Попередня         Головна         Наступна





АНТОНІЙ РАДИВИЛОВСЬКИЙ


Біографічні відомості про Антонія Радивиловського дуже неповні. У 40-х роках XVII ст. він вчився в Києво-Могилянській колегії. По закінченні колегії, прийнявши згодом монашество, був якийсь час архідияконом Чернігівської кафедри. З половини 1650 рр. Радивиловський виступає в Києві як печерський проповідник; у 1671 р. був, як видно з його рукописів, намісником Печерського монастиря; наприкінці 1683 або на початку 1684 р. став ігуменом Пустинно-Миколаївського монастиря. Помер у грудні 1688 р. Свої проповіді Радивиловський видав у двох книгах: в 1676 р. вийшов збірник «Огородок Маріи богородицы», в 1688 р. «ВЂнец Христов з проповЂдій неделных». Серед інших українських проповідників XVII ст. А. Радивиловський відзначається як більшим інтересом до питань сучасності (характерні згадки про розбрат між старшиною й трудящим народом, про тяжке становище жінки в сім’ї, про неправосуддя), так і широким використанням у проповідях «прикладів» з популярних збірників «Римські діяння», «Велике зерцало» та ін.

Наведені тексти подаємо за виданням: М. Марковский, Антоний Радивиловский, южнорусский проповедник XVII в., К., 1894.









СЛОВО I, ЧАСУ ВОЙНЫ, ПОБУЖАЮЧЕЕ ВОИНОВ ХРИСТІАНСКИХ ДО ПОТКАНЯ СЯ З ТУРКАМИ И ТАТАРАМИ



Ополчитеся за братію вашу, сынов ваших, и жены ваши, и домов ваших: Неемія, глава 4...




Кгды на якое панство без жаднои вины непріятель якій окрутный з войском наступует, нетылко оное спустошити и до панства своего прилучити, але навет самых рейметаров албо справцов онаго, и люд посполитый, жены их, чада, братію и любимых другов в тяжкую неволю запровадити, албо под меч пустити усилуючи; таковому войною ся спротивляти, и отймовати писаніе святое не забороняет, слухачу православный. Наступовали негдысь невинне мадіанитове на люд ізраилскій, хотячи их мечем искоренити, жены, чада, братію, и пріятелей и вес их набыток выгубити албо в неволю забрати; щож рекл на он час бог до Моисея гетмана их? — казал абы войско як найрыхлЂй собрал и войною ся так окрутному и страшному непріятелеви одоймовал... Чи можетже быти окрутнЂшій и страшнЂйшій нам непріагель яко турчин, который хотячи отчизну нашу милую до конца спустошити, церкви божій сплюгавити, в мечеты албо стайнЂ обернути, жены ваши, чада ваши, братію и приятелей ваших и всЂх нас албо мечем выгубити, албо в неволю запровадити. Якож ся так окрутному и страшному непріятелеви спротивити маете, если не войною? взявши теды себЂ бога в помощ и пресвятую богородицу, ополчитеся за братію вашу, сынов ваших, и жены ваши, и домов ваших.

Чтобы вас до росправы военной з тым окрутным и страшным непріятелем порушити могло, о том до любви вашей сіе слово мЂти желаю.

Презацное христіанское воинство, д†речи набарзЂй вас порушити и сердца ваши запалити могут к мужественной роспра†военной з тым окрутным бисурмянином на нас невинне наступуючим. Першая — честь божая, другая — любов отчизны. Что ся ткнет чести божей, за тую так мужественно ставати повиннисте, же хочбы пришло и здорове свое тратити, з пляцу непріятелеви не уступовати, уважаючи тое, же такового воина бог в небЂ несмертелною вЂнчает славою...

Ей презацныи войнове, если коли яко тепер мужайтеся и да крЂпится сердце ваше противно того непріятеля, подвизайтеся з ним до смерти, поистинЂ (то ест за честь божую, за вЂру святую, за церкви божій) и господь бог поборет по вас. Припомните себЂ Константинов великих, Феодосіев, Іракліев и их гетманов, яко ся они за честь божую и вЂру православную з непріятелями потыкали, яко свой живот, свое здорове в небезпеченство непріятелское подавали; припомните себЂ своих стародавных продков, гетманов, полковников, сотников, асаулов и инших молодцов добрых, запорожцов, яко з тым поганином отважне морем и полем валчили, яко их за помощію божею и пресвятой богородици звЂтяжали, яко их много на пляцу клали, яко много в неволю брали. МЂйте надЂю в богу, же и вы их звЂтяжите, поневаж справедливе, бо за честь божую, за вЂру святую, за отчизну милую, за себе самых, за жены своя, за чада и за братію свою противно того выправуетеся непріятеля. Если в силЂ божей дуфаючи споткатеся з тым непріятелем, вЂруйте, же господь немощна сотворыт того супостата нашего..., дасть крЂпость благочестивому царю нашему и вознесет рог его.

