Головна         Див. також: В. П. Колосова. Віршовий полемічний комплекс 80 — 90-х років XVI ст.




ІЗ КИЄВО-МИХАЙЛІВСЬКОГО ЗБІРНИКА



До лЂнивых

Осторожность от єреси

На идолы

На Ирода

«Єсли бых был красномовный ангелского гласу...»

На аріане

На чревоугодных

Зрада єретиком

О князю тмЂ

О лжеучителєх

О лжепророках

Дерзость злоє єреси








ДО ЛЂНИВЫХ


ЛЂнивыє, любЂте Христу работати

и от нынЂ лЂности себе удаляти,

СмотрЂте дявола, како не лЂнится,

а вас, яко птицу, половити тщится.

Злокозный мысливець заставляєт сЂти,

во дни же и в нощи, и зЂмЂ, и в лЂти.

Вы же убЂгайте от такого лову

и до бога вашу наклонЂте главу,

Роскошей и пыхи будте отчужени

и, яко вЂрныє, будете блажени...






ОСТОРОЖНОСТЬ ОТ ЄРЕСИ


Любезный народе христианских полков,

писмо оглашаєт в вас живущих волков,

Кламливоє вЂры єретицких дЂтей.

УтЂкайте от нея, як дяволих сЂтей.

Проклят бо имЂяй со онЂми дружбу,

бога отлученый дяволу на службу.

Иже святых таин приялисте чашу,

наклонЂте бого†пилно любов вашу.

Не мещЂте святого свиниям топтати,

не мозЂте Христа два крот роспинати,

Нечистого пянства бЂгайте, молю вас,

да не приидет помста от вышнего на вас.






НА ИДОЛЫ


Идолская прелести, и ты вже попрана,

и з многобожиєм от Христа изгнана,

Єгда царство єго над нами трываєт,

тогда дЂмон з вами, яко прах, ищезаєт,

Сам носим был смирено на руках дЂвици,

иже всяческая держит во десници.

У великий нищетЂ повитый и в яслєх

удивляємый, иже в ангелских мыслєх.

НевЂрныє іюдеи, что вас ослЂпило,

вам бо сиє отроча даровано было.

На свЂдецство на вас будуть и пророки,

коли прийдет наш господь в остатнии вЂки.

Вы бо пред Пилатом того отверглися,

и царства єго купно отреклися, и тым обачите йдучого з небес,

который родився от дЂвици у вас.





НА ИРОДА


О Ироде безумный, гдЂ нынЂ царствуєш,

єще ли ся на Христа злостиве готуєш,

З незлобивых дЂток крови проливая,

и немилостивно смерти предавая.

ГорЂе бо дявола такоє убийство

зготовало тобЂ вЂчноє проклятство.

Царество земноє хотяше хранити,

и сласть грЂховную дерзаєш творити,

Главу Предтечеву мечем усЂкаєш,

и кров пророчую з него проливаєш.

Той же живет в радости во вЂки у Христа,

а тобЂ воздана праведная помста...






Єсли бых был красномовный ангелского гласу,

не может ми стати розуму и часу

Небесную славу достойно повЂдать

и языком людским ку похвале сказать.

Токмо поручаю мой убогий розум

отцу премудрости, да даруєт ми ум.

Єго же єсть престол превышайши небес,

имя єго страшно по вселенной у нас.

Ангелския полки в послугу предстоять

и не отреченно того волю творять.

Премногоє число звЂзднои красоты

бЂг свой отправують дивными оброты,

Хотениєм єго стежками их ходять

ий красоту зарей от средних зводять.

Абы всякои твари бога повЂдали,

на земли и мори пути знаменали.

Всемирноє солнце сияниєм свЂтит,

чтыричастным кругом з нощи дне освЂтит.

Праведного солнца волю пополняєт,

и на поднебесной землю ввеселяєт.

С ними же и луна тако послЂдуєт,

темности и свЂта дЂлность фикгурует.

Их же єсть создатель бог непостижимый,

в свЂти неприступном и во вЂки живый

Скудель о здателю мовити не вмЂєт,

и чловєк о бозст†мыслити не смЂєт,

ВсЂ бо писменики, людЂ того свЂта,

не научилися за всЂ тыє лЂта

Бога всесилного славу исписати

и невидимоє лице оглядати.

Яко єретики тым нас потваряють

и благочестиє наше ображають,

Мовячи, их боство у фарбах найдуєм

и несписанного на дре†малюєм.

БогоцЂлователми так нас намЂнили,

а предвЂчность Христову, бЂдни, затаили.

А пытаєм ли их о продкости отцев

и по апостолєх их законодавцов,

Никогда их вЂры начала не скажуть

и смрадом невЂрства сами ся помажуть.

Похвала бо отцем их святнє справы,

иж чистую вЂру дЂтєм доховали.

Отшедши от тЂла, с памятию живуть

и во наслЂдницєх так навЂки слынуть,

Иж им вЂру, як злато чистоє, вручили,

Абы их и внуков сея научили.

Церков восточная так нас научаєт

и як дЂтей єи к собЂ присвояєт.







НА АРІАНЕ


Чого єретици вмЂстити не могуть

и в недовЂриє до темности йдуть.

Не три боги, но один, в царстви нероздЂлный,

во трєх ипостасєх нами почитаный.

Иже сый преже сый, конца не имуще,

всяческая и всЂх дланю содержаще.

Во велицей сла†у престола єго

ангелския силы славять троистого.

Там страх, а не хулу, згодне прославляють,

премирныя лики немолчно спЂвають.

