Головна         Див. також: В. П. Колосова. Віршовий полемічний комплекс 80 — 90-х років XVI ст.




ІЗ ЗАГОРОВСЬКОГО ЗБІРНИКА




Об отступных от церкви

О лжепастырех

О латынской гордости

ВЂра что єсть

Крещеніє без мира у римлян

Молитва со слезами пріятна богу

ПапЂжне непокорство к Христу

Гордость папЂжская

Церкви своєй Христос помогаєт

Церков западная блудить

О простотЂ апостола Петра

Дар душевредный

О прелестях римских

О гоненіи на святую церков

На злую єдность

О мудрости мирской

До благочестивых

Како Андрей, святый апостол пришел в Кієв-град к невЂрным

О крещеніи русском

Племени русскому наказаніє

Непріязнь латинская

О святых тЂлах печерских

До иноков русских








ОБ ОТСТУПНЫХ ОТ ЦЕРКВИ


Врагови подобни церковніи врази

и єго милыи и вЂрніи друзи,

Иже Востока свЂтлость нынЂ оставляють

и до тмы Запада во прелесть отбЂгають,

От истины до лжи, от вЂры во єресь,

от святых сладости во грЂшную горесть.

Водимы бывают плотскими совЂты

и не сохранили ко богу обЂты,

Которых ко нему сами учинили

и своими усты оных осудили.

К богатому папЂ отбЂгли на пашу,

абы за пЂнязЂ погубити душу,

ГдЂ все им по волЂ будет поблажати,

измышленный Христос, убійца, не мати,

Иже всю вселенную злостями осквернил

и духовный розум на плотскій измЂнил.

Дух же святый истинен, солгати не может,

и людем прегордым гордость не поможет.

Аще бо кто вержет камень на высоту,

мняще небесную збивати красоту

Всемірнаго солнца, яснаго свЂтила,

на такого падется и оная сила.

И на свою главу воспріймет болЂзни,

да к тому престанет творити соблазны.

И сіи же Христовы церкви не побЂдять,

але сами себе во вЂки безчестять.

И срамоту пріймут от онаго славы,

крЂпость єго и суд сокрушит им главы.

НавернЂться, бЂгуны, ко церкви восточной,

пріидите к матери святой, непорочной,

Не шукайте Христа на ЗападЂ, в РимЂ,

и явился нам бог наш во ІєрусалимЂ.

Уже бо не прійдет с земнаго вертепа,

але от божія небесного свЂта.

Папа бо пануєт не на небЂ, в РимЂ,

и погребаєтся во землЂ и ямЂ.

Не яко бог владЂєт, человЂк бо тлЂнный,

слава и вЂк єго вскорЂ отмЂнный.

Але цар небесный сидит на столицЂ,

и трепещуть пред ним ангельстіи лицы.

И все созданіє єму ся кланяєт,

от него живот и духа мЂваєт.

И самый Петр в РимЂ где бы нинЂ востал,

благочестія вже там бы не застал.

Єго намЂстники им бы изгордЂли,

Иже, як царове, по нем збогатЂли.

Мусил бы их снова нищеты учити,

але по истынЂ не мог бы смирити.

Праведно ж бы папам Петра памятати,

востанет бо потом он их обличати.

СохранЂмо ж вездЂ Петровы науки

и будемо Христу и єму ученики.








О ЛЖЕПАСТЫРЄХ


Горе оным, иже церков наражають

и за имЂнія вЂру продавають,

як жиды ІудЂ цЂну поставляють,

Оставляють Восток и бЂгуть на Запад

и многими вожами поспЂшными во ад.

Мимо права святого людских наслЂдують

и слова божого ни мало пріймують,

славы бо и чести на землЂ шукають,

До всякои єреси ради ся злЂпити,

а святую вЂру хотят развратити.

Суди ж им, господи, от мыслей отпасти,

и нас же избави от той прелести.

Вы же, православныи, господа любите,

матку духовную честію почтите,

Восточнои церкви уставы храните

и за отступными пастырьми не йдите.

Не даєт бог славы своєи никому

и хочет служити нам єму самому.

И вы от Сіона, Рима не шукайте,

и непобожнои єдности бЂгайте.

Ни, свЂт бо темности не поработаєт,

но всегда собою темность отгоняєт.

Так святая вЂра свЂтла єсть и свята,

без змазы и єресей, яко дЂва чиста.

От самого Христа до нас возсіяла

и от апостолов людей освЂтила.

Всю бо вселенную они научили

и за неи крови свои проліяли,

И на вся языки дали єпископы,

Богу позыскавши, як честныи снопы.







О ЛАТЫНСКОЙ ГОРДОСТИ


Але во остатній вЂк гордыи римляне

почитают своє, яко божіє, созданіє,

МЂстца апостолов мнятся содержати,

а их обычаєв не любят хранити,

И все противноє дЂлают Христови,

и не послЂдуют святому Петрови,

И божую славу миреною покрыли,

и духовный розум плотским измЂнили.

Запремо ж ся таких апостолов новых,

да не отлучають нас любвей Христовых.

Святыи папЂжи, первыє блаженны,

иж муки за Христа были сподобленны,

И тыи истинно Христови служили,

и для христіанов души положили,

Яких тепер церков римская не маєт,

и с жидами дружбу и любов ховаєт.

Христови и церкви зЂло єсть противна

и до восточнои матки непокорна.

Але вы, вЂрныи, мачоху минайте,

святую отчизну зЂло заховайте,

И не послЂдуйте гордому народу,

держите со Христом пресвятую згоду.

Не подобаєт нам слабовЂрным быти,

да не заведуть нас от вЂры зблудити.

Кто православной вЂры отступаєт,

такій со святыми жребія не маєт,

Убог такій и наг, душа єго мертва,

и сам єсть гнусная грЂховная жертва.







ВЂРА ЧТО ЄСТЬ


ВЂра єсть дар божій и людей спасаєт,

але злая єресь души погубляєт.

ВЂра праведников на судЂ прославит

и перед лицем божіим со святыми ставит.

ВЂра спасенію пріятель зичливый

и наставник грЂшным и путь добротливый.

ВЂра до царства божієго приведет,

а єресь в пагубу вЂчную заведет.

ВЂра и от смерти многих избавляєт,

и слугам божіим в бЂдах помогаєт.

