Головна




Клірик ОСТРОЗЬКИЙ


Отпис на лист в бозЂ, велебного отца Ипатія

Исторія о Листрикійском, то єсть о разбойническом Ферарском, або Флоренском синоде, вкоротце правдиве списаная

[Отпис] на другій лист велебного отца Ипатія








ОТПИС
НА ЛИСТ В БОЗЂ ВЕЛЕБНОГО ОТЦА ИПАТІЯ, ВОЛОДИМЕРСКОГО И БЕРЕСТЕЙСКОГО ЄПИСКОПА, ДО ЯСНЕОСВЕЦОНОГО КНЯЖАТИ КОСТЯНТИНА ОСТРОЗСКОГО, ВОЄВОДЫ КІЄВСКОГО — О ЗАЛЕЦАНЬЮ и ПРЕХВАЛЯНЬЮ ВОСТОЧНОИ ЦЕРКВИ З ЗАХОДНЫМ КОСТЕЛОМ УНЂИ, АБО ЗГОДЫ, В РОКУ 1598 ПИСАНЫЙ, ЧЕРЕЗ ОДНОГО НАЙМЕНШОГО КЛИРИКА ЦЕРКВИ ОСТРОЗСКОИ В ТОМ ЖЕ РОКУ ОТПИСАНЫЙ


Апостол [Павло]:

«Я пришол до вас, братіє, не во вынеслости оздобных слов або мудрости, оповЂдаючи вам свЂдєцство божеє, абы вЂра ваша не в мудрости людской, але в моцы божієй была».


Григорій Богослов 1:

«Мудрость правдивая то єсть: пробачати мудрость, которая в словах и в стосованью мовы належит. Не той бо мнЂ, который в словах мудр мудрым єсть; ани тот, который маєт язык вымовный, а душу ненаучену, яко гроби зверху оздоблене украшены, а внутр смраду полны».


Афанасій Александрійскій:

«Кождый человЂк, который принял розум и розсудок от бога, єсли послЂдуєт пастыру неискусному, кламливую славу, яко правдивую, пріймуючому, мучон будет».




ДО ЧИТЕЛНИКА


Велико єсть — будованьє на чюжом закладати фудаментЂ — небеспеченство. Не менша — не своим рядити домом — трудность. Тым болшая — важитися вЂдати и потрафити в чий умысл — смЂлость. Але гдє хуть ку богу ткнется, там дочасныє страхи не звитяжают; гдє кролевства оного надЂя засмакуєт, там всЂх небезпечностей занедбаньє; гдє утЂха пришлои заплаты обмовы и насмЂвиска переважаєт, там всЂх трудностєй латвость.

Тоє ся власне в том отписованью листу, читателю христіянській, зо мною дЂєт. Бо кгды нерыхло в праве на остатку всЂх и мнЂ ся достал видети лист 2 до яснеосвецоного княжати Острозского, воєводы кієвского, от велебного отца Ипатія, володимерского єпископа, о залецанью и прехвалянью восточной церкви з заходным костелом унЂи, або згоды, писаный, — повинность оная («будте готови к отвЂту або отповЂди кождому, пытаючому вас») до отозванья ся на тот лист мене приводила, трудность а небезпеченство отповЂдати за кого вышшого а шафовати чіим умыслом — не допущала. «Ревность правды дому божого грызла мя», простота а неумЂєтность зась (не взглядом так далаце онои, до которои, аде далеко болше — от которои особы отповЂдатися мЂло — розважаючи) наболше мя гамовала. И на око видЂлом то, же с тых мЂр — хромому за добре здорового на завод, нЂмому за красомовцу на споры и оному жабраку, чюжую кролевскую на своє лице вкладаючому персону — малом не был або и был подобный. Бо што за подобна сЂдинам уступовати, а молодости в лЂтєх и розумЂ вырыватися?! «Запытай бо, мовит, отцев твоих, и оповЂдят ти, старцов твоих, и рекут тобЂ».

Однакже пришедши в память, — же «о молодости, мовит твоєй нихто абы не занедбавал», же «моц божія в недостатку выполняєтся», же «господь слЂпца умудряєт», же без'язычного и гугнивого Моисеа в мо†украшаєт, же у выростку Даніилу духа побужаєт, же «з уст немовяток хвалу свою выполняєт», — не иж бы-м и я то собЂ привлащал, або кгды над силу мою было бы што (чого не вижу) трудного, тому досить (леч кому болшому умЂєтнЂйшему около малых речій працы не зычачи) учинити мЂл. Але, яко пастушок, над гусятками поставленый, видячи хитрого лиса, укладностью до оных прилужаючогося, хотя не может єго поконати, предся доколя хто сильнЂйшій на ратунок не припадєт, и оно отгоняєт, — надто єще и таким умыслом чинячи, яко псалмиста мовит: «Ото, устам моим не бороню: господи, ты розумЂєш: «моє хотЂти, а твоє дЂйствовати», — важилемся на тот лист єго милости спроста отписати, суму однак тую кладучи: же и доброє, кгды не по воли божей бываєт, не добро єст; же не кождая згода богу єсть пріємна; и тая их самая новоутворенаа згода, яко не з волею божею зачата, так не єсть богу пріємна, такіє теж з неи и овоцы родитися почали.

Которую то убогую а велми плохую, аби тернієм от розсЂвача ненависти заглушена не была, мою працу — самому оному правды оборонци и зависти розпрошителю под оборону поручаю.

Читателя — о ласкавоє в духу кротости, єсли ся кому До рук достанет, прочитаньє, а правды узнаньє — прощу. Єсли бы-м ся в чом, яко писма неумЂетный, поткнул, сам недостаток мой исполняй, або мене голого словы и розумом неузброєного («вы бо силніи повинни єсте немощи немощных носити»), сам заступивши, отповЂдай. Зношеньєм бо один Другому тяжаров выполняємо закон Христов, которому слава и честь на вЂкы. Аминь.


Писан у Острогу, у школЂ кгрецкой Острозской.


В бозЂ велебному, єго милости господину отцу Ипатію, володимерскому и берестейскому єпископу — в теперешнєм вЂку добр своих в животЂ своєм фортунне воспріймати, а у оном прійдучом, кому ведле годности дано будєт — писар того листу зычыт.



Лука, глава 16:

«Помяни, яко воспріял єси добра твои в животЂ твоєм».


Сирах, глава 22:

«Ткнувшися у око, выточит слєзу, и ткнувшися в сердце, выточит чювство».



ПРЕДМОВА ЛИСТУ ДО ОТЦА ЄПИСКОПА


«Справедливый господь во всЂх дорогах своих», «и преподобен во всЂх учинках своих». Который освЂчаєт всякаго человЂка свЂтлостью розуму и «справуєт все во всЂх, подаючи духа на пожиток», яко сам вЂдаєт: «овому духом слово мудрости, овому слово розуму через того ж духа; другому вЂру тым же духом, иному розсудок, другому вымову. То все справуєт один и той же дух, роздЂляючи дары, яко хочет», и роздаючи таланты, ведле личбы нашея вЂры и годности.

Якоє хто каждый з нас начиньє своє себе самого отдаєт богу, в тоє вкладаєт таланты ласки своєи бог. Єсли малоє начиньє подамо єму, малый талант пріймем. А пріймуючи кождый з нас таланты, повинен єсть вдавати торжником, абысмо отдали єго з лихвою, а не в земли молчанія погребем и з оным злым слугою в темность кромЂшнюю вкинени будем.

А закопаньє таланту — не одно толко само молчаніє и о своєм стараньє, а о другых недбанє спасенью, — але далеко болше то: хотя и справовати што мниманєм умыслу своєго, але не по воли божієй, погребши и закопавши свЂтлость души своєи, ум в темность своєи о собЂ думы, надутости и взгорды.

«СвЂтилник тЂла, мовит, єсть око. Єсли око ясно, все тЂло свЂтло». А яко око в тЂлЂ, тако ум єст в души свЂтлостью. Єсли свЂтел и чист ум, освЂчаєт душу. А єсли ум потемнится, потемняєт и душу и от стежки заповЂдей божіих блудит. Таковый хотя єсли што и чинит, не по воли божієй чинит.

Яко апостол, уругаючися, до таковых мовит: «СвЂтчу о них, иж ревность або горливость божію мают, але не ведле розуму; шукаючи бо свою правду поставити, правдЂ божей погрЂшися». И зась: «Прото не бывайте в собЂ мудри», «но преобразуйтеся обновленієм ума вашего».

Якобы рек: «Не вЂрою однозляйтеся, але учинками добрыми», и «не мудрствуйте над тоє, што ся годит мудрствовати». «Бо хто зрозумЂл ум господній, або хто єму порадцею был?» А мудрованьє вынеслоє — то, што перескакати граници отцевскіє, и жребій отеческій вЂры правдивои легцеважити! «Не преходи бо, мовит, границ, которыє положили отцы твои».

А так о тот талант, о который, отче єпископе, до єго княжацкоє милости в предмо†листу своєго припоминаєш, и тую згоду свою залецаєш, — єсли по воли божей чинити стараєшся, сама правда за часом окажет. Але однак и тым писаньєм моим уважатися будєт, котороє, прошу, не во гнЂвЂ прочитати не полєнуйся.




ЛИСТ


Малый хмары оболочок, кгды под насвЂтлЂйшеє солнце подступит, мало не ввесь свЂт потемняєт. И «мал квас все вмЂшеніє квасит», свЂтчит голос божій. И наменшеє, прилучившися доброму, злоє всю доброть псуєт. Мала искра огню, до налЂпшого будованья впавши, все попалит.

И яко приплЂтается называємоє зЂльє «смилакс» до ципрису, так привязуєтся злость до доброти. Бо гдє насЂньє побожности сЂєтся, там впосродку пшеници куколь свой розсЂваєт непріятель.

НасЂньє доброти всЂяно человЂку — малженство, для потомства; куколь свой непріятель всЂял — вшетеченство. НасЂньє доброти всЂяно человЂку — прагнути славы, але онои вышнеи; куколь свой враг всЂял — тщеславіє, прожную хвалу.

НатурЂ человЂчой дано або всЂяно — и покарму жадати; а куколь свой враг всЂял — объядєніє. Прироженью людскому всЂяно и гнЂв, але на непріятеля душного; куколь свой вкинул непріятель — на ближняго гнЂватися.

На таких стежках побожности звыкл діявол сЂти свои роскидати, абы так незначне в кождую справу добрую трутизну свою снаднЂй вкидати мог. Обычай бо непріятеля оного — сердца и мысли людскіє с пилностью выпатровати, до чого ся склоняют: тым он ошукати и звести, а затым и погубити стараєтся.

Яко нЂкоторый непріятель облежоноє мЂсто войною зо всЂх сторон огледаєт: отколя латвый приступ видит, оттоля и штурмуєт. Або яко пилный господар стережет: на которой землЂ котороє насЂньє лЂпше ся родит, там оноє и розсЂвает. Так — и душный непріятель: вЂдаєт, гдє и яко своє насЂньє злости сЂяти; вЂдаєт, гдє на гордость, гдє на лакомство, гдє на нелюбов, гдє и на любов злую а шкодливую; вЂдаєт, кого фрасунком в розпач, кого збытнею радостью в недбалство, кого страхом в упадок, кого на остаток одным позреньєм в грЂх привести маєт. Кгды видит, до чого найболшей хто старанє и милость сердечную маєт, оттоля он вину або оказію пріймуєт до приступу. Розсужаєт кождого обычай, пробуєт учинки, стережет хути, ревности, и там вынайдуєт способ зведенья и упадку.

А яко то єсть щира, и жаден з людій в подсолнечной от таких шатанскых наиздов волєн быти не может, — свЂтчит на самого всЂх речій творца от діявола покуса. Кгды видЂл єго лакнучого, на тых мЂстах хлЂбом покусу навєл. Адама и Єву кгды видЂл хотячих быти яко богове, обЂтницею бозства зблазнил. Іюду, кгды видЂл лакомого, през єго проданьє погубил. Сампсона, кгды видЂл любоженного, жоною смерти приправил. Озію, короля жидовского, кгды видЂл великую хуть до бога маючого, през кадило олтаря (и доброю речью, але не по воли божієй) в проказу або труд на тЂлЂ к в гнЂв божій управил.

А так і в той теперешнєй, отче єпископе, которую в писанью своєм усилне смакуєш, вашой згодЂ — потреба остерегатися того, аби ото такими подобенствы, под плащиком згоды, не впал хто в сЂть діаволю. «Добро, мовит, древо ку покарму и оздобно ку пойзренью», «але в который день зъисте от него, смертію умрете». Добра єсть згода, и «красно мешкати братьи в сполечности»; але абы в той вашой оцукрованой зверху потра†не было трутизны; але абы єя одно з волею божією тая згода згожала. Бо не в кождой згодЂ кохаєтся бог, яко в своєм писанью, отче єпископе («же лЂпшая єст нагоршая згода, нижли налЂпшая незгода»), припоминаєш. Што єсть писму святому велми противно. Бо єще и в Старом законЂ господь бог о жадную реч так ся не прогнєвал, яко о тоє злученьє або згоду вЂрных з обчими народы. И прото строфуючи таковых, мовит: «Злучилися з сторонами або з народы и навыкли учинков их».