Что ся ткнет отчизны, и тои любов мает сердпа ваши порушити до мужественнаго потканя ся з тым непріятелем креста Христова.

Чтож албовЂм в мірЂ сем может вам быти милшого над отчизну? Если милое ест вам здравіе, если милые жены, чада, братія, отчизна далеко милшею быти повинна; бо она вас уродила, она вас выховала, она вас всЂми добрами збогатила, що выражаючи еден з ораторов римских так мовит: над отчизну ничого сладшого, ничого милшого в животЂ быти немает (Цицерон). Милы суть чада, ближній и знаемыи, але всЂх єдина отчизна обоймует, за которую кто з добрых умрЂти не восхощет, если ей пожитечным быти мает?

Кгды бы вас кто запытал презацныи и отважныи войнове: что вас порушило по чести божей, же оставивши домы, жены, чада, братію, сестры и други, оставивши вси роскоши домовые, з такою отвагою здоровя своего выправуетеся на того непріятеля креста Христова? речете вси згодне: любов отчизны. Гды бы кто запытал, кто вас провадит на такіе небезпеченства военные, на острые джиды, мечи, шабли и стрЂлы поганскіе? иначей не речете: тылко честь божая и любов отчизны. Отважайтеж теды здоровье на вси военные припадки за милую отчизну вашу; засланяйте ю от куль, от стрЂл, от копій и шабель поганских, як муром нЂяким персями вашими рицерскими, если хочете блаженства вЂчного и славы не смертелнои на земли и на небЂ доступити; бо мовит єден з істориков: Блаженній, которыи колвек бьючися за отчизну звЂтяжцами стаются; оным албовЂм барзо веселый день засвЂтит; блажени теж и тыи, которыи на пляцу полЂгают, албовЂм вЂчнои памяти над всЂ богатства зацнЂйшеи доступят (Ксенофон, О справах греческих, книга 2).

Кому ся за честь божую и за отчизну милую трафит на пляцу умрЂти, люб от кулЂ, люб от шабли, люб от копій, албо иншого якого воєнного оружія; таковый нехай будет певен великои награды в небЂ, бо мовит сам Христос: иже погубит душу свою мене ради, сей спасет ю... Єсли бовЂм тыи, которыи оставуют дом, отца, матер, жену, чада, сестры, братію для любви Христовой, а жіют в убозствЂ, не выдаючи здравія своего на так видомые розные небезпеченства, сторицею в небЂ пріймуют, щож розумЂти о себЂ мают тыи, которые оставуют дом, отца, матер, жены, чада и братію, а для любви и чести божеи, для любви отчизны самых себе выдают на розмаитые смерти? тыи заправды двоякую в небЂ от Христа пріймуют сторицу, єдну рицерскую, а другую мученическую. Сторица мученическая ест палма, яко Іоан святый в апокалипси выразил: видЂх и се народ мног, єгоже изчести никтоже возможе, стоящ пред престолом и пред агнцем облечены в ризы бЂлы, и финици в руках их... Где през народ мног никто иншій не разумЂетеся тылко мученикове, яко там же єден от старец рекл до святого Іоанна: сіе сут иже прійдоша от скорби великія, и испраша ризы своя, и убЂлиша ризы своя в крови агнчей. Сторица рицерская ест вЂнец правды, о котором мовит Павел святый: подвигом добрим подвизахся, теченіе скончах, вЂру соблюдох прочееже отложимися вЂнец правды, егоже отдаст ми господь в день праведный судія: не токможе мнЂ, но и всЂм возлюблшим явленіе его...

Пишут історикове о Помпеюшу великим: той так велце себЂ важил цЂлость отчизны, же за ню живот свой и здорове свое в великіе морскіе подал был небезпеченства; ато з такси оказіи: трапиледного разу великій недостаток хлЂба Рим, отчизну его; он хотячи ю в том ратовати нещастю, для набытя збожя розного сам пущается окрутом до Африки, Сардинія и Сициліи; где гды ведлуг потребы набыл збожя, а споро поспЂшалъся до Риму, повстанут великіе навалности на морю; кажет кормником, абы окрут от берега отвязовали и Ђхали; не хотят для небезпеченства морскаго. Щож любячий отчизну Помпеюш? сам першій входит в окрут, подносит котвицы и мовит до жегляров: абысмо жегліовали, вытягает по нас того потреба, ажебысмо жили — не вытягает. През что давал знати Помпеюш, иж кгды в яком небезпеченст†зостает отчизна, теды кождый цар, князь, гетман повинен борзЂй взгляд мЂти на отчизну свою, нежели на власный свой живот и здоровье...






