Попередня       Головна       Наступна             Переклад





ЖИТЬЕ И ХОЖДЕНЬЕ ДАНИЛА РУСЬСКЫЯ ЗЕМЛИ ИГУМЕНА



Се азъ недостойный игуменъ Данил Руския земля, хужши во всЂх мнисЂх, съмЂреный грЂхи многими, недоволенъ сый во всяком дЂлЂ блазЂ, понужен мыслию своею и нетрьпЂнием моимъ, похотЂхъ видЂти святый град Иерусалимъ и землю обЂтованную. И благодатию божиею доходихъ святаго града Иерусалима и видЂх святаа мЂста, обиходих всю земьлю ГалилЂйскую и около святаго града Иерусалима по святымъ мЂстом, куда же Христос богъ нашь походи своима ногама и велика чюдеса показа по мЂстом тЂмъ святым. И то все видЂх очима своима грЂшныма. Безлобивый показа ми богъ видЂти, его же жадах много дний мыслию моею.

Братиа и отци, господие мои, простите мя грЂшьнаго и не зазрите худоумью моему и грубости, еже писахъ о святЂмъ градЂ ИерусалимЂ, и о земли той блазЂй, и о пути еже к святымъ мЂстом. Иже бо кто путемъ симъ ходил съ страхом божиимъ и смЂреньем, не погрЂшить милости божия николи же. Аз же неподобно ходих путем симъ святым, во всякой лЂности и слабости и во пьяньст†и вся неподобная дЂла творя. Но обаче надЂяся на милость божию и на вашу молитву, да ми простить Христос богъ моихъ грЂховъ безщисленых, да си исписах путь си и мЂста сии святаа, не возносяся ни величаяся путем симъ, яко что добро створивъ на пути семъ, не буди то: ничто же бо добра створих на пути сем; но любве ради святых мЂстъ сихъ, исписах все, еже видЂхъ очима своима, дабы не в забыть было то, еже ми показа богъ видЂти недостойному. Убояхся оного раба лЂниваго, скрывшаго талантъ господина своего и не створившаго прикупа им, да сие написах вЂрных ради человЂкъ. Да кто убо, слышавъ о мЂстЂх сихъ святыхъ, поскорблъ бы ся душею и мыслию къ святым симъ мЂстом, и равну мзду принмуть от бога с тЂми, иже будуть доходили святыхъ сих мЂстъ. Мнози бо, дома суще в мЂстЂх своих, добрии человЂци мыслию своею и милостынею убогых, Добрыми своими дЂлы, достигають мЂстъ сихъ святых, иже болшую мзду приимуть отъ бога спаса нашего Иисуса Христа. Мнози бо, доходивше святых сих мЂстъ и святый град Иерусалимъ и възнесшеся умом своим, яко нЂчто добро створивше, и погубляють мьзду труда своего, от них же пръвый есмь азъ. Мнози бо, ходивше святаго града Иерусалима, поидуть опять, многа добра невидЂвши, тщаще опять вскорЂ. А сего пути нелзЂ въскорЂ створити ни истоком тог... щ... и вся святаа та мЂста и въ градЂ и внЂ града.






О ЕРУСАЛИМЂ, О ЛАВРЂ


Азъ недостоин игуменъ Данил, пришед въ Иерусалимъ, пребых мЂсяць 16 в мЂстЂ в лаврЂ святаго Савы, и тако могох походити и испытати вся святая си мЂста. Невозможно бо без вожа добра и безь языка испытати и видЂти всЂхъ святыхъ мЂстъ. И что имЂя в руку моею худаго моего добыточка, то от того все подавах вЂдущиимь добрЂ вся святаа мЂста в градЂ и внЂ града, да быша ми указали все добрЂ, яко же и бысть. И пригоди ми богъ налЂсти в лаврЂ мужа свята и стара деньми, и книжна вельми; тому святому мужеви вложи богъ въ сердце любити мя худаго, и тъи указа ми добрЂ вся святаа та мЂста: и въ ИерусалимЂ и по всей земли той поводи мя, и до Тивириадъскаго моря поводи мя, и до Фазоры, и до Назарефа, и до Хеврона, и до Иордана, и по всЂмъ тЂмъ мЂстом поводи мя, и потрудися со мною любве ради. И ина святаа мЂста видЂх многа, яже послЂди скажу.






О ПУТИ В ИЕРУСАЛИМ


А се есть путь къ Иерусалиму. От Царяграда по лукоморию ити 300 верстъ до Великаго моря. До Петалы острова 100 верстъ. То есть 1 островъ на узьцЂм мори; и ту есть лимен добръ, и ту есть град Ираклия Великаа; и противу тому граду святое миро выходит из глубины морьскыа; ту святии мученици погружени суть мнози от мучителевъ. От Петалы острова до Калиполя 100 верстъ, а от Калиполя до Авида града 80 верстъ. Противу тому граду лежить святый Еуфимие Новый. А оттудЂ до Крита 20 верстъ, и ту есть на Великое море внити: на шюе въ Иерусалимъ, а на десно к СвятЂй ГорЂ, и к Селуню, и к Риму. А от Крита до Тенеда острова верстъ 30. То есть 1 островъ на ВелицЂм мори, и ту лежит святый Навгудимос мученикъ. И противу тому острову на брезЂ град великъ был именем Троада, и ту есть Павелъ апостолъ приходил и научил ту страну всю и крестил. А от Тенеда острова до Метанни острова верстъ 100; и ту лежит святый митрополит Мелетиньскы. А от Мелетинии до Ахия острова верстъ 100; и ту лежить святый мученикъ Исидоръ, и в том остро†ражаеться мастика, и вино доброе, и овощь всякий.






О ЕФЕСЂ ГРАДЂ


А от Ахиа острова до Ефеса града верстъ 60. И ту есть гроб Иоанна Богословца, и исходит персть святаа из гроба того на память его, и взимают вЂрнии человЂци персть ту святую на исцЂление всякого недуга; и свита Иоаннова ту лежит, в ней же ходил.

И ту есть близь пещера, идЂ же лежать тЂлеса 7-ми отрок, иже спали 300 и 60 лЂт; при Декии цари успоша, а при Феодосии цари явишася. В той же пещерЂ 300 святых отець лежит; и святый Александръ лежит ту, и гроб Магдалыни Марьи и глава ея, и святый апостолъ ТимофЂй, ученикъ святаго апостола Павла, в ветсЂмъ гробЂ лежить. И ту есть в ветсЂй церкви икона святыя Богородица, ею же святии препрЂша Несториа еретика. И ту есть баня Диоскоридова, иде же работал Иоаннъ Богослов с Прохором у Романы. И видЂхом пристанище то, иде же Иоанна Богословца море изверже; ту стояхом три дни, и зоветься пристанище то Мореморное. Ефесъ же град есть на сусЂ, от моря вдале 4 верст, в горах; обилен же есть всЂм добромъ. И ту поклонихомся святому гробу тому и, благодатию божиею храними и молитвами святаго Иоанна Богословца, идохомъ, радующеся. А от Ефеса до Сама острова верстъ 40. И в том остро†рыбы многы всякы и обилен есть всЂм остров-от. А от Сама до Кария острова верстъ 20.






О ПАТМЂ ОСТРОВЂ


А отъ Кариа до Патма острова верстъ 60. На странЂ далече в мори Патмъ остров. В томъ остро†Иоаннъ Богословець Еуангелие написал, егда заточен бысть с Прохором. Таже оттуда Леросъ островъ, таже Калимнос островъ, таже Нисера островъ, таж и Кос островъ, велик зЂло. Тот островъ богатъ велми всЂмъ, и людьми, и скотом. Таже Тилос островъ: и въ сЂм остро†мука Иродова кипит сЂрою горящею; и ту сЂру, варяче, продають, мы же огнь вытинаемъ. Таже Харкия островъ. И ти острови вси с людми и скотом близь себе суть по ряду, яко по десяти верстъ или болши межи собою.

Таже Род островъ, велик и богатъ всЂм велми. И в томъ остро†был Олегь князь русскый 2 лЂтЂ и 2 зимЂ. А от Сама до Рода острова 200 верстъ; а от Рода до Макрии 60 верстъ. И въ том градЂ и по земли той по всей, нолны до Миръ, ту ражаеться темьянъ черный игоифит.

И тако ражаеться темьанъ черный игофит: из древа исходит аки мезга, и снимают желЂзом острым. Имя древу тому зигия, и есть яко олха образом древо то. А другое древце есть мало, образом яко осина, но есть имя древцю тому рака; и есть въ древци том червь великъ, яко поноровъ вболЂ есть, за корою древца того; и точит древце то черв-етъ, и исходит из древца того червоточина та, яко отруби пшеничны, и падают от древця того, яко клей вышневый. И то сбирают людие и смЂшивают с первореченнымъ древом и, вложивше в котел, и тако варят темианъ гоифит, и кидають в мЂхи, продають купцем.

А от Макрии до Патера града верстъ 40, и ту есть рожество святаго Николы, то его есть и отчина и род — Петера. А от Патеры до Миръ, идЂ же гробъ святаго Николы, есть верстъ 40; а от Миръ до Хилидония верстъ 60; а от Хилидония до Кипра великаго острова верстъ 200.






О КИПРЬСТЂМ ОСТРОВЂ


Кипръ есть островъ великъ зЂло, и множество в нем людии, и обиленъ есть всЂм добром. И суть в нем епископи 24, митрополия же едина, а святыхъ въ нем бе-щисла лежит: и ту лежит святый Епифание, и апостолъ Варнава, и святый Зинон, и святый Трифолие епископъ, и святый Филагриос епископ, его же крестилъ апостолъ Павелъ.






О ГОРЂ, ИДЂ ЖЕ СВЯТАА ЕЛЕНА КРЕСТЪ ПОСТАВИЛА


И ту есть гора высока зЂло, и на той горЂ святаа Елена крестъ поставила кипарисенъ велик на прогнание бЂсомъ и всякому недугу на исцЂление; и вложила въ крестъ честный гвоздь Христовъ. И бывають ту, на мЂстЂ том у креста того, знамения велика и чюдеса и до нынЂ. Стоит же на въздусЂ крест-отъ, ничим же не придержится к земли, но тако духомъ святымъ носимъ есть на въздусЂ. И ту недостойный азъ поклонихся святыни той чюдной, и видЂхъ очима своима грЂшныма благодать божию на мЂстЂ том, и походих островъ тъи весь добрЂ.






О ФИНИЯНЂ


И ту ражаеться темиянъ, ладан; спадает с небесе, и тако взимают на древцих. Суть бо по горамъ тЂмъ древца многа и низка, с травою равна, и на том падаеть темианъ тъ добрый, и емлють его июля мЂсяца и августа; въ иныя же мЂсяци не спадывает, но токмо в та два ражаеться.

А Кипра до Яфа града верстъ 400, все по морю ити; от Царяграда до Рода острова 8 сот верстъ; а от Рода до Афа 8 сот верстъ; то ти всего пути по морю до Афа есть верстъ 1000 и 600. Яфъ же есть град на брезЂ близь Иерусалима, и оттоли поити по суху къ Иерусалиму. И есть от Афа до Иерусалима верстъ 30, по полю 10 верстъ ити до святаго Георгиа: ту была церковь велика создана во имя святаго Георгиа, ту бо и гроб его во олтари был, ту же есть мученикъ святый Георгие. И воды многи суть ту; и ту опочивають странници у воды тоя, но съ страхом великим: есть бо пусто мЂсто то, и близь есть Асколонь град, выходять бо оттуду срацини и избивають странныя на путЂхъ тЂх, да ту есть боязнь велика, от мЂста того входя в горы. И есть от святаго Георгиа до Иерусалима верстъ 20 великих, но все въ горахъ каменых; и тий путь тяжекъ и страшенъ зЂло.






О ГОРЂ АРМАФЕМ


И ту есть гора высока, близь Иерусалима, на десной руцЂ тамо идуще отъ Афа, имя горЂ той Армафемъ. На той горЂ той Армафемъ — на той горЂ есть гробъ святаго пророка Самоиля, и отца Елъкана, и Марьи Египтяныни; ту бо святых было село и домъ. И есть мЂсто то градом оделано, да тако зоветься град-от Армафемъ.






О ЕРУСАЛИМЂ


Есть же святый град Иеросалим в дебрех, около его горы каменыи высокы. Да нолны пришедше близь ,ко граду тоже видЂти пръвое столпъ Давидовъ и потом, дошедше мало, увидЂти Елеоньскую гору, и Святаа Святых, и Въскресение церковь, идЂ же есть Гробъ Господень, и узрЂти потом весь град. И ту есть гора равъна о пути близь града Иерусалима яко версты вдале; на той горЂ ссЂдают с конь вси людие и поставляють крестьци ту и покланяются святому Въскресению на дозорЂ граду. И бываеть тогда радость велика всякому християнину, видЂвше святый град Иерусалимъ; и ту слезамъ пролитье бываеть от вЂрных человекъ. Никто же бо можеть не прослезитися, узрЂвъ желанную ту землю и мЂста святаа вида, идЂ же Христосъ богъ нашь претрьпЂ страсти нас ради грЂшных. И идуть вси пЂши с радостию великою къ граду Иерусалиму.

И ту есть на левой руцЂ у пути, тамо идучи, церкви святаго Стефана Первомученика; на том мЂстЂ побиенъ бысть камениемъ Стефанъ Прьвомученикъ от июдЂй, и ту есть гроб его. И ту есть гора камена плоска просЂлася в распятие Христово; то зоветься Адъ; есть близь стЂны градныя, яко доверъжет.

И потом входять въ святый град Иерусалимъ вси людие с радостию великою враты, сущими близь сына Давыдова, и та суть врата от Вифлеома лиць, и ту суть врата Венияминова. Яко воидуче въ градъ, путь есть сквозЂ град въ Святаа Святыхъ на правую руку, а на левую къ святому Въскресению, иде же есть гроб Господень.






О ЦЕРКВИ ВЪСКРЕСЕНЬЯ ГОСПОДНЯ


Есть церкви Въскресениа Господня всяка образом: кругло создана, столповъ имат 12 обьлых, а 6 зданыхъ; мошена же есть дъсками мраморяными красно; двери же имат шестеры; а на полатех столповъ имат 16. А над полатьми под верхом исписани суть пророци святии мусиею, яко живи стоятъ, а над олтарем написан есть Христос мусиею. Въ олтари же велицЂм написано есть Адамово воздвижение мусиею; горЂ верху написано есть мусиею възнесение господне; оба полы олтаря на обою столпу написано есть мусиею благовЂщение. Врьхъ же церковный не до конца сведенъ каменемъ, но тако сперенъ есть древом тесаным, яко полъстичнымъ образом; и тако есть безъ верха, не покрыта ничим же. Под тым самым врьхом непокрытым Гробъ Господень.

Есть же сице Гробъ Господень: яко печерка мала у камени сЂчена, дверци имущи малы, яко можеть человЂкъ влЂсти на колЂну поклонься; възвыше же есть мала, всямокачна 4 лакоть и в длину и в ширину. И яко влЂзуче в пещерку ту дверцами малыми, и на деснЂй руцЂ есть яко лавица засЂчена въ том же камени пещерьнЂмъ, и на той лавицЂ лежа тЂло господа нашего Иисуса Христа. Есть нынЂ лавица та святая покрыта дъсками мраморяными. Суть на странЂ продЂлана оконца 3 кругла, и тЂми оконци видиться святый тъ камень, и тудЂ цЂлують вси христьяне. Висит же в ГробЂ Господни 5 кандил великих с маслом, и горят беспрестани кандила свята день и нощь. Лавица же та святаа, идЂ же лежало тЂло Христово, есть в длину 4 лакот, а в ширину 2 лакти, а възвыше полулакти. И пред дверми пещерными предлежить камень, треи стопъ вдале от дверець тЂх пещерных; на том камени аггелъ, сЂдя, явися женамъ и благовЂсти има въскресение Христово.

Есть пещерка та святаа одЂлана около красным мрамором, яко имЂнъ, и столпьци около мрамором красным стоят числом 12. Верху же над пещеркою сдЂланъ яко теремець красенъ на столпЂх, верху круголъ и сребреными чешюями позлащеными покован; и на връхъ того теремца стоит Христос, сдЂланъ сребром яко в мужа болЂе, и то суть фрязи сдЂлали, и нынЂ есть под самым врьхом тЂмъ непокрытымъ. Суть двери 3-и у теремца того учинени хитро, яко и решето крестьци; и тЂми дверми влазят люде къ Гробу Господню. Да то есть Гробъ Господень был пещерка та, яко же то сказах: испытах добрЂ от сущих ту издавъна и вЂдущих по истиннЂ вся та святаа мЂста.