ВЂра живет с богом и в ней всЂ во бозЂ,

и вЂрныи души ставаются блази.

ВЂра христіаном все творити может,

сила бо божія таковым поможе.

ТЂсною стезею до Христа приходять,

але широкою в пагубу отходять.

Не хотЂмо ж Христа снова роспинати,

ани крещенія второ поновляти.

Не слухайте лживых учителей новых,

иже отлучають от бесЂд Христовых.

Западная мати не нас породила,

але прегордыи дЂти исплодила.

Блудная бо церков нЂсть Христова дЂва,

держащая кубок господнєго гнЂва.

Скверная, сквернити людей навыкаєт

и от спасенія хитро отдЂляєт.

Превелія бЂда Риму работати

и новаго Христа себЂ измышляти.

Премногая ж цнота Сіону служити

и святого духа уставы хранити.

Як чистоє злато, господніи слова,

сильнЂйшая огня от уст єго мова,

Из Ієрусалима вЂрным даровано

и всю вселенную богови призвано.

Восточная церков — правдивая мати,

весь свЂт породила духом благодати

и чистою дЂвою Христа обручена,

тЂлом и кровію єго освященна.

Иже прегордому папЂ не голдуєт

и Христу-цареви вЂру заховуєт.

Златоструйный поток, любимицы, пійте,

отческую вЂру хранити умЂйте.

Як святыи книги нам оповЂдають

и всякую єресь явно обличають.

Памятайте пыльно о убогом ХристЂ,

который за люди умирал на крестЂ,

И на поклонную оного покору,

иже росказуєт ангельскому збору,

Як за наши грЂхи безчестіє пріял

и нас от упадку милостію поднял.

Не мнимайте ж папу Христову особу,

а ни чудитеся на єго оздобу,

Иже єсть змышленный, не Христов апостол,

и похитительно держит єго престол.

Наука и живот нЂсть єму духовный,

яко блаженный апостол верховный.

Познавайте ж разумно пастыри и волки

и не лучитеся в невЂрныя полки.

Не хочет бог єдности не по єго волЂ

и за то караєт, абы єго знали,

Потоком и огнем непокорных,

тылу и грЂхови и мирови вгодных.

Велик єсть бог, судія грозный всему свЂту,

пред которым стануть папы того вЂку,

Которыє смЂють Христовы декрета

вельми зневажати для марного злата,

Ламлючи каноны и вызнаньє вЂры,

и власти шукають, яже вышшей мЂры,

Жидовскій опрЂснок честію почтили,

а тайную вечеру Христову змЂнили,

Як мертвого трупа, оплатка глытають,

а Христа живого в хлЂбЂ отмЂтають.

Посполитый народ, без крове Христовы

сакраментуючи, утЂшають словы,

И дЂти малыи з ними отлучають,

о горе, о горе, и сами згибають.

Там правдивых агнець з костела изгнано,

абы жидовскую пасху праздновано.







КРЕЩЕНІЄ БЕЗ МИРА У РИМЛЯН


Крещенія свои без мира справують,

не як апостоли сіє отправують,

И трехпогруженія в костели не мають,

и новокрещенных блатом помазують.

Тремя погруженьми тройцу вызнаваєм,

и смерть гнюсную тайно возвЂщаєм,

Ибо вода сія тЂло омываєт

и святоє миро члонки освящаєт:

Слух и очи и чело, перси, руцЂ и нозЂ,

яже просвЂтлены бывают о бозЂ.

И дар невидимо духовний пріємлем,

от бога и отца сыновство пріємлем.

ГдЂ святыи молитвы бывают читаны

И бЂсове тогда бЂгут, изгонимы.

З святых апостолов так єсть нам подано,

и от святых отцев каноны ствержено.

НынЂ вже римляне письмо преслушали

и набоженства их ново позмышляли.

Вже бо жидовствуют з своими органы,

любо плясальницы в бога поруганы.

Господь не требуєт пищалей и шума,

иже тщеславніи воплють без ума.

О мірская! Будто богу догожаєш

и умиленіє з людей выганяєш.

Гудуть бо трубами, як смоки рыкають,

гдЂ божій ангели приступу не мають.







МОЛИТВА СО СЛЕЗАМИ ПРІЯТНА БОГУ


Лучше йти в дом плача, а не в дом веселія,

гдЂ єсть похулено господнеє имя.

Христос-избавитель плакати нам каже

и слезами вЂрный бога найти може.

Не труба и арфа бога умоляєт,

але милостыня небо отворяєт. Гласы ж безчинныи воздух наполняют

и по сем, яко дым, поставы не мают.

Але святых молитвы пред бога исходят

и милость божію мирови приводят.

Не єсть то честь богу, єже грЂх творити,

ниже нечистими жертвами вгодити.

Святый же дух мЂшканя в грЂшниках не маєт,

и беззаконников господь погубляєт.

Не тамо дом божій, гдЂ злостям господа,

и не любить Христос, гдЂ мерзости згода

ГдЂ крест єго честный на нозЂ вкладають,

таковыи собЂ мученія чають.

Так и римскій папа Христу досажаєт,

на своих обущах крест выображаєт,

Блудницам же мерзость разрЂшив творити,

и во римстЂм градЂ посты разорити.







ПАПЂЖНЕ НЕПОКОРСТВО К ХРИСТУ


ДоколЂ ж, о папо, высишся на Христа,

будет бо от него на грЂшники помста.

Достоин ти святый крест честію почитати,

пред которым бЂси звыкли трепетати.

Крест нам печать, вЂрным христіаном,

а нападеніє невЂрным поганом.

И святого Петра так не заповЂдано,

и тебЂ заклято и не благословенно.

Ни один святитель нигдЂ на вселенной

не согласуєт так твоєй власти темной.

И креста на нозЂ свои не вкладають,

котораго в чести ангели мЂвають.

БезотвЂтен будеш пред царем распятым

и от святых єго станешся проклятым.

Дасть тебЂ бог нозЂ по землЂ ходити,

а ты узаконив людєм цЂловати.

О гордая гордынє, кичишся до неба,

але во глубину снидеши до ада.

НадмЂніє твоє, яко водная пЂна,

але твоя крЂпость, яко паутина.

