Попередня       Головна       Наступна       [див. переклад І.Жиленко]





«СЛОВА» СЕРАПІОНА ПЕЧЕРСЬКОГО (ВОЛОДИМИРСЬКОГО)




І

СЛОВО ПРЕПОДОБНАГО ОТЦА НАШЕГО СЕРАПИОНА; ГОСПОДИ, БЛАГОСЛОВИ, ОТЧЕ!


Слышасте, братье, самого господа, глаголяща въ Евангелии: «И въ послЂдняя лЂта будет знаменья въ солнци, и в лунЂ, и въ звЂздахъ, и труси по мЂстомъ, и глади». Тогда реченное господомь нашимь ныня збысться — при насъ, при послЂднихъ людех. Колико видЂхомъ солнца погибша и луну померькъшю, и звЂздное премЂнение! НынЂ же земли трясенье своима очима видЂхомъ; земля, от начала оутвержена и неподвижима, повелЂньемь божиимь нынЂ движеться, грЂхы нашими колЂблется, безаконья нашего носити не можеть. Не послушахомъ Еуаггелья, не послушахомъ Апостола, не послушахомъ пророкъ, не послушахомъ свЂтилъ великих, рку: Василья и Григорья Богословца, Иоана Златоуста, инЂхъ святитель святыхъ, ими же вЂра оутвержена бысть, еретици отгнани быша, и богъ всЂми языкы познанъ бысть, и тЂ оучаще ны беспрестани, а мы — едина безаконья держимся! Се оуже наказаеть ны богъ знаменьи, земли трясеньемь его повелЂньемь: не глаголеть оусты, но дЂлы наказаеть. ВсЂмъ казнивъ ны, богъ не отьведеть злаго обычая. НынЂ землею трясеть и колЂблеть, безаконья грЂхи многия от земля отрясти хощеть, яко лЂствие от древа. Аще ли кто речеть: «Преже сего потрясения бЂша и рати, и пожары быша же», — рку: «Тако есть, но — что потом бысть намъ? Не глад ли? не морови ли? не рати ли многыя? Мы же единако не покаяхомъся, дондеже приде на ны языкъ немилостивъ попустившю богу; и землю нашю пусту створша, и грады наши плЂниша, и церкви святыя разориша, отца и братью нашю избиша, матери наши и сестры в поруганье быша». НынЂ же, братье, се вЂдуще, оубоимъся прещенья сего страшьнаго и припадемъ господеви своему исповЂдающесь: да не внидем в болши гнЂвъ господень, не наведемъ на ся казни болша первое. Еще мало ждеть нашего покаянья, ждеть нашего обращенья. Аще отступимъ скверныхъ и немилостивыхъ судовъ, аще примЂнимься криваго рЂзоимьства и всякого грабленья, татбы, разбоя и нечистаго прелюбодЂиства, отлучающа от бога, сквернословья, лжЂ, клеветы, клятвы и поклепа, иныхъ дЂлъ сотониных, — аще сихъ премЂнимся, добрЂ вЂдЂ: яко благая приимуть ны не токмо в сии вЂкъ, в будущии, самъ бо господь рече: «Обратитеся ко мнЂ, обращюся к вамъ, отступите от всЂхъ, аз отступлю, казня вы». ДоколЂ не отступимъ от грЂхъ нашихъ? Пощадим себе и чад своих: в кое время такы смерти напрасны видЂхомъ? Инии не могоша о дому своемь ряду створити — въсхыщени быша, инии с вечера здрави легъше — на оутрия не всташа: оубоитеся, молю вы, сего напраснаго разлученья! Аще бо поидемъ в воли господни, всЂмъ оутЂшеньемь оутЂшить ны богъ небесныи, акы сыны помилует ны, печаль земную отиметь от нас, исходъ миренъ подасть намъ на ону жизнь, идеже радости и веселья бесконечнаго насладимся з добрЂ оугожьшими богу. Многа же глаголах вы, братье и чада, но вижю: мало приемлють, премЂняються наказаньемь нашимь; мнози же не внимають себЂ, акы бесмертны дрЂмлють. Боюся, дабы не збылося о нихъ слово, реченное господомь: «Аще не быхъ глаголалъ имъ, грЂха не быша имЂли; нынЂ же извЂта не имуть о грЂсЂ своемь». Много бо глаголю вамъ: аще бо не премЂнитеся, извЂта не имате пред богомь! Аз бо, грЂшныи вашь пастухъ, повелЂное господомь створихъ, слово его предаю, вы же вЂсте, како куплю владычню оумножити. Егда бо придеть судить вселенЂи и въздати комуждо по дЂломъ его, тогда истяжеть от васъ — аще будете оумножили талантъ, и прославит вы, в сла†отца своего, с пресвятымь духомь и нынЂ, присно, вЂкы.






