Головна




ГЕРАСИМ СМОТРИЦЬКИЙ

[Перша передмова до Острозької біблії 1581 р.]

Предсловіе к благовЂрному и православному всякаго чина, возраста же и сана читателеви...

Ключ царства небесного







[ПЕРША ПЕРЕДМОВА ДО ОСТРОЗЬКОЇ БІБЛІЇ 1581 р.]


Боже 1 отче вседержителю, превЂчный, пребезначалный и всесилный. Єдін имЂяй бесмертіє и в свЂтЂ живый неприступнім, вЂдый вся прежде бытія єго. Всяческая бо сам твориши, якоже хощеши, словом повелЂнія твоєго. Ты вЂси, господи боже мой, єдін свЂдый сердечная, яко во твоє пресвятоє имя умыслих и начах сіє пречестноє дЂло, єго же нынЂ твоєго мілосердіа благоволенієм и щедротами сподобихся видЂти совершеніє. Сего ради благодарю и величаю твоє пресвятоє имя и преклоняю колЂнЂ мои, руцЂ воздЂвая страшныя власти твоєя пресвЂтла подножію.

Величеству же неизреченныя славы твоєа сіє дЂло предлагаю; дерзнух бо на се, уповая милосердію твоєму. ВЂдый, яко неудобно человЂком спастися, токмо храненієм заповЂдей твоих с вЂрою. Их же роду человЂческому благоизволил єси предложити и возвЂстити божественным своим и всесвЂтлым писанієм. Єже благоволи нынЂ пріяти от мене, грЂшнаго и умаленаго раба твоєго, твоя бо от твоих яко воистинну тебЂ приносятся.

Все бо єже дал ми єси, боже мой, твоє єсть, якоже и аз. И аще за немощь прегрЂшеній моих и мнЂ повинующихся дЂлателей недоумЂнієм укратися или приложися, или отмЂнися, сам исправи своим благоволенієм, дЂйством пресвятаго твоєго духа. ТЂми они же болших дарованій по достоянію своєму от тебе сподобишася, да всЂми согласно славится твоє великолЂпноє и пречестноє имя купно с єдінородным ти сыном и всесвятым, и благим, и животворящим духом твоим. Аминь.

Вам же, о ХристЂ избранным прежде вЂк по предувЂденію вечнаго бога в народЂ руском сыном церкве восточныя и всЂм согласующимся языку словенскому и соєдиняющимся тояжде церкве православію, всяческаго чина христоименитым людєм аз Константан, нареченый во святом крещеніи Василіє, благодатію божією княжа Острозскоє, воєвода кієвскій, маршалок земли волынскоє и прочая, братіи возлюбленой не точію єже по плоти, но и под Христу святыя всЂм повсюду православным с любовію се возвЂщаю, яко благоволенієм, щедротами и человЂколюбієм божіим сподобихся начало положити и совершеніє видЂти дЂла сего честнаго и вся превосходящаго.

Єже вам нынЂ повсюду предлагаємо зрится, книги обоєго завЂта, глаголємыя греческим языком Вивліа, вся по ряду напечатана, в богоспасаємом и домоначалном градЂ моєм ОстрозЂ, в земли волынской, в лЂто от созданія мира 7089, от воплощенія же от духа свята и Марія дЂвы вочеловЂченіа Христа Спаса нашего 1581 месяца августа 12 дня. Єже пріємше не яко вещи человЂческіа, но яко свыше сходящеє дарованіє духовноє, путь прав своєго спасеніа изобрЂтайте. Изволившему же вам сіє видЂти, хвалу и благодареніє воздавайте.

О нашем же изволеніи, иже вашей ради любве и душевныя ползы нЂкогда предумыслихом, не хощу да не разумЂєте, помянух бо глаголы господа бога и спаса нашего Исуса Христа, яже рече: «ИщЂте прежде царствія божія и правды єго, и сія вся приложатся вам». ТЂм же вожделенієм желах прежде даже не отиду вашему благочестію нЂкоє дарованіє духовноє оставляти, в нем же царствіє божіє и правду єго хотяще обрЂсти возможете.

И о сем всегда бога благодаряще память творите. Внегда бо видЂх церковь Христову честною єго кровію искупленную от клятвы законныя, отвсюду врагы противящимися попираєму и нещадными волки, пришедшими в мир, без милосердіа пожираєму. ТЂм же поминах словеса пророческая, яже нЂкогда и господь наш Исус Христос рече:

«Жалость дому твоєго снЂсть мя».

Кто бо єсть от благовЂрных и благоразумных, єго же неподвиже жалость, зряще ветхость церкве Христовы на паненіє клонящуся? Или кто не смирится и не смутится, видя виноград, богом насажденный, єго же обимают вси, мимо ходящеи, путем разоренія ради оплотов єго и поядаєт и инок дивій, и вепр от луга озоба и ини? Кто же может стати противу ярости єго скудости ради духовныя броня, єже єсть слово божіє? Или кто не умилит сердца своєго и не плачется, зряще разореніє церкве Христовы и испровержену хвалу єго и яко волци тяжцы нещадно расхищают и распужают овчеє стадо Христово? Различныя бо сопостаты и многообразныя лукавства обстоят ны.

Сего ради не аз, рад господа моєго, сотворих се, но всесилнаа десница єго состави, не по достоянію бо моєму ни на силЂ подвига моєго, но по благоволенію милосердіа своєго, славы ради прехвалнаго своєго именє и нашего ради спасеніа, владыка мой Христос изволи сія вся. Начало же нашего дЂйства — се єсть произволеніем бо всесилнаго бога. Он же рече ис тмы свЂт восіяти, иже всіа в сердцех наших ко просвЂщенію разума славы божіа о лици Исус ХристовЂ.

ТЂм же желанієм возревновах на дЂло сіє. И разумЂх, яко се не бысть от плоти ни от крови, яко в похвалу плотьскую, но благодатію и человЂколюбієм божієм да писаніє исполнится. Яко нЂсмы доволни єже от себе что добро творити или мыслити. Но довольство наше от бога. Да не похвалится всяка плоть пред величествієм прєсвятаа славы божія. Но и аще хвалится, в богу да хвалится.

Обаче ни дЂла зачати ниже дЂлателей єже творити на сіє изобрЂтохом. Ибо и книг, глаголЂмых Вивліа, взвод сего дЂла начальством не имЂхом, дабы нашему изволенію к начальству сего содЂянія во всем была доволна. Но во всЂх странах роду нашего языка словенскаго ниж єдіна обрЂтеси совершена во всЂх книгах Ветхаго завЂта, токмо от благочестива и в православіи изрядно сіателна государя и великаго князя Іоанна Василієвича 2 Московскаго и прочая. Богоизбранным мужем Михайлом Гарабурдою 3, писарем Великаго князства Литовскаго, с прилЂжным моленієм испрошеную сподобихомся пріати совершеную Вивлію з греческа языка седьмдесят и двЂма преводники множає пяти сот лЂт на словенскій преведеную 4 єще за великаго Владимера, крестившаго землю рускую. Таже и иных Вивлій много изобрЂтохом различных писмен и языков и сих слЂдованієм испытати повелЂхом, аще вси согласуются во всем божественном писаній. И обрЂтеся многоразлично, не токмо разнствія, но и развращенія, чего ради веліє смущеніє пріяхом. Ко сему же наважденієм исконы противника всякому добру діавола, много разорителей и хулников сея преславныя и неизреченныя вещи показовашеся. Помощников же и зидателей велми мало.

Се же все увЂдЂх извЂстно в удивленіи и размышленіи бЂх велицЂ, непщая, яко неудобно сіє дЂло пресвятоє совершитися может вин ради сицевых. И се размышляя в сердци своєм, аще дЂлати, или престати. По сем же худшеє размышленія моєго богу тако хотящу покорити изволих лучшему, вЂдый, яко єже человЂком мнится невозможно, сіє богу дЂло удобно. Идеже бо хощет той, побЂжаются и єстества чинове. И сего неумЂнною вЂрою и умыслом мужественным ємшися подвигнути крЂпко потщахся, глаголя с Давидом: «Коль сладка гортани моєму словеса твоя и паче меда устом моим. И благ мнЂ закон уст твоих паче тысячу злата и сребра».

Сего ради посланьми и писаньми своими много стран далеких вселенныя проходя, яко римскія предЂлы, тако и

Кандійскія островы 5, паче же много монастырей грецких, сербских и болгарских, даже и до самаго апостолом намЂстника и всея церквє восточныа строєнію чиноначалника пречестнаго Ієремія 6 архиєпископа Константина града, Новаго Рима 7 вселенныа патріарха высокопрестолныя церквє доидох, требуя с тщанієм и моленієм прилежным тако людій, наказаных в писаніах святых єллинских и словенских, якоже изводов добрЂ исправленных и порока всякаго кромЂ свЂдительствованных.

И сицевым всесилный бог по обычной своей благости сподобити ми ся благоизволил. Книг бо и книгочій, якоже предречеся, настоящему дЂлу пресвятому по достоянію изобрЂтох. С ними же купно и с инЂми многими наказаными добрЂ в писаніах божественых доволно совЂтовав и с общим совЂтом і изволенієм єдіномысльным звод древняго писанія славнаго и глубочайшаго языка и писма єллинскаго от ов блаженных и богомудрых преводников на умоленіє желаємоє книгорачителя Птоломея Филаделфа, царя єгипетска, от языка єврейска во єллинскій преведеную 8 избрах. Она же паче инЂх множає со єврейскою и словенскою соглашашеся и сего во всем неизмЂнно и несуменно послЂдовати повелЂх. И нынЂ же благодатію и щедротами бога вседержителя совершеніє сподобихся видЂти. Єму же сіє пресвятоє дЂло с благодаренієм и молєнієм предлагаю, яко всевидцу и содЂтелю жизни нашея.

Потом же, вам, благочестивым и православным христіаном повсюду, єже пріємлите не яко вещи земныя, но яко дарованіє небесноє творяще и храняще вся заповеди господня непорочны. Да сподобится достигнути во вЂчный єго покой неприкосновенныя славы, идеже будет житіє всЂм вЂрующим во имя господа бога и спаса нашего Исуса Христа и возлюбившим хвалноє явленіє пришествія єго. Єму же буди честь и слава, царство и держава и всяко поклоненіє на небеси и на земли с безначалным єго отцем и пресвятым благым и животворящим духом. НынЂ и всегда в безконечныа вЂки. Аминь.

Во град крЂпок невозможно вийти, раз†враты, и во двор овчій не достоит входити, токмо дверми. Тако и всяк хотяй внити в сей град царя великого и во двор овец пастыря небеснаго, божественнаго Писанія, подобаєт входити искусно со тщанієм, вземше ключ совЂсти с вЂрою, сквозь двери сего предсловнаго возвЂщеніа. Да явится гражданин небесный и овца, знающа глас пастыря своєго. Инакоже входящих како именует Писаніє.






ПРЕДСЛОВІЄ
К БЛАГОВЂРНОМУ И ПРАВОСЛАВНОМУ ВСЯКАГО ЧИНА, ВОЗРАСТА ЖЕ И САНА ЧИТАТЕЛЕВИ...


Испытайте Писанія, яко вы мните в них имЂти живот вЂчный, и та суть

свидЂтельствующа о мнЂ (Іоанн, 5; зач. 16).

И паки: Могій вмістити, да вмЂстит (Матвей, 19; зач. 78).

И єще: Не всяк глаголяй ми: «Господи, господи!» внидєт в царство небесноє, но творяй волю отца моєго, иже єсть на небесЂх (Матвей, 6; зач. 23).


Сія три кормилца корабля Христова, о благочестивий читателю; пускающеся на море неислЂдимыя пучины божественных и всесвЂтлых обоєго завЂта Писаній, потреба в мысленных руках опасно и крЂпко содержати и невещественными зЂницами не помизая назирати, да коєждо от них настоящеє себЂ строєніє неизмЂнно содержит, хощем ли избавитися треволненія противних вЂтров єретическаго ухищренія, самомнителныя прелести антихристова дЂйства, нераденія же и небреженія с унынієм свободитися самоволнаго недуга и достигнути во пристанище горняго Ієрусалима, молящеся прилежно морем и вЂтры обладающему. Аминь.

...СодЂтель закону и всяческим творец Христос, єдино сый с отцем и святым духом, сЂдяй одесную престола величествія на высоких, о нем же имамы избавленіє кровію єго и оставленіє грЂхом, иже єсть образ бога невидимаго, перворожден всея твари, яко о нем быша всяческая, яже на небеси и яже на земли, видимая и невидимая: аще престоли, аще господствія, аще начала, аще власти, всяческая тЂм и о нем создашася; и той єсть преждє всЂх и всяческая о нем состоятся; иже грЂха не сотвори, и лесть не обрЂтеся в устЂх єго.

Сего чистая и пречистая уста рекоша и повелЂша, возлюбленный читателю, испытовати Писанія и обрЂтати в нем живот вЂчный; и апостолом бо верховныи, вспоминая вЂру и спасеніє, рече: «О нем же спасеніє взыскаша и испыташа пророцы»; о сем же и скиптродержавный пророк, духа святаго исполн, се предваряя глаголя: «Вразуми мя, рече, и испытаю закон твой, не просто же, но и сохраню и всЂм сердцем моим».