Явно всему свЂту, иж ся обожаєш,

иже єсь персть и пепел, сего презираєш.

Не буди ж нам сіє, матку оставляти,

восточную церков, и богом кламати.

Слышите, слышите, всЂ вЂрных народы,

яко из папЂжем шукаєте згоды,

Который вам кажет себе обожати

и тлЂнніи нозЂ свои цЂловати.

Святый наш владыка иным нозЂ вмывал,

апостолом єго, и так их научал.

Читайте ж о ПетрЂ, єсть ли папЂ отець,

который не набыл многоцЂнных столиць,

Але терпЂніє в нищетЂ проходил

и от грЂха людей многих освободил,

На діавола брани многіи поставил

и кровію єго господа прославил,

Не вбивати, но умрети за люди возлюбил,

и своєго Христа вселюдно улюбив.

Живот апостольскій легкій и высокій

и над земных царей пред богом великій.

И римскій папы тым ся тщеславують,

зле духовноє житіє минають

о многих богатствах и тЂлесных сластєх,

во сла†и чести и по своих страстєх.

Але всЂ знаєте, иж пышніи гниють

и святого духа в собЂ не мають.

В покорных пастырєх Христос пребываєт,

але горделивых далеко минаєт.

ГдЂ ж нынЂ папЂжи за вЂру вмирають?

але за их єресь многих убивають.

Пожирають, яко львы, отческіи права,

абы славилася всего свЂта глава.

Христос — глава церкви, а блудницы — папа,

и своих заводить в пекельній врата.

Христос — глава вЂрных, а єресєм — папа,

иже пойдет с ними в пропастніи врата.

ЧеловЂкоугодным всЂм єсть наставник,

а в лицемЂріи богови противник.

Не єсть всЂм угодно єго наслЂдити,

понеже не могуть так обогатЂти.

Але нищим всЂм Христос єсть учитель

и любящим єго правдивый спаситель.

Таковых пастырей и вы наслЂдуйте,

и себе в чистотЂ богу приготуйте.







ГОРДОСТЬ ПАПЂЖСКАЯ


О прегордый папо, откинь твои блуды,

иже посрамляєш всего мира студы.

ГдЂ ж ти Петр повелЂв посты розоряти,

але под клятвою оных заховати.

Почто ж от блудниц дани избираєш

и оным блудити явно позволяєш?

Для чего празнуєш свята из жидами,

христоубійцами, божіими врагами?

Клятва апостолов тебе искараєт

и святый их канон тебе обличаєт.

И євангелія чому не читаєш,

до вызнаня вЂры єресь придаваєш?

Святого бо духа отець посылаєт,

который по сыну предпочиваєт.

Научил нас Христос тако вЂровати

и благоговЂйно тройцу почитати.

Але не знаємо, хто тебе научил,

абы и от сына дух святый походил.

До третєго неба не был єсть восхищен,

а ни з апостолов того не научен,

Которым сын божій духа обЂтовал,

которому прійти из отца именовал.

Отець сына родил и духа изліял

и всему мирови позвати даровал

Во єдином божест†тройцу вызнавати,

царство и владзу єдну познавати.

Якій євангелист так тебе научил,

дабы и от сына дух святый походил?

О мудросте земная, богу покорися,

и ты, честный отче, єреси заприся.

Два початки духу святому не учи

и євангелієм сам себе обличи,

Кривои науки остави учити

и святого Петра люби наслЂдити.

Хочеш отмЂняти божеє безумне,

но твоя срамота тебе не омине.

Богом ся на земли смЂєш удавати,

который по смерти будеш истлевати.

Ключарю до ада, Петра не потваряй

и собе до Христа врата не затворяй.

Не єсть большій слуга над своєго пана,

а ни божія власть тобЂ не подана.

Попуєш ли в РимЂ, не служи сатанЂ,

поповати тебЂ достоит смиреннЂ.

Не меч и копіє Петр ти зоставує,

а ни мужебойства чинити повчає.

Але Христов ярем кажет ти учити,

а ты поучаєшся братоубійствовати

Як можеш учити людей свято жити,

єсли ся богови не хочеш покорити?

Збираючи скарбы, учиши нищеты,

а не пріємлеши Христовы простоты,

Росказуєш себе на главах носити,

будуть ся бЂсове о тобЂ хвалити.

З ними бо згодливе поваги вживаєш

и смутити церков оным помогаєш.

Не долго ти тая ловитва послужить,

а ни Петр-апостол тебЂ не поблажить.

Єгда на суд божій испустит земля,

искараєт господь беззаконных племя.

Святыи нам книги того не сказали,

иж бысьмо папЂжа главою звали,

Иже всю єресь хитро покрываєт

и святого Петра дармо потваряєт.

Не євангеліє заховуєт цЂло,

але разсЂкаєт церковноє тЂло.

МЂвають и гробы златыи оздобу,

але внутри полны чловЂчаго смраду

Таким себе любить папа сказати,

абы єго таин не могли познати.

Але вы, братіє, Христа величайте

и всею душею того почитайте.

Который и душу, и тЂло даровал

и царство єго вЂрным обЂтовал.

Никто же не блуди от святого пути

и достоин будеш одесную стати.

Путем Христовым отцове ходили

и нам ити стезю благу сотворили,

На лЂво и десно да не возвратимся

и Христу-господу вЂрно прилучимся.

Чужая то слава, и бога минаєт

западная церков, иже отступаєт

СвЂтлости божей и єго дороги,

который погубить вЂчно своя враги.

Але вы пріязни в бога набывайте

и с єретиками згоды не мЂвайте.

ВсЂ бо преступницы свои стези мають,

а пути Христова во вЂки не знають,

Яко же бо дыма, нынЂшній вЂк любять

и душу, и тЂло для марности губять.

МамонЂ, яко богу, вЂрно работають,

во златЂ и сребрЂ надежду мЂвають.

Поколя плотію живемо во мирЂ,

утвердите себя во Христовой вЂрЂ,

Старцы и юноши и всякій народе,

будите во вЂки во Христовой згодЂ,

Познайте ясно прелюбого царя

и будете потом, яко свЂтлая заря.

Нехай же вас хитро мир сей не полонить

а ни прелесть єго до грЂха не зводить.

