СЪКАЗАНИЕ ОТЦА НАШЕГО АГАПИЯ ЧЬСО РАДИ ОСТАВЛЯЮТЬ РОДЫ И ДОМЫ СВОЯ И ЖЕНЫ И ДЂТИ И ВЪЗЬМЪШЕ КРЬСТЪ И ИДУТЬ ВЪ СЛЂДЪ ГОСПОДА ЯКО ЖЕ ЕВААНГЕЛИЕ ВЕЛИТЬ
Господи, благослови, отче!
Агапии отець нашь из млада начатъ бога бояти ся и заповЂди его хранити. Живъ въ дому своемь шесть на десяте лЂтъ. И тако изиде въ манастырь, и прЂбысть въ манастыри шесть на десяте лЂтъ моля ся господу день и нощь глаголя: «Господи, съкажи ми чьсо ради оставляють домы своя и роды и въ слЂдъ тебе идуть». Тако же ему молящу ся, услышана бысть молитва его въ девятыи час нощи. Гласъ бысть къ нему глаголя: «Агапие, рабе мои, молитва твоя въшьдъши къ мнЂ прията бысть, и се извожю тя изъ манастыря, и веду тя въ пути моя. И егда изидеши из манастыря и узьриши орьлъ, и амо же тя ведеть, иди по немь».
Агапии же рече: «Буди имя господне благословлено отселЂ и до вЂка». И въставъ излЂзе ис церкве. И събьра вься калугеры и рече имъ: «Братия, кого хощете да поставлю вам игумена въ себе мЂсто?» Братия же рекоша къ нему: «А ты ся камо хощеши дЂти отъ насъ?» Агапии же рече къ нимъ: «Господь богъ отводить мя отъ васъ, и азъ иду въ пути господня. Вы же кого хощете да поставлю вам старЂишину?» Калогери же рекоша: «Его же ты изволиши, и поставиша намъ игумена», Агапии же постави имъ игумена брата старЂишаго, и устроивъ я и цЂловавъ Ђ, изиде изъ манастыря. Рек: «Миръ вамъ, и господь съ вами». И егда поиде путьмь, узьрЂ и орьлъ идущь съ небесе къ себЂ, и испълъни ся духъмь святыимь Агапии. Орьлъ же пришьдъ къ нему поиде прЂдъ нимь, путь кажа. Агапии же идяаше съ тъщаниемь по пути въ слЂдъ его. И доведе и орьлъ морьскыя лукы, и отиде от него.
Агапии же стояше на мори, мысля, камо бы прЂшьлъ морьскую глубину, бяше бо и звЂрь лютъ въ лукахъ морьскыихъ, иже изЂдаше человЂкы. Агапии же ужасьнъ бысть вЂльми. И яко же отиде от него орьлъ и не домышляше ся камо ити. Стоя бо узьрЂ корабль плавающь и въздрадовася вельми и приближися къ морю. И видЂ въ корабли дЂтищь идъва мужа велика. И егда поклонити ся хотЂ и рещи: «ДобрЂ ходите и добръ вы путь буди», тъгда малыи-дЂтищь пьрьвЂе рече къ Агапию: «Агапие, съдравъ ли еси, чьто дЂеши сьде въ лукахъ сихъ морьскыихъ, и не вЂси ли, яко звЂрь лютъ есть сьде и изЂсть тя?» Агапии же рече къ младому дЂтищу: «Къто ти имя мое повЂда, како ли мя знаеши?» Малыи же дЂтищь рече: «Агапие, а ты не знаеши ли мене? НЂсмь ли азъ близь манастыря твоего сусЂдЂхъ? НЂ ли мнЂ отець оньсиця имя ему рекъ, и братия моя, не вЂси ли, яко учать ся у тебе въ манастыри?» И вьсЂмъ имена повЂда. Агапии же въздЂвъ руцЂ помолися господу глаголя: «Прославлю тя, господи, яко съподобилъ мя еси, господи, обрЂсти человЂка своего племеньника въ пустыняхъ сихъ и въ глубинахъ морьскыихъ». Малыи же дЂтищь рече: «О Агапие, чьто есть путь твои и камо хощи ити?» И рече Агапии: «Не вЂмь мЂста ни нарока, камо хощю ити нъ господь богъ мои путь есть». Малыи же дЂтищь рече: «Агипе, вълЂзи къ намъ въ корабль и прЂвеземъ тя амо же хощеши ити». Агапии же вълЂзъ въ корабль и посЂдЂвъ мало, от пути и от труда въздрЂмавъ ся и усьпе. И егда усъпе, повелЂ малыи дЂтищь великыима мужема възьмъша и прЂнесЂта чрЂсъ море. И положьше и, и се ищезоша от него.
