Попередня     Головна     Наступна





РОЗДЂЛЪ ПЯТЫЙ О ОПРАВЂ ПОСАГОУ


АРТЫКУЛЪ 1.

Которымъ обычаемъ отецъ выдаючы дЂвку свою замужъ маеть обваровати и впевнити записанья вЂна отъ зятя.


Тежъ уставуемъ, ижъ кождый обыватель того панства которого кольвекъ будучы стану, выдаючы дочку свою замужъ и даючи за нею посагъ або выправу подле доброе воли своее, наипервей нижли дЂвку выдастъ, маеть отъ зятя взяти записъ подъ печатью его и подъ печатьми людей добрихъ, которымъ онъ на третей части имЂнья своего лежачого оный посагъ або выправу совито описати маеть потомужъ яко нижей описано; а потомъ оный записъ тотъ же зять на первыхъ рокохъ земскихъ передъ судомъ земскимъ оного повЂту, въ которомъ осЂлости маеть, оповЂдати и въ книги земскіе записати маетъ, таковая отправа маеть быти въ кождого права задержана. А пакли бы отецъ выдаючы дЂвку замужъ передъ выданьемъ ее вЂна и отправы отъ зятя своего не одержалъ; таковая дЂвка по смерти мужа своего внесенье тратитъ, хотя бы и великую суму за собою внесла. А ведже предсе яко шляхтянце дЂти або близкіе повинни будуть за вЂнецъ дати тридцать копъ грошей, если бы замужъ пошла; а гдЂ бы замужъ пойти не хотЂла, тогды межы дЂтьми и близкими въ имЂньяхъ мужжнихъ будеть равную часть имЂнья держати ажъ до смерти своей; естли же бы оного шляхтича имЂнье тридцати копъ грошей не стояло, тогды тежъ водлугъ того зъ оного имЂнья маеть выдЂлена быти четвертая часть, которую будетъ держати только до живота своего, хотя за другого мужа пойдетъ.






АРТЫКУЛЪ 2.

Якъ маеть мужъ жонЂ вено записати.


Тежъ уставуемъ, хто бы хотЂлъ записати вЂно жонЂ своей, тогды маеть, ошацовавшы вси имЂнья свои, на третей части, чого стоитъ, маеть совито противко того внесенья записати вЂно жонЂ своей, такъ яко бы сума описаная тое третье части. И коли будетъ тая жона его на третей части имЂней мужнихъ вЂно описаное отъ него мЂти, а онъ бы потомъ умеръ, а дЂти по собЂ зоставилъ, а тая жона пойдетъ за другого мужа, а если дЂти всхочуть або близкіе ее съ тое третее части имЂнья за живота ее вывЂновати; тогды мають всю суму пенезей, яко будеть въ листЂ описано, заплатити, тожъ тое имЂнье къ рукамъ своимъ взяти. А естли же будутъ дЂти ждати смерти матки своее, не всхочуть выкупити; тогды повинни будуть одно внесенье, што въ домъ ихъ внесла, по смерти ее заплатити тому, кому она отпишеть, а привенку, што будеть записалъ отецъ ихъ на противко внесенья, совито платити не повинни, а она тежъ не маеть никому того привенку записовати, кромЂ только вольна будеть отписати внесенье свое, а естли бы никому не отписала а дЂтей не мЂла, тогды маеть тое внесенье вернено быти въ домъ той, съ которого вышла. Вольно тежъ кождому жонЂ своей отписати речы свое рухомые такъ яко и кождому обчому, то естъ: золото, серебро, шаты и иншые речы, кромъ зброи стада и челеди неволное быдла дворного; а ведже и того всего яко имЂнья лежачого третюю часть жонЂ отписати вольно, абы седечы на имЂнью мЂла чимъ службу нашу господарскую и земскую съ третее части имЂнья заслуговати. А дЂти и близкіе кгды будуть съ тое третее части скуповати; тогды тые вси речы яко зброя челядь стадо и быдло мають при имЂнью зоставити, а гдЂ бы тые речи утратила, тогды зъ вена ее мають за то ошацовавшы вытрутити часу откладанья пенязей. А такъ подлЂ уставы нашое мають ся заховати вси подданые наши и на потомные часы, а хто бы надъ звышей тое уставы нашое учинилъ, а што неслушнЂ жонЂ своей записалъ; таковыхъ записовъ не хочемъ мЂти моцныхъ мы сами и потомки наши Великіе Князи Литовскіе. А для того жъ отецъ еще не выдавши дЂвки своей замужъ маеть первей того смотрити, естли бы того зятя своего третяя имЂнья совито стояти могла противко внесенья дочки его, на чомъ бы ее противъ того веновати мЂлъ. А гдЂ бы тая часть не стояла противко внесенья; тогды маеть отецъ за тую суму пенезей, што бы по ней мЂлъ дати, купити имЂнье и дочцЂ своей за то дати; а зять предсе жонЂ своей за то, што бы особно взялъ суму якую, маеть отправу вчинити на третей части имЂнья своего властивого, а того имЂнья, которое отецъ купивши дочцЂ своей дастъ, мають сполу уживати ажъ до живота своего мужнего, а по животЂ мужнемъ она яко свое властное маеть одержати весполокъ зъ веномъ своимъ.