II

ПОУЧЕНИЕ ПРЕПОДОБНАГО СЕРАПИОНА


Многу печаль в сердци своемь вижю вас ради, чада, понеже никако же вижю вы премЂнишася от дЂлъ неподобныхъ. Не тако скорбить мати, видящи чада своя боляща, яко же аз, грЂшныи отець вашь, видя вы боляща безаконными дЂлы. Многажды глаголахъ вы, хотя отставити от васъ злыи обычаи — никако же премЂнившася вижю вы. Аще кто васъ разбоиникъ, разбоя не отстанеть, аще кто крадеть — татбы не лишиться, аще кто ненависть на друга имать — враждуя не почиваеть, аще кто обидить и въсхватаеть грабя — не насытиться, аще кто рЂзоимець — рЂзъ емля не престанеть, обаче, по пророку: «Всуе мятется: збираеть, не вЂсть кому збираеть». Окаанныи и помыслить, яко нагъ родися — тако отходит, ничто же имый, но токмо клятву вЂчну; аще ли кто любодЂй — любодЂйства не отлучиться, сквернословець и пьяница своего обычая не останеться. Како оутЂшюся, видя вы от бога отлучишасся? Како ли обрадуюсь? Всегда сЂю в ниву сердець ваших сЂмя божественое, николи же вижю прозябша и плод породивша. Молю вы, братье и сынове, премЂнитесь на лучьшее, обновитесь добрым обновлениемь, престаните злая творяще, оубойтесь створшаго ны бога, вострепещете суда его страшнаго! Кому грядем, кому приближаемся, отходяще свЂта сего? Что речемъ, что отвЂщаемъ? Страшно есть, чада, впасти въ гнЂвъ божии. Чему не видЂмъ, что приди на ны, в семъ житии еще сущимъ? Чего не приведохомъ на ся? Какия казни от бога не въсприяхомъ? Не плЂнена ли бысть земля наша? Не взяти ли быша гради наши? Не вскорЂ ли падоша отци и братья наша трупиемь на земли? Не ведены ли быша жены и чада наша въ плЂнъ? Не порабощени быхомъ оставшеи горкою си работою от иноплеменник? Се уже к 40 лЂт приближаеть томление и мука, и дане тяжькыя на ны не престануть, глади, морове животъ нашихъ, и в сласть хлЂба своего изъЂсти не можемъ, и въздыхание наше и печаль сушать кости наша. Кто же ны сего доведе? Наше безаконье и наши грЂси, наше неслушанье, наше непокаянье. Молю вы, братье, кождо васъ: внидите в помыслы ваша, оузрите сердечныма очима дЂла ваша, — възненавидЂте их и отверзете я, к покаянью притецЂте. ГнЂвъ божии престанеть, и милость господня излЂется на ны, мы же в радости поживемъ в земли нашей, по ошествии же свЂта сего придем радующеся, акы чада къ отцю, къ богу своему и наслЂдим царство небесное, его же ради от господа создани быхом. Великии бо ны господь створи, мы же ослушаниемь малы створихомся. Не погубимъ, братье, величая нашего: «Не послушници дЂломъ и закону спасаються, но творци». Аще ли чимь пополземься, пакы к покаянью притецЂмь, любовь къ богу принесЂмь, прослезимся, милостыню к нищимъ по силЂ створим, бЂднымъ помощи могуще, от бЂдъ избавляйте. Аще не будем таци — гнЂвъ божии будеть на нас; всегда в любви пребывающи, мирно поживемъ. Слышимъ бо Ниневгыю град: бывше великии множьством людии, полнъ же безаконья. Богу хотящу потребити, аки Содома и Гомора, Иону пророка посла, да проповЂдаеть погыбель града их. Они же, слышавше, не пождаша, но скоро премЂнишася от грЂхъ своихъ, и кождо от пути своего злаго, и потребиша безаконья своя покаянием, постом, молитвою и плачем, от старець и до унотъ, и до сущихъ младенець, и тЂхъ бо млека отлучиша на 3 дни, но и до скота: и конемъ, и всеи животинЂ постъ створиша. И умолиша господа, и томленье от него свободишася, ярость божию премЂниша на милосердье и погибель избыша. Ионино пророчество вотще бысть, дондеже и потужи къ богу, яко в бещестье створися пророчество его: градъ бо не погибе! Иона же, акы человЂкъ, погибели и градьскыя ожидаше; богъ, видЂвъ их сердца яко воистину покаявшеся, обратишася кождо от своего зла дЂломъ и мыслью, — милость к нищимъ пусти, Мы же что о сихъ речемъ? Чего не видЂхомъ? Чего ли ся над нами не створи? Чим же ли не кажеть нас господь богъ нашь, хотя ны премЂнити от безаконии нашихъ? Ни единого лЂта или зимы прииде, коли быхомъ не казними от бога — и никако лишимся злаго нашего обычая: но в нем же кто грЂсЂ вязить — в том пребываеть, на покаяние никто не подвигнеться, никто обЂщаеться къ богу истиною зла не створити. Какыя казни не подыимемъ в сии вЂкъ и в будущии огнь неугасимый? ОтселЂ престаните бога прогнЂвающе, молю вы! Мнози бо межи вами богу истиньно работають, но на сем свЂте равно со грЂшьникь от бога казними суть, да свЂтлЂиших от господа вЂнець сподобяться, грЂшьником же болшее мучение, яко праведници казними быша за их безаконье.