Знаменай сія словеса с вниманієм и искусно разумЂй, и отверзи умныя зЂница сердца твоєго, и остави тщеславіє и самомнителноє мудрованіє. Земно, душевно и бЂсовско, не свыше сходящеє и о горняя мудрствующе, разумЂй словесем господним, яко не просто читати повелЂваєт, но и испытовати; испытавши же и сохраняти; могущая же вмЂстити, вмЂщати; не вмЂстимая же церкви с вЂрою предлагати, она же не обыче заблуждати; читаніє бо письменноє умерщвляєт, испытаніє же духовноє оживляєт; инакоже мудрствующе прелстишася мнози и на пути погибели сташа. Сіє же молю, да никого же от чтущих и слышащих ожестит; не ко всЂм бо речеся, но токмо к ненаказанным и неутвержденным, приникшим закону господню утро, в вечер же учителми зватися изволяющим; искусных же и благоразумных в писаніах божественних и в добродЂтелєх прилЂжно молю, да и аз, недостойный, от них наказан и исправлен буду.

Якоже во здравіи не требуют врача, тако и искусніи сицеваго возвЂщенія; но понєже не вси искусни, ниже вси читают с испытанієм и вниманієм, от них же и заблудиша мнози, аще убо невЂрующим повелЂ Христос испытати Писанія, обличая их безуміє и слЂпоту, яко. без рассужденія духовнаго читают телесне; мнят в писаніях живот вЂчный имЂти, неразумієм же писаній живота отмЂтаются, глаголет бо: «И та суть свидЂтельствующа о мнЂ, сирЂчь о животЂ вЂчнЂм», яко же и инде рече: «Аз єсмь путь, и истина, и живот», и «вЂруяй в мя, имать живот вЂчный».

Аще же они в ВетхЂм сЂннем писаній, неразумієм помрачени суще, мняще живот имЂти, не вЂдят живота вЂчнаго, обличаєми от живота и укоряєми от живота являются.

Кому уподобятся сій, иже в новій, паче солнца сіяющей благодати тщеславієм и самомнЂнієм ослєпше, Христа єдиносущна и сопристолна отцу же и святому духу, преждє всЂх вЂков сущаго, прелщенных ухищренієм под лЂты токмо и тварію злохулно с Арієм 1 исповЂдати дерзают на соблазн неутвержденым, на свою же погибель? О нем же убо угль горящь в уста пріємый пророк 2, духом провЂдив, ясно предвозвЂсти, глаголя: «Яко отроча родися нам сын и дасться нам. Єму же власть на рамЂ єго и миру єго нЂсть предЂла. И нарицаєтся имя єго велика совЂта ангел, чуден совЂтник, бог крЂпок, владыка, князь смиренія, отец будущаго вЂка, єму же с вЂрою царіє дары принесоша, яко страшному и отемлющему духи князем, и страшному паче царей земных».

О нем же и восхищенный пречюдно до третіяго небесе, достовЂрен свидЂтель и божественних тайн сказатель великій, слышавый тамо неизреченныє глаголи, их же нелЂп єсть человЂку глаголати, сей, увЂряя и утверждая церковь господню, к Тимофею 3 сице написа: «Воистину велія єсть благочестія тайна: бог явися во плоти, оправдася в дусЂ, показася ангелом, проповЂдан бысть в языцЂх, вЂрова же ся в мирЂ, вознесеся в сла※.

Єдін же от обоюнадесяте, глаголемый близнец, по смотренію божію не обрЂтыйся с ученики, єгда видЂша господа. По осмих же днєх паки явися им Христос, хотя и сего увЂрити, паче же нас, и рече: «Мир вам!», потом глаголя ФомЂ 4: «Принеси перст твой сЂмо и виждь руцЂ, и не буди не вЂрен, но вЂрен».

Он же осязав и рече: «Господь мой!» Єже рече: «Господь мой» — челозЂческоє єстество показуєт, а єже рече: «Бог мой» — божественноє существо являєт; єдинаго же того господа и бога исповЂдует Фома: господа бо виденієм с осязанієм, бога же смышленіем с вЂрою; псаломски глаголя: «Бога взысках рукама моима и не прелщен бых».

Почто не отвЂща єму Христос, по суємудрЂных злоумію: «Что мя глаголеши бога, никто же бог, токмо єдин, иже на небесЂх». Но сіє от него прієм, яко єдиносущен отцу, и рече предстоящим ему учеником: «Яко видЂв мя, вЂрова; блажени невидЂвшеи и веровавшеи», сирЂчь якоже ты вЂрова и исповЂда.

Обаче, православный читателю, не свыше прищепленная отрасль, не испытуя Писанія, но яко удицу прелести восхитив, предлагаєт ти слово Христово, иже вопросившему юноши, отвЂща: «Что мя глаголеши блага? Никто же благ, токмо єдин бог».

И сим словесем и иными, сему подобными, повреждаєт умы неутвержденых, хотя уловити в свою козноплетенную пленницу.

О безумія, о помраченія, о піянства неистрезвенного, не токмо не рассуждая словес господних, но и несогласна сего творит: тамо, бога себе исповЂдающа, Христос пріємлет, здеже отрицаєт благость; не самоє ли помраченіє во тмЂ ходящих неразумія?

Инако бо Христос отвЂщаваше вЂрующим по вЂрЂ, инако же невЂрующим и невЂдущим :по невЂдєнію: сей убо яко человЂка проста мня глаголет: «Учителю благый!».

Христос же, вЂдый сердце єго, яко создавый є, невЂденієм и сребролюбієм, иже єсть всему злу корень, помрачено, обличая єго невЂденіє и неразуміє, глаголет: «Никто же благ, токмо єдин бог».

Фому же, яко апостола благоразумна, бога себе исповЂдающа, пріємлет, вЂдый, яко от всея душа и от всего промышленія с вЂрою несуменною се творит.

Что бо удобіє: пріяти бога, себе исповЂдующаго, или отрещи блага, себе глаголющему? Сіє же слово не токмо богу, но и человЂком, боящимся єго.

Сам Христос обще творит, глаголет бо пріємшим таланты и сугубо отдавшим: «Благай рабе, добрый и вЂрный», и прочя; Давид же: «Благ муж, милуяй и даяй».

Христос ли, по их суємудрію, в словесєх своих не согласуєтся, или они? Да не будет; Христос бо истинная правда глаголет: «Небо и земля мимо идет, словеса же моя не мимо идут»; но «Сій воистинну ходящеи во тмЂ и не видящеи свЂта, лжа отца имущеи, и сынове лжи обрЂтаєми являются».

Что же болше требовати имамы, взысканія, или свидЂтелства от писаній, паче предлежащего и єму послЂдующаго, иже дух святый, истынная премудрость, в Ветхом и Новом завЂтЂ єдинЂм писанієм божество Христово я†возвЂщаєт.

Пророча бо словеса апостол заємлет, благодати божія богатно паче инЂх сподобивыйся, жиды увЂряя, в свидЂтельство истинноє сія предлагая, глаголет; к сыну же рече: «Престол твой, боже, во вЂки вЂка, жезл правости, жезл царствія твоєго, возлюбил єси правду и возненавидЂ беззаконіє; сего ради помаза тя, боже, бог твой єлеом радости, паче причастник твоих».

И паки: «Ты в началЂ, господи, землю основа и дЂла руку твоєю суть небеса. Та погибнут — ти же пребываєши; и вся, яко риза, обветшают, и яко одежду свієши я, и измЂнятся, ты же тойжде єси, и лЂта твоя не оскудЂют».

Видиши ли, яко пророча словеса апостол во увЂреніє жидом предлагаєт, и многи в познаніє истинни настави? Не боголиборци суть и жидом невЂрующим равни?

Сим противящейся сам же сын, бог сый истинен, отцу же и святому духу єдиносущен, учителей закону вопрошая, глаголет: «Что ся вам мнит о ХристЂ, чій єсть сын?»

Они, яко же и нынЂшніи богопротивницы, отвЂщаша от писаній телесне, глаголюще: «Давидов». Христос же их духовне испытуєт, сице бо рече им, како убо Давид духом господа єго нарицаєт, глаголя: «Рече господь господеви моєму: «СЂди одесную мене, дондеже положу враги твоя подножіє ногама твоима». Аще убо Давид нарицаєт єго господа, и како сын єму єсть. И никто можаще отвЂщати єму словесе.

Тако и ты, православный читателю, духовне отвЂщай от Писаній божественных — и нЂмы будут вся усты льстивыя, глаголюща на праведнаго сына божія хуленію гордынею и уничиженієм, яко сын Давидов єсть под лЂты и тварь кромЂ существа божественного.

Сего не хотяще разумЂти, самомнивіи и превозносящеися на разум божій, яко земных ум небесныя тайны не совЂсть, ни тварь творча разума домыслится. Преходит бо ума человЂча от дЂвы рождаяся господь, якоже сам рече: «Никто же вЂсть, кто єсть сын, токмо отец, и кто єсть отец, токмо сын, немуже аще хощет сын открыти».

Се же и блаженный апостол 5 неплотским умом разумЂвая, от Исаина пророчества прієм, глаголет: «Пріидєт от Сіона 6 избавляяй, и отвратит нечестіє от Іакова 7; и се им от мене завЂт, єгда оттиму грЂхи их».

По сем же како се устрояєт и творит, неислЂдимым судбам божіим удивлься, возопи: «О глубино богатства и премудрости, и разума божія, яко неиспытани судове єго, и неизслЂдовани путіє єго! Кто бо разум ум господен или кто совЂтник єму бысть», и прочая.

Аще убо инаго свидЂтельства о сем много от писаній божественних привести бы могло ся; но понеже предсловноє сказаніє необыче долготы словес вомЂщати, сего ради, єлико можно, вкратцЂ предложися и се, яко бы нЂчто мнится странно вещи предлежащей в звЂщенію божественных Писаній обоєго завЂта.

Но понеже не вЂм, аще кому нЂсть явно, кто в настоящеє се время послЂднєє, по грЂхом нераденія и ненаказанія нашего, розгорЂся великій пламень злохитрых и многоглавных єресей, помалЂ по временєх вступающих злохулно на преданія церковная, от єдиная на єдину, даже и до самыя главы церкве пріидоша, вся древняя обновляюще началник своих єреси, таже и в єдинст†свЂтозарно по вселеннЂй славймого трехсоставного божества коснутися дерзнуша.

Но яко сЂно огню постоит и яко нога камень претыканія вредит, тако тій сего гонзнути могут и исчезнут бо, и погибнут по образу началник своих. Обаче прежде нам подобаєт явитися искусным в вЂрЂ и добродЂтелєх по преданію церковному, на нас бо, нынЂ в нераденіи сущих, сбысться апостолскоє слово, иже глагола: «Подобаєт и єресєм в вас быти, да искусніи явятся».

Сего ради, православный читателю, видяще толик облежащ ны облак ругателей различных и многохулных супостат, неискусных же и неутвержденных, паче же незлобивих, мнящих истинную вЂру обрЂсти, толь велико поползновеніє и сицевыя ради вины сія предложися.

Понеже врачем достоит с прилежанієм прилагати пластир тамо, идеже єсть телесная язва; воином же воздвизати оружієи ополачатися крЂпко тамо, идеже єсть супостатная брань; строителем же корабльныи искусство хитрости своєя показовати во время зимы и бурнаго противленіа — тако и нам достоит, вся чувствія наша очистивше и облекшеся во вся оружія божія, зрЂти и обращити тамо, откуда діавол, рыкая, яко лев, приходит, искій церковь божію растерзати, ополчатися и бранити мужественно, повинующеся под крЂпкую руку божію, и ничто же нас вредити может.

Тебе же вторицею молю: не прогнЂвлися, мой сверстнику ненаказанный добрЂ и неутвержденный, рече бо божественный пророк: «Коль сладка гортани моєму словеса твоя, и паче меда устом моим».

Ты же, читающе сладость божественних Писаній, блюди удицы снЂсти самозаконныя прелести, многи бо суть бЂсовскія козни и прелестнича соблазны, умякчают бо словеса своя паче єлея, и та суть стрЂлы; но поминай слово Христово, иже глаголя: «Могій вмЂстити, да вмЂстит»; не єдино бо дарованіє духа святого всЂм дасться, но помЂрЂ; ты же, єлико можеши, вмЂщай, плотски же не высокомудрствуй; плотскоє бо мудрованіє смерть єсть, и мудрованіє духовноє — живот и мир; суть бо в писаніях неудобразумна нЂкая, яже ненаучени и неутвержденни развращают к своєй погибели им.

Но паче проси от дающего всЂм премудрость духовную, и тебЂ дасться; токмо читай прилЂжно, ревнуя ученію; послет бог Филиппа, якоже иногда силному євнуху, в наставленіє твоє церковного благочестія, и преданія без сумненія крЂпко придержися и яже в неи добродЂтели наслЂдуй; начало же всеи премудрости имЂй выну в сердци, иже єсть страх господень и разум благ всЂм творящим, и в нем же вся заповЂди исполнети можеши.