Наша убо свЂтлость в темность не злучона,

єретицкая же злоба обличена,

Иже неистовством стояти навыкла,

бо от бЂсовского совЂта проникла.

З нечистого сердца смЂлоє блюзнЂрство,

кривоумЂниє, явноє шаленство.

Уста их высокии слова розширяють,

а языки долЂ, як змЂи, ползають.







НА ЧРЕВОУГОДНЫХ


Хитро дявол половил тых, угодных собЂ,

храняще на згубу своей старой злобЂ.

За пост на роспустность подаєт им волю,

блуди, мовить, яко хоч, на то я позволю.

Не шукай же пастыров грЂхи очищати,

я вас в волю мою буду наставляти.

Хот тя Христос откупил, а ты минЂ служи,

я тым похвалюся, моє ярмо вложи.

Понуряйся знову а крестом ся брыди,

я с тобою и ты нероздЂлно ходи.

Я тебе приведу тамо обитати,

где многии бЂси будуть тя витати.

В широкости пекла там же обитаєш

и мою зычливость на тот час познаєш.

Толко смЂле хули на церков святую,

намножай єресь от них проклятую.

Праотець ваш Арий тым ми ся подобал,

а я єго к собЂ в товарыство принял.







ЗРАДА ЄРЕТИКОМ


Явная то зрада Христа отступити

и чревобЂсиєм врагу угодити.

Никто же бЂ освящен препитавый чрево,

но и безплодный єсть, як гнилоє древо.

Благодати святыє постом доступили

и святого духа дары получили.

На тот час бЂсове триумфы мЂвають,

кгды православного в єресь уловляють,

БЂсовскому князю радости приносять

и о помоч єго конечную просять,

Абы єго лестью болшей уловити

и своєму почту присовокупити.

Не терпять бо сами в мучений быти,

але християнов тамо загорнути,

Абы в день судный тым ся похвалити

и нашу достойность тамо потлумити.

ПобЂди, владыко, дЂмонская полки

и погуби от нас зловидныя волки.







О КНЯЗЮ ТМЂ


Князь темности, фалшивоє науки учитель

и скверного грЂха отець и любитель,

Моє, мовить, властво нынЂ мира сего

и вси роскошници широкости єго,

Як лев, рыкая, тщится поглотити,

єретическия души половити.

Але тамо хула з ними погибаєт,

а покаяния дЂмон возбраняєт.






О ЛЖЕУЧИТЕЛЄХ


Лжеучителиє науки новоє,

дЂти Ариєвы вЂры проклятоє

Явная то плЂва з пшеници Христовы,

которые в геєнЂ горЂти готовы.

Иже бо безстудне на Христа дерзають

и скверными словы єго ображають,

Єже Христу бозство лгуще утаити,

єдино честности з отцем отлучити,

Пламень невЂрия вмЂсто росы хладу

набавил души их спасенного гладу.

На вЂчную згубу так ся затвердили,

врази креста Христова святых путь згордили.







О ЛЖЕПРОРОКАХ


Познавайте, иж то суть лживы пророки,

которыє повстали в остатнии вЂки.

Абы кламствами их и вас половили,

народ православных собою згоршили.

Отца облычають, духа похуляють,

сына от божества они отдЂляють,

и тако невЂрством своим погибають.

ГдЂ ж оная свЂтлость от них отступила,

иже крещениєм оних породила.

Тройческого свЂта лучу отринули

и себе в невЂрство, бЂдни, низринули...







ДЕРЗОСТЬ ЗЛОЄ ЄРЕСИ


Аще бо ангели дерзати не смЂють,

ниже таких споров родити умЂють.

Каковы, створеньє, на здателя сами

мовите суєтство вашими устами,

Иже отца з сыном бозством роздЂляти

и духа святого тварю глаголати.

Самопосланные, себе погамуйте,

и благоумия розумы приймуйте

НезмЂноє безумство скоту ся ровнати,

от свЂта Христова ко тмЂ утЂкати.

Яко же ангели, богу покорЂться,

хулениє ваше з вами сокрушиться,

Єже быти вамо нечисту сосуду

и внЂ извержену ко вЂчному студу,

Где Ариє, старый Іюда, предатель,

Несторий и Самосат плевелосЂятель.

Дайте в серцах ваших обитель Христови,

не послЂдуючи хитрому змЂєви,

Да не испадете, яко з неба в бездну,

иже изнуристе жизнь вашу безмездну.

Зготовите себе небесному свЂту,

Христовому полку и новому вЂку.

Покайтеся, а он прияти желаєт,

умылными словы вас упоминаєт...









ІЗ КИЄВО-МИХАЙЛІВСЬКОГО ЗБІРНИКА


Вірші, що друкуються тут, містяться в рукописному збірнику першої третини XVII ст., який належав бібліотеці Києво-Михайлівського монастиря, а нині зберігається у ЦНБ АН УРСР, Петров (Мих.), № 484(1738), арк. 88 — 144.

Вперше передруковані у вид.: Перетц В. Н. Историко-литературные исследования .., т. I, ч. 1, с. 82 — 84 (уривок вступу і два вірші); Щеглова С. А. Вирши праздничные и обличительные на ариан конца XVI — начала XVII в. Спб., 1913; Українська поезія. Кінець XIV — початок XVII ст., с. 89 — 114.

Подається за вид.: Українська поезія. Кінець XIV — початок XVII ст., з уточненнями, зробленими за рукописом.








Див. також Українська поезія. Кінець XVI — середина XVII ст.




Головна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.