Есть же церковь та Въскресение образомъ кругла, всямокачна: и в длЂ и въ преки имать же сажень 30. Суть же в ней полати пространьны, и тамо горЂ живет патриархъ. И есть же отъ дверей гробных до стены великого олтаря саженъ 12. Ту есть внЂ стЂны за олтаремъ Пупъ земли, и создана над нимъ комарка, и горЂ написан Христос мусию, и глаголеть грамота: «Се пядию моею измЂрих небо и землю».






О МЂСТЂ СРЕДИ ЗЕМЛЯ, ИДЂ ЖЂ РАСПЯТЬСЯ ХРИСТОС


А отъ Пупа земнаго до Распятия господня и до Края есть саженъ 12. Есть же Распятие господне къ встоку лиць, есть же на камени высоко было яко стружия выше. Камень же тый был круголъ, яко горка мала. А посреди камени того, на самом врьху, высЂчена есть скважня лакти воглубле, а вширЂ мний пяди кругъ; и ту был въдруженъ крестъ господень. Исподи же под тЂмъ каменемь лежить прьвозданаго Адама глава, и в распятие господне, егда на крестЂ господь нашь Иисус Христос предасть духъ свой, и тогда раздрася церковная катапетазма и камение распадеся; тогда же и тъ камень просЂдеся над главою Адамлею, и тою разсЂлиною сниде кровь и вода изъ ребръ владычень на главу Адамову, и омы вся грЂхы рода человЂча. И есть разсЂлина та на камени том и до днешняго дне: знати есть на деснЂй странЂ Распятиа господня знамение то честное.






О МЂСТЂ ЛОБНЂМ


Есть Распятие господне и камен-ет святый озданъ стЂною все; горЂ над распятиемъ создана комара хитро, исписана мусиею дивно; и от встока лиць на стЂнЂ написано есть мусиею Христос на крестЂ распят хитро и дивно, прям яко живъ, и вболЂ и възвыше, яко же был тогда; а полудне лиць написано есть снятие тако же дивно. Двери же имат двои; възлЂсти же есть горЂ по степенемь; до дверей 7 степеней, а въ двери вшед 7 степеней. Помощено же есть мраморными дъсками красными.

Споди же под Распятиемъ, идЂ же есть глава, тако же приздано есть яко церквица мала, и красно исписана есть мусиею и помощена есть красным мрамором; да то зовется Крайниево мЂсто, еже есть Лобное мЂсто; а горЂ, идЂ же есть Распятие, — то зоветь Голгофа. А отъ Распятия господня до Снятия есть сажень 5. И ту есть у Распятия господня близь мЂсто къ полунощию лиц, идЂ же раздЂлиша ризы его; и ту другое мЂсто, иде же възложиша вЂнець трьновъ на главу господню и в багряницу поругания облекоша.






О ЖЕРСТВЕНИЦЂ АВРАМОВЂ


И ту есть близ жрьтвенник Авраамовъ, иде же положи жрьтву богови Авраамъ и закла овенъ въ Исаака мЂсто; на то же бо мЂсто възведен бысть Исаакъ, иде же Христосъ възведен бысть на жертву и закланъ бысть нас ради грЂшных. А оттолъ есть близь мЂсто, яко двою сажень далее, иде же заушен бысть Христос богъ нашь. А оттолЂ есть далЂе 10 сажень святая темница, иде же всаженъ бысть Христос, и ту посидЂл мало, дондеже приспЂють июдЂи и поставять крестъ, да распнуть и. И та святаа мЂста вся под одиным покровом суть, по ряду вся к полунощию лиць. А отъ темници Христовы до мЂста, иде же святаа Елена налЂзла честный крестъ, гвоздия, и вЂнець, и копие, и губу, и трость, есть сажень 20 и 5. Есть же гроб Господень, и Распятие, и та святаа мЂста вся на удолнЂмъ мЂстЂ суть; и есть вгорие от запад лиць над гробом и над Распятием.

И ту есть мЂсто на пригории; на то мЂсто притече скоро святая богородица. Тщаше бо ся, текущи вслЂд Христа, и глаголаше, в болЂзни сердца своего слезящи: «Камо идеши, чадо мое? Что ради течение се скорое твориши? Еда другий бракъ в Кана Галилеи, да тамо тщишися, сыну и боже мой? Не молча отъиди мене, рожшаа тя, дажь ми слово, рабЂ своей». И пришедши на мЂсто то святаа богородица, и узрЂ с горы тоя сына своего распинаема на крестЂ, и видЂвши, ужасеся, и согнуся, и сЂде, печалию и рыданиемъ одръжима бЂаше. И зде събысться пророчество Симеоне, яко прежь рече святЂй богородици: «И се лежит на встание и на падение многим въ Израили, и тебЂ же самой оружие душу проидетъ, егда же узриши сына своего закалаема», Ту же стояху мнози на мЂстЂ том, друзи и знаниа его, издалеча зряще: Мария Магдалыни и Мария Ияковля и Саломии, — идЂ же стояху вси, иже от Галилея пришедше и съ Иоанном и съ материю Иисусовою. Стояху же вси знаемии друзи Иисусови, зряще издалеча, яко же пророкъ глаголеть о том: «Друзи же мои и ближники моя издалеча мене сташа». И то мЂсто есть подаль от Распятия Христова, яко полутораста сажень есть на запад лиць мЂсто то от Распятия Христова; имя мЂсту тому Спудий, иже ся протолкуеть Тщание богородично. И есть на мЂстЂ томъ нынЂ манастырь, церкви святаа Богородица клЂтьски верхъ въсперенъ.






О СТОЛПЂ ДАВЫДОВЂ


А оттуда есть до столпа Давыдова и до дому 200 сажень. Столпъ же то есть святаго пророка Давыда; ту есть и дом его был. В том столпЂ Давыд пророкъ и Псалтырю сставил и написал. Дивен есть столпъ тъ, великим камениемъ сдЂлан высоко вельми, на 4 углы созданъ, и весь есть черствъ и днероден; и камень уродился; посредЂ его воды в немъ многи. Двери же имать 5-ры желЂзны и степеней имать 200, по нима же взити горЂ. И жита в нем бес числа желитъ. И есть много твердъ ко взятию, и то есть глава всему граду тому; и блюдуть его велми и не дадять влЂсти никому же во нь лапь. МнЂ же, худому, недостойному, пригоди богъ в столп-от святый, одва могох ввести с собою единого Издеслава.






О ДОМУ УРИЕВЂ


А от столпа того близь был домъ Уриевъ, его же Урию уби Давыд и поя жену его, видЂвъ ю мыющюся в бани. И ту есть но†метохия святаго Савы, и есть же близь от столпа, яко можеть доверечи. Есть знати, гдЂ же была баня та до днесь: есть же, иде же святаа Елена крестъ честный налЂзла, близ Распятиа господня къ встоку лиць сажень 20 вдалЂе. И ту есть была на мЂстЂ том церкви создана клЂтски велика велми, нынЂ же мала церквица. Ту суть двери великия къ встоку лиць: к тЂмъ дверем прииде святаа Мария Египтянына, и хотЂ влЂсти; и цЂловати хотЂ, и не впустя ея сила святаго духа въ церковь. И потом помолися святЂй богородицЂ, то бо стоаше икона святая богородица въ притворЂ том, близь дверии тЂх, и потомъ возможе ити въ церковь и цЂловати честный крестъ. ТЂми же пакы дверми изыдохъ въ пустыну Иорданскую.

А отъ тЂхъ дверей близь мЂсто, идЂ же искуси святаа Елена крестъ господень честный, абие вста мертваа дЂвица. А оттуду есть, поидучи мало ко востоку лиць, притории, идЂ же воини приведоша Христа къ Пилату. И ту руцЂ свои умывъ Пилатъ и рече: «Чистъ есть отъ крове сего праведиика». И бивъ Иисуса и предасть июдеомъ. Ту жь есть темница июдейска; ис тоя темници изведе ангелъ святаго апостола Петра в нощи. И то есть былъ дворъ Июдинъ, предателя Христова. Есть пусто и нынЂ дворище то проклятое: никто же не смЂетъ на мЂстЂ томъ сЂсти клятвы ради. А оттуда мало придучи ко встоку лиць, есть мЂсто, идЂ же Христось кровоточивую исцЂли. И ту есть ровъ близь, идЂ же вверженъ бысть Еремиа пророкъ; ту и домъ его былъ. Ту жь и Павла апостола дворъ был прежь, егда бяше въ жидовствЂ. А оттуды мало поидучи ко востоку лиць, уступить мало съ того пути: ту есть домъ был святаго Иоакима и Анны.

Ту есть печера мало исподи подъ олтаремъ въ камени: въ той печерЂ родилася святая богородица, въ той же печерЂ есть гроб святаго Акима и Анны.






О ОВЧИИ КУПЂЛИ


А оттуду есть близь приторъ Соломонь, идЂ же есть Овча купЂль, идЂ же Христосъ разслабленного исцЂли. И есть мЂсто то къ западу лиць о Акима и Анны, близь яко довержет человЂк. Оттуду на востокъ лиць близъ суть ворота городнаа, теми вороты исходятъ къ Гепсимании.






О ЦЕРКВИ СВЯТАА СВЯТЫХ


А отъ Въскресениа Христова до Святаа Святыхъ есть вдалЂе яко дважди дострЂлити можеть. Есть церкви Святаа Святыхъ дивно и хитро создана моисиею издну, и красота ея несказанна есть; кругла образом создана; извну написана хитро и несказанна; стЂны ей избьены дъсками мраморными другаго мрамора; и помощена есть красно мраморными дъсками. Столповъ же имать под верхом, кругом стоящих, облых 12, а зданых столповъ 8, двери же имат 4-рь; мЂдию позлащеною покованы суть двери ты. И връх исписанъ издну мусиею хитро и несказанно, а звну врьхъ побиенъ есть былъ мЂдию позлащеною. Под верхом же тЂм самЂм есть пещера, в камени изсЂчена, и в той пещерЂ убиенъ есть Захария пророкъ; ту же и гробъ его был, и кровь его ту же есть была, нынЂ же нЂсть ту. И есть ту камень внЂ пещеры тоя под верхом же, и на том камени Ияковъ сон видЂл: и се лЂствиця бяше до небеси и аггели божии всхожаху и низъхожаху по ней; и ту бралься съ аггелом Ияковъ, и вста от сна Ияковъ, и рече: «Се мЂсто домъ божий, и се врата небеснаа суть». И на том же камени пророкъ Давидъ видЂ аггела, стояща съ оружием нагим и сЂкуща люди израилевы, и влЂзъ в ту же пещеру плакаше, моляся богу, и рече: «Господи, не овца согрЂшиша, но азъ согрЂших». Есть же церкви та всямокачна, сажень 30 и в преки, и в длЂ; всходы же 4-ри. Ветхая же церкви Святая Святыхъ рена есть, и нЂсть ничто же от прьваго здания Соломоня знати, и токмо знати насопъ церковный, еже Давидъ пророкъ начал здати; и пещера та днЂ въ церкви и камен-еть, иже то есть под врьхом, то есть ветхаго здания толко. А сиа церкви нынЂшняя создана есть от старЂйшины страциньскаго именемъ Аморъ.






О ДОМУ СОЛОМОНЂ


Ту же был домъ Соломонь, и силно было здание его, и велико велми, и зЂло красно. Мощенъ был весь мраморными дъсками и есть на комарах утверженъ, и воды исполнен весь дом-отъ был. Храми же создани были краси зЂло, и хитро мусиею украшено изрядно и столпи мраморяни драгаго мрамора и красно поставлени стоят по ряду; и комары на столпЂх тЂхъ создани суть хитро, и покрыт оловом весь. И ту суть врата дому того, красно зЂло и хитро покрыта оловом, мусиею исписана и покована мЂдию позлащеною, ита врата зовуться Красная, иде же Петръ и Иоаннъ исцЂлиста хромца одного; и есть мЂсто то у врат тЂхъ и до нынЂ.

А иныя врата суть троя кромЂ тЂх, а 5-я врата суть Апостольская. Та бо врата Давидъ пророкъ създалъ есть. Твердо и дивно хитростию врата суть сдЂлана: мЂдию позлащеною покована была, издну исписана хитро была по мЂди, а извну желЂзы покована была твердо. И суть 4-ры двери у вратъ тЂх. И та бо суть врата осталася толко ветхаго здания, тий столпъ Давидовъ, а ино здание все ново есть. Ветхий бо град Иерусалимъ разоренъ есть весь не единою. И тЂми враты вшелъ есть Христос в Иерусалимъ от Вифаниа с Лазаремъ, егда въскресила Лазаря Христос. Вифаниа на всток лиць противу ЕлеоньстЂй горЂ. И есть отъ тЂх вратъ до церкви Святаа Святыхъ сажень 100 и 50.






О ВЕСИ ВИФАИНЕ


Вифаниа же от града Иерусалима вдалЂе двою версту, за горою во удолнЂ мЂстЂ. И есть Вифаниа градок малъ к полуденью лиць от Иерусалима. И влЂзучи есть во врата градка того, на деснЂй руцЂ есть пещера, и в той пещерЂ есть гробъ святаго Лазаря; и в той келии Лазарь болЂлъ, ту же и умерлъ был. И есть посрЂдЂ градка того церкви велика, создана вверхъ и исписана добрЂ была вся. И есть отъ церкви тоя до гроба Лазарева сажен 12; и есть гробъ Лазаревъ от церкви к западу лиць, а церковь къ встоку лиць. И пред градом к западу лиць есть вода добра зЂло, и есть глубоко в земли, по степенемъ влЂсти къ ней. А оттуда есть къ Иерусалиму лиць столпъ от Вифаниа вдалЂ версты; и на том мЂстЂ усрЂла Марфа Иисуса; ту паки на осля всЂл Христос, егда Лазаря въскресивъ.






О ВЕСИ ГЕПСИМАИНЕ


Фепсиманиа же есть село, идЂ же есть гробъ святыя богородица, близь града Иерусалима на потоцЂ КидаръстЂмъ въ удолЂ плачевнЂм, и есть отъ Иерусалима межи встока лиць лЂтнимъ и зимным.






О ВРАТЂХЪ ГРАДНЫХ


И есть от врат градных сажень 8 до мЂста, иде же Охония жидовинъ хотЂ сврещи тЂло со одра святыя богородица, егда несяхуть е погребать апостоли въ Гепсиманию, и утя ему аггелъ обЂ руцЂ мечем, и положи я на нем. И есть на мЂстЂ том был монастырь женьскый, и нынЂ же разорено есть от поганых.






О МЂСТЕ ГРОБА СВЯТЫА БОГОРОДИЦА


И оттуда до гроба святыя богородица есть сажен 100. И есть гробъ святыя богородица въ удолнЂ мЂстЂ: пещерка была мала в камени изсЂчена, дверци имущи малы, яко можеть человЂкъ влЂсти наклонься; и во днЂ в пещерЂ той противу дверцам яко лавица засЂчена в том же камени пещернЂмъ, и на той лавици положено бысть тЂло честьное пречистыя владычица нашеа богородица, и оттуда же взято бысть въ рай, нетлЂнно суще. И есть пещерка та днЂ мужа възвыше, а вширЂ 4 лакоть всямокачна, а около теремцем одЂлана красно мраморными дъсками. А врьху, над гробом святыя богородица, создана была церкви велика велми клЂтьски, во имя святыя богородица Успения; нынЂ же разорено есть от поганых мЂсто то. И есть гробъ святыя богородица исподи под великим олтаремъ тоа церкви.






О ПЕЩЕРЂ, ИДЕ ЖЕ ПРЕДАН БЫСТЬ ХРИСТОСЪ


А от гроба святыя богородица есть сажень 10 до пещеры, иде же преданъ бысть от Июды жидом на 30 сребреницЂх. И есть пещера та об онъ пол потока КЂдарьскаго при горЂ ЕлеоньстЂй.

И ту есть мЂсто близь пещеры тоя, яко довержеть человЂкъ каменемь малымъ, и есть къ полуденью лиць мЂсто то, идЂ же помолися Христос отцу своему в нощи, в ню же преданъ бысть на распятие июдЂем, и рече: «Отче, еще возможно есть, да минеть чаша си от мене». И есть на мЂстЂ томъ нынЂ создана церквица мала. А оттуда есть дострЂла вдалЂе до гроба Асафатова; и то есть былъ царь ИюдЂйскъ и потому зоветься та дебрь Асафатова. И ту есть близь в той же дебри гробъ святаго Иякова, брата господня.