АРТЫКУЛЪ 3.

По смерти отцовской дЂвки якъ мають зъ имЂнья выправованы быти.


Уставуемъ, если бы отецъ за жывота своего выдалъ одну дЂвку свою замужъ, а въ томъ умеръ, а по собЂ зоставившы еще колко дЂвокъ; тогды и тые дЂвки водле опису або тестаменту его мають быти выправованы, яко имъ будеть описано, або зъ готовизны заставленое. А гдЂ бы сумы описаное а ни назначоное не было готовизны, и не могъ бы братъ такъ великое сумы по нихъ дати яко за першою дано; тогды ошацовавшы четвертую часть имЂнья своего отчызного, ничого съ того имЂнья не втратившы; и тымъ сестрамъ своимъ выправу равно всимъ дати, иле ихъ будеть, окромъ если бы братъ ихъ розумЂлъ, ижъ четвертая часть имЂнья ихъ отчызного болшое важности, нижли бы имъ на ровные части такъ много яко першой сестрЂ выправы пришло, то будеть на воли его. А пакли бы братъ або стрыеве суму имъ зоставленую утратили; тогды водлЂ опису будуть повинни яко властный долгь отдати и заплатити.







АРТЫКУЛЪ 4.

0 вдо†венованой, якъ се мають противко ее дЂти лЂта маючые обходити.


Вдова которая сЂдить на вдовьемъ столцы, а будеть ли венована отъ мужа своего, а сынове мають зуполные лЂта; тогды она маеть осЂлость только на венЂ своемъ, а сынове мають припущоны быти ко всимъ имЂньямъ и скарбомъ отцовскимъ, которые мають службу земскую заступовати; а естли бы была не венована, тогды маеть быти захована, яко вышей есть описано.






АРТЫКУЛЪ 5.

Вдовы безплодные, которые дЂтей не мають.


Обачившы есьмо то, ижъ которые вдовы безплодные сЂдятъ навдовьемъ столцы, многіе се шкоды отъ нихъ дЂлають Речи Посполитой, а то тымъ обычаемъ ижъ службы земскіе отъ ихъ не бывають служоны, такъ яко бы мЂли быти, и тежъ ближнимъ много имЂнья утрачають; уставуемъ такъ, ижъ которая вдова безплодная, а будетъ ли венована отъ мужа своего, тогды маеть осЂсти только на вЂнЂ своемъ, а имЂнья мають на ближнимъ спасти; а естли бы небыла венована отъ мужа своего, тогды маеть на третей части имЂнья сЂдЂти, поки за мужъ пойдеть, тогды близшіе мають вЂнецъ ее платити, яко естъ вышей, если будеть не вдовою замужъ пришла.






АРТЫКУЛЪ 6.

Который бы кольвекъ осЂлый и неосЂлый оженился въ ЛитвЂ.


Тежъ уставуемъ, ижъ бы который кольвекъ оселый и неоселый оженился въ Лит†и побралъ по жонЂ имЂнья; тогды часу войны и каждое потребы Великого Князства Литовского противъ кождому непріятелю того панства зъ имЂней жоны своее, и зъ якого жъ кольвекъ набытья досталъ бы имЂнья въ томъ панствЂ, повиненъ будеть самъ съ того службу военную земскую служити и заступовати, и тымъ се не вымовляючы, же ему жона не записала. И хто бы съ таковыхъ якимъ же кольвекъ обычаемъ набывшы и маючи имЂнье у Великомъ Князст†Литовскомъ и въ земляхъ ему належачихъ, а войны которіе бы кольвекъ не служилъ, яко вышей описано; тогды онъ и жона тые имЂнья тратятъ на Речъ Посполитую.