Учителем бо немногим подобаєт бывати и сим прежде самЂм творити, таже инЂх учити заповЂдано. Сам бо учителєм началник рече: «Врачу, себе исцЂли».

Тако же и неслышателє закону правєдны пред богом, но творци закону сій оправдятся. И паки, бывайти творци закону, а не точію слышателє; сих бо токмо Христос блаженством почте, иж слышат слово божеє и хранят є.

Пророк же клят†предаст всЂх уклоняющихся от заповЂдей господних, якоже и пако рече: «ВидЂх неразумЂвающая и стаах, яко словес твоих не сохраниша». Сам же, благочестивый образ показуя и творя, глаголет: «Вразуми мя і испытаю закон твой, и сохраню всЂм сердцем моим», И паки: «Милость же господня от вЂка и до вЂка на боящихся єго и правде єго на сынах сынов, хранящих завЂт єго и помнящих заповЂди єго, творити я».

Якоже и самоє єство учит ны и повеленіє Христово понуждаєт: «Иже аще кто вЂсть волю господина своєго, и не творит, болшеє осуждєніє пріємлет, нежели невЂдущій».

ОтраднЂє убо будет, спас рече, содомлянам и гоморянам в день судный, нежели непріємшим слова божія. Пріємшим же и не сохранившим кольми паче. Или: кая отрада и о сем словеси прилежаніє и попеченіє тщися творити, иже апостолом верховным повелЂ готовом быти праведно к отвЂту всякому, вопрошающему вы, слово о вашем упованіи с кротостью и страхом, совЂсть имуще благу и прочая,

Можеши, ащели не умЂєши, скорб слышати, глаголати же косен, обаче ученію, єлико можеши, прилежи и проси от дающего премудрость и отвЂт благ.

Паче же и найпаче блюдися буих и ненаказанных стязаній, вЂдый, яко рождают свары; рабу же господню не подобаєт сваритися, но тиху быти ко всЂм, учителну и незлобиву, с кротостью наказующу противныя; скверных же тщегласій отмЂтайся, найпаче бо приспЂют в нечестіє. Блюсти же ся достоит от творящих распря и раздоры, таковыи бо господеви нашему Исусу Христу не работают, но своєму чреву.

БесЂд же злых о всем хранися, понеже тлят обычая благи; с преподобным бо преподобен, глаголя пророк, со строптивым же развращен будеши; бесЂды бо злы растлЂвают человЂком умы и лишают истины.

Ты же буди усерден на послушаніє божественних писаній и сих глаголы, яко водою, напаяй свою душу. Всяко бо писаніє богодухновенно, полєзно єсть к ученію, к обличенію, к исправленію, к наказанію, єже вправду. Да совершен будет человЂк божій и на всяко дЂло благоуготован.

И тщися, елико мощно, по сих творити, сим бо образом много наживеши лЂта и приложат ти ся лЂта животу, якоже и пророк рече: 8 «Кто єсть человЂк, хотяй живот и любяй дни видЂти благи, удержи язык свой от зла и устнЂ свои не глаголати лЂсти, уклонися от зла и твори благо».

Веліє воистинну обращеніє, и измЂненіє, и вЂчных благ приобрЂтеніє, аще кто уклонится от злого во благоє, от нечестія в благочестіє, от прегрЂшеніи в покаяніє, о сем бо и множество аггел радуются на небесЂх, о єдином, взискающимся от погибели грЂховныя, от смерти в живот, от истленія и неистленіє, от многообразных и многоразличных мук непрестанных в неизглаголанныя и присно пребываємая водворенія радости небесныя, их же око не видЂ, и ухо не слыша и на сердце человЂку не взыйде, яже уготова бог любящим єго.

Се же все ища, обрящеши, возлюбленный читателю, в предлежащих ти обоєго завЂта божественных книгах, єже всЂм твоєю руку творенію даруй получити, о многомилостиве, молимся прилЂжно, владыко, человЂколюбче, боже наш, яко твоє єсть благоволеніє всЂм человЂком спастися и в познаніє твоєя истины прійти. Аминь.

ВидЂх же многоразлично в писаннях иноя церкве и языка в сицевых предсловіах о зацности и пожитку слова божія пишущих много, аз же, многогрЂшный и недостойный, сего зацности и пожитку, сирЂч величіа и ползы, изрещи не могу, ин предсловному сказанію вмЂстити непщую, якоже бо основанія иного никтоже положити может, паче лежащаго, иже єсть Іисус Христос, тако и сего на нєм зиданія составити никтоже может, паче составленного, иже єсть божественноє писаніє Ветхого завЂта и Новыя благодати, подобно єсть морю, облежащему вселенную, от него же исходят вся моря и истЂкают различныя рЂки и источники напаяти человЂкы и скоты, и вся движащаяся по земли.

Тако и се море пучины неислЂдимыя объемлет и напаяєт не токмо вселенную, но вся превыспрЂняа и преисподняа; та и самого престола величествія касаєтся на высоких, єлико благоволит сЂдяй на нем, в славословіє своє, во спасеніє же наше; а єже се умолча, ум человЂч никакоже дерзнути может, иже бо слыша неизреченныя глаголы сей, яко сих нелЂт єсть человЂку глаголати, странно бо сыну огненноє прикосновеніє.

И яко же бог єсть, творяй аггелы своя, духи и слуги своя огонь палящ, тако и слово єго живо, и дЂйственно и острЂйше паче всякого меча обоюдуостра; и проходя даже до раздЂленія души и духу, членов же и мозгов, и судително помышленієм и мыслем сердечным; и нЂсть тварь, не явлена пред ним; вся же нага и объявлена пред очима єго; над злато ж, и сребро, и каменіє честно єсть дражайше, и сладчайше паче меда и всякия сладости.

Кратко же рещи, яко господин, такова и строєнія єго; потребуєт много похваленія, се бо само все благоє хвалит; разгни книги предлежащая и возри со страхом божіим и смиреною мудростію, и испытай божественная Писанія со вниманієм, не нерадиво и обращеши в коємждо листЂ величія и похвалу божественного Писанія, ползу же и путь прав своєго спасенія, и много различно вЂчных благ воспріатія возданіє. Сама бо правда являєт истину и обличаєт извЂстно противлящаяся єй.

Токмо чтуще, разумЂй и благодари прилЂжно изволившаго тебЂ видЂти се и не забывай достойна дЂлателя мзды своєя. Иже бо николи же никтоже мимошедших времен от царей и князей благочестивих таково сокровище, паче тысящ всяческих сокровищ мира сего, всЂм по чину предложити потщася и сподобися, яко в настоящеє время сей благочестивий князь, єго же имя горЂ и долЂ, по достоянію возвЂстися, иже вся божественная Писанія обоєго завЂта, всЂм повсюду православним христіянам преждє, тако же інныя книги их же напечата, и о них же єще попеченіє имать, молитися богу прилЂжно достоит, яко да и єго имя написано будєт в книгах жизни, купко с преждє благочестно усопшими родительми и прародительми єго, такожде с благословенными отрасльми от рода в род в вЂчное время. Аминь.

Сіє предисловійце прозрЂв, мой господине, читателю благочестивый, пріємли, якоже хощеши, токмо молю: мене, недостойнаго, ненаученія ради, не возненавиди, ни поноси, но паче, яко праведник, покажи милостію и обличи. Готов єсть пріяти, паче нежели грЂшник, єлеом главу мою мастяща, ВЂм убо, воистинну вЂм, яко всія вся превосходящия вещь требовать кратших глагол, множайша разума; аз же составих, єлико могох, умаленієм си смысла, ибо училища николиже видЂх; но понеже людіє молчат, каменіє вопити понудися; и аще своєю волею дерзнул бых на сіє, безотвЂтен убо был бых; но повеленія благочестиваго князя отрєщися отнуть не возначах; обаче же сицевая вещь искусных понуждаєт показати образ лучшаго, ненаказанных же влечет к ученію; нерадивых же и самомнимых ничтоже ползуєт.

Словеса Христова в началЂ, вмЂсто основанія предложенная, имЂй в сердцы выну; сырЂч, Писанія испытуй, могущая вмЂстити вмЂщай, творити прилЂжно не престай, довлЂєшися убо сими и иным образ благ покажеши, паче же єретиком и поганом; они же, видЂвше наша добрая дЂла в православной вЂрЂ, с нами прославят отца нашего, иже на небесєх, купно с єдинородным єго сыном и всесвятым, благим и животворящим єго духом, в трєх составЂх, в єдином же существЂ, єму же буди благодареніє по достоянію, слава, честь и держава, нынЂ, и всєгда, и во вЂки вЂков. Аминь.

Сія предсловная сказанія и двострочноє согласіє 9, мною, грЂшным Герасимом Даниловичем, составлено бЂ.








КЛЮЧ ЦАРСТВА НЕБЕСНОГО



Яснеосвецоному и велможному княжати а пану Александрови Константиновичови 1, божію милостию княжати Острозскому, воєводичови кієвскому, и прочая, и далей, и еще.


Яснеосвєцоноє, велможноє а милостивоє княжа!

Иж мало не всЂ рЂчи, створеные от початку свЂта за предивным устроєниєм их творца, преходити єдины по других и пременятися и гинути мусят. Єдиньї в єдином округу лЂта, другиє в колку, иныє в колку десят аж и до ста и далєй. Ач естество или натура их не гинет, кгды ж прошлому подобноє выростаєт и родится єдино з другого.

Также и народ людскій, которому всЂ тыє рЂчи суть подручны и поданы — высоко лєтаючиє птицы, глубоко плаваючиє рыбы, быстро скачучиє звЂри и все иноє под ноги єму єст покорено, а вжды, — и той также менитися, толко не гинути мусит єдиньї, коротко ли долго ли на свЂтє побывавши, до общей матєрє своєє ворочаются, а иньїє на мЂстца их наступают.

И так в том воля божіа дЂєтся и дЂятися будєт аж до скончанія свЂта.

А вєдже, вЂрныє а добродЂльныє толко смертію з дочасного на вЂчноє премЂняются, а иныє пак якобы и не умирают, бо мудрец так написал: «Родивый чада, не умираєт», кгды ж собЂ подобного от сЂмени и церкви своєй наслЂдником, то єсть дЂдичем по собЂ зоставляєт. И на болшоє благословенство и ласку на свЂтє у бога а творца своєго относят тыє, в которых отечест†и добрах по них не дьдичит обцый и не убЂгают, а ни забиваются ото чужиє.

Таковым благословениєм почтил и увелбил бог оного великого Владимира, преславно и многочудно крестившаго землю рускую, которого церкви и роду зацная линЂя и донынЂ неустала. В ней же истинный наслЂдник 2 и властный потомок ваша княж: милость єсть єси и на мЂсце оных великосановных и многославных предков своих наступаєт.

А яко новотный на том житєйском мори, дивньга и прошлым и настоящим рЂчам с пилностю присмотруватися, ваша княж: милость маєш, беручи за початок всякой бодрости страх божій, а маючи завжды также пред очима страх и взор яснеродившаго, и свЂтлопитающаго, и наказующаго со богоразумієм юность твою и многим по многих сторонах свЂта добрый приклад дающаго, а праве по вселенной у правовЂріи изрядно сіающаго неотступно ани измЂнно.

Ревнуй же прилЂжно сему и ваша княжа милость а послЂдуй неизмЂнно святому прикладу у свЂтлоцвитущой молодости своєй и справуй храм свой телесный, яко бы был прибытком духу святому. Тогды оный же благословенный бог отцев по обычной добрости своєй и тобЂ тоє даровати может, яко и началником твоим 3, а не толко тоє, але и на столици их первой посадити может.

Прето потреба вашей княж: милости мЂти всегдашнєє пилноє баченє на зацный стан и на новый вЂк свой 4, в котором не толко якого долгого, але и дня и годины єдиноє стравити дармо а безпотребне шкода. Кгдыж и телесныє силы и душевныє также смыслы в таковом юнотском возрастЂ што далєй то болше ростуть, множаться и ку горЂ поступають.

И як хто в таковых лЂтєх управит а накеруєт тую свыше спряженную колесницу свою, котораа никгды не стоять, але до кресу назначеного точитсе, на которой и сам бог рад пребываєт, хто єму годне єє устроит, также и на дальшіє часы трваєт, и поступает, и до вЂчных прибытков, которых око, ухо, и сердце человЂчєє дознати не может, въєжджаєт. Чого и вашу княж: мил: господи, получити сподоби. Д колебаня у вЂрэ не установичного или пременєня, господи, сохрани, кгдыж з богом жартовати, у вЂрЂ о нєм отмЂняючися, зле, а єще горше соблазн иным, звлаща, слабым подавати, але в чом хто свєтым крещенієм раз от нєго єсть везван и от родичов правовЂрных избран, в том, по апостолу, нехай и прєбываєт и прочая.

А хто бы хотЂл вЂдати и розезнавати лЂпшеє от горшаго, ведлє того ж апостола, вся искушающе добреє содержати, нехай же не будєт таким подлым а плохоумным рЂчей судєю, же єдину толко сторону выслухавши, похваливши, з нею перестал.