Што оная напєршая на свЂтє, страху и жалю полная, згода за потЂху всєму свЂту принесла? «И видєли, мовит, сынове божій дочки людскіи, иж красны, входили до них, и злучалися з ними, и поймовали собЂ от них жоны». Што ж, пріємно ли то было богу? А то так пріємно. И мовил господь бог: «Не маєт мешкати дух мой в людєх тых, бо єсть тЂло». Але єще то не конєц. Поступи далєй: «И каявся бог, иж человЂка сотворил». А далєй што? «И видЂл бог, иж осквернилася земля перед богом и сплюгавило всякоє тЂло дорогу свою». д якая ж заплата далєй была за тую згоду? «И мовил бог: выгублю человЂка от земли, которого-м сотворил». Отож маєш згоду, которая на ввесь свЂт згиненьє привела, которая до так страшнои а нелитостивои помсты бога порушила.

А о оной згодЂ, в которой вежа вавилонская будована, яко розумЂєш? Аза не была там межи так великим людом згода и любов, иж одностайне всЂ на такій кошт, на такіє труды зезволилися? А была и видЂлася тая воля и згода перед очима их велми добра. «ПойдЂм, мовит, и згодЂмся всЂ, а учиньмо собЂ славу, и збудуймо вежу аж до неба». Власне, теперешняя ваша мЂшаная колотливая згода оному бабелю подобна, же єє своєю думою в небо выставитн усилуєтеся. Там в той згодЂ — помєшаньє языком, а у теперешнєй — помешаньє сумнЂнья и вЂры...

Чому ж, отче владыка, так смЂле и беспечне замыдляєш очи и на ножки выставити а праве всєму свЂту свою несхвалную оцукровати усилуєш згоду? А за ж не явны тоєє вашеє бЂдноє згоды овоцы по всєму тому панству? «От плод, мовит, их познавайте их». «И всякоє, мовит, древо от овоцу своєго познаваєтся». Здойми одно, отче владыка, жестоковыйство фараонскоє або єгипетскоє с карку! Открый Моисейскоє покрывало от твари, отвори к свЂту зЂницу ока, ткнися в сердце и источи чювство, отжени мрачныи дыма от ума хмары. Погляди ж тепер оком и послухай слухом: чого єсте своєю, плачю и рыданію годною, згодою наброили? Не єст тот град, не єст мЂсто, гдє бы єсте плачю и рыданія, стогнанія и вопля и слєз отеческія богопреданныя вЂры людей и душ не наполнили!

От различного воздыханья голосов и болЂзни народов сердечный крик и непостоянный шум всю вселенную исполнил: не толко старых, молодых, отцев и матерей, чад и питателниц боголюбивыя сердца от жалости и стогнаній падаются, але стЂны, каменіє, самыє єлемента движутся.

Может ся тут слушне припомянути: «Глас в РимЂ слышан бысть, плач, рыданіє и вопль мног». Рахиль, Рахиль, восточная церков плачется чад своих и не хочет ся утЂшити, яко не суть! Розсыпана, розсыпана радость сердца єя, погашена пЂснь єя, злуплена корона з головы єя!

Якого єсте преслЂдованья, якого уруганья, якого поличкованья, якого оплеваня, якого замешаня и затрясненя, якого на остаток кровопролійства, мужобойства, забійства, тиранства, мордырства, нахоженья кгвалтов на домы, на школы, на церкви, оболженья шкарадого невЂст, панєнок чистых, Душ невинных, паній зацных и велможных, при самой начистЂшой и страшнои а непостижимой таємници и офЂре, при пріймованю святЂйших таин тЂла и честныя крови Христовы наполнили и наброили!

Якож тут побожного и святобливого душа человЂка умыслу, на тоє смотрячи, не маєт воздыхати, не маєт стогнати, не маєт плакати?! Яко побожноє и чистоє сердце не маєт ся пукати?! Яко земля не вострепещет, небо не ужаснется, солнце не померкнєт, луна не измЂнится, громи не вдарят, силы небесныя не подвигнутся?! Яко вашю тую оплаканую и нещастливую згоду — згодою, а не слушнЂй — Вавилоном або оным темным хаосом и самым пекелным проклятством називати и розумЂти хто не маєт?!

Повадили єсте свЂт, потурбовали люде, высушили в людех зобополную милость, поваснили родичов з дЂтми, поятрили брата з братом, побудили одного против другому, роспорошили братерство, прогнали пріязнь, впровадили заятреньє. Внесли надутость, буту, пыху, легкоє уваженє, легкомысльность, зл'оє одному о другом мниманьє. Повадили єсте пана с подданными, приправили єсте о мниманьє и дивноєрозумєньє монархов з монархами, королев з королми и зацными а великыми духовными.

Нарушили єсте сумнЂня, зламали присягу, звели єсте отца папежа, зостали єсте єму в словЂ. Присягали єсте за нас всЂх, справовали єсте от нас поселство, о котором мы не мыслили, вказовали єсте от нас листы, о которых ся нам не снило. Переступили єсте отеческіє границы, нарушили єсте старожитную вЂру. Стратили єсте прадЂдній жребій, поваріовали єсте отеческій тестамент. Порозкопывали єсте гробы продков, порушили єсте кости отец, взгордили єсте их вЂру, поганьбили єсте их честныє и святыє справы, затоптали єсте их стежки, затмили єсте их пресвЂтлую славу.

Зневажили єсте святых, уничижили єсте преподобных, посоромотили єсте мучеников, которыє за тую вЂру кровь свою розливали. Помазали єсте их короны, погубили єсте от их нам зоставленыє скарбы, погребли єсте таланты их в землю, засмутили єсте их святыє души, наполнили єсте их слєз, накормили єсте их воздыханьми, напоили єсте их горестію, розсыпали єсте память их со шумом!

И хто ж может так много обрати часу, абы всЂ тоєє вашеє пресхвальнои згоды овоцы и пожитки по достатку выличити и выписати мог?!

А предся смЂете згодою называти, смЂєте за речь святобливую удавати, смЂєте єю ся прехваляти, смЂєте до неє инших прилужовати, абы тым свой стыд, свою наготу прикрыти и приоздобити!

ВспомнЂте вжды на день оный остатній, вспомнЂте на нелицомЂрнаго судію, вспомнЂте на страшные муки, на огонь неугасимый, на черв неусыпаємый, на тму кромЂшнюю на скрежет зубный! ВспомнЂте однак на своє сумнЂньє, на свою повинность, на своє поволаньє, на свой стан! ВспомнЂтє навет на оныє слова: «БЂда свЂту от погоршеня! БЂда тому, през кого погоршеньє походит». ВспомнЂте, яко много незличоных душ за собою попровадите, и их погибели виновни будете, и кров их на вас и на душах вашых зостати на вЂчную и неумоленую помсту мусит! А вспоменувши, воспрянЂте, очутЂтеся, узнайтеся, покайтеся, припадьте со слєзами и рыданієм и воздыханьми ко Христу и творцу всЂх благ! Выслухаєт, пріймет и отпустит вам! Дай то, Христе царю!

А што в писанью своєм, отче владыка, смакуючи свою горкости полную згоду, припоминаєш и за один пожиток, и не малый, кладеш: иж трекове, яко в КретЂ, Корцирє, Зацинтє и по инших выспах, веспол з римляны набоженства уживают, с процесіями ходят, и тЂло святого Спиридона по мЂсту носят, и ко гробу святого Арсенія веспол приходят, — яко то єст слабый ку помочи довод, так малый пожиток, а тым єще мнЂйшая в том оказуєтся згода и любов! Княжа єго милость по тых Корцирах и Зацинтєх не бывал, ани дындовал, и молодости лЂт своих по марнотравст†и роспустах на бурку не тратил, — прото теж цвЂту и кглянсу вЂры прародителнои своєи чужими пестротинами не помазал. А єсли хто иншій пестрится зверхними окрасами набоженства, тому не зазрит, паметаючи, же «офЂра богу дух скрушоный», а не єдвабныє поставы. А подобно и отец владыка там не бывал, абы добре и был — на том мало.

Але однак то вЂдаємо и слыхаємо, иж кандійскіє трекове зневолены єсть от влохов або от венетов през мЂч: прото што им роскажут, тоє они чинити, бы и не рады, мусят. «Єму же бо, рече, представляєте себе в работу, раби єсте, єго же послушаєте». И зась: «Им же бо кто порабощен, сему и работен єст».

Бы дал бог отцу владыце побывати в КрымЂ, в ПерекопЂ и у ОчаковЂ, обачил бы там, яко Русь, Москва, грекове, поляцы, влоши, нЂмцы — всЂ неволницы: байрам татарскій одностайне с татарами обходити по неволи мусят. А вжды не идет то за тым, абы мЂла тая згода их хвалена быти. А то не в тот способ мовится, абы ся мЂло мощи або тЂло святого Спиридона и Арсенія, святых отец, уничижати: уховай, боже! И овшем хотя далеко, вЂрою пріємлем, почитаєм, облобызаєм и поклоняємся, яко угодников божих. Толко иж, отче владыка, и нужду або мус за доброволную згоду почитаєш. Єсли такая поневолная згода слушне за згоду розумяна быти маєт, — не может ся знайти переднЂйшая, яко у Ишпаніи и ве Францій, гдє не толко человЂка посполитого, але и самых кролев пуйналами, ножами в брух от писма до згоды приводят...

О собор Флоренскій 3 в писанью своєм припоминаєш: иж єсте ничого нового тепер в той своєй згодЂ не становили, ани завЂрали; толко унЂю оную Флоренскую одновили, которая лежала отлогом полтораста лЂт.

И я то бачю, и всЂм єсть явно, же оная Флоренская унЂя або слушнЂй листрикійскій собор — през теперешнюю вашю згоду одновлен. А што ся тогды на том листрикійском сонмищи дЂяло — же одных душено, других давлено, инших топлено, других голодом морено, везеньєм траплено, инших прекуповано, инших фортелми звожено — тоє тепер вашя згода одновляєт, тоє побужаєт, тоє воскрешаєт, тоє роскревяєт.

Дивуюся тому барзо, отче єпископе: же одной сторонЂ з пилностью уха наставляєш и теплоту сердечную отворяєш, а до другоє и помыслити не хочеш! Залапивши одну исторію, от латинников по зависти против греков списаную а за Григоріа-папы 4 недавно выданую, тую читаєш, той вЂриш, тую выставуєш, тою щитишся, тую за правдивую быти удаєш; а от своих правдиве и щире о том соборЂ давно списанои — читати и вЂрити не хочеш.

А так абысь ваша милость тоєю Флоренскою унЂєю болше очью (бо теж и Берестейскій ваш честный собор 5 на неє много пошол) не закидал, — исторійку вкоротцЂ, але правдиве, о соборЂ Флоренском давно списаную, при концу того писанья ваша милость ку прочитанью маєш: прочитавши, правду узнаєш. О соборЂ Берестейском (который з однои своєи стороны хвалиш, а з другоє на него, иж не мЂли вас на нем выклинати, утискуєш) тут в том писанью ничого не отповЂдаючи, одсылаю до книжок «Апокрисис», през друк о соборЂ Берестейском выданых, в которых досыть достаточне, щире и правдиве о том. соборЂ и о всЂх поступках всеи тоєє справы выписано. Не вЂм, для чого єє ваша милость читати не хочеш: там бы ся ваша милость правды рыхло дощупал...

А затым, юж керуючися с тым ку концу писаньєм, на оныє, килка крот припоминаныє, слова — яко бы княжа єго милость згоды жаловати и утЂкати мЂл — повЂдаю: Хто ж бы мЂл быти так неразсудным, абы оного, от Христа учеником и през их нам зоставленого клейноту, оного покою бЂгати мЂл?! Хто бы онои, от діявола межи Востоком и Заходом поставленои для ненависти стЂны розваленья не рад видєл?! Хто бы вЂчнои єдности и, моцным покою перемирем звязанои, милости не зычил?! Хто бы, по так великой мглЂ хмарных и темных оболоков, ненавистей и гнЂвов, з ясных пожаданои єдности променей засвєченья веселитися не мЂл?! Хто бы оного мира, оного вонного небесного, от найвышшого архієрея Исуса плывучого олЂйку участником быти не хотЂл?! Хто бы оную оздобу, оную окрасу, оную завЂсу, оную шату церковную, на двоє розторгненую, розшарпаную видячи не ужалил?! Хто бы с правдивых сынов, видячи матку свою, церков — мовлю, в так великом смутку и плачу для незгоды дЂтей, не прослєзил?! Хто бы так великого мнозства, абы одными усты и одным сердцем славили и выхваляли пречестноє и великоє бога нашего имя, не рад видєл?! Хто ж того не видит, хто не розумЂєт, иж якоє насЂньє в сердцах вЂрных розсЂвач Христос всЂял, того и овоцу потребуєт?!