Се слышаще, оубойтеся, въстрепещите, престаните от зла, створите добро. Сам бо господь рече: «Обратитесь ко мнЂ, аз обращюся к вамъ». Ждеть нашего покаянья, миловати ны хощеть, бЂды избавити хощеть, зла хощеть спасти! Мы же с Давидомь речем: «Господи, вижь смЂрение наше, отпусти вся грЂхы наша, обрати ны, боже, спасителю нашь, възврати ярость свою от насъ, да не вЂкъ прогнЂваешися на ны, ни да простреши гнЂвъ свои от рода в родъ!» Ты бо еси богъ небесный, и тебе прославляемъ з безначальным отцемь и с пречистымь духомь и нынЂ, и присно, вЂкы.





III


Почюдимъ, братье, человЂколюбье бога нашего. Како ны приводить к себе? Кыми ли словесы не наказеть насъ? Кыми ли запрЂщении не запрЂти нам? Мы же никако же к нему обратимся!

ВидЂвъ наша безаконья умножившася, видЂв ны заповЂди его отвергъша, много знамении показавъ, много страха пущаше, много рабы своими учаше — и ничим же унше показахомься! Тогда наведе на ны языкъ немилостивъ, языкъ лютъ, языкъ, не щадящь красы уны, немощи старець, младости дЂтии; двигнухомь бо на ся ярость бога нашего, по Давиду: «ВъскорЂ възгорися ярость его на ны». Разрушены божественьныя церкви, осквернены быша ссуди священии и честные кресты и святыя книгы, потоптана быша святая мЂста, святители мечю во ядь быша, плоти преподобныхъ мнихъ птицамъ на снЂдь повержени быша, кровь и отець, и братья нашея, аки вода многа, землю напои, князии нашихъ воеводъ крЂпость ищезе, храбрии наша, страха наполъньшеся, бЂжаша мьножайша же братья и чада наша въ плЂнъ ведени быша гради мнози опустЂли суть, села наша лядиною поростоша, и величьство наше смЂрися, красота наша погыбе, богатьство наше онЂмь в користь бысть, трудъ нашь погании наслЂдоваша, земля наша иноплеменикомъ в достояние бысть, в поношение быхомъ живущимъ въскраи земля нашея, в посмЂхъ быхомъ врагомъ нашимъ, ибо сведохомъ собЂ, акы дождь съ небеси, гнЂвъ господень! Подвигохомъ ярость его на ся и отвратихомъ велию его милость — и не дахомъ призирати на ся милосердныма очима. Не бысть казни, кая бы преминула нас, и нынЂ беспрестани казними есмы, не обратихомся к господу, не покаяхомся о безаконии наших, не отступихомъ злыхъ обычай наших, не оцЂстихомся калу грЂховнаго, забыхомъ казни страшныя на всю землю нашу; мали оставши, велицЂ творимся. ТЂм же не престають злая мучаще ны: завЂсть оумножилася, злоба преможе ны, величанье възнесе оумъ нашь, ненависть на другы вселися въ сердца наша, несытовьство имЂния поработи ны, не дасть миловати ны сиротъ, не дасть знати человЂчьскаго естьства — но, акы звЂрье жадають насытитися плоть, тако и мы жадаемъ и не престанемъ, абы всЂхъ погубити, а горкое то имЂнье и кровавое к собЂ пограбити; звЂрье Ђдше насыщаються, мы же насытитися не можемъ: того добывше, другаго желаемъ! За праведное богатьство богъ не гнЂвается на насъ, но, еже рече пророкомъ: «С небеси призри господь видЂти, аще есть кто разумЂвая или взиская бога, вси уклонишася вкупЂ», и прочее: «Ни ли разумЂвают все творящи безаконье снЂдающе люди моя въ хлЂба мЂсто?» Апостол же Павелъ беспрестани въпиеть, глаголя: «Братье, не прикасайтеся дЂлехъ злыхъ и темныхъ, ибо лихоимци грабители со идолослужители осудяться». МоисЂеви что рече богъ: «Аще злобою озлобите вдовицю и сироту, взопьют ко мнЂ, слухом услышю вопль их, и разгнЂваюся яростью, погублю вы мечем». И ныне збысться о нас реченое: не от меча ли падохомъ? не единою ли, ни двожды? Что же подобаеть намъ творити, да злая престануть, яже томять ны? Помяните честно написано въ божественыхъ книгахъ, еже самого владыкы нашего болшая заповЂдь, еже любити другу друга, еже милость любити ко всякому человЂку, еже любити ближняго своего аки себе, еже тЂло чисто зблюсти, а не осквернено будеть блюдомо; аше ли оскверниши, то очисти е покаяниемь; еже не высокомыслити, ни вздати зла противу злу ничего же. Тако ненавидить господь богъ насъ, яко злу помятива человЂка. Како речемъ: «Отче нашь, остави нам грЂхи наши», а сами не ставляюще? В ню же бо, рече, мЂру мЂрите, отмЂрит вы ся. Богу нашему.