Иже утЂкаєт, яко звЂр из горы,

и як вода быстро минаєт воскорЂ,

И скалы и пески валяєт с высока,

так грЂшного слава погибаєт до вЂка.

Мира сего слава сладка єсть и люба,

але як морская потопляєт вода.

Которыи єя нынЂ пріобрЂли

и вЂчнои жизни за сію презрЂли.

Достойна єсть смЂху и Христа далече,

и души грЂшников во муки привлече.

За честь дочастную мерзости во вЂки

праведно пріємлють злыи человЂки.

Сохрани вас, боже, храните ж и сами,

вси бо єсте богом во вЂру призвани.

Слава бо и злато, яко тЂнь, мимо ходять

и любящих сія в пагубу приводять.

Такую то цЂну душЂ учинили

и за небо землю собЂ улучили,

Отступники вЂры, от Христа бЂгуны,

абы уводили до церквей новины.

СмЂючи и Христа тым вже повторяти,

абы своих страстей волю исполняти.

И с грЂхами хотять от муки спастися,

ты же, боголюбче, от них отвратися.

Душе, душе злая, єреси отметай

и на погибели свои воспамятай,

Поверзи, поверзи служити сатанЂ,

будеши терпЂти во мучимой глубинЂ,

И злато и папа там тебе забуде,

и горе, и плачи — з тобою пребуде.

Не торгуй душею, второє не купиш,

и лживый пастырь к тому да не будеш.

Пристояло тобЂ нищету терпЂти,

а не богатства у папы шукати.

Господь, наш спаситель, нищету претерпЂл

и во страданіи увесь мір освятил.

Кто ж тя так научил нового закона,

иже кромЂ бога вынашел сатана?

Мудрость бо плотская Христа преслушаєт

и духа святого в собЂ не вмЂщаєт,

Которая церкви смущенія творить

и врата до Христа грЂшником затворить.







ЦЕРКВИ СВОЄЙ ХРИСТОС ПОМОГАЄТ


Але Христос убогой церкви помогаєт

и во гоненіях сію утвержаєт,

Иже зневолена, як Іосиф, во оковы

и поношеніє поносить Христовы.

Врази креста Христова єи утЂсняють,

але терпЂнія не преодолЂвають.

И так бога славить, иж в немощи сильна,

и межи турками господеви вЂрна.

И ты, русскій роде, тепер утвержайся,

межи єресями во вЂрЂ мужайся.

Воля єсть господня нам нынЂ терпЂти,

а миролюбцам время богатЂти.

Научив нас Христос мір сей не любити,

и єго и вЂру над душу любити.

И не на роскоши апостолы послав,

на бЂды и скорби ити им завЂщал.

И безоружніи на брани послани,

абы были ими языцы спасени.

И не философы, але рыболовцы,

невЂжи, простыи и не красомовцы.

Смотрите же Петра, кгды сЂти оставив,

яко всю вселенную богови уловив.

Весь лик апостольскій ярем Христов несли

и нас, яко дары, господу принесли,

Не шкатулы златом себЂ наполняли,

але нас спастися от муки призвали,

Без поваги ходили пЂшими ногами,

их поставил бог на замлЂ князями,

и благочестіє веюду насадили

и черніє грЂха сильно погубили,

То их был прибыток — за Христа умрЂти

и братолюбіем єму угодити.

Вся им вселенная скарбы створила,

але их нищета богу приближила.

Честный отче папо, яко же Христа чаєш,

и святого Петра яко там превитаеш,

Кгды будет судити и тебЂ и другим,

и дастся заплата и грЂшным и благим?...

лаженни ж нищи, иже Христа ради,

але богатіи найдутся во адЂ.

Нищета Петрова богатых посрамить,

которыи єго слухати не хотять.

ГдЂ ж покора, гдЂ любов, гдЂ тая наука,

Иже нам зостала от святого лика?

Их же господь, други єму именовал,

на которых духа от отца изліял?







ЦЕРКОВ ЗАПАДНАЯ БЛУДИТЬ


О римская церкве, чому погибаєш

и святоє письмо смЂле отметаєш?

Плачемося о вас, милыи римляне,

твердосердечніи жидо-христіане.

Чого Христос не любить, а вам тоє любо,

але смиреніє божіе не любо.

Плачутся святыи на ваше безстудство,

иж упадаєте во вЂчноє проклятство.

Помраченіє ума людей славолюбных

наносить з Западу устав душегубных.

Але покажите вы, римскіє дЂти,

гдЂ вам позволяно заповЂдь презрЂти?.

Шумите словесы, бога обидяще

и євангелія єго не храняще.

Але ваши власти спаситель погубить,

иже беззаконным помстити приходить,

Розкажет и папЂ нагому предстати

и поважность тую от него узяти.

Мусите забыти папу Христом звати,

который вас учить себе обожати.

Але древо от плода бываєт познано

и благочестіє дЂлами явленно.

Блаженный убо Петр служний уряд принял

и, яко ученик, смиреніє хранил,

Царства у РимЂ не помыслив мЂти,

але всякую скорбь за Христа терпЂти,

И папам не казал мучительми быти,

а ни православных на єресь нудити.

Але таковы суть намЂстники злыи,

в которых мЂшкають духи несвятыи,

Которыє крести и мечи пріємлють

и похитительне власти воспріємлють.








О ПРОСТОТЂ АПОСТОЛА ПЕТРА


Убогій Петр и нищій о ХристЂ памятал

и волю плотскую от себе отметал.

Живот єго каждый познати хотите

и єго стезями по бозЂ ходите.

Была єго слава оковы и темница,

не папЂтворная гордая столица.

Апостол бо Христов истинный служитель

и всяких сокровищ конечный неимЂтель.

Ризы бо худыи тЂло одЂяли

и обуви ногам єго послужили.

Постель єму земля, а не одры чудны,

не от плачу нищих, иже богу скудны

ГрЂхов теж за злато никому не простил

и некающимся муки прозвЂстил.

Головою себе не помыслив звати,

а ни господнєй чести похищати.

Але крестная смерть — то єго похвала,

и такая по нем столица зостала.

Убогій рубы иї нагоє тЂло,

иже нужнЂйшои смерти вокусило,

Начальства ж гордаго папам возбраняєт

и єго листами крЂпцЂ завЂщаєт.