«ЗаповЂдь нову даю вам: да любите друг друга». Любов, згоду всЂяя, любов и пожати хочет. Любов бовЂм покрывает мнозство грЂхов, любов пророки ражаєт, любов мучеников умоцняєт; любов єст источник або жродло огня: чим далей вытекаючого, тым болшей прагненьє до бога чинячого; любов посиляєт сердце и душу человЂку, любов увеселяєт смутных, любов тЂшит скорбных, любов подносит упадлых, любов мужными чинит страшливых, любов загрЂваєт озяблых, любов побужаєт ленивых, любов умудряєт неумЂєтных.

Такои княжа єго милость прагне любви, такои не бЂгаєт згоды, такого єдиномыслія жадаєт, такого зъєдноченья зычит, котороє возбужаєт побожность, котороє освЂчаєт вЂру, котороє запаляєт милость, котороє потвержаєт надЂю, котороє направуєт силы, котороє успокоиваєт сумнЂньє. На такой моцной скалЂ вЂчного спасеніа постановити бы хотЂл ногу свою. На таком замку покоя замкнути бы прагнул сумнЂньє своє. На такоє правды от Востоку до Заходу свЂтлость свою розпущеноє солнце радо бы смотрЂло око княжати єго милости. На такых бы обфитых и роскошных паствисках паслося сердце єго. В таком єдномыслія дому опочивала бы мысль єго. Таким возвЂяньєм тихого зефиру охоложали бы ся вЂрніи, веселили бы ся патріарси, радовали праотцы, процвитали праведницы, просиали мученицы. Небо и земля, горы и холмы и всяко дыханіє восхвалило господа. До такои згоды от многых лЂт жадаєт душа княжати єго милости. До такои згоды был и єст он склонный, был хутливым, был поводом, был (вЂдаєм) и початком. О такую згоду промышлял, радил, старал, просил. О такую згоду господа бога вседержителя просит, припадаєт, со слєзами молится:

Владико господи и творче всяческых! От всЂх дубрав зємскых и от всЂх древес избрал єси собЂ виноград один; от всЂх земль всєго свЂта выбрал єси собЂ падол один; от всЂх цвЂтов полных выбрал єси собЂ цвЂт один; от всЂх бєздн морскых наполнил єси собЂ источник один; от всЂх градов и мЂст освЂтил єси собЂ Сіон; от всЂх створеній лєтаючих улюбил єси собЂ голубицу одну; от всЂх сотвореній скота провидЂл єси собЂ агницу одну; от всіх размноженых людій изыскал єси собі люди єдины; от всЂх вЂр и законов дал єси заповЂдь єдину, єже любити друг друга.

И нынЂ, владыко господи, иже обитаєши во вЂкы, которого очи воздвигнуты превышше аєра, которого прєстол єст безцЂнєн и слава неиспытана, которому предстоят вои ангельстій с трепетом, которого слово истино, и мовене силно, и росказаньє моцно, и разсмотреніє страшно: подай мир церкви твоєй, собери сокрушеноє, прійми отриновеноє, взыщи заблуждьшеє, подай єдиномысліє, всели любов, милость, згоду, утверди православієм церков свою, наверни отступников в ограду, собери збєгов в ковчег свой, приведи отбЂгшых в церков, всели єдинодушіє, абысмо одною мыслію, одными усты, одным сердцем выславовали пресвятоє имя твоє, и о тобЂ, цари нашем, веселячися, служили тобЂ єдиному, иже в троици славивому богу, в безконечныя вЂкы. Аминь.








ИСТОРІЯ О ЛИСТРИКІЙСКОМ, ТО ЄСТЬ О РАЗБОЙНИЧЕСКОМ ФЕРАРСКОМ, АБО ФЛОРЕНСКОМ СИНОДЕ, ВКОРОТЦЂ ПРАВДИВЕ СПИСАНАЯ


Кгды высокого неба незычливыє оброты на падол земный кола свои накеровали; кгды нефортунные звЂзды на христіанскоє поколіньє розсыпаными своими променьми ударили; кгды темныє хмары, с Чорного виникаючи моря, заразливыми мглами землю окрыли; кгды псевдопрофета Магомета 1 хвалци сарацини, на свЂт ся появивши, моц свою розширяли; кгды, вслід за ними ядовітыє турци наступивши, страшным шумом світ заглушали; кгды смок яду наполненым умыслом не толко восточныє граници и греческіє сцептра пожирали, але и заходным панствам дужо дотирал; кгды увесь світ плащем смутку, скорби и вздыханіа приодіватися почал; кгды цвіт красы и утЂхи христіянскои жарким огнем усыхал, — тогды Євгеній, папа римскій 2, послал до цесара константинополского 3 послы свои, просячи, радячи и упоминаючи, абы о покою, згодЂ и оборонЂ промышлял, а найболше — абы церковная згода през собор и значный зъєзд, без которои жадная оборона и зобополная милость быти не может, учинена и замкнена была.

Цесар Палеолокг константинополскій писал до всЂх трех патріархов 4, а найболшей з четвертым — царигородским, под боком єго будучим, частую намову о зъєздЂ и синодЂ а єдности церковной мЂвал. Порушил теж княжят сербских, болгарских, княжат сЂверских, руских — през посли и листы; а папа — кролев заходных. И так, за всЂх волею, зложен и назначен был собор в сторонах влоских. О чом много намовы и рады — у яких бы краєх собор назначити — было наслушнЂй.

АбовЂм не здалася всЂм реч быти справедливая — в заходных сторонах (где не бивала и перед тым звыклость), толко там, гдє ведлє Соломона, оная мудрость божія, Христос, збудовала собЂ дом, церковь восточную, и умоцнила столпов седм, вселенских великих синодов, у границах восточных: в Никеи, в Константинополю, в Ефесі и прочая. Там же и тому собору быти, — однак, для небезпечности от драпЂжных турков, не толко в мЂстах подлЂйших, але и в самой столици константинополской трудно было так великій зъєзд отправовати. За великою теды неволею, позволил цесар, папа и иншіє собору быти у Влошех. Але иж не ведле воли божеє: бо не от Заходу выплынул закон и фундамент а твержа всеи вЂры. Прото теж не толко на нем не справили ничого, але Ромулюсовым прикладом кровью єго облили, яко будєт ніжей.

А так, року от нароженья ведлє тЂла Христа спасителя нашего тисяча чтыриста тридцять осмого, за панованья цесара константинополского Іоанна Колуяновича Палеолокга, а за цесара заходных панств Олбрыхта 6 з дому княжат Ракуских, а за короля полского Владислава 7 Якгейловича, а князя великого литовского Жикгимонта 8, — стался, для успокоєнья ростырков и незгоды в церкви Христовой и правдивого оказанья преступников преданій апостолских и догмат богоносных отец, синод духовный у Фераріи.

Которого то собору старЂйшины были: сам цесар Іоанн Палеолог, а от станов духовных Євгеній, папа римскій, Іосиф, патріарх константинополскій. А иж иншіє три патріархове, яко: александрійскій, антіохійскій, ієрусалимскій, зневолены юж з столицами своими были от сарацинов и не могучи для фрасунку, для утисков и бЂд сами особами своими на тот собор єхати, поручили и злєцили мЂстца свои певным особам, то єст: патріарха александрійскій — блаженному Марку, митрополиту ефескому; патріарха антіохійскій — тому ж Марку; патріарха ієрусалимскій — Висаріону, митрополиту никейскому, который потом стался змЂнником. Однак же болшая моц от тых трех патріархов поручена была Маркови Ефескому. И иншіє многіє, яко: кизицкій, трапезонскій, моновасійскій, ираклійскій митрополитове и єпископи на тот собор зъєхалися были.

А о митрополите києвском Исидору 9 — яким способом на столици усЂл — хотя ся троха от предсявзятои речи отступит, приточити потребко.

Року тисяча чтыриста тридцять шестого, по зештью с того свЂта митрополита кієвского Фотіа 10, выбран был так от єпископов и всего причту церковного, яко теж от княжат полночных, обывателев земель Руских и князства Литовского, на столицу митрополій кієвскои человЂк добрый, побожный, тихій, скромный и учоный, єпископ рязакскій, именем Іона, и выправлен был з листы причинними и свЂдительствоваными до патриархи константинополского Іосифа и до цесара кгрецкого Палеолокга, по сакру або по благословеніє.

Которьш то Іона, ним ся з дому с краєв своих выбрал и, про далекость дороги, ним до Константинополя прієхал, — в том теды чась нЂякійсь человЂк, именем Исидор, словак, от краєв заходных, от Рима до Константинополя с причинным от папы римского листом прієхал: с поставы звЂрховнеи — покорный, склонный, облестный, а внутр — превротный, хитрый, неуставичный, — и лагодными словками и покорными прозбами Іосифа патріарху, с причиною цесарскою, абы єго на столицу митрополій Киевскои посвєтил, ублагал. Вказал теж лист от папы римского за собою свЂдоцный и причинный, в тыє слова писаный:

«Євгеній, слуга слуг божих, бискуп римскій. Высокои столици Нового Рима честному Іосифу, патріарсЂ, брату нам о ХристЂ намилшому, покоя и потЂхи. За побожным и чти годным и досвЂтчоным мужем и бискупом, на имя Исидором, покорность наша жадаєт, абысте єго, не омешкиваючи, на архіепископство рускои столици посвятивши, и з моцью зуполною послали. О чим єсмо и до намилшого сына нашего Яна, цесара яснеурожоного, лист наш за тым святоблівым мужем Исидором, который єст от столици нашоє во всЂх годностях досвЂтчон, писали. Господу Исусу вас поручамы. Дан в РимЂ. Року 1437».

Іосиф патріарха, скритости и сердца людского не вЂдаючи (бо то одно испытующому сердца и утробы самому богу вЂдомо, а от человЂк утаєно), за причиною папы римского и цесарскою, а на болшей — абы церков Христова и так великій народ рускій без пастыра и строителя старшого през час долгій не пустовала, а хвала божіа не уставала, — посвятил того Исидора на митрополію києвскую. И посвятивши, з листами своими на столицу єго отпустил.

Затым, скоро Исидор до Руси отъехал, — по малом часЂ, оный помененый Іона єпископ, з листами причинними и свЂдечными от духовенства, от княжат и панов земель Руских, до Константинополя, просячи патріархи, абы його на митрополію Києвскую посвятил, прієхал. Обачивши то патріарха, задивившися не по малу, велми был жалостен, иж ся дал увести Исидоровым словам. И собравши увесь причет свой церковный, радился: яко бы в том поступіти міл. И нарадившися радою духовною, призвавши до себе Іону єпископа, мовил єму тыє слова: «Сыну намилшій, Іона! Благословенство у мене на тую митрополію хитростію и лестію Исавовою залаплено. Але там было презреньє божіє, а тут мнимам лукавство вражіє. Бо, мало проминувших днєв, посвятилем на тую митрополію нЂкоторого Исидора и отпустил єго на престол. Однак же, кгды уподобаєтся богу поволати оного Исидора от житія сего, або єсли ся єму який трафунок станет, теды ты, от всЂх згодне выбраный, святителю Іона, маєш от покорности нашеє власть, и даєм ти благословеніє — воспріати престол рускіа митрополій». И так, и призыванієм святого духа посвятивши, отпустил єго.

А оный першій Исидор, кгды на столицу рускои митрополій прієхал, хотя з великим от всЂх подивенєм и не велми щирым сердцем, предся ж от духовных и свЂцких станов с честью годною принят был. И так столицу осЂл.

Бывши теды на столици митрополєй чтыри мЂсяцы, умыслил поЂхати до краєв Влоских на собор Флоренскій. Бо юж добре час и рок певный, на которьш тот собор был взложен, вЂдал, даючи по собЂ тот знак и тую славу, иж єдєт застановлятися за православіє восточнои церкви.

Обыватели и княжата земль Руских и єпископи нЂкоторые, довЂдавшися о предсявзятью єго (одны — сами до него зъєхавшися, другіє — през письма), упоминали и просили, абы на тот собор не єздил. А єсли бы иначей быти не могло, тогды абы, на том соборЂ будучи, от преданій апостолских и канонов богоносных отец ни в чом не отступовал и никому зводити ся не давал.

Он, упору и предсявзятя своєго переломити не хотячи, никого в том не услухал; однак же за православіє истинныя вЂры, ни в чом границ положеных (але на сердцу лукавство мЂл) не перескакуючи, застановятися шлюбовал. А в том набравши з собою не мало особ духовных, поєхал на собор Ферарскій.