Елеоньскаа же гора есть от Иерусалима на лЂтний встокъ лиць. От Гепсимании полЂсти есть на гору Елеоньскую высоко велми, яко может на ню 3-жды встрЂлити едва, но до Отче нашь толко можеть въстрЂлити отъ Гепсимании.






О ПЕЩЕРЂ, ИДЕ ЖЕ НАЧА ХРИСТОС УЧЕНИКЫ СВОЯ УЧИТИ


И ту есть создана церкви велика, и пещера подо олтарем есть исподи; в той пещерЂ Христос научи ученики своя пЂти «Отче нашь». А оттуда до врьха самого Елеоньскыя горы, иде же есть Възнесение господне, есть сажень 90.






О ГОРЂ ЕЛЕОНЬСТЂИ


Възнесение же господне есть на врьхъ Елеоньския горы прямо къ стоку, и есть яко горка мала; и на той горцЂ был камень круголъ, выше колЂ; с того камени възнеслъся Христос богъ нашь на небеса. И есть мЂсто то оздано все комарами около, и верхъ на комарахъ тех созданъ есть, яко дворъ камень кругомъ, и помощень есть весь двор-от мраморными дъсками. И посрЂди того двора есть созданъ аки теремець кругло, и есть без верха; тако и во днЂ теремца. И в том теремци под самым врьхом тЂмъ непокрытым лежит камен-етъ святый, идЂ же стоястЂ и нозЂ пречистЂи владыки нашего и господа. И есть под каменем темъ трапеза сдЂлана дъсками мраморными, и на той трапезЂ литургисають нынЂ. Есть исподи под святою трапезою камен-етъ, оделан весь около дъсками мраморными, толико врьхъ его видЂти мало, и ту цЂлують вси християне. Двери же имат 2-и термец-етъ. ВъзлЂсти же есть по степенем къ Възнесению господню, и есть же степеней тЂх 22. И есть гора Елеоньскаа высока над градом Иерусалимом и видети с неа все въ градЂ ИерусалимЂ, и Святаа Святыхъ, и до Содомскаго моря и до Иордана с нея дозрЂти, и всю ту землю, и об онъ пол Иордана, все с неа видЂти: вышьши бо есть всЂх Еленьскаа гора сущих горъ около Иерусалима.






О ГРАДЂ ЕРУСАЛИМЂ


Иерусалимъ же град есть велик и твердь стЂнами, всямокаченъ: на 4 углы крестьным образом созданъ есть. Дебри суть многи около его и горы каменыя. Безводно мЂсто то есть: ни рЂки, ни кладязя, ни источника нЂсть близь Иерусалима, но токмо едина купЂль Силоамля. Но дъждевою водою живуть вси людие и скоти въ градЂ том. Ижита добра ражаються около Иерусалима въ камении том без дожда, но тако, божиимъ повелЂниемъ и благоволением: родиться пшеница и ячмень изрядно. Едину бо кадь всЂявъ и взяти 90 кадей, а другоици 100 кадей по единой кади, то нЂсть ли то благословение божие на земли той святЂй? Суть винограда мнози около Иерусалима и овощнаа древеса многоплодовита, смокви и агодичия, и масличие, и рожци; и ина вся различнаа древеса бесчисла по всей земли той суть. И на той же горЂ ЕлеоньстЂй есть пещера глубока, близъ Възнесения господня на полудне лиць, и в той пещерЂ и гроб святыя Пелагии блудници. И ту есть столпникъ близь, муж духовенъ велми.






О ПУТИ КЪ ЕРДАНУ


И есть путь от Иерусалима къ Иордану чресь Елеоньскую гору на лЂтний всток лиць, и есть пут-ет тяжек велми и страшенъ и безводенъ: суть бо горы высокы камены, и суть разбои мнози, и разбивають въ горахъ тЂх и въ дебрех страшных. И есть от Иерусалима до Иордана 26 верстъ великих: 15 верстъ до Кузивы, иде же постился святый Иоакимъ неплодства ради своего; и есть мЂсто то въ потоцЂ глубоко у пути близь на лЂвой руцЂ, тамо идуче. А отъ Кюзивы до Иерихона 5 верстъ, а от Иерихона до Иордана 6 верстъ великых, все поравну въ пЂсцЂ; путь тяжекъ велми; ту мнози человЂци задыхаються отъ зноя и ищезають, от жажи водныя умирають. Ту бо море Содомское близь от пути того, изходит духъ зноенъ смердящь, зноит и попаляеть всю землю ту. И ту есть, недошедше Иордана, близь на пути, монастырь святаго Иоанна Предтечи; и есть горЂ въздЂлан.






О ГОРЂ ЕРМОНЪСТЂЙ


И ту есть гора Ермонъ близь у манастыря того вдалЂе яко 20 сажень; и есть на лЂвЂй руцЂ, тамо идучи, у пути близь; и есть песочна горка та не велика, но мала.

А отъ Ермона до ветхаго манастыря Иоаннова вдалЂе дващи

дострЂлити гораздо; и ту есть была церкви велика создана во имя Предтечи Иоанна.






О МЂСТЂ, ИДЕ ЖЕ МОРЕ ВИДЂ ПОБЂЖЕ И ЕРДАН ВЗРАТИСЯ ВСПЯТЬ


А за олтаремъ тоя церкви близь встоку лиць на пригории есть созданъ яко олтарець и комара мала, и на том мЂстЂ есть крестилъ Предтеча Иоаннъ господа нашего Иисуса Христа. До того бо мЂста изиде Иордан от ложа своего, возвратився, видЂвъ творца своего, пришедша крестится, и убоявся, възъвратися вспять и прииде до того мЂста. И ту есть море Содомьское близь купЂли тоя было, нынЂ же есть дале от крещениа, яко 4 версты вдалеЂ отбЂгло; тогда убо узрЂв море наго божество, стоаще в водах Иорданьскых, и убоявся, и побЂже; Иордан възвратися вспять, яко же пророкъ глаголеть о том: «Что ти есть, море, да побЂже, и ты, Иордане, възвратися вспять?»






О МЂСТЂ, ИДЂ ЖЕ КРЕСТИСЯ ХРИСТОС


От того, иде же ся крестил есть Христос, есть до самыя рЂки Иордановы вдале, яко можеть доверечи мужь каменемь малым.






О КУПЂЛИ


И ту есть купЂль на ИорданЂ, и ту ся куплють христиане приходяще, ту же есть брод чрес Иордан во Аравию. На томь же мЂстЂ Иордан раступися древле сыномъ израилевым, и проидоша людие по суху; ту же и ЕлЂсЂй удари милотию Илииною в воду, и проидоша Иордан по суху: на той же купЂли и Мария Египтяныни преиде по водам къ отцю ЗосимЂ, и приять тЂло Христово, и пакы по водам же преиде в пустыню.






О ЕРДАНЂ


Иордан же рЂка течет быстро, бреги же имать об онъ полъ прикруть, а отсуду пологы; вода же мутна велми и сладка пити, и нЂсть сыти пиюще воду ту святую; ни с нея болЂть, ни пакости во чре†человЂку. ВсЂмъ же есть подобенъ Иордан к рЂцЂ СновьсЂй — и вширЂ, и въглубле, и лукаво течет и быстро велми, яко же Сновь рЂка. Вглубле же есть 4 сажень среди самое купЂли, яко же измЂрих и искусих сам собою, ибо пребродих на ону страну Иордана, много походихомъ по брегу его; вширЂ же есть Иордан яко же есть Сновь на устии. Есть же по сей странЂ Иордана на купЂли тои яко лЂси древо не высоко, аки вербЂ подобно есть, и выше купЂли тоя по брегу Иорданову стоитъ яко лозие много, но нЂсть яко же наша лоза, но нЂкако аки силяжи подобно есть; есть же и тростие много; болоние имать, яко Сновь рЂка. ЗвЂрь мног ту, и свинии дикии бе-щисла много, и пардуси мнози ту суть, лвове же.

Об онъ пол Иордана горы высокы каменыя; и суть подаль от Иордана; а под тЂми горами другыя горы близь суть бЂлы; и ты суть близь Иордана; и то есть земля Заулоня и Неффалимьля об онъ пол Иордана.






О ПЕЩЕРЂ ИОАНА КРЕСТИТЕЛЯ


И ту есть близь мЂсто къ встоку лиць яко двою дострЂлу вдалЂе от рЂки, иде же Илиа пророкъ всхищенъ бысть на колесници огньнЂй. Ту же и пещера святаго Иоанна Крестителя. И ту есть поток, воды исполненъ, и течет красно по камению во Иордан; и вода та студена зЂло и сладка велми; и ту воду пил Иоаннъ Предтечя Христовъ, егда жилъ в пещерЂ той святЂй.






О ПЕЩЕРЂ ИЛЬИ ПРОРОКА


И ту же есть другая пещера дивна, иде же жилъ святый Илия пророкъ съ ЕлисЂем, учеловЂкомъ его. И то все благодЂтию божиею видЂхом очима своима грЂшныма и недостойныма. И сподоби мя богъ трижды быти на святЂмь ИорданЂ, и в самы водокрещеный праздникъ быхом на ИорданЂ, видЂхом благодать божию, приходящюю на воды Иорданьскыя, и множьство народа бес числа тогда пришедших к водЂ. Всю нощь ту пЂвие бываетъ изрядно и свЂщь бес числа горящих, и в полунощи бывает крещение водЂ, тогда бо и духъ святый приходит на воды Иорданьскиа, и видять достойнии человЂци добрии, а вси народи не видят ничто же, но токмо радость и веселие бываеть тогда въ сердци всякому християнину. И егда рекуть: «Во ИорданЂ крещьшутися, господи», — тогда все людие в воду и крестяться в полунощи въ ИерданьстЂй рЂцЂ, яко же и Христос въ полунощи крестился есть. И ту есть гора, высока зЂло, об онъ пол Иордана; видЂти ю есть отвсюду издалеча; и на той горЂ пророкъ Моисий преставился есть, видЂвъ землю обЂтованую. А от манастыря святаго Иоанна до Гарасимова манастыря есть верста едина, а от Гарасимова манастыря до Каламонии, до манастыря святыя Богородица, есть верста едина.

И на том мЂстЂ святая богородица съ Иисусом Христомъ, и съ Иосифом, и съ Ияковом, егда бЂжаху въ Египетъ, то на том мЂстЂ нощлЂг створиша; тогда святаа богородица нарече имя мЂсту тому Каламонии, еже ея протолкует «Доброе обителище». Ту нынЂ сходит духъ святый ко иконЂ святыя Богородица. И есть манастыр-етъ на устьи, иде же входить Иорданъ въ море Содомское, и есть градом одЂлан весь около монастыр-ет; черноризець же в нем 20. А оттуда до манастыря Иоанна Златоустаго врьстЂ двЂ, а тый манастырь тако же градом одЂлан весь и есть богатъ велми.






О ГРАДЂ ИЕРИХОНЂ


А оттуда до Иерихона есть верста едина. Иерихонъ же тый был прьвЂе градъ велик и твердъ велми; того Иерихона Иисус Навгинъ взял и разорил до конца; нынЂ же ту есть село срациньское. И ту есть дом ЗатхЂевъ и пень древа того и до нынЂ стоитъ, на нь же бяше възлЂзлъ, хотя видЂти Христоса. Ту же есть былъ и домъ оноя сумантяныни, идЂ же ИелЂсЂй отрочища въскресилъ. Есть же около Иерихона земля добра и многоплодна, и поле красно и равно, и около его финици мнози стоятъ высоци, и всякаа древеса многоплодовита суть; и воды многы текут, разведены по всей земли той; ти суть воды ИелисЂевы, их же ослади ИелисЂй пророкъ.

И ту есть мЂсто близь Иерихона, врьста едина вдалЂе на лЂтний всток лиць, и на том мЂстЂ явися святый Михаил архистратиг Иисусу Навгину пред полком израилевым; и възвед очи свои Иисус, видЂ пред собою мужа страшна въоружена, и рече Иисус: «Наш ли еси, или от супостат наших?» И рече ему архистратиг: «Азъ есмь Михаил, воевода божьи, послан есмь на помощь тебЂ. Дерзай и побЂжай супостаты твоя». И рече ему: «Изуй сапогъ от ногу твоею; мЂсто бо, на нем же стоиши, свято есть». И паде Иисус на лици своемъ, и поклонися. И есть на мЂстЂ том нынЂ манастырь, и церкви создана во имя святаго Михаила. Въ церкви той лежита 12 камени, и то камение тогда есть взято на днЂ ИордановЂ, егда раступися Иордан людем израилевым; и взяша камение то иерЂи, носящеи кивот завЂта господня, по числу колЂнъ сыновъ израилевъ на память роду их. Имя мЂсту тому Галганий, на том бо мЂстЂ сташа сынове израилевы, прешедше Иордан.






О ГОРЂ ГАВАОНСТЂЙ


И от того мЂста есть гора высока и велика велми к западу лиць, имя горЂ той Гаваонъ, и над тою горою Гаваонъскою солнце ста и пожда, яко полудне, дондеже Иисус Навгинъ побЂди враги своя, егда биашеся с ним Огъ, царь Васанескъ, и вся царьствиа ХананЂйска. И побЂди Иисус до конца, и тогда солнце заиде.






О ПЕЩЕРЂ, ИДЕ ЖЕ ХРИСТОС ПОСТИСЯ 40 ДНИ


В той же горЂ ГаваонъстЂй есть пещера высока зЂло, и в той пещерЂ постился есть Христос богъ наш 40 дний, послЂди же взалка; и ту прииде дияволъ, искусити хотя, и рече ему: «Аще еси сынъ божий, рци да камение се хлЂби будут».

Ту есть близъ был домъ ЕлисЂя пророка, и пещера его, и кладязь есть къ встоку лиць отъ Гаваона, а вдалее яко полверсты.

И есть отъ Иерусалима верстъ 6 до Федосиева манастыря. Манастыр-ет на горЂ градом оделанъ был, и видЂти от Иерусалима. И ту есть пещера велика посреди манастыря, и в той пещерЂ волсви нощьлЂг съствориша, егда уклонишася от Ирода. И ту нынЂ лежить святый Феодосие, и мнози святии отци ту лежать, в той пещерЂ лежит мати святаго Савы, и Феодосиева мати ту лежит.






О ЛАВРЂ СВЯТАГО САВЫ


И от того манастыря до лавры святаго Савы есть връстъ 6. Манастыря же та оба на полуденье лиць. Лавра же святаго

Савы есть на дебри АсафатовЂ, во удоли плачевнЂй, яже дебрь отъ Иерусалима поидет; от Гепсимании бо дебрь поидеть сквозЂ лавру и приходить к Содомьскому морю. Лавра же святаго Савы есть уставлена от бога дивно и несказанно: поток бЂ нЂкако страшенъ и глубокъ зЂло и безъводень, стЂны имя бЂ высоки, и на тЂх стЂнахъ лпять кЂлии прилЂплены и утвержены от бога нЂкако дивно и страшно; на высотЂ бо той стоятъ келии по обЂма странама потока того страшнаго и лпят на скалах, яко звЂзды на небеси утвержены. Суть же 3 церкви. ПосредЂ же кЂлей техъ к западу лиць, ту пещера дивна под скалою каменою, и в той пещерЂ церкви святыя Богородица: и ту пещеру показа богъ святому Са†столпом огненым, преже живущу ему единому в потоцЂ том. И есть же первая келиа святаго Савы, иде же жилъ един, подаль отъ лавры нынЂшняя, яко полверсты вдалЂе; и оттуда показа ему богъ столпом огненым над мЂстом тЂмь святым, идЂ же есть нынЂ лавра святаго Савы. И есть дивно мЂсто и несказанно отнудь. И ту есть гробъ святаго Савы посредиЂ церквий тЂх трий, вдалее отъ великия сажень 4; и есть теремець над гробомъ святаго Савы; учинено красно. Ту же лежат мнози святии отци, телесы яко живи: святый Иоаннъ епископъ Исихастъ ту лежить, святый Иоаннъ Дамаскинъ ту лежит, и святый Феодоръ Едесский ту лежитъ и Михаилъ сыновець его, Афродитианъ святый ту лежит, и инии мнози святии ту лежат, телесы яко живи; и благоухание от них исходить несказанно. И видЂх кладязь святаго Савы, его же показа ему в нощи осля дикое в потоцЂ том, противу келии его; пихом от кладязя того воду сладку и студену зЂло. В мЂстЂ бо том нигде же нЂсть рЂки, ни потока, ни кладязя, но токмо един кладязь святаго Савы; есть бо мЂсто то безводно в горах каменых, и есть пустыни та вся суха и безводна, но токмо дъждевою водою живи суть сущии отцы въ пустыни той.