АРТЫКУЛЪ 7.

О дЂвкахъ, которые бы безъ воли родичовъ замужъ идуть, або бы мЂли пойти.


ГдЂ бы которая дЂвка безъ воли отцовское и матчины ишла за иужъ; таковая отпадываеть отъ посагу и отъ имЂнья отчизного и материстого, а естли бы одна была у отца, тогды отчызна на близкихъ спадываеть мимо таковую дЂвку.






АРТЫКУЛЪ 8.

О дЂвкахъ, которые по смерти родичовъ своихъ безъ воли братьи або стріевъ за мужъ идуть.


Уставуемъ, естли бы дЂвка остала отца и матки, по смерти ихъ родичовъ своихъ, не доросши лЂтъ своихъ, або тежъ и доросши лЂтъ замужъ пошла безъ воли братьи або стріевъ своихъ, а не будеть ли братьи рожоное мЂти або стріевъ, або близкихъ своихъ; таковая отпадываеть отъ посагу имЂнья своего отчызного и материстого и спадковъ, што бы напотомъ на нее спасти мЂло. А естли бы она мЂла лЂта свои, а братья або стріеве ее задерживаючи ее не хотЂли бы замужъ выдати; тогды однакожъ своволнЂ не маеть ни за кого ити, лечъ маеть дати знати до вряду черезъ кровныхъ вЂдомость, а врядъ ей маеть дозволити замужъ пойти; а она естли зъ волею вряду або близкихъ замужъ пойдетъ за ровного собЂ шляхтича, тогды таковая имЂнья не маеть тратити, а вЂдь же дЂвка маеть мЂти лЂта зуполные петнадцать лЂтъ, а тотъ хто ее поиметь вольно ему будеть доходити маетности жоны своее. А братья або стріеве и которіи кольвекъ близкіе маючи сестри въ опецЂ своей, поколь ихъ замужъ выдадуть, мають ихъ учтиве на всемъ ховати, держечы при нихъ нЂвесту старую статечную; а естли бы учти†ховати не хотЂли, тогды таковые дЂвки могуть на части своей, съ которое имъ выправа маеть быти, сами сЂдети подъ справою опекуна отъ вряду имъ приданаго до того часу, поколь замужъ пойдуть, а идучи замужъ выправа имъ съ того дому маеть быти водлЂ поступку вышей описаного.







АРТЫКУЛЪ 9.

Хто бы з двЂма або съ трема жонами дЂти мЂлъ.


Уставуемъ, естьли бы которая вдова замужъ пошла, и дЂти въ мужа першое жоны нашла и съ тымъ мужемъ другихъ дЂтей набыла, тогды по смерти мужней зъ обоима детьми того мужа своего во имЂнью ровную часть и въ скарбЂ маеть мЂти; а естли бы дЂтей не мЂла, тогды зъ дЂтьми мужа своего першое жоны его ровную часть только во имЂньяхъ лежачихъ будеть мЂти, але въ скарбехъ и въ рухомыхъ речахъ мЂти не маеть, окромъ внесенья своего, и тежъ естли бы што зъ ласки ей мужъ записалъ нЂкоторую часть имЂнья лежачого, на той она маеть сЂдЂти только до жывота своего, если замужъ не пойдетъ, а если бы замужъ пошла, тогды тую ровную часть имЂнья маеть дЂтемъ первое жоны его зоставити, а тые дЂти венца ей не повинни будутъ дати.






АРТЫКУЛЪ 10.

О вдовЂ, которая зостанетъ зъ дЂтьми недорослыми мЂтъ.