Але як на мудрого, ростропного а боячогося бога узнавцу пристоять обом сторонам с пилностю, а не спрудка прислухатися, присмотрувати и пилне уважати и єсли же тому может спростати, то ж тепер с тых лЂпшую, не обзираючися на зацность, можность, и телесную мудрость того свЂта, але на самую истинную правду божію, нелегкомысльнє узнати, обрати и з нею переставати безпечне маєть.

Ачбы подобно єще лЂпше, коли бы тым не всЂ, што не кождому належить, шафовали, толко с тым, што церков святая духовно уставила, законно утвердила и неотмЂнно держить, переставали.

Але иж тепер свЂт на том: ради ся пытають, а иныє и отмєняють в новыє або перемЂнныє вЂры, а дЂла бы на горшиє, хоть старыє, хоть новыє, не дбають.

К тому не толко мужчизны, але из бЂлых голов нЂкоторыє хотять вЂдати глубокости письма, таєницы догмат церковних, которым призвоитша бы куделя з веретеном, а нижл.и тоє, што писано пером.

К тому лихи тыє змієобразныє шепталци 5, которым наши Євы волно нахиляють ухо, показуют им сличныє в поставках и словках яблушка, а при них можность и славу свЂта того, зачим юж и Адамове даются зводити, сирЂчь, за молодыми и старыє починають блудити, не хотять бачити, что ся за таковую несталость предков всЂх придало.

Прото як ся выше ознаймило, рач ваша княжеска милость тыи певным а истинным прикладом поступовати, и што далей написано, не рач лєноватися прочитати и так можется што до того ж нездорожноє показати. А ижся важило тую троха писаня вашей княжеской милости пану своєму милостивому приписати и под можную оборону поддати, не разумЂлося, кому бы слушнЂй и власнЂй.

Кгды ж по бозЂ всЂх содЂтели и по єго княжеской милости нашим милостивым пану, а отцу ваша княжеска милость иного не знаєм, и все церковноє отвсюду на младый возраст вашеє княж. мил. умилено зрит око, слєзы испущаючи, всЂх творцу молячися, да не до конца лишена будет началника своєго наслЂдіа, у православіи пресвЂтло сіающаго.

Прето здалося за рЂч небезпотребную тоє вашей княжеской милости предложити, бо хто не хочет похлЂбовати, тому годится правду указовати, звлаща, хто єсть хлЂбом и иными добродЂйствы от кого удоволен.

Остаток и початок ач младому, але мудрому баченю вашей княж: милости поручаєтся, кгдыж за сЂдины мудрость, а за лЂта старости живот побожный Соломон положил.


ПЛЮТАРХУС 6


Такіє нехай у тебе мЂстце мЂвають,

Которыє не ради на все зезволяють. А которым милша роскош, ниж цнота,

Пред такими кажи замыкать ворота.





ДО НАРОДОВ РУСКИХ КОРОТКАЯ А ПИЛНАЯ ПРЕДМОВКА. З НАПОМИНАНИЄМ И МОЛЕНІЄМ ПРИЛЂЖНЫМ


Учителевє костела римского, тых звлаща часов многіе так сяовне с казалниц костелных, яко и письмом з верстатов друкарских, и многими дЂйственными скутками з великою пилностю а потужным старанєм, минаючи своих, которыє от костела их, познавши в нем штось непристойноє, отступили, Удаются до вас, народове рускіє, розличными кшталты и способы, выносячи зацность, святобливость, можность и над всЂми под небом звирхность своих папєжов римских и от них уставленыє законы и вЂры также, а ваших патріархов кгрецких, и от них держаную вЂру и закон, и з вами посполу, з недовЂрством, глупством и отщепенством змєшавши, пред очима вашими явне топчут ногами а призывают вас в єдность.

Вы, не вЂдати, чи так на тоє долгося розмишляєте, єсли призволити албо нЂт, чи так тоє згола мимо себе пущаєте. А в том вЂра ваша и закон, а наперед вЂры вашея подателя бога от них хулится у вас пресвятоє имя спросне и поносне. Изводятся многіє а отступают от вЂры, што вЂдати. За таковоє недбалство ваше не будете ли колись чинить личбы ведле талантов, каждому з вас свыше повЂреных, и многих различными властьми и достоєнствы от толже почтєных?

Вжды, то єст людскій обычай и повынность на питанє чинити отповєдь, а на писанє такоє другоє, чого єще от вас не видати, а ни слихати и донынЂ. Во што ач вдаватись а заходити в реч далеко шкода, але теж вкоротце а правдивє отправити и своих у вЂрє покрепити не вадить, о чом и Петр святый радить, мовячи: «Готови будте завжды ку отповЂди каждому, питаючому вас», и прочая. Бо чим далей будете молчати, тым ся тых шкодливых новин болше будєт являти.

В чом єдин з таковых учителєй 7 выше помєненых, пытаючи, подобнося на вас за тоє юж и розгнЂвал, кгдыж вас тым почтил, што ему самому власнЂй и слушнЂй причтєно быти могло бы. Понєваж у книжце своей, так рок во Львовє твореной, выєхал на пляц з выводами вЂры костела римского * того для Руси навроценья за старших своих позволенєм. Там же и календаря нового 8 не занехал похваляти, як єст потребне поправляй, у вас до него с пилностю толко не велми учтиве напоминаєть. А по том початку писал, штося єму подобало, єдно ж с правдою далекося минало. И не ждучи на тоє жадноє отповеди или отпису, за разом писал и декрет учинил на остатку: бог кгреком и руси все отнял **, не мають ани памяти, аби умЂти «Отче наш» и «ВЂрую в бога», ани розуму, аби збавленыє рЂчи бачити, а не доброє воли, жеби добре жити. И далей писал, як єму шатан казал. А на краю доложил рускоє глупство и блуды. Якож тых новин, ач неправдивих, але шкодливых о вас тепер полны уши всюды.

Годилося вам тоє на собЂ так долго за молчаньєм носити, баченю вашему поручається. Ктдыж молчанє з часом слушным за мудрость почитано бываєть и з пожитком, а з часом теж за глупство и з шкодою ***. А то не в таковых речах божіих законных великих а общих, але у власних каждого. А в таковых и жидовє, и еретиковє, и бусурманы молчанєм не терпят, як вы.



* Там выводов потреба, гдє ся што часто применяєт и поправляєт. А што в своєй клюбє не отмЂнно стоить, выводов жадных не требуєт. ** И тут не вЂдати, што бы то было за навроценьє. Коли хто сам блудит да инших за собою лудит, плохоє хвалячи, доброє гудит.

*** Кто на реч пытаную или ущипливе заданую молчит, здається, яко бы позволяет или винен ся подаваєт.



Не вЂдати, чи у вЂрє вонтпите чи о бога избавленє мало дбаєте, про што на предки свои не памятаєте, о которых полн увесь поднебесный свЂт великоє славы и дивноє справы, же и небеса проникала, и пред престол божій ставала. Так у вЂрє истинной цЂлоє а крЂпкоє сталости, яко и в рыцерских справах можноє и потужноє дЂлности, на чом и тепер против сопостатов телесных вам не сходит.

Зешло бы ся єще болше против духовных пилную чуйность и подвиг мЂти, бо кого невидимыє боятся, тому и видимыє постояти не могут. З чого и слава болшая, и заплата вЂчная.

А иж в тоє писанє за великим мушенєм, а на болше за росказанєм нЂкто от худых простаков вдался от вас, о богохвалныє, великоє сла†и правоє вЂры народове рускіє, не без великого жалю и сумнєня, власне як плохий а голый за збройного рыцера воєвати, а простак неучоный за мудрого оратора отповєдати. Што ж дЂлати, коли сами не дбаєте, на простака не дивуйте. Так ся написано, як ся розумЂло.

Што вжды з вас годных до того порушити и подвигнути могло бы? Взявши бронь духовную от недужого и неумЂлого, сами по вЂрє крЂпко дЂйствовати и сопостатом истинный отвєт давати *. Толко бога дЂля и от него царства небесного, вам наготованого, дЂля **.

Повстанте, почуйтеся и поднесЂте очи душ ваших, а обачте с пилностю, як спротивник ваш диявол не спит и не толко, як лев рыкаючи, ищет, кого пожерети, але явне сами в пащеки єму розными способы многиє от крови и повинных ваших впадають, а звлаща от єдиноє матерє вашеє невЂсты непорочной, царя небесного, роженыє братя и сестры. О чом она, яко мати ваша, болезно вас породивши, водою святого крещеніа омывши, дары духа святого просвЂтивши и хлЂбом животным учениєм євангельским воскормивши, жениху своєму, кровию пречестною вас откупившему, яко сыны свои за слуги и дворяны отдати з радостю, яко родителей и прародителей ваших, надЂялася и с ними, и с вами вЂчно царствовати певна была.

Тепер вмЂсто надЂи, радости и потЂхи, жалостно нарєкаєт и многослєзно плачет: єдиных, же от неє отступають, других, же о тоє не дбають.

И вси вобец на повинность свою мало памятают, колеблючися дивными способы у вЂрє, єдин з другого болшую слабость и згоршене беручи. Где бы єсте болшую крЂпость брали, а тому ся забурнею не дывовали. Кгдыж родивый вас благовЂствованиєм о ХристЂ упоминаєт и простерегаєт, мовячи: «Братиє, должніи єсмы мы силни немощи немощных носити и не собЂ угожати, то єсть нетвердых у вЂрє вЂрою подпирати».



* Ревнителем речей добрых з того вимовляти и ленєватися не годится. ** Тыє слова христіянина побожного и сердечныє двери торкнути могли бы.



Але в нас тепер, кгды ся слабыє опирають подобно вмЂсто покрепленя и поднесєня, нижей нахиляны бывают. А инде той же апостол: «Подобаєт и єресем во вас бывати, аби искусныє бывали познаваны». Єще ли мало єресей, єще ли мало противовЂрства и отступления? А праве меч вЂры вашея духовный обложен єсть з обу сторон многими брусами, или ослами бысте толко хотЂли сами ржу недбалства вашего отерти и прояснити а хутю палаючею науки вЂры вашеє наострити, лацно бысте могли своих покрепити и сопостатом одолЂти, поневаж правда сама являєт истину и обличаєт крЂпко противников своих, маючи поборника з неба.

Прето бога ради и правды єго дЂля и за ваше спасеніє, и повторе поволный писатель молится вам прилЂжно * с пилностю прочитати и добре зрозумЂти тоє малоє составлене. Не поленуйтеся, обачите, ач вкоротце, але правдіве, о своєй православной вЂрє непорочноє церкви и еє строителєх истинных, так теж о костелЂ римском и о єго многих законодавцях достатком, а о новом паки календару и з придатком.

И так розумЂю, же писанья сего причины податель и з своими старшими позволителми за зле мЂти не будет, а хотя бы хотЂл, слушнє не может. Кгдыж так небачне спросне и вшетечне на зацныє особы и великиє станы обоєго достоєнства и на всю вобец Реч Посполитую обоих народов кгрецких и руских и иных всЂх им єдиновЂрных **, по многих и далеких краєх свЂта широко и славно розширених, бы намнЂй баченья мЂти не хотЂл.



* Хто сам не могаєт, помочи от инших жадаєт. И годится ратовати, кгдыж не о властное почал працювати.

** Не было ту баченя не только на зацныє станы и на роды, але и на самого всЂх творца, который мовил, иже речет брату своєму раха или уроде чого єсть повинен.



Але всЂх ровно и посполу безрозумством, блудами и глупством почтил, толко аби єго так бог и люди добрыє чтили и важили, чого єсть годен, кгдыж ани у бога, ани в людий мЂстца им не зоставил. Нехай же теж не дивуєт, єсли ся што єму и єго позволителєм непомысльноє пред очи приточит.

А иж тут толко самый початок и конєц книжок преднаписаных в коротце ся припомянуло, а што в средку писано, тоє ся занехало. ВЂдайте, же не прето абы тоє отповєди или отпису слушного а правдивого мЂти не могло, толко оказуючи єго в том чортоподобную гордость и буйство. Же не ждучи, ани мЂстца даючи на тоє отповЂди или отпису, якобы юж и людий, и правды на свЂтє не было, а яко бы в пустый дом хто вшол, гдє кгосподара немаш, чинит, што хочет, заразом осудил и сказал, же не мають розуму, памяти и доброє воли, глупство и блуды до того придавши.

Не явна ли реч, яким духом и якою милостью тоє чинит, кгдыж на початку якобы указуєт выводы и притягаєт до згоды, а на остатку яду аспидного под устнами задержати не мог, што сердце з мыслью тайно уковало, тоє перо з рукою явно указало.

А иж нЂкоторыє слова Христовы и апостолов єго святых на свой млын римский криво опачиною натягал, право поставивши, єму самому безстыдныє очи колоти будуть. Кгдыж превЂчную божественную власть и силы без баченя и страху з Христа дерет да на своєго папу кладет, а иных всЂх достоєнства и власти, им свыше поданоє, отлучаєт.