И ту есть близь лавры мЂсто на полудне лиць от лавры, имя мЂсту тому Рува, и есть близь моря Содомьскаго. И суть горы высоки каменыя, и пещеры многы ту суть в горах тЂх; и ту суть жили святии отцы в горах тЂхъ, в пустыни той страшнЂй безводнЂй. И ту суть жилища пардусом, и осли дивии мнози суть.

Море же Содомьское мрьтво есть, не имать в себЂ никако же животна, ни рыбы, ни рака, ни сколии. Но обаче внесеть быстрость Иорданьская рыбу в море то, то не можеть жива быти ни мала часа, но вскорЂ умираеть: изходит бо из дна моря того смола чермная верху выды тоя, и лежит по брегу тому смола та много; и смрад исходит из моря того, яко от сЂры горяща; ту бо есть мука под морем тЂмъ.






О МАНАСТЫРЂ СВЯТАГО ЕВФИМЬЯ


А лавры святаго Савы на всток лиць за горою манастырь святаго Еуфимья, 3 версты вдалее отъ лавры; и ту лежит святый Еуфимие, и ини мнози святии отци ту лежат, телесы яко живи. И есть же манастыр-ет на удолнЂ мЂстЂ, и горы суть около его каменыя подаль, манастырь же был градом одЂланъ и церкви же была добра вверхъ. И ту есть близь был манастырь святаго Феоктиста под горою на полудни лиць от манастыря Еуфимиева. И то все нынЂ разорено от поганных.






О ГОРЂ СИОНЬСТЂИ


Сион же гора есть велика и высока есть, от юга лиць, а от Ерусалима полога и равна. И на той горЂ СионьстЂй первое был град Иерусалимъ ветхий, и того града ветхаго разорил Навходносоръ, царь вавилонесъ, при ЕремЂи пророцЂ; а нынЂ Сионъ гора внЂ стЂны градныя есть, на югъ лиць от Иерусалима Сионъ. И ту есть был дом Иоанна Богословца на горЂ СионьстЂй, и на томъ мЂстЂ создана была церкви велика клЂтьски; и есть от стЂны градныя яко довержет мужь каменемь малым до церкви святаго Сиона.

И в той церкви СионьстЂй ту есть храмина, за олтаремъ тоа церкви, и в той храминЂ Христос умы ногы учеником своим.






О ДОМУ ИОАНА БОГОСЛОВА, ИДЂ ЖЕ ХРИСТОСЪ ВЕЧЕРЯЛ


Ис тое храмины на югь лиць поидучи, възлЂсти есть по степенем яко на горницю; ту есть храмина создана красно, яко на столпии и с верхом, исписа муисиею и помощена красно, и олтарь имать яко церкви на всток лиць: и то есть келиа была Иоанна Богословца, и в той кЂлии Христос вечерял со ученики своими: ту же Иоаннъ възлеже на перси его и рече: «Господи, кто ест предаяй тя?» На том же мЂстЂ сшествие святого духа бысть на апостолы в Пентикостию.

В той же церкви есть другая храмина долЂ на земли, и низка есть храмина та, на югь лиць: и в ту храмину прииде Христос къ учеником своим, дверем затвореным, и ста посредЂ их, и рече: «Миръ вам»; ту же и Фому увЂрил есть въ 8-й день. Ту же есть святый камень, принесенъ аггелом с Синайскиа горы.

А на друзЂй странЂ тоа же церкве, к западу лиць, есть другая храмина на земли низка, тЂм же образом; и ту в той храминЂ преставилася святаа богородица. И то все ся дЂяло в дому Иоанна Богословца.

И ту есть былъ домъ Каиафинъ. И ту ся Петръ отврьглъ Христа трижды, дондеже куръ възгласит. И есть мЂсто на всток лиць отъ Сиона.






ИДЂ ЖЕ ПЕТРЪ, ОТВРЬЖЕСЯ ХРИСТА ТРИЖДЫ, ПЛАКАСЯ ГОРКО


И оттуда есть близь паки мЂсто на странЂ горы, къ въстоку лиць, и ту есть пещера глубока велми, слЂсти в ню степеней 30 и 2; и в той пещерЂ плакася Петръ горко отврьжениа своего. И над тою пещерою церковь есть создана во имя святаго апостола Петра.






О КУПЂЛИ СИЛОАМСТЂИ


А оттуда на полудне лиць долЂ под горою есть купЂль Силоамля, иде же Христос слЂпцю очи отверзе.






О СЕЛЂ СКУДЕЛЬНИЧИ


И ту есть под тою же горою Сионьское село Скудиельниче, еже его купиша цЂною Христово на погребание странным; и есть об он пол дебри под горою Сионьскою, на югъ лиць от Сиона. И суть пещеры многи на странЂ горы у камени изъсЂчены, и в тЂх пещерах днЂ суть гроби устроены, у камени изсЂчены дивно и чюдно; ту ся погребають страньни пришельци туне, так; ничто же не даютъ отъ мЂста того святаго: искуплено бо есть кровию Христовою.






О ВИФЛЕОМЂ


Вифлеем же святый есть на югь лиць отъ Иерусалима святаго, 6 верстъ вдалее. По полю 2 верстЂ до СсЂданиа Авраамля, идЂ же отрока своего остави съ ослятемъ Авраамъ и поя сына своего Исаака на жертву, и задЂ ему дрова понести и огнь. И рече ему: «Отче, се дрова и огнь, а кое овча?» И рече ему Авраам: «Богъ покажет, чадо, намъ овча». И идяше Исаакъ, радуяся, путемъ темъ къ Иерусалиму лиць. На том же бо мЂстЂ приведенъ бысть Исаакъ, иде же Христос распят бысть.

И оттуда есть верста едина вдалее до мЂста, идЂ же святаа богородица видЂ двои люди, едины смЂющася, а другиа плачющася. И ту есть была церкви создана, манастырь был святыя Богородица, нынЂ же разорено есть от поганых.

А оттудЂ до гроба Рахилина, матери Иосифовы, еста верстЂ 2.






О ВЕРТЕПЂ, ИДЂ ЖЕ ХРИСТА РОДИ СВЯТАЯ БОГОРОДИЦА


И оттуда верста едина есть до мЂста, идЂ же ссЂла святаа богородица съ осляти, егда понуди сущее въ чре†еа, хотя изыти. И ту есть камень великъ, и на том камени почивала святая богородица, тогда ссЂдши со осляти; и от того камени, вставши, шла есть пЂша до вертьпа святаго, и ту родила есть Христа в том вертьпЂ святая богородица. И ту есть близъ рождество Христово от камени того, яко можеть дострЂлити добръ стрЂлець.






О ЦЕРКВИ РОЖДЕСТВА ХРИСТОВА


И есть ту над вертепом тЂмъ святым рождества Христова создана есть церкви велика крестом, и верхъ ея клЂтьски въсперенъ. Покрыта же есть вся оловом церкви та Рождества Христова, исписана есть мусиею вся, столповъ же имать 8 облых мраморяных; помощена же есть дъсками мрамора бЂлаго; двери же имат трои; есть же вдалЂе 50 сажен до великаго олтаря, а вширЂ 20 сажен. Есть же вертепъ и асли, иде же было рождество Христово, под великим олтарем, яко пещера велика, создана красно, и степеней имать 7, куда же слЂсти есть къ дверемъ святаго вертьпа святаго; имат двери двои, въ других дверии 7 же степеней. И есть, всточными дверми влЂзучи въ вертепъ, на левЂй руцЂ есть мЂсто на земли долЂ, и на том мЂстЂ родился Христос богъ нашь; и есть надъ мЂстомъ тЂмъ въздЂлана трапеза святаа, и ту на той трапезЂ литургисають.






О ЯСЛЂХ ХРИСТОВЫХЪ


И ту есть мЂсто къ встоку лиць, а противу тому мЂсту на пра†руцЂ ясли Христовы; къ западу лиць под скалою каменою суть ясли Христовы святыа; и в тЂх яслех положенъ бысть Христос богъ, в рубища повит нашего ради спасениа, все претрьпЂ. Близь же себе еста мЂста та, и рождество и ясли, яко три сажени вдалЂе межи има еста; въ единой пещерЂ оба мЂста та. Исписана же есть пещера та мусиею и помощена же красно. Церкви же исподи дупляста есть вся; и мощи святыхъ ту лежать.

И поидучи изъ церькви, на правую руку вылЂзучи, и есть пещера глубока под церковь лиць, и в той пещерЂ лежали мощи святых младенець, и оттуда взяты суть святии младенци въ Царьград. Созданъ же есть градок высокъ около всея церкви тоя. И есть мЂсто то было рождества Христова на горЂ, кромЂ людей, в пустыни; да то ся зоветь нынЂ Вифлеем, кдЂ то есть нынЂ Рождество Христово и градок-от, а ветхий Вифлеем кромЂ того мЂста был напреди, не дошедше Рождества Христова; и ту есть столпник нынЂ, и камень святыя богородица; то на той горЂ есть был первый Вифлеемъ. И та земля вся около Вифлеема зовется Ефрантъ, земля Июдина, и о том пророкъ глаголеть: «И ты, Вифлееме, земле Июдова, ничим же менши еси в тысящах Июдовах, ис тебе бо изыдеть вожь, иже упасеть люди мои Израиля». И есть земля та около Вифлеема красна зЂло въ горах, и древеса многоплодовита овощнаа стоатъ по пригориемъ тЂмъ красно: масличие, и смоквие, и рожцие много бес числа, виногради мнози суть около Вифлеема и нивы по удолиемъ многи суть.

И близь церкве Рождества Христова, внЂ стЂны градныя, к полуднью лиць дострЂла вдалЂе на горЂ есть велика пещера, в той пещерЂ жила святая богородица съ Христосомъ и со Иосифомъ.






О ДОМУ ИЕСЕОВЂ, ОТЦА ДАВИДОВА


И ту есть мЂсто на странЂ града къ встоку лиць, от града вдалЂе, яко дострЂлить; имя мЂсту тому Вифиль. И ту был домъ ИесЂевъ, отца Давидова; и в тот домъ прииде Самоилъ пророкъ и ту помаза Давида на царство во Израили, в Саула мЂсто.






О КЛАДЯЗЂ ДАВИДОВЂ


Ту кладязь Давидовъ, его же пити древле Давыд вжадася.






О МЂСТЂ, ИДЕ ЖЕ БЛАГОВЂСТИША АГГЕЛИ ПАСТУХОМЪ РОЖДЕСТВО ХРИСТОВО


А оттуда есть мЂсто подъ горою на поли, версты вдалЂе от Рождества Христова, на встокъ лиць, на том мЂстЂ святии аггели благовЂстиша пастухом рождество Христово. И есть ту была пещера; над тою пещерою создана была церкви добра во имя святаго Иосифа, и ту былъ манастырь добръ; нынЂ же разорено есть от поганых мЂсто то. И есть около мЂста того поле красно велми и нивы многоплодны, и масличья много; и то ся мЂсто зоветь Агиапимина, еже протолкуется «Святаа паства». И ту есть село святаго Савы к Вифлеему лиць под горою.






О ПЕЩЕРЂ И О ДУБЂ МАМРИЙСТЂ


А от Вифлеема есть на югь лиць Хевронъ, пещера Сугубаа и дубъ Мамбрийский. И есть отъ Иерусалима до Хеврона верст 28, и есть путь мимо Вифлеема к Хеврону, ити до Вифлеома 6 верстъ, от Вифлеема до рЂки Афамьскиа суть версты 3. В той рЂце АфамьстЂй пророкъ глаголеть Давыдъ въ Псалтири :«Ты исуши рЂки Афамля, твой есть день и твоя есть нощь». И есть рЂка та нынЂ суха: под землею течеть рЂка та, и явится у моря Содомьскаго, ту бо входить в море Содомьское. И ту есть об онъ полъ рЂки тоя гора камена высока велми, лЂсъ на горЂ той велик и частъ. И есть путь сквозЂ гору ту страшную; неудобь проходно есть; есть бо ту твердь велика, и биють срацины в горЂ той. Иже кто в малЂ хощеть пройти, то не можеть пройти; мнЂ же богъ добру дружину и многу зЂло, и тако могохомъ прейти бес пакости мЂсто то страшное. Ту бо прилежить Асколонь градъ, да оттуда выходять погании и мнози и биють на пути том злЂ. В той же гор!Ђ, в том же лЂсЂ, убиенъ бысть Авесаломъ, сынъ Давидовъ; туда бо бЂжаше отъ бЂды отца своего, и ту внесе его мска в чащю лЂса того, и я главу его за власы, и съя съ мщате, и повисе на дре†высоко, и ту устрЂленъ бысть въ сердце 3-ми стрЂлами, и тако умре на дре†томъ.

А оттуда до клятвенаго кладязя Авраамова есть версть 10, а от кладязя того до дуба Мамъбрийскаго есть верст 6.






О ТОМ ЖЕ


Есть же дуб-от святый у пути на близу, тамо идучи на правой руцЂ; и стоит красенъ на горЂ высоцЂ, и есть около корения его долЂ от бога помощено мраморомъ бЂлым; яко же помостъ церковный помощено есть около дуба того всего добраго, и есть посредЂ помоста того вырослъ дуб-от святый, искамени того, дивенъ есть. На врьху горы тоя около дуба того уродилося яко дворище, равно и чисто бес камениа, и ту стоялъ шатеръ Авраамовъ близь дуба того къ встоку лиць. И есть дуб-от не велми высокъ, кроковат велми, и частъ вЂтми, и многъ плод на нем есть; вЂтьви же его близ земли приклонилися суть, яко мужь можеть, на земли стоя, досячи вЂтви его. Втолще же есть двою сажень моихъ около его, а голомя възвыше до вЂтвЂй его полуторы сажени. Дивно же и чюдно ест.ь толь много лЂт стоящу древу тому, на толь высоцЂ горЂ, не вредися, ни испорохнЂти, но стоитъ утверженъ от бога, яко то перво насаженъ. И под тый дубъ прииде святаа троица к патриарху Аврааму и ту обЂда у него под тЂмъ дубомъ святым; и ту благослови святаа троица Авраама и Сарру, жену его, и вда има родити Исаака на старость; ту и воду показа святаа троица Авраамови, и есть кладяз-етъ и доднесь под горою тою у пути близь. И та земля вся около дуба того зовется Мамбрия; да потому зовется дуб-отъ Мамбриский. А от дуба того до Хеврона есть д†верьстЂ.






О ГОРЂ ХЕВРОНЂ


Хеврон же гора есть велика, и град был на горЂ той велик и твердъ велми, и зданиа его суть ветхаа силно. Множьство людей сЂдЂло прьво по горЂ той, и нынЂ же есть пусто.

На той бо горЂ ХевроньстЂй и первое сЂлъ внук Ноевъ, сын Хамовъ, Ханаонъ, по потопЂ пришед отъ столпотворениа; и населил был землю ту всю около Хеврона; да тако земля та зоветься ХананЂя. И ту землю обЂща богъ Аврааму, и еще ему сушу въ Месопотамии и в ХараонЂ; ту бо есть был домъ отца Авраамля. И рече богъ Авраамови: «Изиди от земля твоея, и от дому отца твоего, и иди в землю ХананЂйскую, и тобЂ дам землю ту и сЂмени твоему до вЂка и азъ буду с тобою». И нынЂ по истиннЂ есть земля та богомъ обЂтованна и благословена есть от бога всЂм добром: пшеницею, и вином, и маслом, и всяким овощом обилна есть зЂло, и скотом умножена есть; и овци бо и скоти дважди ражаются лЂтом; и пчелами увязло ту есть в камении по горамъ тЂмъ красным; суть же и виногради мнози по пригорием тЂмъ, и древеса много овощнаа стоятъ бес числа, масличие, смокви, и рожцы, и яблони, и черешни, инородия, и всякий овощь ту есть; и есть овощетъ лучи и болий всЂхъ овощий, сущих на земли под небесемъ, нЂсть такого овоща нигде же. И воды добры суть в мЂстЂ том и всЂмъ здрави, и есть мЂсто то и красотою и всЂмъ добром. Неисказанна есть земля та около Феврона! И ту есть был домъ Давидовъ на той горЂ ФевроньстЂй; и ту бо есть был Давидъ 8 лЂт, егда бяше выгнал сынъ его Авесалом.