ПРИКЛАДЫ


Цар един мЂл д†дщеры. Една была барзо сличнои уроды и всЂм милая, другая чорная и всЂм непріемная, з которых цар першой дал имя Розимунда, другой Граціа плена, то ест ласки полна. Тыи гды доросли лЂт, цар выправует посланца, абы по всем панст†его извЂстил, жебы до дщерій его, кто бы был годный удавался в зальоты, тое придавши, же кто колвек піенкную дщер на имя Розимунду поймет, нЂчого болш с нею не озмет, опроч піенкности; кто зась поймет чорную, которая ся называет Граціа плена, то ест ласки полная, на того по смерти его все царство спадет. Что многіе слышачи до двору царского приижджают, а, видячи д†дщеры, вси ся до Розимунды, яко піенкнои, скланяют и за жену еи просять. А Граціа плена, то ест ласки полная, видячи тое, же оною погоржают и очи свои от неи отвращают, почала ревливе плакати и на недолю свою нарЂкати. До которои рекл отец: о дщеро моя! для чого бы так жалостное было сердце твое? Аж она отповЂдает: о наймилшій мой отче! для того естем жалосною, же жодного немаш, который бы мене навЂдил и зо мною мовил, вси до сестры моеи Розимунды удаются, а мною, же естем чорною и на твари шпетною, погоржают. Речет до неи отец: о дщери моя милая! азаж не вЂдаеш, же вся моя твоя и кто тебе себЂ поймет в жену, царство мое одержит. Она тым змоцненая зоставши, от плачу престала. Потом приЂхал един цар а, обачивши Розимунду, просил онои за жену тылко з піенкностю, болш ничого не потребуючи. Позволил отец и з радостю дал ю ему в жену. Потым приЂжджает един гетман, але убогій барзо, мыслит, же любо дщер его другая ест чорная, леч, уважаючи тое, же кто колвек оную за жену себЂ поймет, все царство с нею одержит, идет смЂле до царя и просит, абы ю ему дал в жену. Отдал цар з веселіем и, гды сам умерл, все царство его ему зостало.


(Із «Gesta Romanorum» — в збірнику «ВЂнец Христов», 1688 р.).




Был еден император, который в оборЂ своей мЂл слоня, до которого жаден з дворян его не смЂл приближитись. Послышавши то, император бадался 1 от философов, что была за натура слоня. ОтповЂдили, же слонь кохается барзо в чистых дЂвах и спЂваню. Император зараз росказал, абы шукали в всем его панст†что найпіенкнЂйших и найчистших двох дЂв, до того спЂвати умЂючих. Гды знайдено, припроважено их до царя. Казал цар, абы, обнажившися, до обори войшли, една з мЂдницею, а другая з мечем вступила, а входячи, піенкные и весолые спЂвали пЂсни. Услышавши то, слонь пришол до них и перси их почал лизати; а дЂвы поты спЂвали, аж ся слонь на лонЂ единой уклал девицы. Девица другая, видячи слоня успокоившагося на лонЂ товаришки своей, забила его мечем; оная зась, наполнивши мЂдницу кровію слоня, приходит до царя. Цар, увеселившися, зараз все казал, что колвек было в палацу, кровію почервонити.


(Із «Gesta Romanorum» — в збірнику «Огородок», рукоп. 1671 р.).




Пишет един з историков о двох славных купцах, которыи, в доброй з собою жіючи пріязни, куплями себЂ выгажали, един в ЕгиптЂ мешкал, другій в Балдаху; той до Египту ся выбрал, где от пріятеля своего з охотою принятый, утЂшенный и обдарованный зостал. А гды там тыжден промешкал, уподобал себЂ дщер его и просил, абы оную дал ему за жену; на що он господар барзо охотне призволил, выдал за него и з достатным посагом до дому выпровадил. Трафилося потом, же той купец в ЕгиптЂ все стратил и нощію до Балдаху на полы нагый и голодный крыемо уйшол. И гды до еднои входил церкви, нападает на него страж мЂйская, которая едного забойцы шукала, и зараз его порвали и обвинили. Он теж, хотячи конец своеи нендзы мЂти, признался до забою, и, гды его на завтрее на смерть проважено, ов пріятель его поуфалый 2, который за собою мЂл дщер, з иншыми на дивовійско выйшол и, обачивши пріятеля своего в тяжком разЂ, крикнет на оправцов 3: потерпЂте, нЂчого той невинен, ям его забил. И зараз той пойманый. Аж там же власный забойца, задивившися тому, сумненьем порушоный, заволает: «ей, слухайте, ям власный забойца». Ставши теды, судіе кажут его взяти и з двома уволнеными провадити до царя, который, правды дошедши, задивился так стислой пріязни и обох поступок похвалил, а винному каранье отпустил. А оный купец з Балдаху зубожалому своєму пріятелеви половицу добр своих удЂлил и до отчизны его выпровадил.


(Із «Gościńca Dzielowskiego» — в збірнику «ВЂнец Христов», 1688 р.).



 1 дізнавався 2 близький 3 катів













Див. також:
Антоній Радивіловський. Слово 1-е часу войни. Українська література XVII ст.
Байки в українській літературі XVII-XVIII ст. Київ, 1963.










Попередня         Головна         Наступна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.

Iзборник. Історія України IX-XVIII ст.