Начальником вЂры зватися не хотЂл

и всю свою волю Христу поработил,

Иже миру всему себе укрыжовал,

иже Христа ради кров свою изліял.

Добрый раб и вЂрный теченіє скончил

и душу богови в руцЂ поручил.

ТеплЂйшій во вЂрЂ, правый исповЂдник,

камЂнь вЂры и святый міру проповЂдник.

Рим его кров пріял, завЂсив на древЂ,

а Христос отворил к собЂ єму двери

О чистцу не писал и славы не учил. и многіи чада богови прилучил,

Не важився кламства на свЂт выдавати

и в чистец по смерти души посылати,

О божем царст†и муках повЂдал

и покаяніє прежде смерти подал,

ВсЂм быти готовым пред Христа приказал,

огнем поновленіє всей твари написал,

Иже во день судный будет очищати,

и явно и страшно свЂт будет палати,

Иже потоп огненный то ся называєт,

им же, яко злато, бог мир очищаєт

Во огнЂ пламеннЂ, святый Петр мовить,

всесильный и страшный цар и бог приходить.

Але того чистцу, яко Рим повЂдаєт,

святый Петр и Павел не проповЂдает

Але запрещают вЂрным не грЂшити,

а грЂшным покуту на землЂ чинити.

Ознаймили всЂм от мертвых востати

и душЂ и с тЂлом заплату пріймати.

А нынЂ папежи лЂта продавають и до чистцу души грЂшных посылають.

Кто им больше злата за тоє даруєть, такій наданья от оных пріймують,

Иж ему всЂ злости зараз разрЂшають

и на колькосот лЂт в чистец посылають.

Мы же злого грЂха скоро отбЂгаймо

и таким прелестям вЂры не даваймо.

Караєт бог грЂшников дочасно и вЂчно,

и злодЂланіе діаволу прилично.

Царство вЂчноє конца не мЂваєт

и мука мучимым не преставаєт.

Пифагор-философ, поганскій учитель,

чистцового огня первый изъявитель,

Так разумЂв и писав, а римляне держать

и многих роспутно грЂшити приводять.

Для чего лакомства, и блуды, и убійства,

богопротивніи творять своволеньства?

Скажи ж нам, костеле, як о ХристЂ вЂриш,

который без грЂха яко и сам видиш,

Пробывав у тЂлЂ, и судити буде

и нашему тЂлу, купно и всЂ люде,

И велить без грЂха христіанствовати,

абысьмо достойни его оглядали.

Кров его святая рабом єго чистець

и покаяніє грЂхови єсть конець.

А чому ж розбойник до чистцу не послам

и во раю быти со Христом обЂцян?

Але кого ж Христос до чистцу одослав,

абы кто по смерти покуту преймовал?.







ДАР ДУШЕВРЕДНЫЙ


Знайте, христіане, що папЂж вам даєт,

слуга из милости вольность обЂщает.

Милостивым лЂтом людей поманили

и напротив богу право ухватили.

На пЂнязи певній отпуст розсылають

и на грЂх охоту людем повЂдають.

БезцЂнныи души тмами погубили

и благочестіє з людей разорили...

А чому ж до чистцу бЂсов не пошлете

и милостивого лЂта не подаєте,

Же бысте и ангельми могли учинити,

поневаж хочете в небЂ рядити?

Западный костеле, Христов декрет прійми,

иже на судный день услышиш, воспрійми,

Не вбивай, не блуди и пыху поверзи,

и єресь и кламства от себе отверзи.

Праведникам указуй стати на правицЂ,

а беззаконником мЂстце на лЂвицЂ,

А третяго чистца встыдайся змышляти,

злыи бо не могуть бога оглядати.

Єсли Адам был в чистцу, а з ним и всЂ люде,

по вашей науцЂ як то правда буде:

Мусил и Христос до чистца вступити,

мог бы и нам в письмЂ о том дати знати?

Але святых души от ада изводил,

до которых господь под землю в бездну нисходил.

И цар Давид писал, иж выйдет из ада

душа его потом и дождал господа.

Не лжите на бога, учители грЂха,

и не насЂвайте прелестнаго духа...









О ПРЕЛЕСТЯХ РИМСКИХ


О великій Риме, так прелести родиш

и всякій злости ты вже переходиш,

Абысь антихриста мЂв себЂ любовна

которого воля богови противна

Готовишися єго, яко Христа пріяти

и послушаніє оному отдати, —

Сына погибели, церковнаго врага,

которого злыи мЂтимуть, яко бога.

Аж духом уст Христовых будет убієнный

и зо всЂми єго в муки воверженный.

О великій Риме, чом от бога блудиш

и нечистотами всего мира губиш?

ВсЂ бо отщепєньства в тебЂ гнЂздо мають,

и всякій блуды тебе не минають.

Плотиугодницы твои єпископы,

а церкви Христовой злыи апостаты,

Иже только пЂняжный закон заховали

и купами людей до пекла погнали.

Без покаянія спастися повчають

и отпусты свои за злато мЂняють.

И блуды, и вбійства людєм разрЂшили,

которы бы им сребро приносили.

Забыли караньє страшливои помсты

всесильнаго бога за оных лакомства

Але познай каждый, богу вЂрный рабе,

иж преступленіє от Запада иде,

И зрады, и фальши, и хитрій власти

разширяются з адовы пропасти.

Аще мы умолчим, камень возопієт

и блажащих злобу гнЂв божій побієт

И явно, и тайно церкви ворогами,

абы нареклися земными панами.

ВмЂсто власяницы — царскіи порфиры,

одЂяніє их — яже вышей мЂры,

Многими дворами домы их содержать,

и брани, и битвы на царства творять.

Жабоястный народ, влоскіи пастыри

на Христа и Петра влагають потвари.

Але Христос Петра жабами не кормил,

а ни устен єго жабами не сквернил.

Токмо выдЂніє на приклад показал,

абы и поганов до вЂры пріймовал.

А ни Предотеча саранчи не вживал,

але зеліями и медом ся питал.

Так и всЂ святій скверным ся брыдили

и чистыми себе покарми питали,

Не красили себе, яко блудныи жены,

и для того были Христу прилучены.

НынЂ ж багряница — то папина слава,

понеже и сам єсть блудничая глава.