IV

ПОУЧЕНИЕ ПРЕПОДОБНАГО СЕРАПИОНА


Малъ час порадовахся о васъ, чада, видя вашю любовь и послушание къ нашей худости, и мняхъ, яко уже утвердистеся и с радостию приемлете божественое писание, — «на свЂтъ нечистивыхъ не ходите и на сЂдалищи губителеи не сЂдите». Аже еще поганьскаго обычая держитесь: волхвованию вЂруете и пожигаете огнем невиныя человЂкы и наводите на всь миръ и градъ убийство; аще кто и не причастися убийству, но, в соньми бывъ въ единой мысли, убийца же бысть; или могай помощи, а не поможе, аки самъ убити повелЂлъ есть. От которыхъ книгъ ил от кихъ писаний се слышасте, яко волхвованиемь глади бывають на земли и пакы волхвованиемь жита умножаються? То аже сему вЂруете, то чему пожигаете я? Молитеся и чтете я, дары и приносите имъ — ать строять миръ, дождь пущають, тепло приводять, земли плодити велять! Се нынЂ по три лЂта житу рода нЂсть не токмо в Русь, но в ЛатЂнЂ: се волхвове ли створиша? Аще не богъ ли строить свою тварь, яко же хощеть, за грЂхы нас томя? ВидЂ азъ от божественаго написанья, яко чародЂици и чародЂйца бЂсы дЂиствують на родъ человЂкомъ и надъ скотомъ . и потворити могуть; надъ тими дЂйствують, и имъ вЂрують. Богу попущьшу, бЂси дЂйствують; попущаеть богъ, иже кто ихъ боится, а иже кто вЂру тверду держить к богу, с того чародЂйци не могуть. Печаленъ есмь о вашемь безумьи, молю вы, отступите дЂлъ поганьскыхъ. Аще хощете град оцЂстити от безаконныхъ человЂкъ, радуюся тому; оцЂщайте, яко Давидъ пророкъ и царь потребляше от града Ерусалима вся творящая безаконие: овЂхъ убитиемь, инихъ заточением, иних же темницами; всегда град господень чистъ творяше от грЂхъ. Кто бо такъ бЂ судия, якоже Давидъ? Страхомъ божиимъ судяше, духомь святымъ видяше и по правдЂ отвЂтъ даяше. Вы же как осужаете на смерть, сами страсти исполни суще? И по правдЂ не судите: иный по вражьдЂ творить, иный горкаго того прибытка жадая, а иный ума не исполненъ; толко жадаеть убити, пограбити, а еже а что убити, а того не вЂсть. Правила божественаго повелЂвають многыми послухъ осудити на смерть человЂка. Вы же воду послухомь постависте и глаголете: аще утапати начнеть, неповинна есть; аще ли попловеть — волхвовь есть. Не может ли дияволъ, видя ваше маловЂрье, подержати, да не погрузится, дабы въврещи въ душьгубьство; яко, оставльше послушьство боготворенаго человЂка, идосте къ бездушну естьству к водЂ приясть послушьство на прогнЂванье божие? Слышасте от бога казнь, посылаему на землю от первыхъ род: до потопа на гыганты огнем, при потопЂ водою, при СодомЂ жюпеломъ, при фараонЂ десятью казнии, при хананиихъ шершенми, каменьемь огненымь съ небеси; при судьях ратьми, при ДавидЂ моромь, при ТитЂ плЂненьемь, потом же трясеньемь земли и паденьемь града. При нашем же языцЂ чего не видЂхом? Рати, глади, морове и труси; конечное, еже предани быхом иноплеменникомь не токмо на смерть и на плЂненье, но и на горкую работу. Се же все от бога бываеть, и симъ намъ спасение здЂваеть. НынЂ же, молю вы, за преднее безумье покайтесь и не будьте отселЂ аки трость, вЂтромь колЂблема. Но аще услышите что басний человЂчьскыхъ, къ божественому писанию притецЂте, да врагъ нашь дьяволъ, видЂвъ ваш разум, крЂпкодушье, и не възможеть понудити вы на грЂхъ, но посрамленъ отходит. Вижю вы бо великою любовью текущая въ церковь и стояща з говЂньемь; тЂм же, аще бы ми мощно коегождо вас наполнити сердце и утробу разума божественаго! Но не утружюся наказая вы и вразумляя, наставляя. Обида бо ми немала належить, аще вы такоя жизни не получите и божия свЂта не узрите; не может бо пастухъ утЂшатись, видя овци от волка расхыщени, то како азъ утЂшюсь, аще кому васъ удЂеть злый волкъ дьяволъ? Но поминающе си нашю любовь, о вашемь спасении потщитесь угодити створшему ны богу, ему же лЂпо всяка слава честь.