А от Феврона до Сугубыа пещеры Авраамовы близь яко полъ врьсты ближе. Сугубаа пещера в каменЂй горЂ есть и в той пещерЂ есть гроб Авраамовъ, Исааковъ и Яковль. Ту бо пещеру Сугубую Авраамъ купил у Ефронь ХетфЂянина на погребение всему роду своему, егда прииде от Месопотамиа в землю ХананЂскую, и ино не притяжа ничто же прьвЂе, но токмо пещеру Сугубую на погребение себЂ и всему роду своему. И есть нынЂ созданъ градокъ малъ около пещеры тоя, но твердъ зЂло; и есть градок созданъ есть великим каменем, чюдно и несказанно хитростию, и стЂны его высокы суть велми. ПосредЂ, градка того днЂ утвержена есть пещера твердо. И помощенъ есть градокъ тъ весь дсками мраморными, бЂлаго мрамора. И есть пещера та под мостом исподи утвержена велми, иде же лежит Авраам, Исаакъ, Иаков, и вси сынове Ияковли; и жены их ту лежат, Сарра, РевЂка; а Рахиль кромЂ лежить на пути у Вифлеема. Суть же въ градцЂ том днЂ, над пещерею создани гроби разно себЂ; над гробы тЂми созданы церковци малы круглы. И есть близь себе гробъ Авраамовъ и жены его, Сарринъ; и гробъ Исааковъ и жены его, Ревекинъ, близь себе; гробъ Ияковль и жены его, Илиинъ, близь себе еста.






О ГРОБЂ ИОСИФОВЂ


Иосифа Прекраснаго гробъ внЂ градка того, кромЂ пещеры Сугубыя вдалЂе, яко довержеть до градка того; и то мЂсто нынЂ — святый Авраамъ. И ту есть близь гора высока, на полудне лиць, отъ Сугубыя пещеры вдалЂе верста едина; и на ту гору взиде святая троица со Авраамом; до тоя бо горы проводи Авраамъ святую троицу от дуба Мамбрийскаго. И ту есть мЂсто на верху горы тоя, красно и высоко зЂло, и на том мЂстЂ Авраамъ, пад на лици своемъ, поклонися святЂй троици, моляшеся и глаголаше:






О МОЛИТВЂ АВРААМЛЂ


«Господи! Да не погубиши праведнаго с нечестивыми в пагубу! Но еще, господи, обрящеши 50 праведник в СодомЂ, не помилуеши ли, господи, всего града того 50 ради праведникъ?» И рече господь Авраамови: «Аще обряшу в содомлянех 50 праведникъ, не погублю всего града того, 50 дЂля праведникь». И паки поклонився Авраамъ богови и рече: «Аще обрящется в содомЂхъ 30 праведникъ, не помилуеши ли всего града того?» И рече господь богъ Аврааму: «Аще обрящется 30 праведникъ в содомЂх, не погублю всего града того». И поклонився Авраамъ господеви, и рече: «Многомилостиве и трьпеливе о беззакониих наших, господи! Да не прогнЂваешися на мя, раба твоего, и възглаголю еще единою: Аще обрящется в содомЂх 15 праведник, не помилуеши ли, господи, всего града того, 15 ради праведник?» И рече господь богъ къ Авраамови: «Аще обрящется в содомЂх 15 праведник, не погублю всего града того, 15 дЂля праведник, ни 5 ради праведник, не погублю всего града того». И умолче Авраам, и не приложи к тому глаголати ничто же. С тоя же горы посла святаа троица два аггела в Содом, да изведуть Лота сыновьца Авраамова. Ту, на томъ мЂстЂ, тогда Авраамъ жертву принесе богови пшиницею, всыпавъ на огонь; и тЂмъ зоветься мЂсто то Жертва Авраамова. И есть мЂсто то высоко велми, и видЂти есть оттуда всю ту ХананЂйскую.

И отъ Жертвы Авраамовы до дебри Грезновы верста едина, а от дебри Грезновыя до гумна Анататова веръста 1.






О ГРОБЂ ЛОТОВЂ, ИЖЕ ВЪ СИГОРЂ


А оттуда до Сигора есть д†верстЂ. И ту есть гробъ Лотовъ и обою дщерю его, 2 гроба еста. И в той же горЂ пещера велика, и в ту пещеру въбЂглъ Лотъ со дщерма своима. Ту

есть градищо близь первых людий, и был на горЂ той высокь, и то зоветься Сигоръ.

А оттуда есть веръсты вдалЂе мЂсто на взгории, к полуднию лиць от Сигора, и ту стоитъ жена Лотова столпом каменым. А от жены Лотовы до Содома есть д†верстЂ. И то все видЂхом очима своима, а ногама своима не могохомъ дойти до Содомскаго мЂста, боязни ради поганых; и не даша ны ити тамо правовЂрнии человЂци, рекоша ны тако: «Ничто же вы тамо видЂти добра, но токмо муку, и смрад исходить оттуду, и болЂти ти будет, рЂша ны, от смрада того злаго». Да ту ся възвратихомъ опять къ святому Аврааму и, благодатию божиею съблюдаеми, проидохомъ по здраву в Сугубую пещеру, в градок, и ту поклонихся святымъ мЂстом всЂмъ, и почихом ту два дни. Благодатию божиею обрЂтохомъ добру дружину многу, идушу въ Иерусалимъ; и ту пристахом мы к нимъ, и идохомъ с радостию с ними безь боязни, и доидохомъ по здраву святаго града Иерусалима, и похвалихомъ бога, сподобившаго нас недостойных видети святаа та мЂста, и неизреченнаа, и не сказаннаа.

И есть на полудне лиць отъ Вифлеема манастырь святого Харитона, на той же рецЂ. АфамьстЂй; и есть близь моря Содомьскаго в горах каменых, и пустыни около его. Гроздно и безводно есть мЂсто то, и сухо; есть под ним дебрь камена и страшна зЂло; около был весь градом одЂланъ, посрЂдЂ же града того есть 2 церкви, в велицЂй есть церкви гробъ святаго Харитона. ВнЂ же есть града усыпалница, создана гораздо, и в той усыпальници лежат святии отци, телесы яко живи; и лежит ихъ ту болЂ 7-сот; ту лежит святый Кириякъ ИсповЂдник, тЂлом весь цЂлъ; ту лежита Ксенофонтова сына, Иоаннъ и Аркадие, и благоюхание чюдно от них исходит. И ту поклонихомся на мЂстЂ том святомъ, и взидохом я на гору на угь лиць, от манастыря того верста едина вдалее.

И ту мЂсто есть равно на нивЂ, и на том мЂстЂ всхищен бысть пророкъ Аввакум, идущу ему на поле к женцемъ съ брашном и с водою; и несе его аггелъ в Вавилон к Данилови пророку в ровъ; и ту накормивъ Данила и напоивъ, и паки всхищенъ бысть аггелом; в то же час, в том же дни, паки опять бысть на том же мЂстЂ у жнець и дасть им обЂд. И нынЂ есть на мЂстЂ том аки теремець созданъ, знамениа ради. Есть же Вавилон оттуду вдале 40 дний.

И от того мЂста близь церкви велика, клЂтьски создана, во имя святыхъ пророкъ. И ту есть исподи под церковию тою пещера велика, и в той пещерЂ лежита 12 пророка въ трех раках: Аввакум, Наумъ, Михей, Иезекий, Авдий, Захария, Иезекия, Измаил, Савеиль, Варухъ, Амос и Осий.

И ту есть близь на горЂ село велико велми, и сЂдят в немь срацини мнози, и христиане суть же ту, въ селЂ томъ, мнози.

И то село есть святыхъ пророкъ: ту ся суть родили святии пророци, и то их есть отчина село то. И ту лежахом нощь едину въ селЂ том, божиею благодатию храними, и почестиша ны добрЂ в селЂ том Християне. И ту опочивше добрЂ нощь ту, и заутра вставше рано, идохом к Вифлеему. СтарЂйшина бо срациньский сам со оружиемъ проводи ны олне до Вифлеема, и та мЂста вся тоже ны проводил. А лапь не дойти до тЂхъ мЂстъ, поганых ради: туда бо ходять мнози срацини и разбивають в горахъ тЂх. И доидохом по здраву до святаго града Вифлеема, и ту поклонихомся Рождеству Христову и, ту почише, идохомъ с радостию въ святый град Иерусалимъ.






ИДЂ ЖЕ УБИ ДАВИДЪ ГОЛИАФА


И есть ту мЂсто близь Иерусалима, на всток лиць отъ столпа Давыдова яко дострЂлить, и на том мЂстЂ уби Давыд Голияда. И есть мЂсто подобно близь истерны, и ту есть нынЂ нива добра.

И оттуда дострЂла есть вдалее до пещеры, и в той пещерЂ лежат мощи многих святых мученик, избиеных въ ИерусалимЂ во царство Ираклиево; и зовется мЂсто то Агаиа Мамила.






ИДЂ ЖЕ ВЗРАСТЕ ЧЕСТНОЕ ДРЕВО


И от того мЂста до честнаго Креста есть врьста едина; и есть мЂсто за горою, на запад лиць от Иерусалима, и на том мЂстЂ посЂчен есть подножекъ Христовъ, на нем же пригвоздиша пречистЂи нозЂ господа нашего Иисуса Христа. И есть мЂсто то градом одЂлано, и посредЂ града того создана есть церкви велика вверхъ во имя честнаго креста, исписана есть добрЂ вся. И под великым олтарем, под трапезою глубоко, и есть пень древа того честнаго; и утвержено есть велми, и покрыто есть над пнемъ тЂм дъсками мрамора бЂлаго. И оконце продЂлано противу древу тому, и есть кругло. И то есть манастырь ИвЂрьскый.






О ДОМУ ЗАРЬИНЂ


И от того манастыря до дому Захариина суть версты 4, и есть мЂсто то под горою, к западу лиць от Иерусалима. В тот домъ Захариинъ прииде святаа богородица в подгорие къ Иелисавефи и цЂлова Иелисавефь; и бысть, яко услыша Иелисавефь цЂлованье Марьино, и взыграся младенець, радущами въ утробЂ ея, и рече Иелисавефь: «Откуду се прииде ко мнЂ мати господа моего? Благословена еси в женах, и благословенъ плод утробы твоея». В том же дому Иоаннъ Предтеча родился есть. И есть нынЂ на мЂстЂ том создана была церькви вверхъ; идуще въ церковь ту, на левЂй руцЂ под малым олтарем есть пещерка мала, и в той пещерЂ родился Иоаннъ Предтеча. И есть мЂсто то было одЂлано градом каменым все.






О ГОРЂ, ИДЕ ЖЕ БЂЖА ЕЛИСАВЕФЬ СЪ ПРЕДТЕЧЕЮ


А оттуда есть полъверсты чресъ дебрь горы, въ ню же гору прибЂже Иелисавефь и рече: «Горо, приими матерь с чадомъ!» И абие разступися гора и приятъ ю. Слуги же Иродовы, иже гна вслЂд ея, пришедшие до мЂста того, не обрЂтоша ничто же и возвратишася томлены. И есть мЂсто то знати на камени томъ и до нынЂшняго дне. И есть над мЂстом тЂм нынЂ создана церквица мала; исподи под церквицею тою пещерка мала, и церквица другая пред пещеркою тою приздана. Ис тоя пещеры исходить вода добра зЂло, и ту воду пила святаа Иелисавефь, съ Иоанномъ ту сущи, в горЂ той; ту бо есть была до умертвия Иродова, аггель бо ю набдяше в горЂ той. И есть же гора та велика велми и лЂсъ по ней есть многъ, и около ея дебри суть многи, и есть на запад от Иерусалима; имя мЂсту тому — Орини. В ту же гору вбЂглъ Давидъ пророкъ изъ Иерусалима, от Саула царя.






О РАМЂ


А от тоя горы къ западу лиць есть д†верьстЂ до Рамы, и о той РамЂ пророкъ ИеремЂя глаголеть: «Глас в РамЂ слышанъ бысть, плачь и рыдание во ушию ею, Рахиль плачющюся чад своих и не хотяше утЂшитися, яко не суть». И есть Рама та дебрь велика, и по дебри той сЂдЂла села многа. И та земля вся около дебри тоа нынЂ зоветься Рама, и то есть область Вифлеемьскаа. И ту Ирод царь посла воя своа в Раму избить святых младенець.






О ЕЛЬМАУСЂ


А от Рамы к западу лиць суть версты 4 до Елъмауса, и ту Христос въ 3-тий день по въскресении явися ЛуцЂ и КлеопЂ, идущима има от Иерусалима на село, и ту познася има Христос в преломлении хлЂба. И есть ту было село то велико; на мЂстЂ же томъ была церкви создана; нынЂ же есть разорено все от поганых и село то есть Елъмаусъ пустъ. И есть сторонь пути того, за горою было то, на правой руцЂ тамо идуще от Иерусалима къ Яфу.






О ЛИДДЂ


А от Елмауса до Лидды суть 4 версты, по полю все доити Лидды. И ту есть был град великъ велми, имя ему Лидда, нынЂ же зовется Рамбилий. И в той ЛиддЂ Петръ исцЂлилъ есть Ению на одрЂ лежаща.






О ОПИИ


А от Лидды до Опии есть верстъ 10, все по полю ити. В том градЂ во Опии святый Петръ апостолъ Тавифу въскресилъ. В том же градЂ постившю Петру на горници въ 9 час, видЂ плащаницю с небеси сходящу, на 4 краи поврьжено; и пришедшю до него, и възрЂвъ Петръ, и видЂвъ плащаницю ту исполнь сущу четвероногых и всякого гада. И рече ему гласъ с небеси: «Петре, вставЂ, заколи и яжь!» И рече Петръ: «Господи, николи же скверно и нечисто вниде въ уста моя». — И рече ему глас с небеси: «Еже богъ очистилъ, ты не оскверняй». И на том мЂстЂ нынЂ церкви создана во имя святого Петра. Есть же гряд-от Опия у моря близь, и приходит море к стЂнам его, и тако нынЂ зовется град-от Яфъ фряжьскиинЂм языкомъ. А от Яфа до Тарсуфа есть верстъ 6.






О КЕСАРИИ ФИЛИПОВЂ


А от Тарсуфа до Кесария Филиповы суть версты 24, все подлЂ море ити. В той же Кесарии святый Петръ апостолъ крестилъ Корнилия. Ту же есть близь гора, двою версту вдалее от града того на полудне лиць, и в той горЂ жилъ отецъ Маркиянъ, к нему же прииде жена блудница искуситъ его.






О КАПЕРНАУМЂ


А от Кесариа Филиповы до Капернаума града есть верстъ 8. И есть Капернаумъ был град велик велми, и людий множество в немъ было, нынЂ же есть пусть град-от, и есть близь моря Великаго. И о том КапернаумЂ глаголет пророкъ: «О, горе тебЂ КапернаумЂ! Възнеслъся еси до небесъ и до ада снидеши». Ис того бо града изити хотяшеть антихристъ, да того ради нынЂ фрязи отпустили суть весь град-от Капернаумъ.






О ГОРЂ КАРЛИНЬСТЂИ


А от Капернаума до Карьмильския горы есть верст 6. И в той горЂ святый пророкъ Илиа жилъ есть в пещерЂ, и той враном бысть прекормленъ Илия пророкъ; на той же горЂ жерьци Вавиловы исклалъ ножем и рече Илиа: «Ревнуя поревновах по господи бозЂ моем». И есть гора та Каръмильскаа высока велми, и море Великое близь горы тоя, яко версты вдалее, От горы Кармильскиа до града до Кифы есть верста едина.






О АКРЂ ГРАДЂ


А отъ Кифы до Акры есть верстъ 15. И есть градъ тъ Акра великъ велми и твердъ зданиемъ, и лимень добръ под градом тЂмъ есть. И то град есть срациньский, нынЂ же фрязи держат. А от Акры до Тирова града есть верстъ 10, а от Тира до Сидона есть верстъ 10. И ту есть близь село Сареффа Сидонъскаа; в том селЂ Илиа пророкъ въскресилъ сына вдовича.






О ВИРИТЂ ГРАДЂ


И от Сидона до Вирита града есть верст 15. В том градЂ жидове прободоша образъ Христовъ копиемъ, изиде кровь и вода; и тогда мнози вЂроваша и крестишася во имя отца и сына и святаго духа. И в от же град Вирит Ксенофонтова сына Иоаннъ и Аркадие пошъла бяста учить философии. А отъ Рита до Зевеля 20 верстъ; а от Зевеля до Триполя 40 верстъ; а от Триполя до рЂки Судии 60 верстъ.