А в дорозЂ єще єдучи, объявил сердца своєго лукавство. Трафилося бо єму, тягнучи в дорозЂ, приєжджати до одного міста на границах нємєцких, в котором не мало было христіан послушенством восточного греков. Тыє, услыхавши о приходЂ митрополита руского, забравшися с кресты по обычаю, споткали митрополита перед мЂстом. Видячи то, нЂмцы послушенства папезского, зобравшися с процесією и духовенством своим, и з великим вытесаным болваном вмЂсто креста господня, ведле своєго обычаю, вышли и споткали тут же вслЂд за греками одого Исидора. Исидор першій знак лукавства своєго оказал: бо кгды поткали єго вперед христіане с хрестом господним, а за ними в тропы папежницы, — он не поклонившися кресту Христову, занедбавши и проминувши, притек ко оному образу высокому и великому, и, падши, поклонився єму. Бачачи то, єпископ мЂста Суждалского греческого послушенства, именем Аврамій, велми ся дивуючи и жалостен будучи, мовил тихо до своих: «Видимо волка в постатЂ пастыря, овчым одЂньєм прикрытого». И жаловали, иж єго спотыкали. А папежници, велми ся с того тЂшачи, провадили с процесіами до мЂста. И там от их вдячне принят был. И спочинувши у них, потягнул в дорогу свою.

И дошол мЂста Фераріи на собор, где юж были зобралися вышей писаные особы, то єсть: цесар кгрецкій Палеолокг, папа римскій Євгеній, Іосиф патріарха константинополскій, Марко Ефескій и иных многость великая кардиналов и бискупов заходных, яко и восточных. И ожидали Исидора митрополита, за намовою Євгенія-папы: ач засЂданя и намовы чинили, але ничого не завирали шесть мЂсяцей.

А так, кгды ся были юж всЂ на тот собор згромадили, выбрали промежи себе заходници философа и рытора, так в латинском, яко и в греческом языках велми учоного и великого красомовцу, именем Яна Парижанина; а восточници з своєє стороны выбрали Марка Ефеского, мужа не толко в богословіи, в науках философских бЂглого, але и побожностью живота и справ святобливых досконалого и досвЂтчоного, к тому и станом митрополита.

И так веспол сходилися и засЂдали у великих церквах, духовне бесЂдуючи, тихо, в згодЂ и милости, в духу божом, в духу покою Христового гадаючи, прагнучи блуды и отщепенства и заквашеня от немалых часов в церков, одны про недбалство, другіє про упор и пыху внесеные, вычистити и выкоренити, и до зъєдноченья и у одно тЂло христіанства споєнья привести и замкнути.

А так засЂдавши на намо†Ферари мЂстє шестнадцать кроть, а у Флоренціи (бо з Ферари для повЂтря выєхали) девять кроть, чотырнадцять мЂсяцей, многіє артикулы до спору, а наболшей восточници заходником задаючи, соборовали. Межи которьши тыє артикули от восточников заходным костелам были задаваны.

Першій: о похоженью духа святого, иж прикладают «и от сына».

Другій: о прЂснем хлЂбЂ, которого римяне в сакраментЂ уживают.

Третій: о чистцу, за чим ся значит конец муцЂ.

Четвертый: хто причину дал до розорваня церкви?

Пятый: о суботнєм постЂ.

Шестый: о малженствЂ, иж ся каплани римскіє малженством брыдят.

Надто особых артикулов, менше важнЂйших, задали з двадцять, которых ся тут не споминаєт.

О тыє артикулы, а найболше о самый тот першій, наиболшіє споры и доводы з обЂюх сторон през увесь собор бывали...

На остаток таким вызваньєм синод замкнути мЂли: «Один бог, который перед всЂми и над всЂми и во всЂх, в отци и сынЂ и святЂм дусЂ нами вЂруєтся и выславуєтся. Отец не толко без лЂт, але и без початку, один — вина, и корень, и жродло в сынЂ и святЂм дусЂ бытного божества, одна вина, один одному сыну отец и одному духу святому початок, тым толко болшій або отмЂнный от сына и духа, иж єст поводом, але однои чти, одного божества. Которого сын, маючи початок, корень и жродло отца, от него пред всЂми вЂки, безлЂтно, безтЂлєсно, несказително, безстрастно пороженьєм происшол. И дух святый, который корень и жродло и вину маючи отца, от него пред вЂки безлЂтно, не пороженьєм, але похоженьєм происшол, досконалый бог однои истности с отцем и сыном, в троици славимый и покланяємый».

А так юж, одностайными сердцы и усты, и умыслы на то зезволившися, покой, згоду, милость зо всЂх радостью обволали, и по милом а вдячном один з другим целованью, постановили: на завтреє, на мЂстце назначоноє до церкви сшедшися, руки подписати и утвердити.

Але яко страшный и ку спомненью невымовне жалосный тои справы и того святобливого дЂла стался конєц! Яко от бурливого моря знагла закурилася буря! Яко сполнилися слова у «Апокалипсіи», той спра†прировнаны быти могучіє, и от ангела великим голосом воланыє: «БЂда, бЂда мешкаючим на земли и на мори, иж — розвязан єсть сатана от темници своєи на зведеньє и ошуканьє народов»!

АбовЂм ото непріатель и завистник рожаю людского всЂял в сердце ревность злую мЂста великого Родиса 12 опату або майстру богатому, — который з двЂма тисячми, до войны прибраными, людей (слышачи, же ся до згоды єще перед тым мЂли, а перед восточниками заходники в доводєх уставали и своих аркгументов уступовали) притягнул на тот собор, на тихих, спокойных и праве тои ночи до мЂста невЂдоме уєхал. И зараз ночью пошедши до папы Євгеніуша, наполненый гнЂвом и ядом палаючи, мовил єму: «Для чого услухал и дался єси звести тым варваром, тым сирійчиком, тому здавна упорному и гордому кгрецкому народу, и кгволи оным артикули, поважне и от всЂх згодне от немалого часу уживаныє и держаныє, с костела божого вынищити и выгладити хочеш?»

Євгеній-папа рек єму: «През так немалый час усилне стараючися и працуючи, боронилихмы ся и спирали, што одно писма ставало, и всяких доводов. Але их не жадными раціами, ани силоизмами, ани красомовством, толко самыми письма святого и великих филяров церковных оных древних феолокгов свЂдоцтвы переконань! будучи, и само на остаток сумнене иначей не допущало нам, надто зычачи в церкви божой и межи народом христіянским покою и згоды мусЂли єсмо им уступити».

Опат оный, тым єще болшей гнЂву наполнившися, рек: «То юж Євгеній-папа перших отцов своих пап римских, мужей в науках и святобливости живота досконалых, положити и славу их в прох обернути хочет. Зачим и нас до того приводит, же продков и отцов своих, которых слава, побожность и поступки по всєму свЂту слынула и свєтилася, за блудных у вЂрє и непобожных и за власных геретиков розумЂти и проклинати мусим. Чого єсли бысмо (боже, не дай) жебы з нас сирійская кровь и надутыє грекове напотом насмЂватися и за легкомыслных розумЂти, а тот блуд у вызнанью вЂры на очи нам и потомком нашим праве аж не вЂки выкидати мЂли, дочекали, — раднЂй призволили бысмо тепер зараз кровью и горлы своими приплатити, анижли на народ наш и костел римскій, над увесь свЂт, навышшій и славнЂйшій, ганьбу наводити! Вспомни, Євгеній, святый отче! Яко продкове твои, намЂстники апостолскіе, бискупове, чти и памяти годныє, римскіє, скоро с тым превротным ящорчим народом сирским обцованьє и сполечность росторгнули, забобоны их с костела божого выпровадили! Яко немаль увесь свЂт собЂ и костелови римскому зголдовали! Яко дом божій всєму свЂту наставили! Яко панства, монархіє, богатства, можности костелови подбили! А скоро тепер з ними до згоды и сполечности приступиш, и их до себе припустиш, и сам у легком уваженью будеш, и ввесь цвЂт, всю оздобу, всю славу народу нашого погасиш и посушиш, и панства, могутства которых набили продкове наши, так яко и тыє шаленыє грекове, с которыми видимо што ся уж дЂєт, погубиш!»

А в тым немало кардиналов и бискупов италійских ночью (по которых был оный опат розослал, вЂдаючи, которыє были не зычливи греком, и той унЂи не ради, а юж з ним змову мЂли) до Євгенія-папы з господ зышлися и опатови до росторгненья помагали.

Который опат мовил знову до папы: «И продкове от немалого часу наши, и мы сами не могли єсмо слушнЂйшеи, в которой быхмо ся над греками сзоих оных от них насмЂвиск и уруганья и легкого уваженя помститися, оказії; мЂти. АбовЂм оныє першіє по болшой части, або немаль всЂ в их сторонах восточных синоди бывали, на которых што ся им уподобало, тоє становили, и писали, и завЂрали, а наши отцеве складати им мусЂли. Гдє явне многіє каноны, против звычаєв костела римского, яко на шестом синодЂ (о поймованю жон капланом и діяконом и о суботнєм постЂ каноны) през моц унесли. И на том же синодЂ Константинополском, на взгорду костелови римскому и на легкоє уваженє, намЂстника Петра святого, бискупа римского, самую голову костела, уводячи то собЂ на потомныє часы, Онорія 13 маловинного столици римскои отсудили, и завсегды народови нашому незычливыми ся оказовали. Тепер и синод в моци, и их самых в руках маючи, и єще им датися над собою перевести! А так, єсли бысь того собору розорвати не хотЂл, а то я, для слави продков наших и для народу нашого, горлом своим печатати готов, и всЂх, которыє на то позволяют, тои ночи и тои годины скрутною смертю погублю и мечу предам; а цесара, который в барзо малой личбЂ людей зостал, а инших юж в дорогу перед собою выправил, в мгновенію ока тобЂ, єсли з ними переставати не хочеш, в рукы, яко птаху предам!»

Кардинали и бискупи, которыє ся были ночю до папы збЂгли, а одного духу с тым опатом будучи, моцно ся при нем опоновали. Однак же крикнули, абы ся на цесара не торгал и такои неславы не чинил. И повЂдили нЂкоторыє з них: «Иж цесар Палеолокг, за першим словом, о што будем єму мовити и чого по нем потребовати, а звлаща за якими обЂтницами и подарками, кгдыж єсть велми потребный и юж знищоный так, же єму немаль половина панства през сарацинов побрано, и мало не на кождый день новины непотЂшныє єму з Греціи приходят, — прото на все барзо рад позволит, якож ся сам до того завсегды примовяєт, и, яко видимо, мало мыслит о синодЂ, але болше, якоби мог безпечне проєхати пред турками на столицу до Константинополя.

О патріарха — там мало философіи в головЂ: латве єго на кождую сторону накеруєт; а и тот тым рыхлЂй дасться повабити, кгды чим посвЂтят, бо теж не закинет за себе, яко то єсть прироженьє кгрецкоє, за злото вылупил бы собЂ очи. О того вихроватого лба а в думЂ своєй вынеслого Марка Ефеского — идет найболшей! Бо ани єго лагодными словы, ани прозбою, ани дарами от єго упору шаленого отвести трудно; толко потаємне, без крику полапивши, до везенья с ним».

И на том престали всЂ.

Євгеній-папа овчим одЂньєм звирховнєи поставы прикрывал и таил внутрнєго волка, а в речи с плачем отмовял, на то не позволяючи. Але иж юж добре ся был заюшил и оплюскал в крови христіянской, бо ся збытнє у вальках кохал, и покою не раз межи королми видЂл. Тот то папеж Владислава польского и венгерского кроля през кардинала от присяги против турком розгрЂшил, и забит у Варны 14. Тот папєж так ся тиранскы обходил з римляны, стинал, топил, душил штопереднЂйшіє особы, аж потом, не могучи болшей суровству єго вытрывати, торгнулися на єго римляне, мусял в капици мнишой з Рима утечи. А внука єго Францишка, старосту от єго преложоного, римляне поймали, каструм Анели 15 добыли, скарбы, которых был налупил, побрали, Капитоліум моцно осадили, а папежа иншого, в Базиліи синод зложивши, обирали. Он, зобравшися з веліким людом, с помочью короля франційского 16, взявши делфина сына Карла франційского, тягнул на тот зъєзд Базилійскій, с которого слышачи всЂ поутЂкали, а он с тыми ж людми до Риму на папезство кгвалтом наєхал и єще горшим тираном был. Жикгмунта цесара не хотЂл короновати, аж мусял єго в колЂно целовати. И от того часу почали цесари папєжом ногы лизати.

А так Євгеній-папа, снадне дався намовити, позволил оному окрутникови, опату Родискому, и тьщ кардиналом и бискупом тот синод и тую згоду и постановеньє розорвати, а ведле их и своєи мысли инакшеє написати и учинити. И обослалы всЂх своих заходних кардиналов и бискупов ночью, абы вставши, ведле уреченого часу и постановенья для подписов рук и стверженья а замкненья унЂи, до церкви ся не сходили, але абы до папы зобралися.