V

СЛОВО БЛАЖЕНАГО СЕРАПИОНА О МАЛОВЕРЬЕ


Печаль многу имамъ въ сердци о васъ, чада. Никако же не премЂните от злобы обычая своего, вся злая творите в ненависть богу, на пагубу души своей. Правду есте оставили, любве не имате, зависть и лесть жирует въ васъ, и вознесеся умъ вашь. Обычай поганьский имате: волхвамъ вЂру имете и пожагаете огнемъ неповинныя человЂки. ГдЂ се есть въ Писаньи, еже человЂкомъ владЂти обильемъ или скудостью? подавати или дождь, или теплоту? О, неразумнии! вся богъ творит, якоже хощет; бЂды и скудость посылаеть за грЂхи наша и наказая насъ, приводя на покаянье. О, маловЂрнии, слышасте казни от бога: в первыхъ родЂхъ потопа на гиганты, огнемъ пожьжени, а содомляне огнем же сожени, а при фараонЂ десять казней на Егупетъ, при ханании каменее огненое с небесЂ пусти, при судьяхъ рати наведе, при ДавидЂ моръ на люди, при ТитЂ плЂнъ на Ерусалимъ, потомъ трясенье земли и паденьемъ града. И в наша лЂта чего не видЂхомъ зла? многи бЂды и скорби, рати, голодъ, от поганых насилье. Но никако же премЂнимъся от злыхъ обычай наших; нынЂ же гнЂвъ божии видящи и заповЂдаете: хто буде удавленика или утопленика погреблъ, не погубите людии сихъ, выгребите. О, безумье злое! О, маловЂрье! Полни есми зла исполнени, о томъ не каемъся. Потопъ бысть при Нои не про удавленаго, ни про утопленика, но за людския неправды, и иныя казни бещисленыя. Драчь град 4 лЂта стоялъ от моря потопленъ бысть и нынЂ в мори есть. В лясЂхъ от умноженья дождя 600 людий потопло, а инии в Перемышли градЂ 200 потопоша, и глад бысть 4 лЂта. Тамо же се все бысть в сия лЂта за грЂхи наша. О, человЂци, се ли ваше покаянье? сим ли бога умолите, что утопла или удавленика выгрести? сим ли божию казнь хощете утишити? Лучши, братья, престанемъ от зла; лишимъся всЂхъ дЂлъ злых: разбоя, грабленья, пьяньства, прелюбодЂйства, скупости, лихвы, обиды, татбы, лжива послушьства, гнЂва, ярости, злопоминанья, лжи, клеветы, рЂзоиманья. Аз бо грЂшный всегда учю вы, чада, велю вамъ каятися. Вы же не престанете от злыхъ дЂлъ. Егда кая на насъ казнь от бога придет, то болЂ прогнЂваем, извЂты кладучи: того ради ведро, сего дЂля дождь, того дЂля жито не родиться; и бываете строители божией твари, а