О ВЕЛИЦЂ АНТИОХИИ


На той бо рЂцЂ есть Антиохия Великаа. И есть от моря подале Антиохиев град 8 верстъ. Вдалее Адекия 100 верстъ, таже Малаа Антиохия, таже Каниноросъ, таже Мавроноросъ, таже Сатилия градок, таже Хидониа островець малъ. II ти вси гради суть подлЂ море, да тЂ грады вси минухомъ, по морю не приставающе, и приидохомъ близь къ градомъ тЂмъ; боязни ради ратных не пристахомъ в Хилидонии. И оттуда идохомъ в Мира, таже к Патеру граду; и у того града срЂтоша нь хусареве въ 4-хъ галиахъ, и яша ны, и излупиша всЂх. А оттуда доидохомъ къ Царюграду, и доидохом по здраву Царяграда.






О ГАЛИЛЕИ И О МОРИ ТИВИРИАДЬСТЂМ


И есть путь от Иерусалима в Галилею к Тивериадьскому морю, и к ФаорьстЂй горЂ, и к Назарефу; та бо земля около Тивириадьскаго моря вся зовется Галилея, и есть земля та от Иерусалима на лЂтний въстокъ лиць. И есть Тивириада град 4 дний вдалее от Иерусалима пЂшему человЂку ити, и есть путь страшен вельми и тяжекъ зЂло; в горах каменых ити 3 дни, а четвертый день подлЂ Иорданъ по полю ити все къ всходу лиць, олне до верха Иорданова, отнюду же поиде Иордан рЂка.

И пригоди ми богъ пут-ет исходити тако: поиде бо князь Иерусалимьский Балдвинъ на войну к Дамаску путем тЂм к Тивирьядьскому морю, туда бо есть путь к Дамаску мимо Тивириадьское море; то азъ увЂдах, оже хощеть князь путем тЂмъ к ТивириадЂ, идохъ ко князю тому, и поклонихся ему, и рекох: «И азъ бых хотЂл поити с тобою к Тивириадьскому морю, да бых походил святаа та мЂста вся около Тивириадьскаго моря. Да бога дЂля поими мя, княже!» Тогда княз-етъ с радостию повелЂ ми поити с собою и приряди мя къ отрокомъ своим. Тогда азъ с радостию великою наях под ся. И тако проидохомъ мЂста та страшная с вои царьскими бес страха и без пакости; а без вои путемъ тЂмъ никто же может проити, но токмо святаа Елена путем тЂм ходила, а инъ никто же.

Да се есть путь к ТивириадЂ: а от Иерусалима до кладязя святыя Богородица верстъ 10; а от кладязя того до Гельвуньских горъ суть версты 4. И на тЂх горах Гелвуньских убиенъ бысть Саулъ, царь ИюдЂйскый, и сынъ его Анафанъ ту же убиен бысть. И суть же горы велики, камены, сухи, безводны, нЂсть бо росы на них никогда же. А горъ тЂх до кладязя Давыдова есть верстъ двЂ; а от кладязя того до пещеры Давыдовы суть версты 4; в той пещерЂ дал бяше богъ Саула царя в руцЂ Давыдови, и не уби его, оному спящу, но урЂза скуть окройнища его и взя мечь его и покровъ ручный. А от тЂх горъ до Сихемьских горъ и до рова Иосифова суть версты 4; и на тЂх горах сынове Ияковли пасяху стада отца своего Иякова; на тЂ горы прииде Иосифъ Прекрасный къ братьи своей, от отца своего посланъ к ним, нося миръ и благословение от отца своего Иякова; они же, видЂвше брата своего Иосифа, вставше и яша и, и ввергоша и в ровъ, иже и до днешняго дне есть ров-отъ, яко и стЂна глубока создана камением великым, и твердъ велми. И ту угоди ны ся ночьлЂгъ лежати на мЂстЂ том; есть бо мЂсто то близь пути людскаго, на правой руцЂ, тамо идучи.






О КЛАДЯЗИ ИАКОВЛИ


И оттуда до вси Иосифовы, иже нарицаеться Сихарь, есть верстъ 10. И ту есть кладязь Ияковль, глубокъ и великъ, и вода студена зЂло и сладка; и у того кладязя Христос бесЂдовал с женою самарянынею; и ту лежахом ночьлЂгь.






О САМАРИИ


И ту есть близь град Самариа яко полверсты вдалее от кладязя того. Град же Самариа великъ есть велми и обиленъ есть всЂм добром. Град-от Самария стоитъ межи двЂма горама высокима, источници воднии мнози студени посредЂ града того текуть красно, и древеса овощная бе-щисла ту суть всяка: смокви, орЂшие и рожци, масличие, яко дубравы, яко лЂси суть по всей земли той около Самария; по краемъ нивы многоплодовиты суть по полем тЂмъ; и есть земля та около Самариа красна и чюдна зЂло. И есть мЂсто то обилно всЂм добром, маслом и вином, пшоницею и овощомъ, и, просто рещ, оттуда есть живъ Иерусалимъ всЂмъ добром. И тъ нынЂ град Самарийский зовется Неаполи. А оттуда есть мЂсто, двою версту к западу лиць от града Самариа, имя мЂсту тому Севастополи; и есть ту градокъ малъ созданъ, и то есть темница святаго Иоанна Крестителя Христова; и в той темници усЂченъ Иоаннъ Предтеча Христовъ от Ирода царя; и ту есть гробъ святаго Иоанна Предтеча, и есть на мЂстЂ том церковь создана добра во имя Предтеча Иоанна; и есть нынЂ ту манастырь фряжьский, богат зЂло.






О АРИМАФЕИ ГРАДЂ


А оттуда есть 4 версты до АримафЂя, и ту есть гробъ святаго Иосифа и святаго Малелеиля. И есть мЂсто к западу лиць от Самариа в горах, есть градок мал созданъ над мЂстом; церкви добра клЂтьски создана над гробом святаго Иосифа; и то ся мЂсто зоветь АримафЂй. А от Самариа путь есть к Тивириадьскому морю на встокъ лиць на лЂтний.






О ГРАДЂ ВАСАНЬСТЂ


И есть от Самариа до Васана града верстъ 30. В том градЂ ВасаньстЂ Огъ, царь Васаньский, был, его же уби Иисус Навгинъ у Иерихона. И есть мЂсто то страшно и гроздно велми. Исходит из градища того Васаньскаго 7 рЂкъ, и стоитъ тростие велико по рЂкам тЂм, и финици мнози стоятъ высоци по градищу тому, яко лЂсъ частый. И есть мЂсто то страшно и неудобь проходно: ту бо живуть срацини силнии погании и биют на рЂках тЂхъ на бродЂхъ. И лвове мнози ту ся ражают. И есть бо мЂсто то близь Иордана рЂки и болоние велико прилежить от Иордана къ градищу тому Васаньскому. И ты рЂки текуть от Васана въ Иорданъ; да тЂм лвове мнози суть въ мЂстЂ том.

И ту есть близь под градомъ тЂм къ востоку лиць, пещера дивна, крестным образом уродилася; ис тоя пещеры исходит источникъ; и есть ту купЂль чюдна, сама уродилася и яко создана от бога. В той купЂли самъ Христос купался съ ученики своими: и есть знати до днешняго дне мЂсто то, иде же Христос сЂдЂл на камени; ту купахомся и мы грЂшнии недостойнии. Въ том же градЂ ВасаньстЂмъ жидове искаху Христа, показаша ему кинисъ, и рекоша: «Достоит ли дань дати или ни?» Рече же имъ: «Чий есть образ и написание? Въздадите кесарева кесареви, а божиа богови». И рече Христос, обращься къ Петру: «Иди верзи удицу в море; ю же преже имеши рыбу, разверзи уста ея, изми статиръ и вдай за мя и за ся». У того же града Васана Христос; ицЂли два слЂпца, иже зваста въ слЂд его идуща.






О ИОРДАНЂ РЂЦЂ


А от Васана до врьха Иорданова и до мытници МатфЂевы есть верстъ 20; и есть пут-ет все по полю ити подлЂ Иордан, пиюще Иорданову воду, — сладка зЂло и чиста, — все къ восходу лиць ити отли до верха Иорданова. Иордан же поиде из моря Тивириадьскаго, от двою источнику кипит зЂло чюдно; имя источнику единому Иоръ, а другому имя источнику Данъ. И оттуда поиде Иордан двЂма рЂками из моря Тивириадьскаго; и еста подалЂ себе, яко трижды перестрЂлит межи има. И поидета рЂцЂ тЂ разно себЂ мало яко полверсты вдалЂе, и потомъ сонметася обЂ рЂцЂ въ едину рЂку и то ся зоветь Иордан по имени двою источнику. Течеть же Иорданъ быстро и чисто водою, и лукаряво велми. И есть всЂм подобен Сно†рецЂ, в ширЂ и в глубину, и болонием подобенъ есть Иорданъ Сно†рЂцЂ; и рыбы многи суть на верху его зЂло. И есть на самомъ верху ИордановЂ, на обою потоку, еста 2 моста камена, создана на комарах твердо велми, и под та моста течеть Иорданъ сквозЂ комары мосту тою.






О МЫТНИ МАТФЕОВЂ


От тою мосту близь была мытница Матьфиева, апостола Христова; ту бо ся сходять путье вси чресъ Иорданъ к Дамаску и в Месопотамию. И ту в тою мЂсту ста обЂдати князь Балдвинъ с вои своими; ту же и мы стахом с нимъ у самово верха Иорданова, купахомся на самом версЂ, Иордано†в мори ТивириадьстЂмь. И походихомъ тогда около Тивириадьскаго моря бе-страха и без боязии. Вся та святаа мЂста, куда же Христос богъ нашь походил своима ногама, ту же и меме худаго и грЂшнаго сподоби богъ походити и видЂти всю ту землю ГалилЂйскую. Его же не надЂяхомся николи же видЂти, то же ми показа богъ видЂти и обиходити ногама своима недостойныма. И видЂхъ очима своима грЂшныма всю ту землю святую и желанную. Не ложно, по истинЂ, яко видЂхъ, тако и написах о мЂстЂхъ святыхъ. Мнози друзии, доходивше мЂстъ сих, не могоша испытати добрЂ, блазнятся о мЂстЂх сих, а инии, не доходивше мЂстъ сих, лжуть много и блядуть. МнЂ же худому богъ показа мужа свята и стара деньми, и книжна велми, и духовна, живша в Галилеи лЂт 30, а у святаго Савы въ лаврЂ живша лЂтъ 20, и тый ми мужь указа все по истинЂ, от святых книгъ испытавъ добрЂ. Да что въздасть мнЂ грЂшному толико добра видЂти?

И ту стояхом у мосту тою весь день тъ, и к вечеру князь Балъдвинъ поиде за Иордан к Дамаску с вои своими. Мы же идохомъ в град Тивириадьский и ту пребыхом 10 дний въ градЂ том, дондеже прииде князь Балъдвинъ с войны тоа от Дамаска. Мы же дотолЂ походихом во вся мЂста та святаа около Тивериадьскаго моря.






О МОРИ ТИВИРИАДСТЂМ


Тивириадьское есть море обиходичаво яко озеро, и вода его сладка зЂло, и нЂсть сыти, пиюще воду ту. По длЂ же есть 50 верстъ, а въ преки 20 верстъ. Рыбы же в нем много зЂло, и ту есть рыба едина, дивна и чюдна зЂло, и ту рыбу Христос любил ясти; и есть сладка въ ядь рыба та паче всякоя рыбы. Образом же есть яко коропичь. И яхъ сам рыбу ту многажды, ту буда въ градЂ. Ту же рыбу по въскресении Христос ялъ есть, егда прииде къ учеником своим, ловящим имъ; и рече: «ДЂти, имате ли что снЂдно?» Они же рекоша: «Ни». И рече имъ: «Верзите одесную страну мрежа».






О ВЕРСЂ ИОРДАНОВЂ


И есть от верха Иорданова и от мосту тою до бани Христовы и до бани святыя богородица, и до бани апостольскиа верстъ 6, а от бани святыхъ до града Тивериады есть верста едина.

И есть был град Тивириада великъ велми, д†верстЂ вдалЂе, а вширЂ версты. И есть подале море Тивириадьское. В том градЂ многа чюдеса створих Христос богъ нашь. Ту бо есть мЂсто посредЂ града того, идЂ же Христос прокаженаго очисти. Ту есть был домъ тещи Петровы апостола; и ту Христос вниде в дом тый и цЂли от болЂзни огьныя тещю Петрову. И ту на том мЂстЂ церкви создана во имя апостола Петра, кругла образом. Ту есть и домъ Симона прокаженаго был, иде же блудница на вечери омочи слезами нозЂ пречистЂи господа нашего Иисуса Христа и власы своими отре и прия отпущение бе-щисленых грЂх. И в том же градЂ и слукую жену ицЂли: ту же есть было сотниче чюдо; ту же одръ свЂсиша с больным отроком, покровъ прокопавше; ту же ханаоныню помилова. Ту есть пещера и вода в ней сладка зЂло, и студена, в ту же пещеру Христос вбЂглъ, егда хотЂша и царя поставити в Галилеи; и ина чюдеса многа Христос створи въ градЂ том. В том градЂ есть гробъ ЕлисЂя пророка, сына Асафатова. Ту же есть близь при пути гробъ Иисуса Навгина. И есть ту камень великь у моря близь, къ стоку лиць, от града вдалЂе дострЂла; и на том камени стоялъ Христос, и ту учил народы, иже бяше пришли к нему от помория Тирьскаго и Сидоньскаго, и Декаполя, и от всея Галилея; и оттуда отпусти народы и ученики своя, идоша на ону страну моря в коряблих; и сам Иисус ту оста и послЂди оттуда преиде по морю, яко по суху ходивъ ногама своима, и бысть об онъ полъ моря пред народом; они же, пришедше, обрЂтоша Иисуса, тамо ходяща, и глаголаша: «Учителю, когда сЂмо прииде?» Он же рече им: «От бога вся возможна суть, а от человЂкъ невозможна». Есть верстъ 10 от Тавириады до того мЂста по морю, и есть мЂсто на пригории вдалеЂ от моря версты единоя.






ИДЕ ЖЕ ХРИСТОС НАПИТА ПЯТЬ ТЫСЯЩЬ МУЖ


И есть мЂсто то равно и травгю, и на том мЂстЂ Христос питал народы 5 тысящь 5-ю хлЂбъ, кромЂ женъ и дЂтий, и остася укроховъ 12 коша.






ИДЕ ЖЕ ХРИСТОС ТРЕТЕЕ ЯВИСЯ УЧЕНИКОМ СВОИМ, ВСТА ОТ МЕРТВЫХ


И ту есть близь мЂсто под горою моря того Тивириадьскаго, и на том мЂстЂ явися Христос учеником своим по въскресении третиее, и прииде Христос, и ста при езерЂ, рече: «ДЂти, имате ли что снЂдно?» Они же рекоша: «Ни». И рече имъ Иисусъ: «Възверзите одесную страны мрежа, по глаголу моему и обрящете». Они же въвергоша и к тому не можаху еа привлещи отъ множества рыбъ, извлекоша на сухо мрежу, полну великых рыбъ 100 и 50 и 3; и видЂша у мрежи огнь и хлЂбъ, и рыбу печену, и ту ядъ Христос, прочее дасть им. Ту создана есть церкви во имя святыхъ апостолъ. А оттуда есть близь был домъ Марии Магдалыни, ту ицЂли ю Христос от 7-ми бЂсовъ; и то ся мЂсто зоветь Магдалия.






О ВИВСАИДЂ ГРАДЕ


А оттуда есть близь в горЂ Вифсаида градок АндрЂев и Петров; и ту есть мЂсто, иде же приведе Нафанаила к Петрови и къ АндрЂю.






ИДЕ ЖЕ ХРИСТОС ПРИДЕ КО УЧЕНИКОМ, ЛОВЯЩИМ ИМЪ РЫБ


И ту есть мЂсто на мори, иде же прииде Христос к ЗеведЂеви и къ АндрЂеви и к Петрови, они же влечаху мрежа и завязывяху. И ту познаста Христа Андрей и Петръ, и ту остависта лодию и мрежа, идоста в слЂд Христа; и ту сЂлъ был близь моря ЗеведЂева отца Иоаннова, и ту есть был домъ Богословца Иоанна. И ту Христосъ изгна человЂка легион бЂсов, и повелЂ им влЂсти въ свиния, и ту истопаша свиниа в мори. И ту есть близь село Капернаумъ.