А што з многих историков и канонов соборных письма приводил, ач и тоє далеко з правдою розно папєжов усЂх под небо выносячи, а з патріархов многих єретиками указуючи, ино и тут зрозумЂти и обачити того учителя и єго костела правду не трудно. Кгдыж як з васни а ненависти, выткнул на пляц єретиков кгрецких и с тыми тепер всЂх правовЂрных, при греках у вЂрє стоячих, зровняти и змЂшати рад бы и церков всю всходную з єретиками осудити хотЂл бы. ЗапомнЂл бога и правды єго и оных свєтилников, великих и незыблємых столпов церковных учителей кгрецких Василія Великого 9, Григорія Богослова 10, Іоанна Златоустого 11, Афанасія 12, Кирила 13, Дамаскина 14 и иных многих.

А кому на свЂтє може быти тайно, же з греков философы, з греков богословцы увесь свЂт маєт, без которых и єго Рим ничого не знаєт? При которых преданю, науках и уставах церков святая восточная стоит крЂпко и неотступно.

Што ж правдивей судити: то є ли, што было злоє на время и откинено, чи ли тоє, што єсть доброє и вЂчно?

А хочеш ли правдиве судити, отпустЂм же собЂ а идЂм далей. Бо єсли же с патріаршеских столиц находилися єретикове, теды так теж их и отправляно, як были годны.

Што мало дивно, кгдыж бог сам только безгрЂшен и неотмЂнен. В чом створене на небесЂ и на земли єму ровно быти не может. Якож и межи самыми ангелы нашолся был отступный и взял заплату свою, иныє ангелове святій не были винни, и небо змазы за тоє на взяло.

При бытности Христовей телесной на земли нашолся был межи апостолы тому подобный, взял заплату свою. Так и потом при всЂх апостолЂх Николай, Димас, Фиггес и Єрмоген, апостолми и єпископами бывши, отступили от вЂры, с невЂрными суть причтени. Апостолове святыє не были винни и их достойность за тоє змазана не была.

Так власне и межи намЂстниками апостолскими же ся находили єретикове, брали заплаты свои. И иныє патріархове святій, и увесь духовный стан за то винни не были, и церков святая всходная змазы на собЂ не отнесла и нынЂ єсть чиста и непорочна.

Тут же єще зрозумЂти потреба, єсли бы речено, але с папєжов римских жаден заплаты своєє такоє не взял, тым єще горше и прегорше. Кгдыж межи десятий чинов ангельских нашолся злый, межи дванадесять особ апостолов нашолся недобрый, а межи колко сот папєжов римских жебы не мЂл быти жаден злый и єретик, то реч неподобная. Кгдыж ся и трули, и дЂти родили, и многіє єреси плодили, штося может показати доводне на ином мЂстцы.

А то нагоршая, же єресь и злость оная никгды с костела римского оттинана и преч вымєтывана не бывала, мусЂла внутр зоставати а ку смерти ся ровнати. Бо и на тЂлє человЂчем бываючиє розныє вроды, струїш и коросты, кгдыся на верх укажут, выстоят и выплывуть с тЂла преч, а часом и з члонком оттинаны бывають, тЂло здорово зоставаєт. А кгды ся указавши, розпаливши внутр уступають, к смерти ся ровнаєть. Такова власне справа церкве заходноє, которая всЂ змазы, вроды, струпы и коросты в собЂ таит и внутрь свой приймаєт (* Справа костела римского.).

Прето єсть у вЂчном животЂ смертелна и с послЂдователми своими. А то маєтся розумЂти от того часу, як ся от єдности соборной церковной оторвала, а звлаща от оного Формоса, за которого стался костел римский, як лице без носа. Да коли бы хто от тых часов аж донынЂ оных самотворных намЂстников божіих также пером оборочати и подмЂшовати хотЂл.

Показало бы ся дивов и страхов много, да не так як кгрецких заразом оттинано и преч от тЂла церковного отмЂтано, але там все посполу и донынЂ врит, подобно остаток аж у пеклЂ ся доварит.

Ач ся реч порозширила, але для лепшого зрозуменя мусЂло тоє быти. Прето правовЂрныє народове рускіє, тоє што єсть, с пилностю рачте прочитати и зрозумЂти. Зыйдетлися также за старших свох позволенєм, кажЂте на иноє отписати. Не зыйдетлися, самы не рачте не дбати. Бо як причины до того не годится давати, так теж за даною не зыйдется молчати.







КЛЮЧ ЦАРСТВА НЕБЕСНОГО
И НАШЕЄ ХРИСТИЯНСКОЄ ДУХОВНОЄ ВЛАСТИ НЕРЕШИМЫИ УЗЕЛ




«За правды повєдаю вам, што бысте колвек звязали на земли, будет звязано и на небесєх. А што бы єсте розвязали на земли, будет розвязано и на небесєх». «Єще заправды повєдаю вам. Иж кгды бы ся з вас два зезволили на земли о всякую реч, котороє бы просили, станется им от отца моєго, который єсть на небесєх; або вЂм: гдє суть два або три, собрани во имя моє, там єстем впосредку их».

Тут потреба обачувати пилно, якова того чернила духовная сила, про што тут спас наш, тут заразом при отданю всЂм ровноє моцы вязаня и розвязаня, двом, зезволившися о всякую реч, кажет просити отца своєго небесного, и будет им дано, и так же з двома або с тремя, гдє бы ся во имя єго собрали, и сам бывати обецался. А в письме святом вездє много находим, же и отец єго небесный многих по єдиному выслухывал. И он сам, яко сын єго єдинородный, так же чинил и бывати з єдиным обецался не толко сам, але и з отцем своим небесным, гдЂ так мовити рачил: «Єсли кто будет миловати мене а слов моих пилно слухати, теды и отец мой певне ся єго теж розмылуєт, а до него прійдемо и мешканє собЂ у него учинимо».

А тут аж двох выслухати а з двома або з трема бывати обєцаєт.

Неледаяк бы тыє єдиноустныє слова Христовы уважати... собЂ противны. Поневаж сам же Христос, неотменный у словах своих, первЂй тым же апостолом розказал молитися по єдиному и наединЂ, так мовячи: «Ты, коли ся молиш, войди в клЂть свою и, затворивши двери твоя, помолися отцу своєму втайнє, а отец твой, видяй втайнє, отдаст тобЂ явне». Зри, зри и пилно гляди.

Тут же тепер, створивши обоє очи и очистивши всЂ смыслы, з добрым сумнєнєм а з боязню божею присмотримся пилно, для чого то Христос мовил апостолом: «Кгды бы ся з вас два зезволили на земли о всякую реч, котороє бы просили, станется им от отца моєго, которыи єсть на небесєх».

Перво, велит самому наєдинЂ молитися тому ж отцу своєму небесному. А потом радит или розказуєт, аби ся два зезволивши о всякую реч просили, тож будуть выслухани. А далей з двома або з трема и сам бывати обєцался.

Што то єсть, чи слова Христовы не згожаются, чи євангелистове, пишучи, помилилися? НЂ. И євангелистове ся не помылили, и словам Христовым отмЂны нЂт. Кгдыж сам єсть истинная а неотмЂнная правда, снаднЂй небу и земли отменитися, толко подобно мусЂло оную старую приповЂсть рушити *. Бивши около сука, вдарити в сук.

Тыє то слова божіє живыє явне колют обЂ д†оцЂ тым всЂм, которыє так великую а важную справу єго на єдиной особЂ против воли єго завєшають. Которого єдиного отец єго выслухати не маєт, и он сам з ным бывати не обєцался. К тому єще и тоє пилно обачати и добре зрозумЂти потреба, про што того слова Христова початок с концем показуєтся розно. Кгдыж сам мовити рачил обецне до всЂх апостолов: «Коли бы ся з вас два зезволіли на земли о всякую реч, котороє бы просили». Зри и розумєй, мовил: «З вас», а не рек: «Станется вам», але рек: «Станется им от отца моєго, который єсть на небесєх». А потом не рек ни «вам», ни «им», толко: «Где суть два или три, собрани во имя моє, там єстем в посредку их».



ШТО БЫ СЯ КОМУ ЗДАЛО, СУДИ


Я, яко всЂх подлЂйшему а крайнему належит, наперед вотум свой положу. А кого бог с предних почтил правым а досконалим вырозуменєм **, крайнему за зле мЂти не маєт, толко нехай ся, як повинен, не ленуєт. Кгдыж реч подлєйная лЂпшой завжды уступаєт. А меншеє ся от болілого кром всякого спору благословляєт. МнЂ ся так видит: тыє слова «кгды быся зезволили з вас, а станется им» злучили моцно и звязали крЂпко нераздЂлную силу, вдасть и єдность як у апостолєх обецне, где мовит «з вас», так и в их намЂсниках, напотом где мовить «им». А што при том же якобы кром апостолов рек: «Где суть два або три, собрани во имя моє, там єстем в посредку их».

Тут не телесно толко и временно, але вЂчно и божественно до скончания свЂта бывати обєцался завжды со всЂми вЂрными, гдє быся колвєк во имя єго собрали, а с пастырми пак вЂрными вЂрных и овшем.

А иж сам пастыр наш небесный не хотЂл мЂти межи апостолы и их истинными намЂсниками разности и єдиного, вмЂсто себе, старшого а всЂм головою. Толко во всем ровною братею, як были апостолове ***. Где ж ся тепер тая над всЂми голова в РимЂ взяла?


* Приповєсть старая и простая о новую хитрую опираєтся.

** Не о невЂрных ани противовЂрных, толко о правовЂрных тоє ся розумЂти маєт.

*** Апостолове были в своєм уряде ровною братею. Так же бы и их намЂсником ся годило.



Бы хто учоный розтропне тыє слова, острЂйшиє над всякій меч, з обу сторон острый, розтряснути хотЂл, мало бы об той змышленой всего свЂта голо†доводов инших потреба. А ведже и так вЂрному, а хотячому правду узнати, не єсть трудно зрозумЂти.

Претож церков святая соборная вселенская, розумЂючи добре оныє слова живыє пастыра своего вЂчного, не єдиному, але пятєм уставила и узаконила тою духовною властью а свыше даным пастырством по преданию апостолскому над собою рядити и справовати.

Што тривало и стояло святобливе и побожне в доброй справє и порядку лЂт сот не мало. А єсли ся што нарушало и казило розным єретичеством оного пекелного волка и райского зміа справою, так з стороны, яко и посредку их, они, збираючися соборно (* Соборы вселенскіє против еретиков.) з оною ж церквою многочисльно святых преподобных и богоносных отцев, с которыми и сам пастыр небесный бывал, як ся обецал, и оныє волки и зміи отгоняли, с престолов змЂтовали, и анафемЂ предавали, и, як добрыє пастыревє при овцах, и души свои покладали.

А иж Христос наменил два и опять два или три. И тут личбы замЂреноє не указал, аби ся и вси не подносили намЂсниками божіими менячися, же от самого бога суть поставлени, толко абы вЂдали, же от церкве, которая за годность ставити и чтити может, а за выступок карати и змЂтовати может. А вед же, яко бы не отступаючи в том и слов Христовых, двох а трех обрали намЂсниками апостолскими и учинили пять, сообразно пятерочюственной десницы божой, правячи всю поднебесную.

Отчого потом пятый, который засЂдал мЂстце первоє, гордостю и лакомством и многою славою свЂта того за наданєм великих панств и богатств зведеный, отступил дороги правоє и оного товарышства и братства, собЂ ровнаго, гдє мог єдин другого простерегати и направляти. ЗахотЂлося єму самому поднести столицу свою на заходЂ солнца и ровнятися богу вышнєму. Гдє юж тепер у волной кузници своєй куєт собЂ, што хочет, ни на кого ся не обзираючи, а ни о чию ласку и ратунок дбаючи, всего много з стороны свЂта маючи, а гордость всякая умножаєтся от преизобилных рЂчей, за которою и похлЂбство не омешкуєт, спЂшачися У приданых.

Ач и тых четырех розличными фортелми и дивными штуками через розмаитыє начиня духа своєго непрестанно усилуєт, тягнучи до себе. Але юж не на оную правую, толко на свою змышленую дорогу, и юж не в братство и ровную почесть, але в подданьство и в мушеноє послушенство, сам толко над всЂми и перед всЂми, всего свЂта головою, єдиным, найвышшим пастырем, каменем вЂры, фундаментом церковным, княжатем апостолским, намЂсником не толко Петровым, але и божіим без встыду и страху зватися смЂєт и иным допущаєт и кажет *.

Што юж нынешних многомятежных и богопротивных часов на том схилку свЂта, аж и до скаргов и гербестов 15 пришло **, тож пак тыє вже по-своєму почали тую катедру носити аж под небеса, да и рускіє народы наперед блудами, глупством и отщепенством почтивши и з жидами зровнявши, тож тепер указують им тую столицу, як хороша, а на ней пак сидячого снать и в ноги целують, а он не гнЂваєтся, та и нашим кажуть, ано не хочется. Чого иж, боже, уховай и всЂх нас до конца, господи, соблюди такового богопротизного человЂкообоженья или идолопоклонения. Кгдыж Христос господь, всЂх творец и откупитель, подаваючи з себе всякоє тихости и покоры приклад, божественныє и пречестные всетворительные руки свои простіраєт, ноги умывати учеником творец твари преклоняєт колЂна, умываєт руками и служит раболєпно. Он же, мнящийся намЂсник ученика єго, протягаєт тлєнныє и не нескверныє ноги в целованє гордостноє всЂм, приходячим к нєму.