Уставуемъ, которая вдова зостанеть по мужу своемъ зъ дЂтьми недорослыми, а хотЂла бы на вдовьемъ столцы сЂдети и дЂти въ опецЂ своей мЂти, а будеть ли оселость добрую мЂти або вено отъ мужа своего оправеное; тогды таковая вдова маеть на вдовьемъ столцы на всихъ имЂньяхъ зъ дЂтьми сЂдЂти, если бы опекуны уставленые отъ мужа ее не были. А естли бы оселости добрые або вЂна отписаного не мЂла, тогды маеть дати по собЂ рукоемство доброе люсей оселыхъ, таковая ку опецЂ маеть быти припущона. А гдЂ бы она и потомъ будучи на вдовьемъ столцы дЂтемъ имЂнья скарбы утрачала; тогды стріеве або близкіе мають ее притегнути передъ урядъ земскій на рокъ певный, яко на завитый, и доведуть ли того, же утрачала, маеть опеку и имЂнья и дЂти пустити кревнымъ, а сама зостати на опра†своей; а не будеть ли мЂти оправы, тогды мають ей выдЂлити ровную часть межи дЂтьми, которую маеть держати и ее вживати до живота своего, або покуль замужъ пойдеть, а по жывотЂ ее тая часть ее маеть спасти на дЂти. А вЂдьже утрата отъ нее на имЂньяхъ иншая не можетъ се показовати: одно естли бы непобожными податками винами серебщизнами людей у въ оныхъ имЂньяхъ обтяжала, гумна и иные статки домовые неряднЂ роспрашала, або частые и непотребные калацЂи мЂвала, и слуги непотребные ховала, а ничого въ домъ дЂтиный не прибавляла. А гдЂ бы стріевъ и иншихъ кревныхъ не было, тогды мы Господаръ, а въ небытности нашой у Великомъ Князст†Литовскомъ ино панове рада наша каждый у своемъ воеводст†для таковое утраты мають зъ рамени нашого господарскаго опекуновъ оселыхъ на тое мЂстце уставити, которіе дЂти имЂнья скарбы и ее самую у въ опецЂ своей мЂти будуть а не допущати большей утраты чинити. А въ томъ часЂ намъ тую утрату по ней обачатъ, она бы што дЂтемъ утратила; тогды будеть винна тую всю шкоду дЂтемъ своимъ платити зъ вЂна або зъ властного имЂнья своего, а не будеть ли мЂти имЂнья або вЂна, тогды оные рукоимцы будуть повинни шкоду дЂтемъ платити.






АРТЫКУЛЪ 11.

О дЂвкахъ и вдовахъ, которіе за простыхъ людей замужъ идутъ.


Уставуемъ, которая бы дЂвка або вдова, будучы стану шляхецского, маючы имЂнья отчызные або материстые, пошла замужъ за простого стану человЂка не шляхтича; таковая отъ всихъ имЂней своихъ якъ отчызныхъ такъ материстыхъ вЂчности отпадываеть, але тые имЂнья на близкихъ мають прійти, а по вдо†на дЂти и тежъ на близкихъ ее, которые дЂти яко близкіе предсе будуть повинни таковой дЂвцЂ або вдо†за тые имЂнья ее отложыти суму пенезей подлЂ шацунку статутового, але по половицы, то естъ даючы за кождую службу людей пять копъ грошей, а иншые кгрунты сумы по половицы, яко въ томъ статутЂ о томъ шырей написано, а вЂно описаное все тратятъ, и не повинни будуть дЂти и близкіе таковой вЂна откладати.






АРТЫКУЛЪ 12.

О вдовЂ, которая бы по смерти мужа своего за другого хотЂла пойти.


Хочемъ мЂти, абы малженство въ почтивости было заховано и для вЂдомости плоду, абы кождая вдова шляхтянка по смерти иужа своего до шести мЂсецей за другого мужа не смЂла пойти; а которая пойдеть, тогды вЂно отъ мужа своего описаное тратитъ, а пакли бы вЂна описанаго не мЂла, тогды заплату до скарбу нашого дванадцать рублей грошей заплатити маеть.






АРТЫКУЛЪ 13.

О спадки, которые заровно на сына и на дочки приходять, и о внесенью матчиномъ, если бы кому не записала.


Тежъ уставуемъ, ижъ всякіе материстые такъ лежачіе и иншые речи рухомые, тежъ внесенье матчино, которое бы никому не было записовано, то все маеть въ ровный дЂлъ пойти межи всихъ дЂтей якъ сыновъ такъ и сестръ, нижли спадки отчизные на сыновъ на близкихъ по мечу приходять такъ, яко на иншомъ мЂстцу шырей о томъ написано.






АРТЫКУЛЪ 14.

О поровнанья внесенья розныхъ жонъ передъ раздЂломъ дЂтиного имЂнья.


Тежъ уставуемъ, кгды бы одинъ шляхтичъ мЂлъ колко жонъ, а оные жоны мЂли бы ровное внесенье свое въ сумахъ пенежныхъ; тогды сынове, колько ихъ будеть зъ оныхъ жонъ, вси имЂнья отчизные мають на себе на ровные части подЂлити. А естли бы которое жоны внесенья большей нижли иншыхъ жонъ; напервей передъ роздЂломъ имЂней своихъ выровнати оное болшое внесенье матки братьи своей, ровное внесенье подЂливши, заплатити, тогды жъ имЂнья отчизные на ровные части межи себе подЂлити.