А оттуда есть близь рЂка велика, и та рЂка поиде изь езера Генисаритьскаго, и входить рЂка та в море Тивириадьское. Езеро же Генесаритское велико вельми, 40 верстъ вширЂ, всямокачно кругло, рыбы в немъ множество есть. И ту есть близь езера того град, имя ему Генисира; да потому ся тако зовет Генисаритьское.






О ГРАДЂ ДЕКАПОЛИИ


И ту есть другий град велик зЂло, имя ему Декаполий. И ту есть мЂсто равно близь езера того, и на том мЂстЂ Иисус стояше, уча народы, пришедша от Декаполя и помория Тирьскаго и Сидоньскаго, о томъ бо мЂстЂ въ Еуангелии глаголет. И ина многа чюдеса створи Иисус около езера того.






О ГОРЂ ЛИВАНСТЂИ


И ту есть об онъ пол езера того, на лЂтний встокъ лиць, гора высока велми и велика зЂло, и снЂзи на ней лежат чрес лЂто; имя горЂ той Ливан; на той горЂ ражается ливанъ и темианъ былый. И с тоя бо горы Ливаньскыя идета 12 рЂцЂ велицЂ; и идетъ 6 рЂкь къ встоку лиць, а 6 рЂкъ на угъ лиць; и входят рЂкы ты въ езеро Генисаритьское, а 6 рЂкь идут к ВелицЂй Антиохии; да то ся мЂсто зоветь Месопотамия, еже есть СердорЂчие. И ту есть межю тЂми рЂками Харъранъ, отнюду же изиде Авраамъ. Отъ тЂх рекъ наполняется езеро Генисаритьское вод многъ. А ис того езера идеть рЂка велика в море Тивириадьское, и умножаеться вода тою водою в мори ТивириадьстЂмь. А из моря того идеть Иордан. Яко же и преже сказахъ о ИорданЂ, то тако по истинЂ есть.

Горы же тоя Ливаньския не могох дойти ногами своими страха ради поганых, но сказаша ны добрЂ о горЂ той иже водяху ны християне, живущии тамо; и не даша ны тамо ити к горЂ той ЛиваньстЂй, много бо поганых ту живут в горЂ той; но токмо очима своима видЂли есмы гору ту и та мЂста около езера того Генисаритьскаго. И есть же близь езера того от Тивириадьскаго моря, яко двою версту межи вдалЂе, есть на лЂтний встокъ лиць отъ Тивириады езеро Генисаритьское.






О ФАВОРСТЂЙ ГОРЂ


Фаворьскаа же гора и Назареф от Тивириадьскаго моря на запад лиць, 8 верстъ великых до Фаворьскиа горы ити: токмо едину гору взити, а другую малу гору възлЂсти, а ино все по полю ити, оли до Фаворьскиа горы ити. Фаворьская же гора чюдно и дивно, и несказанно, и красно уродилася есть; от бога поставлено есть красно и высоко велми и велика; и есть посреди поля того красного, яко же стог кругол; гора та уродилася есть красно; и есть кромЂ всЂх горъ подале. И течет рЂка подлЂ гору ту по полю долЂ. И есть по всей горЂ ФаворьстЂ росло древо всякое: смоковь, рожьци и масличие много зЂло. Вышши же есть Фаворьскаа гора всЂх, сущи окресть ея, и есть уединена кромЂ всЂх горъ, и стоитъ посреди поля красно зЂло, яко стогъ будеть гораздо здЂлан, кругло и высоко велми и великъ ободом; възвыше есть яко же можеть 4-жды с нея стрЂлити; а еже горЂ на ню, то ни осмижды не может на ню въстрЂлити. Есть гора та вся камена, лЂсти же на ню трудно и бЂдно велми по камению, луками на ню лЂсти, путь тяжек велми; едва бо на ню възлЂзохом: от 3-го часа до 9-го часа, борзо идуще, едва взидохом на самый врьхъ горы тоя святыа. И есть же на самом врьсЂ горы тоя мЂсто высоко ко встоку лиць къ зимнему, аки горка камена, мала, островерха; и на том мЂстЂ преобразился есть Христос богъ нашь. И ту есть церкви добра создана на мЂстЂ том во имя Преображениа, а другаа, во имя святых пророк Моисия и Илии, подаль того мЂста есть создана церкви на сЂверъ лиць от Преображениа.






О МЂСТЂ, ИДЂ ЖЕ ХРИСТОС ПРЕОБРАЗИЛСЯ


МЂсто же то святаго Преображениа одЂлано есть около градом каменым твердо, врата же имат желЂзна град-от; и то есть прьвЂе было епископиа, нынЂ же есть монастырь латыньский. И есть пред градом тЂм полце красно уродилося на версЂ горы тоя. То есть чюдно и дивно божие устроение, еже есть на толь высоцЂ, иже водЂ быти ту; много бо воды есть на горЂ той на самом врьсЂ, то и нивы суть, и виногради добрии, и древеса овощнаа многа суть по горЂ той. И видЂти с нея далече вельми.






В ПЕЩЕРЂ МЕЛЬХИСЕДЕКОВЂ


Ту есть на той же горЂ ФаворстЂй пещера чюдна зЂло на равнЂ: тако есть, яко погребець малъ въ камении иссЂченъ; и оконце мало было на версЂ пещеры тоя святыя; трапеза создана днЂ в пещерЂ той на встокъ лиць; дверци имат малы, слЂсти же в пещеру ту по степенемь от запада лиць. И пре-дверми же пещеркы тоя стоятъ смоковици малы; около ея стоятъ древца мала всякаа. Прьвое же был лЂсъ велик ту около пещеры тоя, нынЂ же мала и худа древца суть ту. И в той пещерици жилъ святый Мелхиседекъ, и ту прииде к нему Авраам и возва 3-жды, и рече: «ЧеловЂче божий!» Изиде Милхиседекъ, и изнесе хлЂбъ и вино, и созда жерътовник ту въ пещерЂ той, створи жертву хлЂбом и вином, и абие взяться жертва на небеса к богу. И ту благослови Мелхиседекь Авраама, и остриже и Авраам, и обрЂза нокти его, и бЂ бо косматъ Мелхиседек. И то бысть начатокъ литургиам хлЂбом и вином, а не опрЂсноком. О том пророкъ глаголеть: «Ты еси иерЂй в вЂкы по чину Мелхиседекову». И есть пещерка та вдалЂ от Преображениа, яко дострЂлить добрЂ, и есть къ западу лиць мЂсто то святое.

И ту почьстиша на добрЂ в манастыри том у святого Преображенья, и ту обЂдахом; и опочивше добрЂ, и вставше, идохомъ въ церковь святаго Преображения, и поклонихомся на мЂстЂ святЂмь, иде же преобразися Христос богъ нашь, и облобызавше мЂсто то святое с любовию и радостию великою, и вземше благословение от игумена и от всее братии, изидохом из манастыря того святого, и обиходивше вся мЂста святаа по всей горЂ той святЂй. Туда бо путь есть мимо пещеру ту Мелхиседекову к Назарефу. Назарефъ есть на запад лиць от Фавора. И второе паки любовию влЂзохом в пещеру ту святую и поклонихомся святЂй той трапезЂ, ю же создалъ Мелхиседекъ со Авраамом. И есть до дняшняго дне трапеза та в пещерЂ той. И нынЂ приходить ту святый Мелхиседекъ часто и литургисает в пещерЂ той святЂй, и почивают вси вЂрнии, иже ту живут, въ горЂ той святЂ; ти же ми повЂдаша о том по истинЂ. И похвалихом бога, сподоблешаго нас, худых и недостойных, видЂти та святаа мЂста и облобызати устнами недостойными.

И прочее снидохомъ с горы Фаворски доловь на поля и идохом по полю д†верстЂ к Назарефу на запад лиць. И есть от Фарския горы до Назарефа 15 верстъ великых; по полю д†верстЂ, а 3 в горах; путь тяжекъ велми и тЂсенъ, зЂло непроходен: туды бо погании срацини мнози сЂдят в горах тЂхъ, и по полю тому села суть многа срациньская, и ти биють, выходяще из селъ тЂх, в горЂ той страшной. И бЂдно ми ити в малЂ путем тЂмъ. Но ли со многою дружиною, то тако может проити путем тЂмъ бе-страха; нам же не пригодишася дружина, но сами едини тако, толко 8 нас, и то же худа и безъ оружия, на бога надЂющеся, проидохом, божиею благодЂтию храними и молитвами святыя владычица нашея богородица сблюдаеми, бес пакости по здраву доидохом святаго града Назрефа, идЂ же бысть святое благовЂщение святЂй госпожи богородици от аггела Гавриила; ту же и Христос въскормлен бысть.






О ГРАДЂ НАЗАРЕФЂ


Назарефь же градок малъ есть в горах на удолнЂ мЂстЂ, да оли надшед над онь то же узрЂти. И посредЂ градка того церкви создана велика вверхъ о трех олтарех. И, влЂзучи в церковъ ту, на лЂвЂй руцЂ есть яко пещерка мала глубока пред малым олтарцем; имать же двери малы двои пещера та, едины дверци от запада, а другии дверци къ встоку лиць; слЂсти по степенемъ въ пещеру ту и во обоих дверцих тЂх. ВлЂзучи в пещеру ту западными дверми, на правой руцЂ есть келия создана, дверци малы имущи; и в той келийци жила святаа богородица со Христомь, ту въскормленъ бысть Христос, в святой той храминци; и ту ложица его, иде же лежал Иисус, ту в келийци той ложицею тако низко на земли создано.






О ГРОБЂ ИОСИФА ОБРУЧНИКА


В той же пещерЂ, западными дверми влЂзочи, на лЂвЂй руцЂ есть гробъ святаго Иосифа, обрученика Мариина; ту его Христос самъ погреблъ своима рукама пречистыма. Исходит у гроба его от стЂны яко миро, вода святаа бЂла, и взимають на ицЂление недужнымъ.






О ПЕЩЕРЂ, ИДЂ ЖЕ СЂДЯШЕ СВЯТАА БОГОРОДИЦА


Ту есть мЂсто в той же пещерЂ у дверей западных близь, на том мЂстЂ сЂдяше святаа богородица при дверех тЂхъ близь и скаше кокнит, еже есть червленица. И ту прииде Гаврил архаггелъ, посланъ от бога къ дЂвици Марии.






ИДЂ ЖЕ БЛАГОВЂСТИ АРХАГГЕЛЪ СВЯТЂИ БОГОРОДИЦИ


И ста пред нею, яви очи вЂсть, подаль мало от мЂста, идЂ же сЂдяше пречистая девица; яко 3-и столпъ вдалЂ есть мЂстото от дверей пещерных, иде же стояше Гавриилъ. Ту поставлена трепезка мала, кругла, мраморяна, объ едином столпци; и на той трапезЂ литургисають.






О ДОМУ ИОСИФА ОБРУЧЕНИКА


И ту есть был домъ Иосифовъ, и где то есть пещера та святаа: все ся то дЂяло в дому ИосифовЂ, обрученика Мариина. И ту есть церкви создана над пещерою тою святою во имя святаго БлаговЂщениа. То было мЂсто святое опустЂло прьвЂе, нынЂ же фрязи обновили мЂсто то суть и устроили добрЂ. И есть ту епископъ латиньский, богатъ зЂло, и то владЂеть мЂстом тЂм святым. И почьстиша нас добрЂ питием и ядениемъ, и всЂм. И лежахом ту нощь едину в градцЂ том. И почивше добрЂ, и заутра вставше, идохомъ въ церковь ту и поклонихомся святому тому мЂсту. И, вшедше въ святую ту пещеру, и ту поклонимся святымъ тЂмъ мЂстом всЂмъ. И изидохом из града того, и поидохом мало на лЂтний встокъ лиць, и обрЂтохом кладязь чюденъ, и глубок, и студен зЂло; и слЂсти есть по степенемъ к водЂ той глубоко. И есть надъ кладязем тЂм создана церкви во имя архаггела Гавриила, и есть кругла образомъ.






О КЛАДЯЗИ, ИДЕ ЖЕ АНГЕЛЪ ПРЬВОЕ БЛАГОВЂСТИ


Есть же отъ града Назарефа вдале яко дострЂлити добрЂ до кладязя того святаго: у того бо кладязя бысть прьвЂе благовЂщение святЂй богородици от архаггела. Пришедши бо ей по воду, и яко почерпе водоносъ свой, възгласи ей аггелъ невидимо и рече: «Радуйся, обрадованнаа, господь с тобою!». ОзрЂвся Мария сюду и сюду, ни видЂ никого же, но токмо глас слыша, и вземше водоносъ свой, идяше, дивящися во умЂ своем, рекущи: «Что се будеть глас, еже слышах, никого же не видЂхъ?» И вниде в Назарефь, и вниде в дом свой, и сЂде на прежереченномь мЂстЂ, и начат скати кокнитъ; и тогда явися архаггелъ Гавриилъ явЂ, стоя на прежереченном мЂстЂ; тогда ей благовЂсти рождество Христово.

И есть же от Назарефа до села Исавова 5 верстъ.






О КАНИ ГАЛЕЛЂИСТЂИ


А от села того до Кана Галилеи полторы версты. Кана Галия же есть на людском пути, и ту Христос воду в вино преложи. И ту обрЂтохом дружину многу, идущу въ Акру, и пристахомъ к ним съ радостию великою, идохом с ними въ Акру.

Акра же град есть был срациньский, нынЂ же фрязи держать, Есть же градок-отъ Акра на Велицем мори, илимень под нимь добръ велми; всЂм обиленъ есть градок. А от Назарефа до Акры есть верстъ 28 великих, есть же Акра к полуднью лиць от Назарефа. И ту пребыхом во АкрЂ 4 дни, и опочивше ту добрЂ, и обрЂтохом дружину многу, идущю въ святый град Иерусалимъ, и пристахом къ дружинЂ той и поидохом с ними с радостию, веселящеся, и придохом в Каифу. А оттуда идохом къ горЂ КаръмильстЂй, и туда идохом. И ту есть в горЂ той пещера святого Илии пророка; и ту поклонихомся, и оттуда идохом в Капернаум. А от Капернаума приидохом в Кесарию Филипову. И туда есть путь все ити подлЂ Великое море по полю, а другое по пЂском оли до Кесария. Ту пребыхом 3 дни в градЂ томъ КесарийстЂм. И ту есть былъ Корнилие, его же Петръ апостолъ крестилъ. А от Кесариа идохом в Самарию: налево от Кесария в Самарию путь есть в горы; есть верстъ 20 от Кесария до Самарии. И быхом другаго дне полудне в Самарии, но по тиху идуще; и зноа ради и не можаху людие пЂши ходити въ зной. И ту нощь прележахом пред градом тЂмъ Самариею у кладязя Ияковля, иде же Христос бесЂдова съ женою самарянынею.






О ЕРУСАЛИМЂ


И оттуда вставше поидохом путем своим, им же бяхом пришли изъ Ерусалима; и доидохом святаго града Иерусалима с радостию великою по здраву.

Ничто же зла не видЂхом на пути сем, но все добро показа намъ богъ видЂти очима своима. Вся святаа та мЂста, куда Христос богъ нашь походил нашего дЂля спасения, туда же и нас грЂшных сподоби походити и видЂти святаа та мЂста. И чюдную ту землю Галилейскую видЂхом очима своима, всю землю Палестину богъ сподоби мя обиходити. И божиею благодатию храними, и походихом бес пакости, молитвами святыя богородица съблюдаеми; и походихом всю Палестиньскую землю; та бо земля вся зовется около Иерусалима Палестина.

Божиею помощию укрЂпляем, походих мЂста та святаа, не видЂх нигде же поганых, ни лютаго звЂри, ни пригоди ми ся видЂти иного зла ничт.о же, ни немощи малы не почютих в тЂлЂ моем; но всегда, яко орелъ облегчеваем, божиею благодатю съблюдаем и силою вышняго укрЂпляемъ. Аще и похвалити ми ся подобает, но силою Христа моего похвалюся; о немощи же моей похвалюся: «Сила бо моя в немощи свершается», — апостолъ глаголеть Павел. Да что въздамъ господеви за вся, яже въздасть мнЂ, худому и грЂшному и недостойному, толику благодЂть видЂти, и походити по святым симъ мЂстом, и исполнити ми желание сердца моего! Его же есмь сподобился видЂти, то же ми показа богъ видЂти недостойному рабу и худому.

Да простите мя, братие и отци и господие мои, и не зазрите худоумию моему, еже написах се не хитро, но просто, о мЂстЂх сих святых, и о ИерусалимЂ, и о земли сей обЂтованнЂй. Обаче аще и не мудро написах, но не ложно: яко же видЂх очима своима, тако и написах.