Єго же мнозіи люде наслЂдують,

которіи вЂрно Христу не пріяють,

Называючися имя христіаны,

дЂла же их творять, яко же поганы.

Але, Христе-царю, сам ты нас сохрани

и нас от такои прелести измЂни!








О ГОНЕНІЙ НА СВЯТУЮ ЦЕРКОВ


Каин и Авель д†церкви значили,

иже из Адама сыны ся родили,

Которыи богу офЂры принесли

и молитвы свои к богу вознесли.

Але грЂшный Каин богу не угодив

и з лукавым сердцем к нему приходив.

Авель же пред богом простоту указав,

и бог єго дары на офЂру приняв.

А коли молитвы Авель богу отдал,

Каин єго зараз убити помышлял,

И по малом часЂ онаго умертвил,

але и бог єго праведно показнил,

И мерзскую жертву онаго отразил,

єго же молитвы вышній не возлюбил,

иже по зависти Авеля погубил,

И братоубійство на земли сотворил,

и кров праведную, яко воду пролил.

И нынЂ таковы Каинови внуки,

выникаючи в остатній вЂки,

Иже снопы злостей на жертву влагають

и души праведных хитро погубляють,

Славицею людскою себе заслонили

и Христово имя себЂ прилучили,

Але суть далече от святаго пути,

и в беззаконіи навыкли пребыти,

Свою честь и славу на земли коренять,

а славы божеи любити не хотять.

Нарекли на земли славно их имена,

а память смерти им не воспомянена.

И грады и села тысящьми собрали,

а Христовы слуги смЂле ся позвали.

Хотячи и больше и землю посЂдати,

и во дни, и во нощи мамону стяжати.

Але бог єсть святый и злыми ся брыдить,

иже своя враги вовЂки погубить,

Любить за нас чистую пріяти офЂру,

и кажет чистую заховати вЂру.

Без єреси и грЂха богу ся явЂмо

и послушаніем оного почтЂмо,

За послушаніє царство нам дарует,

за преслушаніє ж муки уготуєт.

Яко Авель, терпЂмо, от убійцы брата,

и будет молитва пред вышним пріята.






НА ЗЛУЮ ЄДНОСТЬ


Нехай же дружатся с Каином римляне,

и положит их бог в такоє же караньє,

Нехай же их страхи нас не отлучають

от любви Христовы, аще и вбивають.

И даров и лестей от них не пріймЂмо,

и божеи славы тлЂнным не дадЂмо.

Слышите, слышите, всЂ купно народы,

из єретиками не мЂвайте згоды,

Не в палатах златых господа шукайте,

але єго з неба славно ожидайте.

Ложь бо человЂча з богом не царствуєт,

и лесть неправедных скоро погибаєт.

Кто милуєт Христа, на прелесть не ходи

и во терпЂніи оному угоди.

Остатній вЂки, але ты спасайся,

и до папЂзскои купи не злучайся,

И страхом и датком уловлен не буди,

и доброту Христову в сердцЂ соблюди.

ВЂси, яко тебе за кров свою купил,

абысь к противному єго не отступил.

ЦЂну себє дал господь, себе ж єму продай,

и тЂло, и душу єго ради отдай,

Поминай, поминай малость твоєго гроба

и як в нем истлЂваєт земная оздоба,

Фарбованых словес не прійми во слухи,

абы твои врази не имЂли утЂхи.








О МУДРОСТИ МИРСКОЙ


Мира сего мудрость богу непріятна,

иже не истинна и з лестью превратна.

Тую латинскіи учители мають,

а святую мудрость з души удаляють.

ХранЂмо, братіє, святую простоту

и нелукавную божію доброту,

Иже святым духом письмо нам подано,

и тым наши души часто напаяймо.

Господь свою мудрость з высоты даруєт,

и праведным єго в сердца изливаєт,

Иже богословне житіє проходять

и по волЂ єго умы свои водять.

ЧеловЂчая ж мудрость божієй противна,

тЂлесна, бЂсовска и велерЂчивна,

Святый Павел єи глупством называєт,

и непріязнь з неи богови бываєт.

Которую турки и жидове мають,

але не духовне сій пробывають.

Так и латинницы людей прельщають,

от божои мудрости всЂх отдЂляють.








ДО БЛАГОЧЕСТИВЫХ


О милые друзи, всЂ вы христіане,

познавайте от них ваше ошуканьє,

Не напивайтеся з горького студенца

смердячого грЂхами даже и до конца.

Святои ж науки себе научайте,

тую же и чадом своим надавайте,

Вже вам латинницы глупство причитають,

а сами все злоє в людєх умножають.

Их же училища єресь розсЂвають

и, яко же ядом, души забивають.

Що єсть богу не мило, и вы понехайте,

и святыи книги свои почитайте,

В которых наука, и мудрость, и цнота,

побожность, и розум, пречестнЂйшій злата,

Умаляють грЂхов, множать добродЂтель,

будет книголюбець душею пресвЂтел.

Письмо свято й чисто, богодухновенно,

и любящим єго благо и спасенно.

Книги — духовныи раи, разумныи цвЂты,

приводять нас Христови воздати обЂты.

Книги — солнце душам, мысли освещають,

книги грЂхов черность в людєх убЂляють,

Книги в юности премудрыми творять,

простых и невЂжов ритори сотворять.

Ни Платон, ни Пифагор, ниже Аристотель,

не обрЂтаєтся духовный сказатель,

С которых латины наук ся повчають

и безумную Русь к собЂ потягають.

Молю ж, Хриєта ради, на прелесть не йдите,

ани чада ваши на зло не ведите.

О ХристЂ братіє, о русскіє чада,

избавите себе от темного ада,

Не в школах латинских розум купуйте

и их трутизнами души не питайте,

Погубите вЂру и святую славу,

аще суєтную ищите забаву.







КАКО АНДРЕЙ, СВЯТЫЙ АПОСТОЛ, ПРИШЕЛ В КІЄВ-ГРАД К НЕВЂРНЫМ


Єгда вознесеся господь на небеса

и єгда яви нам многіи чудеса,

З горы оливнои от земли взыйде,

иже ис плотію судити нас прійде,

Тогда ученицы всЂм проповЂдали,

народом и царем о нем возвЂщали

И во страны мира слово приносили

и от злои лести к богу приводили,

Всю землю на части собЂ подЂлили

и євангелієм людей просвЂтили.