о безумьи своемъ почто не скорбите? Погании бо, закона божия не вЂдуще, не убивают единовЂрних своихъ, ни ограбляють, ни обадят, ни поклеплют, ни украдут, не запряться чужаго; всякъ поганый брата своего не продасть; но, кого в нихъ постигнет бЂда, то искупять его и на промыслъ дадуть ему; а найденая в торгу проявляют; а мы творимъся, вЂрнии, во имя божие крещени есмы и, заповЂди его слышаще, всегда неправды есмы исполнени и зависти, немилосердья; братью свою ограбляемъ, убиваемъ, въ погань продаемъ; обадами, завистью, аще бы мощно, снЂли другъ друга, но вся богъ боронит. Аще велможа или простый, то весь добытка жалает, како бы обидЂти кого. Оканне, кого снЂдаеши? не таковъ же ли человЂкъ, яко же и ты? не звЂрь есть, ни иновЂрець. Почто плачь и клятву на ся влечеши? или бессмертенъ еси? не чаеши ли суда божия, ни возданья комуждо по дЂлом его? От сна бо въставъ не на молбу умъ прилагаеши, но како бы кого озлобити, лжами перемочи кого. Аще ся не останете сихъ, то горшая бЂды почаете по семъ. Но, моляся, вамъ глаголю: приимемъ покаянье от сердца, да богь оставит гнЂвъ свой и обратимъся от всЂхъ дЂл злыхъ, да господь богъ обратиться к намъ. Се вЂдЂ азъ, поучаю вы, яко за моя грЂхи бЂды сия дЂються. ПридЂте же со мною на покаянье, да умолим бога; вЂдЂ убо, аще ся покаевЂ, будемъ помиловани; аще ли не останетеся безумья и неправды, то узрите горша напослЂдь. Богу же нашему.









За вид.: «Слова» Серапиона Владимирского / Памятники литературы Древней Руси. XIII век. — М., 1981. — С.440-455.

Підготовка тексту В.В.Колесова.

Серапіон, монах Києво-Печерського монастиря, в 1274 році поставлений єпископом Володимирським, Суздальським та Ніжегородським. Помер 12 липня 1275 року. П’ять слів Серапіона подаються за списками: Златая Цепь XIV ст. ГБЛ, ф. 304, I, №11; Паїсієвський збірник бл. 1412 р. ГПБ, Кирило-Білозерське зібрання, 297/1081; різночитання наводяться за Ізмарагдом (XIV с. ГБЛ. ф. 256, №186; XV ст. ГПБ, Q. I. 312) — за виданням: Е.В.Петухов. Серапион Владимирский, русский проповедник XIII в. СПб., 1888, с.1-15.







Попередня       Головна       Наступна       [див. переклад І.Жиленко]



Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.