* Превознесенє папежов богопротивноє.

** Скарга оскаржаєт, Гербест осуждаєт, бо той писмом своим страшит, а сей декретом не тЂшит.



Петр блаженный Корнилія 16 сотника, поклонившагося єму, подносит, мовячи: «Встань, кгдыж и я чоловЂк єстем», — показуючи то, же богу належачих поклонов пред человєком чинити не годится. А пред намЂстником єго мниманым и цесаром не пропускають. А иных посполитых подобно и бЂють, не поклоняющихся єму со страхом и трепетом. И иного безчинства и противозаконства за поступком лЂт и часов много.

А оныи четыри столпы церковныи, намЂсникове апостолскиє, патріархове кгрецкиє, пастыреве и богомолцы наші за милостию божею и за молитвами их и иных християн богобойных и правовЂрных в своєм заволаню, порученю и предсявзятю стоять моцно и непоколебимо, апостолских преданій и отческих правил соборных ни в чом не нарушаючі. А иж суть в убожест†и под розказованєм поганским, тому ся дивовати не маємо, а ни ся тым горшЂмо, изводитися иным не даваймо, поручаючи то недовЂдомым судбам и справам бога вседержителя, который за грЂхи караєт, а за терпливость милует и дочасную утрату вЂчными нагорожает дары. Якоже рече сосудом своим избранным: «Аще наказане терпите, яко сыном обрЂтаєтся вам бог». Єго же бо отец любит сына сего и наказуєт, не терпящаго же наказаня и двом господином работающего презирает и мимо пущаєт. И учинил декрет через праотца патріарха нашего Авраама , межи таковыми сынами мовячи: «Чадо, ты восприял єси благая своя в животь своєм, Лазарь 18 же злая. Сего ради сей утЂшаєтся, ты же страждєши». Так и тепер разумЂймо, кого дочасно бог караєт, вЂчно з собою мЂти хочет. А кого по воли пущаєт, тут єго дочасне отправляєт.

Претож радоватися в караню достоит лЂпше, а нижли горшити. Кгдыж то не новый обычай божій, чиновал то и давно з выбраными своими, карал их Єгиптом, карал Вавилоном скрутно и немилостивно, авжды от них промыслом дивным и милосердієм отцовским не отступовал. А дивными и страшними справами своими з ними и з оными ся обходил. А потом их до ласки и милосердія своєго чудовне приводил. В чом и нам вонтпити непотреба, кгдыж у бога лЂт тясеча, як день єдин, а не єст єму николи не можно ничого.

А иж и тоє нам задают, же крестов на церквах не мают, звонов мЂти не волно, а на том велми мало, кгдыж крест волный маємо на церквах своих телесных всюды и завжды, а без звонов и органов бога хвалити и єму ся молити можем. Кгдыж болше смотрит на сердца, нижли на тыє гуки. Не все было волно ведлє устав божіих израилтяном оным справовати в незоли, авжды их лЂпше выслухавал, нижли на свободЂ. Там же пророки и священники, старцЂ и дЂвицЂ не в великой повазє и учтивости были, што скромне с покорою терпячи, богу ся подобали.

А што ся ткнет о свободЂ, роскоши, можности, богатствє и славє свЂта того, тоє все, як за старых давных вЂков, так и тепер болше межи поганых бывало, нижли межи вЂрными. Кгдыж наш откупитель не звался царем свЂта того, так, бачу, и вЂрных своих мЂти хочет, наготовавши им што лЂпшеє болшеє и вЂчноє. И Павел апостол указует, же не маєм здЂ пребывающаго града, но и грядущого взыскуєм. А як то радит и для чого што справуєт, замкнул то в недостигненных своих судбах, которых ткнутися розумы людскими так безпечно, як соломЂ огня.





КАЛЕНДАР РИМСКИЙ НОВЫЙ,

о котором князь Венедикт Гербест у книжце своєй новотвореной во Льво†в листе до читателя чинит пытаньє такоє


Аза годится єдиному людови християнскому не єднако и велку ноц, и боже нароженє, и иншыє свята през целый рок тримати *.

Вчора сам от єдности церковноє в том оторвался, а нынЂ юж нам тоє задаєт, заразом и прится и потваряєт. Сам же мовит, же ся не годит, сам же от єдности церковноє отскочил или отщепился. И што ся дЂєт явне пред очима и ушима не толко всЂх нас, але праве всего свЂта. Што ж розумЂты маєм о тых речах давных, в которых так же от єдности отступаючи, нас невинных потваряют? Чим простаков, некрЂпких у вЂрє, зводят, страшаючи их, же без воли их папы жаден збавен быти не может, а той волЂ таковым способом никгды конца не будєт. Кгдыж каждый з ним можнєйшим, мудрєйшим и зацнєйшим єдин на другого хочет быти на свЂтє. Которую таковую мудрость Павел апостол глупством именуєт и мовит.

Мудрость тєлєсная ворожство єсть на бога и божему закону не покаряєтся. Не тєлєсная ли то мудрость противозаконная, же явне самомнителною гордостью над всЂх превознесшися, єдины новины уставляют, а другиє старины поправляют? И як отступили дороги правой, завжды ся мешают да инших до того примушают и страшают, же им того ж не помагают. Ано бы в добром баченю болший то мЂл быти пострах, гдє апостоловє и их послЂдователє святые богоносные отцевє, укрепляючи и упевняючи уставы и порядки церковныє без нарушенья, анафемою страшно загрозили того ся стеречи. И бояти лЂпше бы потребе, анижли их папы, и с тым новым календарем, о котором там же пишет же за великими причинами юж ото маєть своє потребноє поправленє **.



* СмЂшная мудрость Гербестова: або о иных плохо розумЂєт, або ся сам мало чуєт.

** Причыны великіє календарного поправленя.



З которых причин великих и єдноє наменшоє не указал, а хотя бы хотЂл подобно слушноє не мЂл, ач многиє дають до того тую запевную причину. Иж кгдыбы насвятший папєж яко найвышший намЂсник божій а всего свЂта голова так мудре а потужне в час тому не забєжал, теды за небаченєм и глупством посполитого люду вошло бы было боже нароженє у весну, а велка ноц в лЂто. Якож за правды, за так пилным а преважным промыслом и стараньєм, звлаща так зацноє особы, которая ключЂ носит от неба, досить ся значно погамовало, же не толко боже нароженє у весну не вошло, але я велка ноц не смЂла *. Хто был на той час в костелЂ у худой одежи, лЂпшей повЂдити может.

Ач хотя бы был и не помыкал тых недєл четырех наперед, не велми бы ся с тым опознил. Не вЂдати, чи звЂздный бЂг єго в том омылил, с которым законныє справи своє посполу скорикговати хотЂл.

Чи пак звездам творец спротивился оному сваволному корикговатєлеви, абы в тоє ся, што єму не поручено, не вдавал, кгдыж на том, яко видим, и назбыт шванковал. Яч яко недбалый коштовал, яко бы было ведлє єго зданя лЂпше, рядивши на земли, хотЂл поправити и на небЂ и, прозрЂвши наперед якимсь, невЂдати, єсли не валаамским духом , тому так пилно в час забєгал, вЂдаючи, же по шкодЂ розум мало потребен бываєт. Бо и лЂкар довтЂпный, кгды обачит який шкодливый врод, або, як они зовуть, пекелный огень, не жалуєт наперед здорового члонка урЂзати, абы все тЂло от того ся не псовало. Также теж ростропный строитель в мЂстє, гдЂ бы ся загорЂл а моц великую взял и пекелный огень, бо и той лих, гдє свою волю возмет **, перебєгаєт наперед колко домов цЂлых, и єдин бы налєпшого будованя, а хотя бы и великого пана, одираєт, рубаєт, ломит и розмєтуєт, мало ся в том кого радит, на будованє и кгосподара домового ничого ся не обзираючи.



* Свята божего нароженя у весну не впущено.

** Коли в печи горит — велми добр и потребен. Але коли вышше печи — шкодлив и страшен.



А кгды ся тоє погамуєт и угасит, за зле єму не мєвают, але по старому ведле волЂ или можности своєє знову будують, гдє што кому належит.

Так теж подобно насвятший он трийнадесят Григор папеж, кгды обачил, же календар предков єго старый дороги правоє далеко зблудил, солнце днюв причинило, мЂсяц имена свои помєшал, звезды бЂг свой потеряли, заразом, яко довтипный лЂкар и ростропный строитель, отрЂзал члонкн здоровыє, которыє єще стояли нЂшто при тЂлє церковном.

Дом теж законный, на седми столпєх моцных оных святых соборов вселенских добре укгрунтованый и вЂчно убудованый, перебЂгши недЂлЂ четыри наперед, ободрал, порубал, поламал и разметал. Мало ся кого в том радил, на будованє и кгосподара или пана ничого ся не обзираючи, все давноє погамовал и огнь духа святого до конца погасил. Не толко божего нароженья, але и велкоє ночи у весну не впустил, же ся ледве и святки уминули. МЂсяци иначей покрестил, християнскую пасху с жидовскою далеко отменил и опак посадил, и своєму предсявзятю, яко видим, досить учинил, толко ся после того борзо и сам схоронил. Што вЂдати, если в пеклЂ чого поправляти не казано. Бо то реч єще старшая, ниж календар.

А так зешло бы ся юж опять по-старому на оном давном фундаментЂ будовати. ГдЂ были трамы, стЂны, окна и двери за недбалыми кгосподарами, а с нас наємниками покривилися и понадгнивали, знову все ведле старого фундаменту, над которого иного жаден заложити не может, кроме заложеного побудовати.

Там же бы юж и о єдность не трудно ся згодити, до котороє не лацно прийти, поколь ся так будет блудити. Бо єсли панове земныє за таковыє кгвалтовныє рЂчи за зле не мЂвають, але небесный, не вЂм, єсли ся не розгнЂвал. Бо якось тыє новоперемЂнныє квЂтки и маи вмЂсто зеленоє барвы все бЂлою нам зверху притрясають, што видячи и розмышляючи, сердце ся лякаєт, и єдин бог вЂдаєт, єсли што далей горшеє нас не поткаєт. Кгдыж то суть єго самого справы и уставы законная пасха старая, которую сам уставил, сам и докончил и новую учнем своим и нам всЂм вЂрным подал, все тоє пошло опак, што завжды законная шла наперед, тепер мусЂла колко и двадесят днюв зостати назад. И мовят нЂкоторыє, же жидове поблудили, а мы добре порядили или поправили.

С которого то поправленя, яко видим, заправды мало што доброє дЂєтся, толко великий и дивный розрух стался во всєм праве свЂтє. Не толко у дЂйствах законных церковных, але и во всЂх справах и поступках свєтских, и великая васнь и ненависть межи людми с того поправленя всчалася, тягнучи за собою много трудностей и утрат безпотребных невинне.

Первое. ЧеловЂк бЂдный, убогий, который от праци рук своих (* Поправы календарноє пожитки.) и в потЂ лица мусит ясти хлЂб свой и с тоє ж працы и поту мусит досыть чинити и давати пану, што єму розкажуть. Звык был от предков своих отдавати, што належало богу и што належало пану, тепер юж в тоє жадным способом гаразд потрафити не может. Пан єму кажет у дни святыє богу ку чти и хвалЂ ведле звычаю церковного давного належачиє робити. Боится и бога, боится и пана, мусит болшого опустити, а меншему служити. Бо о оном слыхаєт, же єсть долготерпелив и многомилостив, а сего вЂдаєт, же єсть коротко терпелив и троха милостив. Єсли не єго тЂло поведуть, теды воловоє певне.

Панскоє теж свято прийдет, рад бы бЂдный убозство своє роботою подпомог, боится пана, мусит лишити, а часом за тыми бєдами не толко панского нового свята не памятаєт, але и свого старого забываєт. В чом и богу, и пану неправ бываєт. А собЂ пак рЂдко або николи. Зверху нензда доєдаєт, а внутр сумненє грызет. Чого иншим сбособом ратовати не могучи, мусит нареканєм, вздыханєм и слезами часто бЂду свою нагорожати. И не вЂдати, єсли в таковой своєй роскоши и оного календарного поправителя часом злиха не проклинаєт, в чом, хотя не в шарлатЂ и не оратор, потурати не треба.

Кгдыж тот пан, до которого то чинит в горкости сердца, подчас и шарлаты и орлаты из оратормы бывают у него як сметьє. Поневаж толко на чистоє, покорноє и сокрушеноє сердце гледит и таковых выслухаєт, а сильных и незбожных со престолов зметываєт да на мЂстца их, от гною беручи, сажаєт.

Второе. Так теж в мЂстех затвористых наших на своє новыє свята зброн не пущають, в роботах заказують, забирають и сажають, они теж як христіяне правовЂрныє, будучи повинни свята свои церковныє давныє обходити и святити мусять, в чом немалыє забавы, трудности и утрати в своих справах и господарствах домовых и полных и дорогах гостинных невинне мусять относити, и тыє не мають, за што оного ж благословити.

Третєє. Так теж в ярмарках, и у справах купецких великих, в записєх, в цырографех * єдны по старому, другиє по новому мЂшатися и великих трудностей и безпотребных забав, накладов и утрат, а часом и завасненя уживати мусять, и с тых, подобно, не всЂ мовять: «Бодай здоров поправлял, якож не много ся тут послє того забавлял».