О СВЂТЂ НЕБЕСНЂМ: КАКО СХОДИТ КО ГРОБУ ГОСПОДНЮ


А се о свЂтЂ святЂмъ, како сходит къ Гробу Господню. Се ми господь показа видЂти худому и недостойному рабу. И видЂх очима своима грЂшныма по истинЂ, како сходит святый свЂт къ Гробу животворящему господа нашего Иисуса Христа.

Мнози бо странници неправо глаголють о схожении свЂта святаго; инъ бо глаголеть, яко святый духъ голубем сходит къ Гробу господню, а друзии глаголють: молнии сходить с небесе, и тако вжигаются кандила над Гробом господнимь. И то есть лжа и неправда: ничто же бо есть не видЂти тогда, ни голубя, ни молнии, но тако, невидимо сходит с небеси благодатию божиею и вжигает кандила в ГробЂ Господни. Да и о том скажю, яко видЂх по истинЂ.

В Великую пятницю по вечерни потирають Гробъ Господень, и помывают кандила та вся, и вливають масла честнаго без воды, единого масла того токмо; и вотъкнувше свЂтилна во оловца, и не вжигають свЂтилен тЂх, но тако оставляють кандила та невожжена. И запечатають гробъ въ 2 час нощи. И тогда изгасять вся кандила и свЂщи по всЂм церквамъ въ ИерусалимЂ.

Тогда азъ худый, недостойный, в ту пятницю, въ 1 час дни, идох къ князю тому Балъдвину и поклонихся ему до земли. Он же, видЂв мя худаго, и призва мя к себЂ с любовию, и рече ми: «Что хощеши, игумене русьский?» Познал мя бяше добрЂ и люби мя велми, яко же есть мужь благодЂтенъ и смЂрен велми и не гордить ни мала. Аз же рекох ему: «Княже мой, господине мой! Молю ти ся бога дЂля и князей дЂля русских: повели ми, да бых и азъ поставил свое кандило на гробЂ святЂмь от всея Русьскыя земля!» Тогда же онъ со тщанием и с любовию повЂле ми поставити кандило на ГробЂ Господни и посла со мною мужа, своего слугу лучьшаго, къ иконому святаго Въскресения и к тому, иже держить ключь гробный. И повЂлЂста ми иконом и ключарь святаго Гроба принести ми кандило свое с маслом. Аз же поклонився има, идохъ с радостию великою, и купих кандило стькляно, велико велми, и налиавъ масла честнаго все, принесох ко Гробу Господню, уже вчеру сущу. Упросихъ ключаря того, единого внутрь Гроба суща, и обЂстихся ему; он же отврьзе ми двери святыя, и повелЂ ми выступити ис калиговъ, и тако босого введе мя единого въ святый Гробъ Господен и с кандилом, еже нося с собою, и повелЂ ми поставити кандило на Гробъ Господни. И поставих своима рукама грЂшныма в ногах, иде же лежаста причистЂи нозЂ господа нашего Иисуса Христа; в главах бо стояше кандило гречьское, на персехъ поставлено бяше кандило святаго Савы и всЂхъ монастырей; тако бо обычай имут: по вся лЂта поставляють кандило гречьское и святаго Савы. И благодЂтью божиею та ся 3 кандила вожгоша тогда; а фряжьская каньдила повЂшана бяху горЂ, а от тЂх ни едино же възгорЂся.

Аз же тогда, поставивъ кандило на ГробЂ святЂмь, и поклонився честному Гробу тому, и облобызавъ мЂсто то святое с любовию и съ слезами, иде же лежало тЂло господа нашего Иисуса Христа, изидох из Гроба святаго с радостию великою и идохъ в келию свою.

Заутра же в великую суботу въ 6 час дне сбираются вси людие пред церковь святаго Въскресениа. Бесщисленое множьство народа, от всЂх странъ пришелци и тоземци: и от Вавилона, и от Египьта, и от всЂх конець земли ту ся сбирають во тъ день, несказанно множьство. И наполнятся вся та мЂста людий около церкви и около Распятиа Христова; и велика тЂснота и томление лютЂ людемъ ту бываеть; мнози бо человЂци ту задыхаются от тЂсноты людий бещисленных. И ти людие вси стоятъ съ свЂщами не вожженами и ждуть отврьзениа дверий церковных. Внутрь же церкви тогда токмо попове едини суть. И ждуть попове и вси людие, дондеже прииде князь съ дружиною; и тогда бывает отврьзение дверемъ церковным, и входять людие въ церковь в тЂснотЂ велицЂ и въ гнетении, и наполняють церковь ту; и полати вси полны будуть. Не могуть бо ся вмЂстити вси людие въ церковь ту, но ту стоять внЂ церкви людие мнози зЂло, около Голгофы и около Краниева мЂста и дотуда, иде же кресты налЂзени; и все то полно будеть людий бе-щисла много множьство. И ти людие вси въ церкви и внЂ церкве иного не глаголють ничто же, но токмо «Господи, помилуй!» зовут неослабно и вопиють силно, яко тутнати и гремЂти всему мЂсту тому от вопля людий тЂх. И ту источници слезам проливаются от вЂрных людий. Аще бо кто окаменено сердце имат, но тогда можеть прослезити. Всякъ бо человЂкъ зазрит в себЂ тогда, и поминаеть грЂхи своя, и глаголеть в собЂ всякъ человЂкъ: «Еда моих дЂля грЂхов не снидет свЂт святый?» И тако стоать вси вЂрнии людие слезни и скрушенным сердцемъ, и тъ самъ князь Балъдвинъ стоитъ съ страхом и смирениемъ великим, источници проливаются чюдно от очию его, тако же и дружина его около его стоятъ прямо Гробу, близь олтаря великаго, вси бо сии стоят съ смЂрением.

И яко бысть 7 час дне суботнаго, тогда поиде Балъдвинъ князь ко Гробу Господню и з дружиною своею, из дому своего, и вси бо сии пЂши. И присла въ метохию святаго Савы и позва игумена того святаго Савы и съ черници его. И поиде игуменъ с братиею къ Гробу Господню, и азъ худый ту же поидох съ игуменом тЂмъ и з братиею. И приидохом ко князю тому и поклонихомся ему вси; тогда и онъ поклонися игумену и всей братии и повелЂ игумену святаго Савы и мнЂ худому близь себе поити повелЂ, а иным игуменом и черньцем всЂм повелЂ пред собою поити, а дружинЂ своей повелЂ позаду поити. И приидохомъ къ церкви Въскресения Христова к западным дверем, и се множьство людии заступили двери церковныя, и не могохомъ тогда въ церковь внити. Тогда князь Балдвинъ повелЂ воином, и разгнаша люди насалие, и створиша яко улицю олне до гроба, и тако могохом проити сквозЂ люди ольне до гроба. И приидохом къ восточным дверемъ святаго Гроба Господня, и князь по нас прииде и ста на мЂстЂ своем, на деснЂй странЂ у преграды великаго олтаря, противу всточным дверем и гробным; ту бо есть мЂсто княже, создано высоко. И повелЂ князь игумену святаго Савы стати над гробом с своими черньци и с правовЂрными попы; мене же худаго повелЂ поставити высоко над самыми дверми гробными, противу великому олтарю, яко дозрЂти ми лзЂ бяше въ двери гробныя. Двери же ты гробныя всЂ трои запечатаны бяху, и запечатаны печатию царскою. Латиньстии же попове в велицЂм олтари стояху. И яко бысть 8 час дне и начаша вечернюю пЂти на гробЂ горЂ попове правовЂрнии; и черноризци, и вси духовнии мужи, и пустынници мнози ту бяху; латина же в велицЂм олтари начаша верещати свойскы. И тако поющим имъ всЂм, аз ту стоях, прилЂжно зрях ко дверем гробным. И яко начяша чести паремии тоя суботы великиа, на первих пареми изиде епископъ с дьяконом из великого олтаря, и приде къ дверем гробным, и позрЂ въ Гробъ сквозЂ крестець дверей тЂхъ, и не узрЂ свЂта в ГробЂ, и възвратися опять. И яконачаша чести 6-ю паремию, тот же епископъ прииде къ дверем гробным и не видЂ ничто же. И тогда вси людие възпиша съ слезами «Кирие, елеисонъ», еже есть «Господи, помилуй!». И яко бысть 9-му часу минувшую и начаша пЂти пЂснь проходную «Господеви поим», тогда внезавпу прииде туча мала от встока лиць и ста над верхом непокрытым тоа церкве, и дождь малъ над Гробом святымъ, и смочи ны добрЂ стоящих на ГробЂ. И тогда внезаапу восиа свЂтъ святый во ГробЂ святЂмь: изиде блистание страшно и свЂтло из Гроба Господня святаго. И пришед епископъ съ 4-рми дияконы, отверзе двери гробныя, и взяша свЂщу у князя того у Балдвина, и тако вниде въ Гробъ, и вожже свЂщу княжю первЂе от свЂта того святаго; изнесше же из Гроба свЂщу ту и даша самому князю тому в руцЂ его. И ста княз-ет на мЂстЂ своемъ, свЂщю держа с радостию великою. И от того вси свои свЂщи въжгохомъ, а от наших свЂщь вси людие вожгоша свои свЂщи, по всей церкви друг отъ друга вожгоша свЂщи.

СвЂт же святы не тако, яко огнь земленый, но чюдно инако свЂтится изрядно, и пламянь его червлено есть, яко киноварь, и отнудь несказанно свЂтиться.

И тако вси людие стоят съ свЂщами горящими, и вопиють вси людие велегласно «Господи, помилуй!» съ радостию великою и с веселием. Така бо радость не можеть быти человЂку, ака же радость бываетъ тогда всякому християнину, видЂвши свЂтъ божий святый. Иже бо не видЂвъ тоа радости въ тъ день, то не иметь вЂры сказающим о всемъ том видЂнии; обаче мудрии и вЂрнии человЂци велми вЂрують и въсласть послушають сказаниа сего и истины сеа и о мЂстЂх сих святыхъ. ВЂрный в малЂ и во мнозЂ вЂренъ есть, а злому человЂку невЂрну истина крива стваряються. МнЂ же худому богъ послух есть и святый Гробъ Господень и вся дружина, русьстии сынове, приключьшиися тогда во тъ день ногородци и кияне: Изяславъ Иванович, Городиславъ Михайлович Кашкича и инии мнози, еже то свЂдають о мнЂ худомъ и о сказании семъ. Но възвратимся на прежереченную повЂсть.

Егда же свЂтъ восия въ ГробЂ святЂмъ, тогда же и пЂние преста, и вся возпиша «Кирие, ейлеисонъ» и поидоша въ церковь съ свЂщами горящими и с радостию великою, сблюдающи свЂщи свои от угашения вЂтреняго, и идоша кождо их въ свояси. И от того святаго свЂта вжигают кандила въ своих церквахъ и канчивають пЂние вечернее дома; а в велицЂй церкви, у Гроба Господня, сами попове едини, безъ людий, канчивають пЂние вечернее. Тогда и мы съ игуменом и съ братиею въ своей манастырь идохом, несуще свЂщи горящи, и ту кончахом пЂние вечернее, и идохом в келии свои, хваляще бога, показавша недостойным нам ту благодЂть божию видЂти.

И на утрени въ Святую недЂлю, отпЂвше заутренюю и бывшю цЂлованию съ игуменом и съ братиею, и отпущению бывшю въ 1 час дне, и вземше крестъ, игуменъ и вся братия, идохом къ Гробу Господню, поюще кондакъ сий: «Аще и въ гробъ сниде, безмертне». И вшедше в святый Гробъ животворящий, и облобызавше святый Гробъ Господень с любовию и со слезами теплыми, и насладившеся ту благоуханныя воня тоя святаго духа пришествиемъ; и кандилом тЂмъ еще горящим свЂтло и чюдно. Та бо 3 кандила бяху вожьглися тогда, яко же повЂда ны иконом и ключарь Гроба Господня; ко игумену глаголаста оба: «ДолЂ стаащеа на ГробЂ Господни, та 3 кандила възгорЂстася». А иных 5 кадилъ виситъ над гробомъ; но горяху тогда; свЂтъ ихъ инакъ бяше, не якоже онЂхъ 3-хъ кадилъ, изрядно и чюдно свЂтится.

И потомъ изыхомъ из Гроба въсточными дверми, и вшедше въ великый олтарь, и ту створивше цЂлование съ правовЂрными, и бывшу отпущению, игуменъ же и братиа, изыдохомъ изъ церкви святаго Въскресения и идохомъ во свой манастырь, и ту опочивше до литургии.

И по 3-емъ дни Въскресения господня, по литургии, идохомъ къ ключареви Гроба Господня и глаголахъ ему: «ХотЂлъ быхъ взяти кадило свое». Онъ же съ любовию поимъ мя, введе въ Гробъ одиного токмо. Азъ же вшедъ въ гробъ и видЂхъ кадило свое, стояща на гробЂ святЂмъ и еще горяще свЂтомъ тЂмъ святымъ, и поклонився Гробу тому святому, и облобызавъ с любовию и слезами мЂсто то святое, идЂ же лежало тЂло господа нашего Иисуса Христа пречистое; и тогда измЂрих собою Гробъ въдлЂ и вширЂ и выше же, колико есть; при людех бо невозможно есть измЂрити его никому же. И почьстих Гроба Господня по силЂ моей, яко мога, и тому ключареви подах нЂчто мало и худое благословение свое. Он же видЂ любовь мою сущую к гробу Господню, и к тому ми удвигнувъ дощъку, сющую во главах Гроба Господня святаго, и уять ми того святаго камени мало благословение, и запрЂтивъ ми с клятвою никому не повЂдати въ ИерусалимЂ. Азъ же, поклонився Гробу Господню и ключареви, и вземъ кандило свое съ масломъ святымь, изидох из Гроба святаго с радостию великою, обогатився благодатию божиею и нося в руку моею даръ святаго мЂста и знамение святаго Гроба Господня, и идох, радуяся, яко нЂкако скровище богатьства нося, идох в келию свою, радуяся великою радостию.

И богъ тому послух и святый Гробъ Господень, яко во всЂх мЂстЂх святых не забых именъ князь русскых, и княгинь, и дЂтей ихъ, епископъ, игуменъ, и боляръ, и дЂтей моих духовных, и всЂх христианъ николи же не забыл есмь; но во всЂх святыхъ мЂстЂх поминалъ есмь: первЂе поклонялъся есмь за князей за всЂх, и потомъ о своих грЂсЂх помолился есмь. И о сем похвалю благаго бога, яко сподоби мя худаго имена князей рускых написати в лаврЂ у святаго Савы; и нынЂ поминаются имена их во октении, с женами и с дЂтьми их. Се же имена их: Михаил Святополкъ, Василие Владимеръ, Давидь Святославич, Михаилъ Олегъ, Панъкратие Святославич, ГлЂбъ Менский. Толко есь ихъ помнЂл имЂнъ, да тЂх вписах. ОпрочЂ всЂхъ князь русскых, — и о болярех у Гроба Господня и во всЂх мЂстЂх святых. И отпЂхом литургии за князи русскыя и за вся християны, 50 литургий; а за усопшаа 40 литургий отпЂхом.

Буди же всЂмъ, почитающим писание се с вЂрою и с любовию, благословение от бога и от святаго Гроба Господня и от всЂх мЂстъ сих святыхъ: приимут мзду от бога равно с ходившими мЂста си святаа. Блажени же видЂвше вЂроваша, треблажени не видЂвшие вЂровавше. ВЂрою бо прииде Авраамъ в землю обЂтованную. ПоистинЂ бо есть вЂра равна добрым дЂлом.

Бога ради, братие и господье мои, не зазрите худоумию моему и грубости моей. Да не будет в похуление написание се, мене ради и Гроба Господня и святыхъ ради мЂстъ сих. Кто любовию почтеть, да мьзду прииметь от бога спаса нашего Иисуса Христа. И богъ мира со всЂми вами в вЂки, аминь.







За вид.: «Хождение» игумена Даниила / Памятники литературы Древней Руси. XII век. — М., 1980. — С.25-114.

Підготовка тексту Г.М.Прохорова.

«Житіє і ходіння ігумена Даніїла з Руської землі» — найдавніше з руських описів паломництва до Святої землі. Подається за текстом першої редакції «Хождения» за списком ГПБ, Q.XVII.88, 1495 г. Вставки пропущених слів зроблено за списком ГБЛ, Рум., №335, XV-XVI вв. Виправлення виділено курсивом.







Попередня       Головна       Наступна             Переклад



Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.