От них же бысть святый Андрей первозванный,

от числа ученик Христовых избранный,

Из Ієрусалима во Византію дойде

и оттуда паки во Россію прійде,

Та же во град Кієв по ДнЂпру странствова

и посреди поган святый крест знамена,

На горах кієвских молитву сотворив,

дабы там господь благодать створив

Дабы имя єго в Руси величано,

дабы христіанство оным даровано,

Иже о идолєх были упражнени

и во зловЂріи бЂсом ослЂплени,

Дабы вже бездушным престала офЂра

и православная возсіяла вЂра.

Вострубив начало проповЂдь святую

и принес в Россію новину благую,

Як скарб небесный, на полунощ принес

и Христово имя пречестноє вознес.

И нынЂ хвалит тя полнощная страна,

иже от идолов к богу призвана.

Прославляй, господа повсегда, Россіє,

иж благовЂріє в тобЂ процвЂтає,

Иже красуєшся святыми церквами

и богови служиш чистыми жертвами.

Великая Россія, аж до океана

за Володимера свято просвЂщенна.

Воспоминай труды апостолов святых,

посланнаго к нам, и прочих других.

Святоє начало от них нам явленно,

яко от самого бога повелЂнно,

Яко маєм спастися в благом послушенствЂ

и не изволяймо во злых отщепенствЂ,

Которыи плотне нас порабощають

и до отступной власти потягають.

Не наши суть пастыри западныи отцы,

не нам наставницы папЂзскіи ловцы,

Не нам духовницы отметники вЂры,

иже опрЂсноками приносят офЂры,

Не наши пастыри церкви супостаты,

иже ускакують тыном, а не враты,

Иже суть не кротци и якоже волци,

и злопрехитрыи людєм душегубцы.

Не таков был господь наш, иже. наш спаситель,

и Андрей-апостол, россійскій учитель,

Яко же влоскіи папины присланцы,

иже будуть по сем из неба выволанцы.

НЂсть бо их дух со богом, но земная мудрость,

которая творить богу непокорность.

Мы же вонимаймо Христови вгожати

и святоє имя єго величати.

И сохраним твердо гонимую вЂру,

и отбЂгаймо мерзскую офЂру.

И бЂды, и страхи их скоро минають,

которыи нынЂ на нас повставають.

Ибо и господь наш много за нас страдал,

и нам терпЂнія сам образ прописал.

Та же святый Андрей крестную смерть пріял,

во Патрєх Ахайских за господа страдал,

Христови благій раб и мирови ловець,

и церквам ахайским был духовный отець.

Не бЂ в нем гордости, ниже златолюбства

але нам оставил чины братолюбства,

Всему христіанству и Кієву-граду,

богоизбранному россійскому стаду.

На вЂчныи лЂта церков нынЂ стоить,

храм честного креста, в нем же ся бог славить.

Єсли ж нас бог пріял, и к нему прибЂжим

и теплую милость к нему умножим.

И мужи, и жены, и дЂти, и старцы,

всЂ православныи братія и отцы,

Ласкове лице Христово узрите,

коли в день судный пред него прійдете.

Яко же бо звЂзды из неба упали,

тако и отступницы Востоку отпали.

Но слава Христови, иже нас спасаєт

и от єретиков вЂрных заступаєт.

По лЂтєх же мнозЂх свЂт Руси возсіяв,

князь кієвскій, поганин,

Христови увЂрив, Володимер, єго же патріарха крестил,

кгды от идольскои темности отступил

и себе и люди о ХристЂ просвЂтил.

И за молитвами Андрея святого

вЂруемо нынЂ в бога живого.








О КРЕЩЕНІИ РУССКОМ


Володимер великій вас у вЂру крестил

и от идольскои темности освЂтил.

А то бог даровал з милости благои,

абы прилучил вас до воли своєи,

Иж мертвым идолом служити престали

и живому богу сынами зостали,

Кгды с Востоку святая вЂра возсіяла

и многобожную прелесть погасила.

З Константинополя, от святых патріархов

просвЂщены єсьмы, восточных ієрархов

Любите ж и чтите восточныи права,

и пробудет с вами правдивая слава.

Чому ж єсте вЂру марне отступили

и єретицкіи науки злюбили?

Чому церков божію нищую творите,

чому о збавенью своем не радите?







ПЛЕМЕНИ РУССКОМУ НАКАЗАНІЄ


Отцы ваши вЂру святую любили

и святыи церкви украшали,

Отцы ваши посты святыи хранили

и братолюбіє и милость ширили,

Отцы ваши дЂла добрыи творили

и божієй церкви усердно пріяли,

Отцы ваши во єресь не приступовали

и в благочестіи души их спасали,

Святых патріархов, яко отцев, чтили

и благословенство от оных пріймали,

Отцы ваши святых наук ся учили

и от погибельных себе отлучили.

А чому ж вы ими єсте погордЂли

и на зловЂріє себе измЂнили?

Єсли погубите души для мамоны,

вже не помогут вам римскіи законы,

И не схочет Христос об вас уже знати,

єсли умыслите єго отступати.

Нехай вЂрять, яко рачать, папЂзскіи дЂти,

але вы в такій не падайте сЂти.

Не бойтеся, малая господня чредо,

упасет вы Христос цЂло своє стадо.

Раз єсте крещени, любимій друзи,

мужайтеся нынЂ о преблагом бозЂ,

От втораго креста, єреси, бЂжЂте

и от прелестников себе стережЂте,

Добрую маєте вЂру и науку,

и помощ божію, всесильную руку.

Маємо погоду богу угодити

и цареви царєм любЂмо служити.

Хто вас отлучаєт от Христа и правды,

того не пріймуйте лукавои рады.

Єсли бы и ангел не так проповЂдал,

яко же Христос с апостолы подал,

Святоє нас письмо учить не пріймати

и кламливым устам вЂры не давати.








НЕПРІЯЗНЬ ЛАТИНСКАЯ


Злую пріязнь церкви латина даваєт и благовЂріє з неи издираєт.

Так и поганове христіан гонили

и мудрости божой себе не смирили.

Марнотравность лЂтам молодым бываєт,

кто у латинников наук уживаєт.

Мало там о ХристЂ науки слыхати,

мало о спасенном пути навыкати.