Четвертоє. К тому єще муж и з женою, которых сам бог наперед прозираєт здалека, а потом словом своим всетворителным через слуги церковныє злучаєт в єдно тЂло, межи которыми в доброй згодЂ и порядку, як тЂло єдино, так воля и мысль маєт быти єдина, первому — розказовати и рядити, второму — слухати и повиноватися, так теж в молитвах до бога, в учинках милосердных, в постєх и святєх мають быти як єдино сердце и уста, так єдина и рука. Тепер тот календар новый нашол и там скутки своє новыє.

В тых, мовлю, гдє з реліи грецкоє и римскоє стан малженский приняли **, якож то бывало, не толко межи посполитими, але и межи зацными стани.



* О ярмарках и записєх.

** Згода вдячная в малженст†ляхови з рускою, так же, як русинови з ляховкою.



Кгдыж єдиному бываєт средопостьє, а другому — мясопусты, потом єдиному — жалостноє розпамятованє Христовых страстей, а другому — веселыє розпусты. Также теж и всЂ свята дорочныє, что первЂй з радостью, з дЂтками и с челядкою, хвллу даючи богу, обходили сполечнє, тепер мусять далеко розно. З чого подобно часом бываєт маркотно, а другому немило. Кгдыж первЂй все ся дЂяло ясне, а тепер якобы ся снило.

В чом нас же невикных укоряють, взгоржають и ненавидять. И без мала не слушнєй бы теє покрывленєм назвати, а нижли поправленєм, кгдыж болше вадит, ниж помагаєт. И як непевныє а новотныє уставы не всЂ теж єднано держать, а звлаща в том року.

Єдины по-старому мясопусты отправили, другиє — по-новому. Але по-старому велку ноц з нами обходити позволили. А иныє пак з нами запустывши, з ними ся отговЂли. И пост святый великий, самым Спасителем нашим проображеный, апостолми єго святыми установленый, и святыми преподобними отцы соборно по всем праве свЂтє где єдно имя христіянскоє слыхати моцно утверженый, тепер у них за тым поламаным календарем и пост ламатися мусит *. Бо єдини постыли недєль одинадесят, другиє седм, а третіє толко три недЂли спостывши, а з старого календаря на новый переступивши, фортелем остаток отправили. А далей пак што ся будєт дЂяти, бог то лЂпше вЂдает, страшно помышляти, єсли тая мЂшанина далєй будет тривати, не вЂдати на што было реч так певную а вЂчную поправовати, бо як здоровому лЂкарства, так речи цЂлой поправленя не потреба.

А хто против того чинит, болше казит, ниж радит. А ведже хотя бы юж и так было, же то собЂ ку воли, або кому на упор, тых десять днов вывергши, нехай будто поправили, што пред ся пошло якобы своим колом, кромЂ тых днюв десяти **. Але сеє пак другоє коло, котороє от воскресенія Христова аж до вознесенія точится и през целый год бЂг свой справуєт. Про што замЂреного кресу также ведле першого бЂгу своєго не одержало.

Подобно тыи єсли бы также десять днюв выкинули, то бы в середу велку ноц мусЂли святити. Але иж тоє ся не зешло, тыж днем теж наперед десети днов личбы не дошло, а двома недЂлями зась перешло, а так юж тоє коло снать комусь на упор пустили якимсь диким гостинцем, никгды не топтаным, а праве стропетным. Первого року недєль три, другого двЂ, а третєго єдину, а теперешнєго пак сполна недєль четыри.



* Статечность посту новокалендарного. ** Кола церковныє.




Што єсли же тепер твердять и вызнавають, же в том праао ходят *. Теды нЂлзе єдно мусят вызнати, же их папежове от початку аж до того часу за всЂми своими наслєдовниками блудили, а єсли же оныє не блудили, ино теперешній блудят. Якож и великоє подобенство, кгдыж не толко против устав законных церковных давных и оных великих соборов славных, але и против самого законодавца, творца и откупителя всего свЂта, который водлуг воли бога отца своєго небесного, справуючи спасенє наше а выполняючи всЂ письма, о собє пророческиє, действом докончил закону старого.

В четверток великий отправил пасху законную и Нового завєта великую тайну апостолом своим подал. У пяток муки и смерть подъял для збавенья всєго свЂта. В суботу лежал у гробЂ, в которую была обхожена жидовская пасха, як євангелистове свЂдчать. А в недєлю з мертвых воскресеньєм своим небо и землю, и преисподняя просвєтил, што єсть наша христіянская истинная пасха.

З якою ж то смЂлостью и баченьєм християнскую пасху свою, перед жидовскою наперед днов двадесят и пять внесли. А нЂ с християны, а нЂ з жидами ся згожаючи штось велми дивно. А не толко апостолским преданєм и отеческим уставам, але и самому Христови много спротивно. Который яко сотворитель, откупитель и законодавец не пришол закона казити, але виполнити, якож собою все выполнивши и новый уставивши, вЂрным своим подал. Чого Павел апостол посвєдчаючи написал, староє мимо пошло, а ото все ся стало ново. Якож вЂрным певно ново, але тыи мЂшаным не вЂм яково.

То юж тыє два законы вЂдаємо гаразд от кого суть поданы. Первый старый от бога отца, через Мойсея жидом подал был до часу. Вторый новый от того ж отца небесного через сына єдинородного вам подан єсть вЂчно.

А сей пак тепер третий закон от кого подан, хто вЂдаєт як сего законодавца назвати, кгдыж не от Мойсея, а ни от Христа. Без мала не на тоє пошло до второго имене придавши, триста шестьдесят єдин или 359.

Личба розна, сила єдина ** 20.



* Суди, кто хочєт, толко мЂй баченє на судю правдивого и страшного. ** Титул третєго законодавца.



Кгдыж юж, яко видим, и само небо, або на нем сЂдячий противится вне их так небачному упорови, болшеє зимно в том их квЂтню показуючи, а нижли в иных мЂсяцех прошлых было. А звлаща их недєли бЂлоє, где и чорному мусєло быти под носом бЂло. А хто бы тому вЂрити не хотєл, нехай бы без футра и теплоє избы потрывал хотя з годину, бачитьмися, к тому не был бы невЂрєн, но вЂрєн.

У пяток великий, кгды Июдаша хлопята страшили тыми крекотками 21, в которого была не голосна, мусєл зубами трєску докладати, а звлаща тыє, которыє от «пауперибус» латину починають учить 22, так теж и на самую велку ноч дивноє знаменіє * бог показати рачил 23, так бурливоє и страшноє зимно, з великим снєгом. Же не каждому волно было и колачи до костела святити отослати, хто был в мили або далєй от костела, кгдыж не толко санями или пЂшому, але и на кони не можено, гдє потреба, доєхати.

И много быдла розмаитого на тот день от зимна вЂтру и кгвалтовного снєгу поздыхало, што и з людий мало ся комусь не придало. А вжды нЂкоторий казнодЂя, который перво был прокуратодЂя, таковую штуку в обмо†учинил до своих, видячи, же их мало в костелЂ на так великоє свято было: «Не противтеся тому, а то нас пан бог карает для небачноє упорноє а крнубрноє руси, жеся не хотять узнати ** а до найвышшаго намЂсника божего пристати».

А нися тому дивуйте, же жидовская велка ноц по нашей припадаєт, бо мають рок преступный, и тим своих вонтпеньє покрепил, а по других и в домы посылал. Бо многиє тыли умыслили по семи недєлях и тые четыре постити. В чом их пилно простерегши, повидєл. Потым тего дню кто хце, может постити, тылко тераз каждый мусит законови святому досить чинити.

А бы так на простака пришло, трудно бы в тоє мог потрафити.

А вжды твердять, опираючися як на леду, же право ходять, а иныє вев блудять. С чого можем снадне обачити и властне зрозумєти, же не без великих явных и слушных причин *** всЂх всходных и полуденных сторон или церквей пастыревє мусєли опустити заходного костела вожа. Который ач будучи з нами в єдности и згодє, первоє мЂстце засєдал, але потом утыл утолстЂл и разширЂл, и забыл бога спаса своєго и закона, от него поданного...



* Знак от бога, противный новоримской великой ночи.

** Обмова... учителя не глупая.

*** Причины — грецких патріархов и римского папежа незгоды.



Так теж жоны законныє, от самого бога презреныє и поданые и от апостол святых, так скутком, яко и писмом потверженыє, духовным своим поотыймовали, да на их мєстца блудницы поподставляли, а хотя не подставляли, ино на дурноє и сами ся домышляють, кгдыж их посполу з собою многіє явно ховають, и особныи юртгелт у панов своих им вымовляють.

Єсли же ваша милость опатрил каплана, потреба еще и на прачку, а ты, бЂдный попє руский, мусиш и з законною нендзу клепати, неборачку.

Надто, хотя кому можется здати реч малая, але не вЂм, не єсть ли и то противозаконная, кгдыж самоє подобіе Христова, пророков єго древних и апостолов святых показили, бороды и усы поголивши, мужский образ в женский премяняючи. Не оному ли то к воли папЂ, который малого папежка был уродил, бо там борода и усы не мусєли быти, и розумЂли, же то з великого набоженства бог єго тым почтил, же ангелу подобный образ єму подал.

Зверху ся им так здало, а на долЂ не вЂдали, што ся дЂяло, ач єдин мусЂл вЂдати, але не сказал никому и на сповЂди не смЂл ся того звЂрити жадному. Боячися клятвы як намЂсника божого а ключника высоких ворот, бо бы єго не пустил до неба. О не малую шло заправды. И так тоє было незначно и тихо, аж ся выполнили дни, тож пак всЂм было явно и лихо.

А предся волЂли тоє зелживости мститися на богу или на истинных уставах єго церковных, а нижли на уставах папЂжских. Бо и донынЂ многиє ся голят, подобно и сам папа, але юж их тым жаден не ошукаєт, пригода учит розуму, доглядають того с пилностю, которим то повЂрено. Смотривши в вочи, смотрять из другого конца, ку горЂ подносячи столца. ВЂдають юж гаразд, чим были ошукани, а кгды тоє добре обачять и намацають, юж за тым всю годность познавають...

Час бы ся юж за правды почювати и давно, бы потом, коли будет труднЂй и помочи будет не лачнєй и прочая. Што ж было чинити оных часов всходных и полуденых церквей пастырем и началником, и всему вобец христіянству? За первыми єдиним блудити, чили им четырем зе всЂми своими подвластными при правдє стояти, маючи по собЂ писм святых яко оболок, к тому из самого неба приклад великій?

Же теж первый ангел, поднесшися в гордость а хотячи ровен быти вышнему, звержен єсть зо всим почтом з высокости. А иныє чинове ангельскіє со страхом и трепетом стали в своєм везваню, или чину, крЂпко и неотступно, и нынЂ суть и вЂчно будуть.

Также и наши началници православнеє вЂры, добре ся розмысливши, ач не без великого жалю мусЂли то вчинити, за што их и нас менять отщепєнцами, в чом без мала и не своим титулом иных подписуют.

Претож тут хто боится господа бога и святую правду єго знаєт, нехай тому добре ся присмотрит очима верхними и внутрними * а нехай не боится тых плонних страхов, которими грозят, же без того папы и єго календара жаден збавлен быти не может.

ПодобнЂй бы тому лякатися, который отступивши правеє старожитноє спасающеє вЂры и своєго исправленья церковного, и пристал до тых многозмышленых блудов, которих чим будуть болше поправляти, тым тоє горше будет валяти **. И смЂл в том юж не нас толко, але и самого Христа потварити, мовячи, же до тоє єдности и тераз значне нас рачить вести през костелный календар ***, сам змысливши и написавши, привлащаєт Христа або своєго папежа Христом именуєт.



* Суди, хто рачит, толко мЂй баченє на оного судію, от которого декрету делиберовати и апелевати не мощно.

** И акция якобы о єго кривду властную точится.

*** Гербест глаголет.



Надто єще все, юж не тилко дни и свята празником господским и нарочитых святых угодников божіих отменили на земли, але и на небЂ лунного бЂгу дорочного дванадесятим мЂсяцам имена от начала свЂта ведлє Бремен и часов им даныє, поотменяли, подобно у римскую вЂру их похрестили, хотячи и тых под послушенство папы своєго привести. Абы и они без волЂ єго нЂчого справовати не смЂли. Февраля назвали мартом, а марта квєтнєм, бачитмися и май у них змЂнит своєго именє скуток, так и всЂ дванадесят мусятся менити.

Што ж дЂлати, коли то их папЂ волно чинити, толко тоє на него яко бы полихо, же имя отменити может, але прироженья и скутку свыше поданого, трудно. Зимна и тепло, снЂгу в дожчь пременити — то не римского бога сила и справа, хотя бы и всЂ кардинали собрал, до того не помогуть нЂчого.

К тому єще жидове, ач Месияша правдивого не познали, але в законних уставах и церемоніях, а звлаща в той наболшой переходу израилского з Єгипта, где Моисеови бог сам явне указал и мЂсяц на имя, и день мЂсяцеви также, в чом розумЂю жадному увЂстися не дадуть.