АРТЫКУЛЪ 15.

Если бы которая вдова замужъ пошла.


Уставуемъ, если бы которая вдова замужъ пошла, а первей будучи за первымъ мужемъ своимъ вЂно оправленое отъ мужа своего мЂла; тогды отъ другого мужа вЂна записаного мЂти не може, нижли бы тотъ мужъ ее другій вмеръ, а дЂти по собЂ зоставилъ, тогды она межи дЂтьми своими ровную часть у въ имЂнью взяти маеть, а на томъ до жывота мЂшкати*. Тогды отъ близкихъ маеть на вдовьемъ столцу на третей части зостати, а по животЂ ее и тая третяя часть маеть спасти на близкихъ *, заховатися водлЂ того, яко вышей о томъ написано.



* Въ трет. ред. стат. «А если бы одно дитя зостало; тогды отъ того дитяти альбо отъ ближнихъ маетъ на вдовьемъ».







АРТЫКУЛЪ 16.

О имЂнью, на которомъ мужъ жонЂ отправу чынить.


Уставуемъ тежъ, ижъ хто кольвекъ описавшы отправу жонЂ своей на которомъ имЂнью своемъ учинившы, того имЂнья своего никому иншому никоторимъ правомъ а ни способомъ записовати а ни въ чужіе руки задавати не можеть, хотя и призволенье отъ жоны показовалъ, безъ очевистого передъ врядомъ сознанья ее; а и врядъ тежъ кождый на таковомъ вЂнованомъ имЂнью никому отправы никоторое чинити не маеть, окромъ добровольного и очевистого передъ врядомъ самое панее вЂнованое призволенья.






АРТЫКУЛЪ 17.

О безплодной жонЂ.


Кгды бы которая жона будучы замужемъ безплоднЂ умерла, маючы певное внесенье за выправою отъ родичовъ своихъ, а того бы имЂнья никому не записала, таковое внесенье зась въ тотъ же домъ, съ которого вышло, вернутися маеть родичомъ ее. А которая бы жона незплоднЂ умершы мЂла внесенье и выправу певную отъ братьи съ четвертое части, а никому бы того не записала, а еще бы сестра ее была невыпосажона и за мужъ не выдана; тогды таковое внесенье не приходитъ засе на братью, але на сестру которая бы еще замужъ не выдана была; або если бы оное внесенье отъ сестры своее братья собЂ взяти хотЂли, тогды вмЂсто того сестрЂ невыданой зо всее четвертое части, чого стояти будеть посагъ и выправу дати повинни. Кгды жъ четвертая часть водлугъ давныхъ правъ особли†на выпра†дЂвокъ замужъ отложона безъ всякое розности, хотя бы ихъ было и на болЂй або тежъ и одна **.



* «А ведже сЂдечи на вдовьемъ столцу, не маетъ того имЂнья утратити, але се вовсемъ».

** Въ трет. редакціи Стат. «а если бы отецъ колко дочекъ за своего живота выдалъ, а еще бы одна або колко ихъ невыданыхъ зостало; тогды той албо тымъ позасталымъ, не зо всее четвертое части, але водлугь ихъ права и личбы съ части тое четвертое выправа дана быти маетъ».








АРТЫКУЛЪ 18.

О розводехъ малженскихъ передъ судомъ духовнымъ.


Тежъ уставуемъ, ижъ розводъ малженскій маеть быти передъ судомъ духовнымъ обоего стану водлЂ правъ нашихъ хрестіянскихъ: если мужъ зостанеть виненъ зъ розсудку права духовного, тогды жона останеть на опра†отъ него описаной; а пакли бы жона винна найдена, тогды внесенье и оправу свою тратить. А вЂдьже если бы розводъ слушный доводомъ для кревности, ижъ ся малженство въ невЂдомости кревности стало, або для иншыхъ причынъ, которые бы се передъ правомъ духовнымъ показали, ижъ бы слушный розводъ мЂлъ быти; тогды при розводЂ вЂнокъ при мужу и внесенье при жонЂ зостати маеть.















Попередня     Головна     Наступна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.

Iзборник. Історія України IX-XVIII ст.