Упилися мудростію свЂтскои науки

не апостольскіи сій ученики.

Можете болЂти, як вас заразили,

и єще бы рады, щоб души згубили...

Кланяємся на Восток, а на Запад плюєм,

єгда крещеніє святоє пріймуєм.

Ко свЂту идите, а тмы утекайте,

и от поганскои мудрости бЂгайте.








О СВЯТЫХ ТЂЛАХ ПЕЧЕРСКИХ


Маєт земля ваша и святыи тЂла,

во славном КієвЂ, их же слава цЂла.

Вже от шести сот лЂт в печерах нетлЂнни

святыи постницы по смерти явлений.

Преподобний Антоній, иноком начальник,

общого житія по бозЂ наставник.

Блаженный Феодосій, ангельскій сожитель,

игумен братіи, Христови ревнитель.

И множество братіи святая дружина,

яко благополучная божая маслина,

От святой горы ученіє мЂли

и на высокоє житіє доспЂли,

И ясны и славны их подвиги стали,

и тыи истинно господа познали.

Святых молитвами вы нынЂ живете

и их наслЂдуйте и так ся спасете,

Пречестно бо они Христу угодили,

иже з любовію за нас ся трудили.

Побачте очима, кто письму не вЂрить,

и самыми дЂлы нехай ся увЂрить.

Тыи не римскому костелу служили,

але патріархов святых наслЂдили.

то вам єсть, руси, печать христіанства

принесенный овоц в началЂ с поганства.

Як честный дар богу, блаженныи рабы,

от вашеи персти во небесном стадЂ.

Шестьсот лЂт минаєт, а их чуда славны

и до судного дня будуть свЂту явны.

Подземныи мученицы горы постигали,

постом и працами тЂла изсушали,

Преже смерти тЂла земли предавали,

кожи их до костей живых присыхали,

Пот чола своєго богу жертвовали

и слезами лице своє омывали,

Чудами своими прославили бога —

отож вам за ними святая дорога

Єсть уготована, и по ней шествуйте,

и во святой вЂрЂ отеческой стойте.

Не ослабЂйтеся страшками гнилыми,

а ни зводитеся науками злыми,

Памятайте оный лик от русских рожаєв,

которыи были святых обычаєв.

Господь их зоставил на вашу науку,

да пожелаєте честному их лику.

И вЂру правую и дЂла благій

заховайте, богу дары дорогій.

А хто ж вас оскорбит, кгды бог потЂшаєт

и святыми усты радость обЂщаєт?

И хто ж вас убієт, аще господь живит,

и святый хранитель от злого хранит?..

Не ужасайтеся в послЂднеє время,

одно облегчайте грЂховноє бремя.

От любви божія да вас не отлучат,

аще и ранами и огнями мучат.

Ревность апостолов в сердцах роспалите

и вЂрность ко богу щире покажите.

Вам то честь и слава за вЂру вмирати

и по сем будете з богом пробывати.

Не маш там зависти, и гордость не буде,

и божій з богом, и з ними бог буде.








ДО ИНОКОВ РУССКИХ


НасЂню божому священная земле,

нехай ваша душа господа подъємле,

Будьте господою всесвятого духа,

явитеся людєм вЂрная утЂха,

И дЂлом, и словом будьте совершенни,

в молитвах и постЂ будьте украшени,

ВЂру утвержайте, церкви не зражайте

и для имЂнія душ не продавайте.

Будьте предтечами братіям спастися,

и кождый Христови любовію смирися.

Претерпите той вЂк, скоро бо минаєт,

угодите богу, иже вас вЂнчаєт.

Щасливыи єсте, при вЂрЂ стоите

и себе и многих богу приведите.

За черныи вретища будете прекрасны,

пред царем небесным и честны и ясны.

НынЂ скитайтеся, а там почієте

и со ангельскими лики поживете.

Не погоршайтеся, иж злость начальствуєт,

поневаж над вами Христос царствуєт.

Не скорбите о скорбєх, збирайте в небЂ,

и не угожайте тЂлесной потребЂ.

Играйте душами, бог вас избираєт

и вашу терпливость часто назираєт.

Не маєте жен и чад, яже суть от плоти,

але з вами не могуть царове зровняти.

Чада ваши будуть, их же вы спасете

и яже в чистоту других приведете.

Великая вам слава перед богом дана,

и царская столиця єсть уготована.

Ваша нынЂ глава — Христу колесница,

и уста и язык — святая скарбница.

Чистую дань богу, хвалу отдайте

и богомыслієм помыслы красите.

Отчизны на земли мЂти не желайте,

и бЂды и скорби любовно пріймайте.

НынЂ будем странны на земли пришельцы,

держим незлобіє, яко же младенцы.

НынЂ будем убози, да обогатЂєм,

яко да со Христом царство имЂєм.

Не чудимся, братіє, иж злыи владЂют,

сіи бо вЂчнои славы отпадают.

Понеже святій вся нынЂ презрЂли,

и честь, яко же дым, себЂ вомЂнили.

Господь не замедлит и прійдет воскорЂ,

отверзет вам славы царства єго двери.

Як добрыи рабы, будьте нынЂ вЂрны,

и чисты душею и сердцем смиренны.

И словесы и дЂлы, во славу Христови,

явитеся вЂрны вышнєму цареви.

Минають бо скорби и радость приходить,

и прелесть мирская скоро мимо ходить.










ІЗ ЗАГОРОВСЬКОГО ЗБІРНИКА


Вірші, що друкуються тут, містяться в рукописному збірнику XVII ст., який належав бібліотеці Загоровського монастиря (с. Волиця-Загоровська, між Володимиром-Волинським і Луцьком). Доля цього рукопису невідома. Тексти вперше передруковані у вид.: Добротворский А. Загоровский монастырь, его библиотека и сохранившийся в ней западнорусский литературный памятник XVII-го столетия. — Вестник Юго-Западной и Западной России, год 2-й, т. I, 1863, июль, с. 1 — 17; август, с.75 — 115; сентябрь, с. 165 — 166; Українська поезія. Кінець XIV — початок XVII ст., с. 115 — 136.

Вірші подаються за публікацією А. Добротворського.










Див. також Українська поезія. Кінець XVI — середина XVII ст.




Головна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.