А вжды и тамся кушено, праве у весь свЂт хотячи подурити. Перед своєю великою ночю жидовскую пасху вполни марта поставили, сполна недєль чотыри капред, хотячи их отмєною мЂсяца подманути, што никгды отмены от часов Моисеовых аж донынЂ не мЂло.

Якож предся их в том нЂкоторіє винуют, же поблудили, в чом бы менший див, хотя бы тыє и поблудили. Але єсли всего свЂта голова заблудила, на целый див походило. А ведже тоє знати гаразд, и не єст тайно хотячому правду познати нЂ троха, же не идеть им так о жиды, як о правовЂрных. Розными а дивными штутами, лавки подставляючи, на которых скоро бы хто усєл, заразом бы ся на суши охинул по уши.

Бо зле и небезпечно кролевскіє и княжацкіє уставы и декреты порушати и ламати, а о божих пак як маєм розумєти, о которых нарушенью в добром баченью страшно бы и помышляти.

А то все справа тых новоименных законников, которим уприкрилося звати христіяны, прозвалися єзусіяны, или єзуитаны, ни на чом старом не хотячи переставати. А достаток великий на всем з стороны свЂта маючи, робити чого потребного не хотять, так они староє поруть, да опят пошивають, але юж у первый шев, гдє духовноє око смотрело, телесным далеко не трафляють. Кгдыж тоє с тым так близко, яко восток от запада.

А иж сами мало видять, мнимають, же на свЂтЂ вси слЂпи, и иж з оного своеволного буйства, не маючи, што далей чинити. Которий ся з них улєз в одежу имене пастырского, оного святого и богоразумного мужа Генадія 24, патріярха константиноградского, власные щиріє новые вымыслы свои под именем єго святым и под именем зацного дому великоє фамиліи княжати...












Герасим СМОТРИЦЬКИЙ

Герасим Данилович Смотрицький — український письменник-полеміст, поет, педагог, учений. Один із ідеологів культурно-освітнього руху, що розгорнувся на Україні в останній третині XVI ст. Батько Мелетія Смотрицького. Народився у с. Смотрич, тепер Хмельницької обл., у першій половині XVI ст. Одержав ґрунтовну освіту, володів грецькою, латинською і церковнослов'янською мовами. Працював міським кам'янецьким писарем і прославився своєю ученістю. Близько 1576 р. на запрошення князя Костянтина Острозького виїхав до Острога, де став ректором нововідкритої школи, а також очолив науково-літературний видавничий гурток, до якого входив Іван Федоров. Разом з першодрукарем працював як «головний редактор» над Острозькими виданнями, зокрема над Азбукою 1578 р. та Біблією 1581 р. Припускають, що помер у жовтні 1594 р.

[Перша передмова до Острозької біблії 1581 р .] — Передмову («Боже отче вседержителю...») вміщено на перших аркушах Біблії від імені князя Костянтина Острозького. Проте стилістичний аналіз, порівняння з другою передмовою, підписаною Герасимом Смотрицьким, доводить, що автором і першої передмови був «головний редактор» Острозької біблії. Передмова цікава тим, що показує, яку вагу надавали культурні діячі організації книгодрукування на Україні. Передрук тексту див. у вид.: Строев П. М. Обстоятельное описание старопечатных книг славянских и российсккх. хранящихся в библиотеке... Ф. А. Толстова. М., 1829, с. 51 — 69.

Подається за першодруком.


1 Боже... благодареніє воздавайте. — Від початку передмови до цих слів включно текст друкувався на двох-мовах у дві шпальти: в лівій подавався грецький текст, у правій — старослов'янський.

2 ...великаго князя Іоанна Василієвича...» — Йдеться про Івана IV Грозного (1530 — 1584), московського великого князя з 1533 р., російського царя з 1547 р., за якого в Росії почалося книгодрукування.

3 Гарабурда Михайло Богданович (? — 1586) — білоруський магнат, писар Великого князівства Литовського, дипломат, активний учасник культурного руху в Білорусії другої половини XVI ст., виявляв великий інтерес до книгодрукування. Неодноразово їздив до Москви у складі посольства, зокрема у 1571 та 1573 рр. «Очевидно, — припускає український книгознавець Я. Д. Ісаєвич, — під час однієї із двох останніх місій він привіз повний церковнослов'янський переклад Біблії з грецької мови»

(Ісаевич Я. Д. Першодрукар Іван Федоров і виникнення друкарства на Україні. Львів, 1983, с. 97).

4 ...седьмдесят и двЂмя преводники множає пяти сот лЂт на словенскій преведеную... — 3 Москви був отриманий переклад, здійснений не в Київській Русі, як гадали острозькі діячі, а в Новгороді при митрополиті Геннадії.

5 Кандійські острова. — Кандіею називали Кріт за назвою його тодішньої столиці м. Кандії (Іракліона).

6 Єремія (Ієремія) II Транас — константинопольський патріарх (1572 — 1594), глава східнослов'янської православної церкви.

7 ...Новаго Рима... — Див. визначення Константинополя як Нового Рима у листі Ісайї Кам'янчанина до Івана Грозного (с. 191).

8 ...от языка еврейска во єллинскій преведеную... — Йдеться про переклад, здійснений 72-ма перекладачами, — так звану Септуагінту.


Предсловіє к благовЂрному и православному всякого чина, возраста же и сана читателеви... — Це друга передмова до Острозької біблії. В ній Герасим Смотрицький, розвиваючи думки першої передмови, поглиблює теологічний зміст викладу і загострює його полемічний характер. Текст містить численні посилання на біблійні сентенції.

Передрук передмови здійснений у вид.: Предисловие к Библии, изданной в Остроге 1581 г. — Архив Юго-Западной России, издаваемый комиссею для разбора древних актов. Ч. 1, т. 8, К., 1914, вып. 1, с. 45 — 56 (Далі — АЮЗР).

Подається уривок за першодруком.


1 Арій (256 — 336) — священик з Александрії. Проповідував вчення, яке отримало назву «аріанства». Аріани не визнавали основного догмату християнства — трійці (єдиносутності отця, сина і святого духа), вважаючи, що існує тільки один бог, а Христос — створена богом істота нижчого ступеню. На Нікейському соборі у 325 р. аріанство було засуджено як єресь. Однак заперечення «триєдності» божества було характерне і для пізніших течій в християнстві. У XVI ст. аріанами називали антитринітаріїв — послідовників релігійних учень і сект, які також відкидали догмат трійці. Проти аріан гостро виступали і православні українські та білоруські культурно-освітні діячі, які прагнули консолідувати національні сили для протистояння католицькій експансії.

2 ...пріємий пророк... — Йдеться про Ісайю — за біблійною легендою, іудейського пророка (VIII ст. до н. е.). Йому приписується авторство глав 1 — 33 і 36 — 39 книг Старого завіту. Тимофій — євангельський персонаж.

4 Фома — за євангельською легендою, один з дванадцяти апостолів — найближчих учнів Ісуса Христа.

5 ...блаженный апостол... — Йдеться про апостола Павла.

6 Сіон — одна з висот, на яких розкинулось місто Ієрусалим. У християнській літературі вживається як символ царства божого.

7 Іаков — біблійний персонаж.

8 ...пророк рече... — Йдеться про Давида.

9 ...и двострочноє согласіє... — Текст віршованої передмови — «Двострочного согласія» («Всякого чина православний читателю...») див. у цьому томі, с. 460.



Ключ царства небесного. — Цей твір увійшов до книжки, виданої в Острозі 1587 р., яка містила дві передмови і два трактати. Перша передмова присвячена «Яснеосвєцоному и вельможному... Александрови Константиновичови»; друга передмова має назву «До народов руских...». Трактати йдуть під заголовками «Ключ царства небесного...» і «Календар римский новий...»

Відомі лише два дефектні примірники цієї книжки, які зберігаються у Києві в Центральній науковій бібліотеці АН УРСР та у Львівській науковій бібліотеці АН УРСР ім. В. Стефаника.

Передрук текстів здійснено у вид.: Ключ царства небесного, западно-русское полемическое сочинение 1587 г. — АЮЗР, К., 1887, ч. 1, т. 7, с. 232 — 265.


Подається за першодруком.

1 Олександр Костянтинович (? — 1603 р.) — син Костянтина Острозького, навчався в Острозькій школі, ректором якої був Герасим Смотрицький.

2 В ней же истинный наслЂдник... — Йдеться про те, що рід князів Острозьких веде свій початок від великого князя київського Володимира Святославича (? — 1015), який запровадив християнство як державну релігію.

3 ...началником твоим... — Певно, засновником роду Острозьких.

4 ...мЂти всегдашнєє пилноє баченє... на новый вЂк свой... — Очевидно, Герасим Смотрицький має на увазі, що Олександр щойно вступив у своє повноліття.

5 ...змієобразныє шепталци... — Йдеться про єзуїтів.

6 Плютархус. — Це віршова кінцівка присвяти-передмови до Олександра Острозького, сина Костянтина Острозького, яка передує трактатові Герасима Смотрицького. У вірші обігрується одна з апофегм (афористичних сентенцій) Плутарха.

7 ...єдин з таковых учителєй... — Герасим Смотрицький має на увазі Бенедикта Гербеста (бл. 1531 — 1593) — польського письменника-єзуїта, одного з ініціаторів і пропагандистів церковної унії — римської і православної церкви, автора брошури „Wiary kosciola rzymskiego wywody..." («Висновки віри римського костьолу...»). Краків. 1586, наступне видання — Львів, 1586. З положеннями цієї брошури і полемізує далі Герасим Смотрицький.

8 ...к алендаря новог о... — Йдеться про календар, який у лютому 1582 р. запровадив папа Григорій XIII (1502 — 1585). Хоч григоріанський календар мав наукові підстави, однак він викликав опір православного населення і полемістів, бо вводився католиками силоміць, порушуючи усталені звичаї і традиції.

9 Василій Великий (329 — 379) — кесарійський єпископ (з 370 р.), письменник-богослов, поборник чернецтва, укладач «Статуту подвижницького», один з «отців церкви».

10 Григорій Богослов (Назіанський чи Назіанзин; 328 — 390) — єпископ Константинополя (381 — 383), письменник-богослов, один з «отців церкви».

11 Іоанн Златоуст (347 — 407) — константинопольський єпископ (398 — 404), письменник-богослов, один з «отців церкви».

12 Афанасій Александрійський (бл. 295 — 373) — старо-християнський діяч і богослов. Родом з Александрії, був там єпископом з 328 р. Боровся проти аріанства, проповідував аскетизм. Автор численних творів.

13 Кирил Александрійський (бл. 376 — 444) — єпископ Александрії (з 412 р.), письменник-богослов.

14 Іоанн Дамаскін (бл. 675 — бл. 754) — богослов, поет, вчений.

15 ...скаргов и гербестов... — Скарга (справжнє прізвище — Повенський) Петро (1536 — 1612) — польський письменник-полеміст, засновник єзуїтських колегій, ректор єзуїтської школи (пізніше академії) у Вільно. Один з ініціаторів і пропагандистів Брестської унії 1596 р. Герасим Смотрицький має на увазі його книжку „...O jednosci kosciola bozego..." («Про єдність церкви божої...»), написану 1574 р., опублікована у м. Вільно 1577 р., друге видання — Краків, 1590).

16 Корнілій — євангельський персонаж.

17 Авраам — за біблійною легендою, родоначальник єврейського народу.

18 Лазарь — євангельський персонаж.

19 Валаамским духом — тобто ослячим духом. За біблійною легендою, у пророка Валаама був осел, який заговорив людським голосом.

20 Личба розна, сила єдина. — Тут автор зашифровує у числах ім'я папи Григорія XIII — «третього законодавця»: 3 + 100 + 8 + + 3 + 70 + 8 + 8+13 = 305 + 361=666; «Грігорій XIII» дає 307 + 359 = 666, а це число вважалося «знаком антихриста».

21 ...с трашили тыми крекотками... — Йдеться про народний звичай крутити тріскачами біля церкви у великодній четвер.

22 ...которые от «пауперибус» латину починають учить... — Йдеться про так званих «нищих школярів» або спудеїв тогочасних шкіл.

23 ...дивноє знаменіе бог показати рачил... — Надзвичайно холодну весну 1587 р. Герасим Смотрицький пояснює тим, що нібито сам бог виступає проти введення нового календаря: за старим календарем Великдень мали святкувати тоді 26 квітня, а за новим — 29 березня, коли трапилася велика хуртовина.

24 Улєз в одежу... Генадія... — Йдеться про те, що уніати виступали під ім'ям Геннадія II Схолярія (? — 471), константинопольського патріарха, письменника-богослова, укладача «Стословця», поширеного ще з давніх часів і на Русі.









Див. також:

Герасим Смотрицький. Українська поезія. Кінець XVI — середина XVII ст.

ГЕРАСИМ СМОТРИЦЬКИЙ. Українські гуманісти епохи Відродження.

Герасим СМОТРИЦЬКИЙ. Ключ царства небесного, 1587 р. Переклав В. Шевчук


СМОТРИЦЬКИЙ Герасим. Філософська думка в Україні. Біобібліографічний словник








Головна




Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.