Восточніи отци в утрешній день, з великою охотою на час и мЂстце назначоноє, до церкви, на умоцненьє унЂи, не вЂдаючи о их ночной радЂ и умыслЂ, зышлися, и през немалый час, аж ку вечеру ожидаючи, кгды заходных отцев ведле постановенья дождатися не могли, довЂдалися по части о их отмЂнє и злом умыслЂ потаємном. И не вЂрячи до конца, послали до оного их ритора Яна 17, от которого кгды певную о достатечную вЂдомость взяли, и юж трухнуло то по всєм мЂстЂ.

ДовЂдалися о люду служебном збройном, иж єсть поготову, бЂгли в скок до цесара Палеолокга, даючи знати, просячи о ратунок и о раду. А кгды до цесара пришли, застали у него кардинала Уліана, з двома бискупами от папы посланого, єднаючи и благаючи цесара великими подарки и обЂтницами.

Видячи то отци, отколя обороны и рады сподЂвалися, оттоля их надЂя омылила, смутком, жалостью и фрасунком, со слєзами и стогнаньєм, и великим страхом и дрыжаньєм обняты будучи, ани отколя жадного ратунку мЂти не сподЂваючися, почали розно утєкати. Патріарха константинополского Іосифа подарками от папы благано.

Марко Ефескій, на котором много залежало, иж трех патріархов особу носил, видячи, же о єго наболшей идет, — наперед всЂх, за престреженьєм от нЂкоторых самых заходных людей побожных и за помочью и радою их, так теж и своих (яко оный великій Афанасій с Тиру от несправедливых судій, так и он с того собору до Ефесу мЂста) втєк. И многіє иншіє єпископи и архієпископи восточніи, яко Григорій Иверскій, Софроній Газскій, утЂкали.

Видячи то, заходніи отци и папа Євгеній казали восточных отец имати. А написавши згоду або унЂю, ведлє мысли и воли своєє, якобы восточніи отци похожденіє святого духа «и от сына», опрЂснокы, чистєц, бискупа римского намЂсником Христовым и потомком Петровым и головою костела признали, — до подпису имаючи примушали розмаитым везеньєм, темницами, путами, ранами, голодом. Шестьдесят єпископов а полтораста презвитеров, синкгелов, протосинкгелов и діяконов в темницах замкнувши, розмаитыє мукы задавали: одных голодом пятнадцать день морили, инших огнем пекли, других душили, давили.

В котором везенью тыє мученичскіє короны приняли и помучени: митрополит амасійскій, митрополит силиврійскій, митрополит халкидонскій, никомидійскій, филипписійскій, діометринскій, трапезонскій, єврипскій и инших немало, которых тЂла потаємне ночью ховано; а руки их до тои своєи унЂи по смерти их подписовано. Инших презвитеров и мнихов восточных болше ста душ помучено.

А иншіє так єпископи, яко митрополити, не могучи таких мук вытерпЂти, подписовалися до тои змышленои унЂи. Зачим, кгды выпущены были и до своих столиц вернулися, покладали рукы свои перед патріархами, перед клиросом и причтом церковным, с плачем вызнаваючи явне грЂх свой, просили, абы им утинано руки, которыми тую унЂю поневолив подписовали.

Исидор, рускій митрополит, доброволне подписался. А два єпископи рускых и сто презвитеров, которыє при нем были, не призволяли на тую унЂю, ани ся подписовати хотЂли. И утекло их осмьдесят. За которыми гонено, и немало их побито. А иншіє в земли нємецкой, у однои побожнои невЂсты, у винници скрывшися, здорово потом до домов своих ушли.

Патріарха Іосиф, окрутноє такоє тиранство над своими видячи, жаловал того не по малу, и грызло єго сумнєнє, аж от страху и от жалю памяти отходил. Але юж было трудно назад; для чого, кгды им далєй, тым в болшую розпач приходил и явне пред всЂми почался был каяти узнавати, а от тои унЂи отступовал и рукы до неи не подписовал. Обачивши то, заходници а хотячи то утаити, справивши от нєго тестамент, о котором он и не мыслил, направили трех своих мнихов, которыє, рекомо в поселст†от папы до него в ночи пришедши и замкнувшися на розмову, там же вдушили патріарха до смерти. А отходячи от него, тестамент оный в руки єму вложили, которым якобы тую унЂю и всЂ на нєй уфаленыє артикулы принял, потвердил и остатнею волею своєю, отходячи з того свЂта, запечатовал. Которым тестаментом пописуются назбыть, а патріарху поведают и пишут: «Нагле умер».

И тут правду явне познати! Єсли бы нагле умер, якож бы тестамент писати мог? Або єсли бы юж конечнои на себе сподЂвался смерти, а за не слушнЂй бы послал до папы, або навет до своих, ознаймуючи, же жив быти не может? МнЂй было до готового листу, до той унЂи толко руку подписати, нижли целый тестамент, а єще при наглым а несподЂваным сконанью писати!

Не мнЂй теж и цесар Палеолокг, ач был ударован великими подарками и зневолен єще болшими обЂтницами, трвожився на мысли и не мог волного и безпечного сумнЂнья мЂти. А до того на кождый день непотЂшныє новины приходили єму о кгвалтовных вторжках в панства кгрецкіє турков. Бо юж турци немало всю Трацію 18 были посЂли и через Гелеспонт волный переход мЂли, Каллиополим в ХерсонЂ, также и Андринополє опановали. СпЂшився цесар до Константинополя, але єму было не споро! И юж за свой выступок против богу не оглядал Константинополя, столици своєи. АбовЂм кгды был в Силивріи, пришла новина о зниценью през турки знаменитых мЂст, Тесалоники 20, Етоліи 21, Епиру и инших, же до кгрунту збурены, которыє были и перед тым утиснены, але не так до конца. Познал свой выступок, которым бога образил, продавши за злото сумнЂньє своє. Там же впадши в розпач, нагле здох.

А потом рыхло по єго мизерной смерти, то єст року 1452, Махомет Вторый 23 Константинополь облег. Слали кгрекове с цесарем своим до папы Миколая 24 и до панов заходных о ратукок. Не толко им не дали, але были тому барзо ради. Шестьдесятого теды дня от обложеня Царгород взят: речи божскіє и людскіє турци покгвалтили, церкви полупили, святостій не учтили, речи против богу брыдкіє чинили, в крови христіянской бродили, голову и клейнот всєго христіянства зневолили, стерли, ворота до всеи Європы отворили.

Скоро по оном синодЂ а по зглаженью с того свЂта Іосифа патріархи послал папа Євгеній до Константинополя, перед взятьєм єще єго от турков, выбравши нЂякогось римлянина Григорія, хотячи то собЂ у звычай увести на патріаршество царгородскоє, и упережаючи, абы кгды ся кгрекове о смерти Іосифа довЂдают, иншого патріархи, ведле стародавного звычаю, собЂ не поставили. Которьш Григорій, милосник славы римскои и вызванья их наслЂдовца, кгды до Константинополя приєхал, з великою смЂлостыо и гордостью вшедши в церков, на мЂстцу патріаршом ставши, оповЂдался быти патріархом.

Митрополити и єпископи и протосинкгели царгородскіє, видячи покусу нагле несподіваную, без уса и без бороды, по чом посполите мужчизну от нєвЂсты розознати, боячися, абы то не оный Ян Осмый римскій 25 з мертвых встал, жаднои почестки єму не чинили, ани повинности, патріархом звыклои, не отдавали.

А в том один, побожного сердца и умыслу, философского и богословского розуму полный, з значного княжат кгрецких роду, именем Никентій, пришедши до него, мовил: «ВЂдаєш, честный мужу, правдивый декрет Христа спасителя нашего: «Хто не входит дверми у двор овчарни, а пролазит инуды, тать єсть и разбойник»? Прото чомусь ся важил дирею, а не дверми, по стопнях порядку церковного на так высокои столицы стан лЂзти?» А взявши на нем сакос святителскій, почал з него здыймовати. Люд посполитый торгнулся был, шарпаючи на нем всЂ святителскіє убЂры. Але пререченый Никентій, с причтом церковным и з митрополиты и єпископи, прозбами их ледве ублагали, и вдушити єго не давши, отпровадили єго до корабля и отпустили до Рима.

Исидор, митрополит рускій, позволивши и подписавшися на Флоренскую унЂю, отъєхал до краєв своих. И кгды до Смоленска приєхал, пойман был и до везенья всажои. Але през посулы (бо был великіе скарбы от папежа, продавши вЂру, вывез) з везенья ушол и утек знову до Рима. Там вдячне от папы принят, и кардиналом учинен, и до Константинополя на патріаршество упором и гордостью римскою выправлен был. Але там и тот не много попасовал: и не принято, ани слухано єго. И кгды упором власть римскую ростягал, тогды, при бытности єго, турци Царгород взяли, а он незначне до Руси втєк. И до Києва прибЂгши, видячи явную от бога помсту, жаловал учинку своєго, а праве от бога и от людей, а иле своих овечок власных — опущон будучи, почал роспачати.

Архидіякон римскои столици хвалца, именем Венедикт, которьш при нєм, и у великом коханью у Исидора казнодЂєю и справцею будучи, постерегти тоє, задал єму в потра†трутизну. Иншіє пишут — от руси, то єсть от киян, смертью поконан, и так ведле заслуг згинул 26.

Ворочаючися знову до оного Флоренского (кгды видєл папа и кардинали побожныє, иж на нєм не тылко ничого ся доброго не справило, але єще тым горшая ненависть у христіанст†закурила) синоду, — мыслили: што бы далей чинити мЂли?

А так, за намовою оного ж звЂровидного родоского опата и тых, которыє єму помагали, а за розказанєм, волею и накладом папеским, вЂдаючи, иж в ГорЂ Афонстєй 21 было сто и тридцать монастырєй великих, мурми оточоных, и великоє мнозство инок, або мнихов греческих, которыє на тую унЂю и словка мовити не дали, ани позволяли, а иж на побожноє, праве ангельскоє постническоє житіє их Восток и Заход оглядался, — выправили воєнного люду с частью крыжаков, з арматою двадцать шесть тисяч, которыє, рекомо на оборону краєв Сербских и Булгарских тягнучи, вторгнули до Горы Афонскои.

Пришедши оный от римского папы люд, выправленый до Святои Горы, напервЂй до монастыря лавры святого Афанасія. Иноцы, вадячи суровство их и наглоє приштьє, злякшися, приняли их вдячне. Они зараз унЂю и поминаньє у молитвах папы римского приняти казали. Што за неволею учинити, але не от правдивого сердца, мусЂли, и так цЂло заховани были.

Потом в Амалфинов монастыр пришли. И тыє приняли их также.

Потом в Иверскую лавру пришли. Там их иноцы приняти, ани з ними згожатися не хотЂли. Они монастыр збурили, мнихов, або чернцов, хватаючи, в море потопили, а штонапереднЂйших в рожаю и в науцЂ до Рима у оковах отсылали.

Потом до прототіи, або старшого монастыря, пришли. Вышол сам прот со всЂми ангелского подобенства старцы, сЂдинами квитнучими, просячи и упоминаючи их от письма лагодными с плачем словы, абы такого тиранства и окрутенства над мЂстцами и над невинною кровію не заживали, грозячи им страшною от бога помстою за то. Образилися тым барзо, а поймавши прота, обЂсили, иноков всЂх мечу поддали, монастыр с пиргом и зо всЂм запалили и вывернули.

Потом рушилися до великого монастыря Ватопеда. Послышавши, мниси от страху повтЂкали, розбЂглися по яскиням, по горам. Они, пришедши, самого игумена з нЂкоторою братьєю поймали, и по великих спорах и от письма розмовах, а найболшей страхах, видячи, иж не позволяєт ведле их воли, обЂсили и того перед монастырем, перед самою брамою, а чернцов постинали и розмаитыми муками помучали.

Потом пришли до монастыря Зокграфского. Иноцы, вияячи страх, збЂглися до пиргу, або до башты монастырскои, не хотЂли до них выйти, ани на унЂю позволити. Они, мнозство наносивши дров и хворосту, оную башту запалили, и так з чернцами и зо всЂм до кгрунту згорЂла, мЂсяца октовріа десятого дня.

А кгды так по всєй Святои ГорЂ по монастырем, по винницам, по яскиням, по горам чернцоз находячи, бьючи, мордуючи коло пяти тисячей и болшей душ невинных иноческих выгубили, и мЂстца святыє пусты вчинили, — пришли потом до великого и славного монастыра, Ксеропотам реченого. Мниси, або иноци, слышачи, што ся з иншими монастырами стало, болестью сердечною и страхом зняты будучи, вышли против им со кресты, приняли их и на унЂю позволили и згодилися з ними.

По той згодЂ отправовали литургію. Діакон в октеніи, кгды припомнял имя папы римского, явный чуд бог з высокости оказал: стался шум и стрясеньє землЂ страшноє, и знагла упали всЂ стЂны церковныє, и муры монастырскіє, яко стЂны єрихонскіє, и погинули всЂ веспол, так иноци, яко и римляне, которыє ся там змЂстити могли, великоє мнозство душ. и сталася офЂра мертвая, богу мерзкая! И на болшій єще знак осталася одна стЂна, часть башты мурованои, над звычай нигде николи небывалый, ку землЂ низко схилившися, а не упавши, на память вЂчную и до того часу.

Видячи то, римяне и крыжаци, перестрашившися великим страхом, мало што цЂлых монастырев оставивши, оттягнули от Горы Афонскои. А иншіє з римлян и с крыжаков чернцами у Святои ГорЂ зостали.

Позосталыи по яскинях, горах, вертепах крыючієся иноци збиралися по отходЂ их. А видячи обители свои, мЂстца святыи попалены, понищены, з кгрунту повыворочаны, братію побитую, помученую, кров порозливаную, иных в полон поведеных, — в болЂзни сердца, со слєзами и криком великим, оплаковали и рыдали, спЂваючи оный псалом:

«Боже! Пришли погане в дЂдицство твоє, осквернили церков святую твою! Поклали трупы слуг твоих в покарм птахом небесным. Пролили кровь их, яко воду, около всего Афона, и не маш хто бы их погрЂбал! Гдє ж нынЂ Афон — гора святая, пустынники и скитники цвЂтущая? Гдє окраса и оздоба монастырєй и церквєй твоих? Яко єси опустЂло и осиротЂло! Яко над тобою, вмЂсто свЂтлости, аєр наполнився дымов, скваров! Яко стЂны твои прикрыл порох погорЂлиск! Яко стєжки твои поплюсканы кровію! Яко сынове и мешканцы и пєлкгримове твои в тобє полегли! Яко старцы твои, головы сивизн своих попелом посыпаныє, над трупами духовных сынов своих смутне седячи, птаство отгоняют! Яко позосталыє сынове духовных отцев ревно плачут! Котороє нелитостивоє сердце без жалю, котороє окрутноє око без розлянья обфитых слєз опустити тебе может?! Хто с твоих мешканцов, видячи тоє, не призаолит раднЂй смерть, ниж живот?! Почто, господи боже, не учинил єси нас годными, веспол з отцы и братією нашею, пріати от тебе мученическіє короны?! Почто нас смутных в посмЂх врагом нашим оставил?! ДоколЂ, господи, гнЂваешися до конца? Пролій гнЂв твой на языкы, не знаючіє тебе и утискаючіє церков православіа твоєго! Скоро посиль нас щедробливостями твоими, господи, бо єсмо обнищали назбыть! Помози нам, боже, спасителю наш, для славы имени твоєго! Выбав нас! Мы бо єсмы людіє твои и овца паствы твоєя, абысмо оповєдали хвалу твою и чуда твои от рожаю в рожай».

И в таком смутку, посилаючися псалмы и пЂніи и пЂснями духовными, збираючи и носячи тЂла оных побитых мученик, ховали и погрЂбали.

Такій то был конєц оного преславного Флоренского синоду! Такиє овоцы єго згроомаженя, тыє пожитки принес всєму христіанству! Так ся тот пожар ненависти запалал по всєм свЂтє! Так оная померклая ночь гнЂву скрыдла свои розширила! Так мятежи, ростырки гору вынесли! Так тот синод зерцало в собЂ тиранства потомком зоставил! Так межи пшеницу, по зосталои любви, куколю незгоды, зависти, розорванья всЂял! Так до остатнеи кропли милость в христіянєх высушил!

Обач же ту з давных преслЂдованьє часов, сыну востока, облюбеници Христовы! А ку концу, заходу свЂта того не отступуй солнца правды и матки своєи, в пелюхах єще тираній суровых Иродов 28 пороженои, и под розливаньєм от них крови в утиску выхованои, през огонь и мЂч досвЂтчонои и коронованои! Не отбЂгай же в старости єе, утисками упрацованои и вынеслои!

Твоя матка — первородных своих сынов, на потканьє и привитаньє з далеких а высоких небесных палацов короля над королми, до яслец Вифлеомских чтырнадцать тисячей одным разом жолнЂров мужных ку оборонЂ пана своєго, яко сличных аромат фіалки, под острую косу сатурноватого Ирода посЂяла и выростила! Твоя матка под вЂнец, с каменя плетеный, первомученика Стефана уродила! Твоя матка, в солнце облечоная и короною от дванадцати звЂзд коронованая, перед семиголовным а десяторожным смоком в пустыню утисков, бЂд, скорбій и выгнаня а блуканя ся по свЂту утЂкати, ведле Апокалипсиса, мЂла и утЂкаєт! Твоя родителка — не в роскошах свЂта того, але в гунях, скурах, волосяницах, по горах, яскинях, пропастєх волочачихся, опущеных, утисненых, поруганьє, везеньє, темници, камЂньє, пилованьє, мечи скромне зносячих, которых не был годен свЂт — сынов спложала! Таких и вас, сынов теперешних восточных, мЂти хочет; тоє вам на тестаментЂ зоставуєт, того по вас потребуєт, того зычит: абысте, прошедши тут сквозь огнь и воду, впроважены были до оного вЂчного покою. Аминь.










[ОТПИС]


НА ДРУГІЙ ЛИСТ ВЕЛЕБНОГО ОТЦА ИПАТІЯ ВОЛОДИМЕРСКОГО И БЕРЕСТЕЙСКОГО ЄПИСКОПА, ДО ЯСНЕОСВЕЦОНОГО КНЄЖАТИ КОСТЯНТИНА ОСТРОЗЬКОГО, ВОЄВОДЫ КІЄВСКОГО (ПРОСЯЧИ АБЫ ГНЂВ СВОЙ ЄГО КН[ЯЖЕСКАЙ] М[ИЛОСТИ] ОПУСТИТИ РАЧИЛ, А ПОВЄДАЮЧИ, ИЖ ОНИ ВЛАДЫКОВЕ НЂЧОГО В ЦЕРКВИ ВОСТОЧНОЙ НЕ НАРУШИЛИ, ТОЛКО ДЛЯ НЕПОРЯДКУ ПАТРІАРХА ОТСТУПИЛИ ПИСАНЫЙ


Сирах: Яко єст красєн сЂдинам розсудок, и старшим розумЂти раду, вЂнец старшим много различкоє искуство, и похвала их страх господень.


ДО ЧИТЕЛНИКА


В дому великом (церкви божой) чителнику ласковый, не толко начиня злотыє срЂбреныє, але деревяныє и глиняныє быти мусят, бо яко тЂло єдно єст, и члонки маєт многіи, а всЂ члонки єдного тЂла, многіє будучи, єдно єст тЂло, так и церков бога живого, ач многіє члонки многіє начиня, многіє ремесники маєт, але хотяй и найболше живописцов, або маляров, кгды на єдну персону и особу глядячи малюют, всЂ образы собЂ подобни бывают, так и многих обычаи, гды єднои стежки церковного порядку стерегут, от всЂх побожности фигура просіяваєт.

Маєт церков божія пастыров, маєт ловцов, маєт пергримов, маєт первохудожников, маєт будовничих, маєт землєдЂльцов, маєт страдальцов, маєт рицеров. Тыє всЂ єдным духом и в єдно тЂло покрещени, и не може око руце мовити, не потребна ты, ани голова нозЂ мовити, ничого по тобЂ. Але которыє члонки здадутся наплохшіє быти, тыє далеко болше потребнЂйшіи суть, бо так бог растворил тЂло: меншему подал болшую часть, абы не была распря в тЂлЂ и абы всЂ єднакоє в будованью тЂла Христова чинили члонки.

З межи которых и я єдин, ач от всЂх непотребнЂйшій, єднакже божіє твореніє, за таким певним и моцньїм щитом писма святого повторе отповЂдати на лист в бозЂ велебного отца Ипатія володимерского єпископа выступую. А иж бы так тот єпископ сам, як и хто иншій з стороны, же неслушнаа єст реч меншому болшого, а простЂйшому учоного учити и строфовати, не рек, а тым не сумнился, против такого припоясую бронь.

Подъяремний безгласен, або осел, чловєчим голосом промовивший, обличаєт пророку безуміє. С таким оружієм иду уважати и строфовати єпископа оного и з ним прочих єго єдиномыслєников, нерозсудный и легкомыслєный поступок мЂшанои а вихроватои и бурливои згоды. Придаю до того стосованьє а уваженьє порядков восточнои церкви старожитных, с порядками римскими, что, чителнику христіянскій, читаючи уважай а с правдою переставай, здравствуй, здравствуй.

Писан в Острогу в школЂ кгрецкой, в рок 1599.




ТИМОФЕИ, ГЛАВА 2:


«Твердеє основаніє божіє стоит, маючи печать сію, позна господь сущія єго. И да отступит от неправды всяк, именуя имя господнє».


В бозЂ велебный господине отче владыка володимерскій!

Великіє а высокіє сумнЂньє и душу заходячіє речи великои сталости, а поважного и розмислєного поступку, як з многих, памяти годных прикладов и богомыслєных писма святых наук обачаємо, потребуют великую бовЂм и высоце важную реч. Поважный и премудрый архитектон и мужный у оповЂданью Євангелія воєвник Павел, яко модную ангиру в сердцах твердою вЂрою спанялых засажаючи, статечнє и предивне важный поступок умыслу божего, в котором хотячи бог дЂдичом обЂтницЂ обфитшеи сказати неотмЂнность рады своєи, причинил присягу, абысмо ку тому бЂгучи, моцноє потЂшенє мЂли, и заложоную надЂю одержали, которую маємо як ангиру або котвицу душЂ, моцну и певну, которая входит аж во внутрЂнєє завЂсы. Гдє предтеча за нас зоставши архієрєєм водле порядку Мелхиседекового на вЂки вшол Христос.

Тот же незвитяжоный архистратиг сталости, которого и сами силы небєсныа з оною розлучити не могут, на колЂна к отцу господа нашего Исуса Христа упадаючи, просят. Абысмо духом оного моди укрЂплени будучи, фудамент нашеи надЂи неуклонно статечне заховуючи, през такую сталость вЂры и оный приклад вЂрного оного патріарха и отца многим народом, которьга статечнє вЂры додержавши богу, розсЂял в благословєнст†як звЂзды небесныя, мнозством потомства отечества неземного Авраамова, як гостЂ а пергримове на земли, але лЂпшого небесного взыскуючи, доступовали.

Сталость скалистого а опочистого твердости вызнаня вЂры Петр, поважне на таблицах сердец плотяных рисуючи и лЂнЂю от неи родячихся добродЂтелій выводячи, обфитый вступ в вЂчноє царство господа нашего Исуса Христа обєцуєт.

Сталость, як нЂякій фЂляр духовного будованя, премудрый Сирах на свЂт выставуючи, мовит: «Сердце основанно на совЂсти розума». Яко тынкованьє ваплєноє каменнои стЂны, яко вязаньє и балки в будованю моцне знятыє, фЂяньє не росторгнутся. Так и сердце, розмысленою радою умоцнєное, жадного часу не улякнется.

Сталостю розмысленых поступков и мужествеными сердцы праведній и приподобніи оныи великіє патріарси во днєх своих процвитали и над солнце сіяли. Мужіє оныи, добродЂтелми богатіи, которых имена живут в роды, и память их ведле Соломона и Сираха с похвалами, и в благословеніих, и кости их процвитают от мЂста своєго, и имя их зоставаєт на сынєх прославленых.

Статочностю умыслов, и моцною (яко свЂдєцтво оных вЂдаєт Павел) вЂрою вси святій звитяжали королєвства, виконували правду, доступовали обЂтниц. (Замыкали уста львом, погасиша силу огнистую и прочяя).

Сталость вЂры єст грунтом речій тых, которых ся сподЂваємо, и выкшталтованьє невидимых, через котороє свЂдєцтво одержали отци наши, нам зерцало науки зоставивши, абысмы маючи так великій оболок обдержачій нас свЂдков, тестамент их богомыслєнои сталости в сердца свои впоивши, статечне в заводЂ заложоного крысу (взираючи на началника вЂры и совершителя Исуса, который в мЂсто предлєжащія єму радости, претерпЂв крест, и о ганьбЂ не дбал), не уставаючи анЂ ослабЂваючи, бЂгли. (Бо єсли быстє мовит, сынове Авраамли были и учинки Авраамли бысте чинили.)

Яко смЂти будемо ґвалтом неналежачій собЂ титул священства, сталых оных великых, в мыслях и поступкох богомыслєных угрунтованых и вкорєнених продков наших, привлащати, гды от сталости вЂры их своими непостоянствы, своєю легкомыслєностю выродимося, гды их прирожоноє подобіє своими отмЂнками, своими мЂлкими умыслками, з твари своєє истратимо змажемо. (Слава мовит отцем преподобіє дЂтєй, и учтивость паном суженій страх.)

Якую славу преподобія з нас отци наши мЂти будут, гды их сличнои сталости марне зволокаючися, обнажаємося, гын своими плохими смЂлостми, яко облацы безводныи, от вЂтр преносими и звЂзды блудячіє, с прибытков и домов их, на камени сталости уфундованых, выступуємо. (Єлици мовит, Духом божіим водятся, сій сут синове божій.)

Яко ся маємо называти сынами божіими, родом избранным, царским священієм, языком святым, гды не духом крЂпости, не духом совЂта, не духом смысла, не духом разума и премудрости божеи, але леда вЂтром слабых наших поступков, по стихіям свЂта сего водячися, от племени и повиноватства сынов божіих упливаємо. Бо што за учасництво свЂту с темностю? СвЂт бовЂм до свЂтлости присвояется, и справедливому справедливеє, и доброму доброє, и нетленному нетленноє. Як маємо стежками отец своих ходити, гды ся их сталости, их великих розмыслов и несквапливым поступкам, не толко многим и згола всЂм, але єдному з них присмотрити и поревновати не хочем...

Чим єст лЂпшій Петр Ключар небесный над Павла Тайника албо секретаря третєго неба 1? Чим же вам старожитныє законо положеныє порядки не подобалися? Чим и в чом вам патріархове так далеце винни? Чому без даня причины их отступаєте? Чому их безчестите? Чому о них злоречите? Чому им поругаетеся? А за то пристоит; аза єст призвоито христіяном, а наиболше духовным, болным хоробы, уязвеным ран, а темници затвореным замков, смутным вздыханія причиняти. Аза ж то не власная произвоитость людей превротных, клєветников, роздорников, шепотников, которіє не так тЂшатся з своєго щастя, як з людского нещастя и пригоды и которіє з добрых речій злые, и добрых людей недобрыми ницовати, переворочати и удавати звыкли.

Клеветницы, обмовницы, видячи, єсли кто постится, удают — покрытец єст; єсли яст, мовят — обжирца; єсли ходит, мовят — неспокойный; єсли уєдиняєтся а сЂдит, мовят — лЂнивый; єсли мовчит, мовят — простак, глупый; єсли мовит, повЂдают — щебетлив, велеречив; єсли даєт милостыню, мовят — тщеславник; єсли не даєт, мовят — скупєц а лакомєц. Єсли мудрый, мовят — гордый; єсли смиренный, тихій, мовят — понурый, сатурноватый; єсли веселый, мовят — розпутный; єсли до людей даркій а склонный, мовят — похлЂбца; єсли люде никого не ласкави, мовят — злыє, о нем от людей голосы — лотр.

Такими и власными тыми словы люде умыслу и сердца завистного преложоных церкви восточноє щиплют. Тыми их безчестят, а хотяй бы было восточных духовных до килку сот и до килку тисячей або и тем, предся обмовцы и посужачи зависным обычаєм своим жадному з них жаднои добродЂтели признати не хотят, што водлє их зависти и повЂсти быти не может и не єст.

Кгдыж и в письмЂ найдуєтся, же яко такого ни єдного праведника, который бы страстя икои в собЂ не мЂл и нЂгды не зогрЂшил (єдин бо єст безстрастен и безгрЂшен, в которого жадная лесть не постала в устЂх, а всякій человЂк — кламца), так теж такого неправедника и грЂшника, который бы чого доброго коли колвєк учинити не мЂл, нЂмаш.

Але не див клеветником, якій корен, такій вЂтви. Аза может єдно жродло горькую и солодкую воду точити? Аза збирают от бодачя фЂги або з терну винныє грона?

Так и продкове их посужали, мовячи — видЂли Іоанна Крестителя постячогося, мовили — бЂса имат; видЂли Христа ядуща и піюща, мовили — обжирца и винопійца; видЂли Христа духи нечистыє и бЂсы выгонячого, мовили — о ВелзевулЂ изгонит бЂсы.

ЛЂпше восточником злореченьє относити, нЂжли злоречити; лЂпше обмовиско слышати, нЂжли о людєх мовити, як мовит єдин учитель: «ЗлЂ слышати лучше, нЂжли глаголати злЂ, лучше уруганіє, пріймовати, нЂжли от всЂх с похвалы веселитися». БЂда, мовит, гды добро, речити вам будут всЂ чловЂци. Латвая реч єст посужати, нЂжли самому добрым быти. І инших строфовати, мовит учитель, не трудная єст реч и кождому, хто хочет, латва, але свой розум управовати, то єст мужа побожного, ум маючого.

Чим же мают восточныє духовныє (як мовит чиноначалник смЂренія и убозства их великій учитель) малодушествовати, иж коней не мают среброуздных; але мают солнце, быстрЂйше бЂгом, у вес день свЂтячи свою свЂщу; не мают сребра и злота бляску, але мают луну свЂтячую; не поєзджают на колєсницах златокованных и не носятся на лектицах, але мают ноги, домовую колєсницу; не мают богатства, слуг, прото чужих ног до хоженя не уживают; не сыпляют на одрах албо ложнах слоневых, але мают землю честнЂйшу над многіє слоны. Роскошен на ней покой, и скорый сон, и фрасунков перемЂнєне.

Не сЂдают под обитєм и под злотистым покровом, але мают небо, невымовною звЂзд оздобою украшено.

Єсли их от града в град, от престола на престол перегоняют, они мовят — господня єст земля и исполненіє єя; єсли их стинают — маєм Іоанна Крестителя; єсли каменієм побивают — маємо первомученика Стефана 2; єсли их пилами трут, они мовят — маємо Исаїю-пророка; єсли их в море вкидают, они мовят — маємо Іону-пророка, єсли их до львов вкидают — моємо Даніїла-пророка; єсли маєтности их берут, якож и збытнє берут, они мовят — наги єсмо вышли от животов маток своих, наги отийдем знову.

Их утЂшаєт потЂшителный глас: блажени плачущіися нынЂ, яко восмЂєтеся. Их утЂшаєт, мудрым быти на змія, выдаючи тЂло на забитьє, а голову — Христа хоронити. Тебе ради умерщвляєми єсмо весь день (по вся дни живота нашего), вмЂнихомся як овца на заколеніє.

Их видимо атоли ни скорб, атоли ни тЂснота, атоли ни гоненіє, атоли ни голод, атоли ни нагота, атоли ни бЂда, атоли ни меч, ведлє апостола, не может розлучити от любве божієй, атоли не может отдалити от закону Христового, атоли не может двигнути от основанія апостол и пророк, атоли не может з стежки зопхнути законоположенія отческого, от преданій богоносных отец, умЂют в щастю обфитовати.

Показуєтся из их премудрых и обфитых, которіє на увес свЂт вылили наук, умЂют в нещастю з апостолом лишатися, показуєтся з их невимовне терпливостій и смЂренія. УмЂют скорби над радости честнЂйши, и смуток над тріумфы и смЂхи пожиточнЂйшіи (з богословцєм) прекладати.

Якож, отче владыка, смЂеш тым дЂравым щитом, же нЂчого єстє не отмЂнили, нЂчого не переступили, нЂчого не нарушили, заслонятись, якож оныє, которыє яснЂй солнца вам променьми своими очи колют, цЂло зостанут слова: «Єсли который єпископ, або митрополит против своєго патріарха дерзнєт, розумЂючи єго быти виным, в пред суда и собору всЂх єпископов. И отступит от него, и не поминаєт имене єго по службЂ, да извержется».

Як такій моцный привилей порядку церковного от вас не єст скасованый, ани пошарпаный, якож шукаючи порядков лЂпших, оных границ вЂчне в церкви положоного порядку, от тринадцати сот лЂт цЂлотриваючого, не нарушили єсте?

Єгиптом и Ливією, и Пендаполією александрійский єпископ абы владал, и римскій єпископ под Римом будучими нехай владаєт. И антіохійскій и прочіи єпископи, своими єпархіями да владЂют.

Яко овый звязок покою и клейнот порядку, от вас не єст ростроганый и покрушоный? ПредЂл ради, то єст для границ, нихто нехай змЂнки не чинит в церкви и не пріймуєт чужого презвитера, ни єпископа, и межи поганы будучіє церкви божіє, обычай святых отец старожитный нехай держат.

Якож ово от вас не єст нарушоно, и в нЂвеч обернєно?

Понтійстій асистій и фракійстій, и по всЂх варварскых землях будучіє єпископи, митрополити от Константинопольского патріархи аби поставлялися.

А зато не нас варварскими землями, єще в тот час, гды єсмо крещеніа не приняли были, граничачи парафЂи называли.

Яко от вас не єст преступлени овыє карфагенского 28-го и 125-го и 138-го каноны, абы жаден с причетников и з презвитеров, и з станов духовных, от того часу в яких же колвєк потребах, до римского єпископа не утЂкались, ани до него ходили, а єсли бы который учинил, от сполечности мЂл быти вылучон.

Якож вы не уважите, и не устрашаєтесь оных слов, же запамяталым и затрачоным людєм здастся быти мнЂйша повага, в Африце поставленых єпископов нЂжли римскых? Яко не гризет, и не печет вас сумнєньє на овыє слова? Же негодная ани можная єст реч, тых которіи юж раз просвЂщеными сталися, и вкусили дара небесного, и причастниками стались духа святого, и добра скоштовали слова божого и моци пришлого вЂку и отпали, абы знову мЂли отновлятися к покаанію, второє роспинаючи собЂ сина божія.

Якож вас жал и плач и страх рушити не мает, иж вы Сіон, матку свою, которая вас сплодила и на лонЂ пЂстуючи, як чадолюбивая голубица выкормила и выховала, отпустили и выреклися, а вмЂсто онои звыклои пЂснечки Дамаскиновы: «Радуйся, Сіоне святый, мати церквам, божіє жилище» от семисот лЂт и болшей дЂток єи єй ку потЂсЂ спЂванои, тепер плач, рыданіє и вопль воздвизаєтє и причиняєте. Сіон, матку церков, квилите, свЂщу свЂтилника єи угашаєте, освященія єи запустошаєте, олтар сокрушаєте, псалтыр смЂряєте, пЂснь заглушаєте, радость связуєте, кіот нового премЂря переворочаєте, святости измЂняєте, волность по благодатію сущу укоряєте, велебноє имя сіонскоє обезчещаєте.

Якоєж дерзновеніє до бога и до людей, гды сумнєньє вам не допущаєт (бо не розумЂю, абысте так у великоє отчаяніє отпавши, сумнЂнє своє скотски безчеловЂчне потоптавши, сердцем ся коли колвєк вспомнЂвши, на легкомыслєный учинок свой не пукали), мЂти хочете, бо аггелско єст, ведлє учителей наших, не грЂшити, а діавольскоє — згрЂшивши, в затвердЂлости сердца и упорЂ тривати, а не каятися, а человЂческо — изгрЂшивши, покаятися.

Покайтеся и вы, о єпископи, восплачитеся своєго отступленія, возрыдайте гражанства сіонского, отдаленя ужалтеся. Росточивши достойную часть отеческаго имЂнія, постыдЂтесь, лишившись изобильства духовного хлЂба, и желающій насытитися рожец свинскых, различных похотєй богатств свЂта того, от Ієрусалима правды в Єрихон низпадшіє, и на трієх путєх роздвоєного и ростроєного умыслу, ледве живо поверженыє, навернЂтесь.

ПрійдЂте ж к Сіону, и обоймЂте єго, и дадите славу в нєм мешкаючому богу. На гору высоку вступЂте, Сіону благовЂстите, в моци голос свой поднесЂте, утешайте, утешайте людіє мои офЂровникы, глаголєт господь бог, мовте в сердци Ієрусалиму, тЂште єго, яко наполнилася покора єго. УжаснЂтеся и услабЂйте от умыслу своєго, упійтеся не вином, але духом покаянія, вспоминаючи, иж всЂх мнозство, которіє воюют на гору Сіоню, не остоятся.

Не замружайте ж очій своих, позрЂте а обачте, а остережЂтеся сыны сіонскіє, яко выдаєте и за нерозмысл продаєте своє достоаніє, своє дЂдицтво, свою Отчизну, в руки тыє, которіє о вашой матисмЂ, о ваших врядех, о ваших достоєнствих єще за животов ваших мечут жребія, албо люсы, которіє яко мшица албо саранча єгипетская, тых ку концу наклонєных вЂков, по всЂх немал частєх свЂта розлетЂвшися, по многих кролевствах в сердцах людских гнЂзда свои штучне увиваючи, овоц свой вылЂгают, и примножают, и великіє кролевства, и высокіє преславныє домы, як робацтво точачи и дЂркуючи, обваляют, што не толко на посторонних королєвствах ясно и значно ся сказало (аж з нЂкоторых мусЂно их яко осы або мотылицЂ преч дымом выкурити), але и в том панст†ново а свЂжо их выдворныє а вылЂтаючіє думки до такого конца, уховай боже, который бы з самым небезпеченстзом здоровя єго королєвскоє мЂл: побожного и святобливого, и от многих лЂт пожаданого пана нашего (чого бы вся корона до судного дня отжаловати не могла, ани, дай боже, заносился) мало не привели.

Повстаньте от такого сну заблуженя, навернЂтеся к чудному Востоку свЂта, вступЂте в виноград сіонскій, вселЂтеся в мЂста аромат, собирайте богоносных крын цвЂты, не мовте ж — отца маємо Авраама, ани презорствуйте, ани гордЂтеся, и не подносЂте в гнЂвЂ бога вашего, на тоє малоє духовноє упоминаньє, не вступайте в слЂд оных, которыє мовили, коєю областію сія твориши, яко смЂєт нога будучи, нас очей, єпископов упоминати.

Силєн єст бог и от каменє потомство Авраамово зводити, силен єст и мало умными дЂтми, великих, и в добродЂтелєх высоких, святых отцов (которых абысте и вы доступили) учити, и невЂстам премудрых учителій, яковых тепер мало, наставляти.

ИзмЂте такоє лукавство спосредку себе, а не сполкуйтеся с таким зводителем хитрим, который и мерзскых богу и людєм овоцов и учинков (о которых єсли мы молчати будєм, теды земля стогнати и волати будєт) наброил, с которым не тылко участництвовати, але, ведлє Павла, ани ясти подобаєт, тот в той вашой єдности вам не толко сполковал, але мало не началствовал и предводителем был.

Уважте ж, добро ли єст злото из ржею мЂшено, не шкодлив ли єст марципан с трутизною приправный, добра ли милостыня от руки грабленія; пріємна ли на офєру кров свинія и стерв смердячій; годно ли муры ієрусалимскіє оправовати и церков подносити зоровавелеву веспол с навалтом? Не єст бо, мовит, реч годная вам и нам будовати дом господу богу, чистых бо чистыє дЂла пречистый пріймуєт.

Непристойнаа єст реч з розслабленым о моцы, з слЂпым о свЂтЂ, з розбойником о покою и згодЂ, з блудником о чистотЂ, з драпєжцею о милостынЂ, з безстудным о благовЂнствЂ, з обжирцею о постЂ, с піяницею о встремежливости роковати и радитися.

Услыште ж, сыны сіонскіє, матер свою плачушу и рождшую вас, глаголющу: прійдЂте и видите, сыны, понєж вдовица оставлена єсм. Воспитах вас з радостію, а погубилам вас со скорбію. Што ж тераз маю чинити з вами, я, вдовица опущоная? Только идЂте, сыны мои, а просЂте от господа милости, обачте, а узнайтеся, яко Исавовыми наслЂдниками сталистеся, стративши первородства своєго доброту.

Благословенія патріарха умного Іоиля отпали єсте, поздрЂвши насадовную того свЂта красоту. Прелстилистеся умом и дЂянієм и погубили первозданную благолЂпія доброту, осквернилисте тЂла своєго шату и окаляли по образу божіє созданноє. Очернили єсте душевный свЂт и окаляли страстными сластями ум, разодрали єсте пєрвую одєжду от зиждителя истинную. Сшиваются вам кожаныє ризы и обнажаєтеся боготканныа одєжда, обвиваєтеся смоковным листвієм дЂяній, и одЂваєтесь пЂстрыми похотми сердец ваших.

Предпочли єсте любовещноє и любостяжателное житіє, украсили єсте телесного болвана свЂта того окрасою, пробачили єсте благообразіє внутрЂнего человЂка, удалилися єсте духовного єдема, райскія породы.

И нынЂ что сотворю, чада моя, исчадія моя? ОскудЂста очи мои слєзами, смутись сердце моє, розсыпася по земли слава моя, хто мнЂ порадит, хто мене потЂшит, синове мои? Поднєсся и подвисшился келих упадку моєго и хто улЂчит? ВсЂ приходячіє и минаючіє путєм, покивают головами и позвиздуют голосами, отворяют уста и згрызтают зубами и мовят: «То ли єст мати Сіон, то ли єст корона, слава и потЂха всєй земли?»

Отож маємо день, которогосмо ожидали, и годину, которои єсмо прагнули, тепер тую одержали єсмо и видимо. Сокрушемо ж єи, потопчЂмо и потрєбЂмо от земля живущих.

Ото честныи синове Сіони, одеяныи первым златом, отмЂнилися єсте в начинє глиняноє, и в роботу рук гончарских, ото ловцЂ половили вас, яко шпаков дармо, и уморили в потоцЂ живот мой, и вложили на мене камєнь тяжкій жалю, ото розлилася вода слєз моих вышше головы моєи, око моє погрязло, померкло, и помкнулося, и не отворится, доколя не восіяєт свЂт правды пред вороты моими, ДоколЂ дєнкица не озарится в сердцу моєм.

ПрійдЂте ж, синове восточніи, возшедшему на небо небесноє на Востоки, припадЂте, сЂдящему одєсную отца, поклонЂтеся, выслухаєт вас! ОбернЂтеся до нєго — обернется до вас, просЂте — и пріймете, толцЂтє — и отверзет вам дверь милосердія, дверь райскія, дверь ограды церковныя. Абысте увошедши в невЂстник небесный, в ложницу облюбєнца церквє Христовы, в нерукотворенный прибыток, овоц животный приняли и от вЂка зготованых добр боящимся єго, насытилися. Што все за узнанєм и покаанієм, а наверненєм вашим, и от бога послЂднєє благословеніє над першеє, и от людей совитую прихильность и ласку, и от своих овечок великую любов и послушенство одержите.

А єсли не узнаєтеся и не навернетеся — гнЂв господен пояст вас. Аминь.










Клірик ОСТРОЗЬКИЙ


Клірик Острозький — не розкритий досі псевдонім одного з українських полемістів, діячів острозького літературно-наукозого гуртка. Висловлювалися припущення, що під цим ім'ям міг виступати молодий Мелетій Смотрицький, автор «Апокрисиса», який назвав себе Христофором Філалетом і, як припускають, могли бути Мартин Броневський, Гаврило Дорофейович або Йов Борецький. Найвірогідніше припущення про авторство Мелетія Смотрицького (див.: Пам'ятки полемічного письменства кінця XVI і поч. XVII в., т. 1, с. XXXIII — L. — У кн.: Пам'ятки українсько-руської мови і літератури, т. 5).

Клірик Острозький — автор двох «Отписов», адресованих Іпатію Потію (1541 — 1613) — володимирському та берестейському єпископові, одному з організаторів Брестської унії 1596 р., згодом (з 1600 р.) уніатському митрополитові. До першого «Отпису» додана «Исторіа... о Флоренском синодЂ...».




Отпис на лист в бозЂ велебного отца Ипатія... в року 1598 писаний, через одного найменшого клирика церкви Острозскои в том же року отписаный.


Твір вийшов друком в Острозі у 1598 р. Складається з передмови «До чителника», «Предмови листу до отца єпископа» та «Листа».

Текст передруковано у вид.: Ответ Клирика Острожского Ипатию Потею. — Памятники полемической литературы в Западной Руси. Спб., 1903, кн. 3, с. 377 — 432.

Подається за першодруком.


1 Григорій Богослов Назіанзин (бл. 328 — 390) — старохристиянський письменник, діяч і мислитель, один із «отців церкви». У 381 — 383 рр. був єпископом Константинополя. Автор численних творів, зокрема поетичних.

2...на остатку всЂх и мнЂ ся достал видети лист... — Іпатій Потій надіслав листа Костянтину Острозькому, датованого 3 червня 1598 р. Князь доручив Клірику Острозькому відповісти на нього. Про оперативність автора відповіді і про те, якої ваги їй надавалося, свідчить той факт, що «Отпис» надрукований цього ж року.

3 ...собор Флоренскій... — Йдеться про Флорентійський собор 1438 — 1439 р., на якому було ухвалено унію православної церкви з католицькою.

4 ...за Григоріа-папы... — Йдеться про папу Григорія XIII (1502 — 1585; папа з 1572 р.).

5 ...Берестейскій... собор... — уніатський Брестський собор 1596 р. Підписуючи на ньому Брестську унію, єпископи-відступники твердили, що вона лише відновлює рішення Флорентійської унії 1439 р.





Исторія о Листрикійском, то єсть о разбойническом Ферарском, або Флоренском синоде, вкоротцЂ правдиве списаная. — Текст передруковано у вид.: История о разбойническом Флорентийском соборе, изданная Клириком Острожским в 1598 г. — Памятники полемической литературы в Западной Руси. Спб., 1903, кн. 3.

Подається за першодруком.


1 Магомет (Мухаммед, Мохаммед; бл. 570 — 632) — арабський релігійний і політичний діяч, засновник ісламу — однієї з найпоширеніших релігій світу, її послідовники — мусульмани.

2 ...папа римскі й... — Йдеться про папу Євгенія IV.

3 ...цесара константинополского... — Йдеться про візантійського імператора Іоанна Палеолога (1425 — 1448).

4 ...до всЂх трех патріархов... — тобто до александрійського, антіохійського та ієрусалимського.

5 ...четвертим — царигородским... — Йдеться про константинопольського патріарха Іосифа (1416 — 1439).

6 ...за цесара... Олбрыхта... — Мається на увазі німецький імператор Альбрехт (Ольбрахт) II (1397 — 1439, імператор з 1438 р.).

7 ...полского Владислава... — польський і угорський король Владислав III Ягайлович.

8 ...литовского Жикгимонта... — Йдеться про великого князя литовського Жигмонта (Сигізмунда) Кейстутовича.

9 Ісидор — київський митрополит (? — 1463).

10 Фотій — київський митрополит (1408 — 1431).

11 Іона — біблійний персонаж.

12 ...великого Родиса... — тобто м. Родоса. 13 Онорій. — Папа Гонорій І (625 — 638) засуджений як єретик на шостому вселенському соборі у 680 р.

14 ...и забит у Варны. — Йдеться про битву між військом Владислава III і армією турецького султана Амурата II. Битва відбулася 10 листопада (за ст. ст.) 1444 р. біля Варни, фортеці-порту на березі Чорного моря (нині місто в Болгарії), де Владислав загинув у бою. 15 ...каструм Анели... — замок св. Ангела у Римі. 16 ...короля франційского... — Мається на увазі французький король Карл VII (1403 — 1461; король з 1422 р.).

17 ...ритора Яна... — Йдеться про «парижанина Яна», Іоанна Шарльє-Жерсона (1363 — 1429), ученого-богослова, професора і ректора Паризького університету. Перше видання його творів вийшло у Страсбурзі в 1488 р. Брав участь у Флорентійському соборі як представник «західників».

18 ...в сю Трацію... — Мається на увазі Фракія, історична область на північному сході Балканського півострова.

19 ...через Гелеспонт. — Йдеться про Дарданельський пролив.

20 Тесалоники — тобто Фесалоніки.

21 Етолія — назва області.

22 Епір — назва області.

23 Махомет Вторый — Магомет, Махомет (1430 — 1481), турецький султан з 1451 р. Захопив Константинополь у 1453 р.

24 ...папы Миколая... — Йдеться про римського папу Миколу V (1447 — 1455).

25 ...Ян Осмый римскій... — Йдеться про римського папу Іоанна VIII (872 — 882), який виявився жінкою — «папежихою».

26...ведле заслуг згинул... — Митрополит київський, відступник Ісидор, про якого йде мова, помер 1463 р.

27 ...в ГорЂ Афонстєй... — Афон (по-грецьки — свята гора), півострів у Егейському морі, який візантійський імператор Костянтин Погонат (668 — 685) віддав у володіння ченців. Протягом наступних століть тут побудовано багато монастирів, скитів та келій аскетів-самітників. Афон відіграв роль великого релігійного і культурного православного центру. 28 ...тираній суровых Иродов... — Ірод І Великий (бл. 73 р. до н. е. — 4 н. е.) — іудейський цар (правив в Іудеї з 37 р. до н. е.),

жорстоко придушував народні рухи. За євангельською легендою, Ірод, щоб позбутися новонародженого Ісуса, наказав винищити у Віфліємі всіх хлопчиків до дволітнього віку.





[Отпис] на другій лист велебного отца Ипатія... —

Подається за вид.: Незвісний твір Клирика Острогского (1599). — У кн.: Пам'ятки полемічного письменства кінця XVI і поч. XVII в., т. 1, с. 201 — 229.


1 Чим єст лЂпшій Петр Ключар небесный над Павла Тайника албо секретаря третєго неба? — Католицька церква вище за всіх апостолів ставила Петра, якому нібито були доручені ключі від неба. Православна церква обстоювала рівність усіх апостолів.

2 Стефан первомученик — за євангельською легендою, один з семи перших християнських дияконів, який жорстоко переслідувався ворогами нового вчення і був забитий камінням.












Див. також:

КЛІРИК ОСТРОЗЬКИЙ. Філософська думка в Україні. Біобібліографічний словник









Головна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.