Агапии же убудивъ ся от съна и не видЂ корабля, ни малаго дЂтища. И въставъ, оттудЂ приде въ мЂста нЂкая не вЂдома. И обрЂте ту дрЂва различьна, и цвЂты цвьтуща различьны, и овоща различьны, ихъ же не видЂ никъто же николи же. СЂдяху же пътицЂ на дрЂвЂхъ тЂхъ, различьны имуща одежда. ОвЂмъ бяше яко злато перие, а другыимъ багъряно, инЂмъ чьрьвлено, а другыимъ сине и зелено и различьныими красотами и пьстротами украшены. Другыя же бЂлы яко и снЂгъ. ВьсЂхъ бо гласи бяху различьни и щьбьтаху сЂдяще друга къ друзЂ и пояху пЂсни различьны — ова великъмь гласомъ, а другыя льгъкъмь гласомь, а другыя тънъкъмь гласомь и пЂниемь, ины же дивьнъмь гласомь яко бо каяжьдо по ряду ихъ и по подобию, пЂсни же ихъ и слава велика, ако яже никъто же слышалъ на семь свЂтЂ ни видЂти имать. Агапии же напослушавъ ся и напитавъ ся отъ овоща и испочивъ от труда. Глагола въ себЂ: «Сего ради господь богъ мои привелъ мя есть сЂмо и не имамъ отити отсюду нъ обрящю си мЂсто подобьно, иде же вьртоградъ сътворивъ. И сьде животъ свои съконьчаю». И тако похажая къде сътворить вьртоградъ свои и обрЂте путь подъ овощьмь, и съде при пути глаголя: «Подобаеть человеку приити по пути сему, иже ми съкажеть мЂста си кая суть». И посЂдЂвъ мало и узьрЂ идуща 12 мужа въ бЂлахъ ризах, идуща къ себЂ путьмь. Въздрадова ся радостию великою. И егда приближи ся къ нему, узърЂ Исуса въ сла†велицЂ. Въставъ же Агапии прииде къ нимъ. И егда хотЂ поклонити ся рещи: «ДобрЂ вы буди путь», тъгда великыи мужь рече: «Съдравъ ли еси Агапие и чьто есть путь твои?» И рече Агапии: «Господь богъ мои путь есть». И постоявъ мало Агапии видЂ окрьстъ его лиця человечьска многа и пътиця перьнаты, и пЂсни и славу велику. И падъ поклонихъ ся прЂдъ нимь глаголя: «Господи, къто ты еси и сия 12 мужа? И яко вижю окрьст тебе лиця человечьска мънога и пътицЂ перьнаты и славу велику, и сия мЂста кая суть, въ нихъ же се азъ есмь?» Рече же великыи мужь: «О Агапие, по чьто тако дьрьзаеши и по чьто мене въпрошаеши, нъ обаче съкажю ти вься да ся не блазниши. Азъ есмь глас глаголавый тебЂ въ манастыри: «Изиди въ путь мои», азъ есмь орьлъ иже стЂньмь путь тебЂ казахъ. Азъ есмь дЂтищь малыи, иже тя чрЂсъ море прЂвезохъ. Азъ есмь господь богъ творьць небу и земли и вьсея видимыя и невидимыя. Си же 12 мужа апостоли суть. Си же лица, яже видиши хЂровими и серафими суть. Слава же си юже видиши, въсылаема есть сЂдящуму на семЂмь небеси. МЂста же си раиская суть. Овоща же си пища апостольская и правьдьныихъ душь есть. Пътиця же, яже слышиши, небесьныя суть. Слава же ихъ и пЂния на небеса въсылаеть ся сЂдящуму на прЂстолЂ хЂровимьстЂ». Рече же Агапии: «Господи, помилуй мя и дажь ми да не излЂзу из дрЂвъ сихъ, нъ да сьде съконьчаю животъ свои». Господь же рече къ нему: «НЂсмь тебе сего ради привелъ сЂмо, нъ оже рече семъ оставихомъ вься и въ слЂдъ тебе идохомъ и чьто ны будеть, — то се иди и узьриши славу божьства сего». И рече Агапии: «Господи, камо ми велиши ити?» И рече господь: «Идеши по пути сему, по нему же мы приидохомъ къ тебЂ, и шьдъ приидеши къ стЂнамъ яже суть от землЂ до небесе и обрящеши стьжицю малу и по стьжици тои идеши. И обрящеши окъньце мало въ стЂнЂ. И тълъкнеши въ не, и изидеть къ тобЂ человЂкъ старъ и поимъ тя въведеть въ стЂну, ижи ти съкажеть тамо вься. И егда изидеши и идеши пакы по стьжьцЂ и доидеши лукы морьскыя и узьриши кораблиць малъ въ мори и 12 мужа въ немь и вълЂзеши къ нимъ, и доидете въ градъ въ нь же хотять ити. И егда изидуть гражане противу вамъ изидеть и жена съ ними въ сквьрньнахъ ризахъ простовласа, и оже ти начьнеть велЂти, сътвори еи». Агапии же поклонивъ ся поиде по пути, по нему же настави и господь. И шьдъ много обрЂте стЂну яже стоить до небесе. И пришьдъ обрЂте стьжицю малу и по стьжици шьдъ обрЂте окъньце мало въ стЂнахъ и тълъкнувъ възьва. И изиде къ нему человЂк и рече ему: «Чьто есть путьтвои?» Агапии же рече: «богъ тъ мои путь есть». И рече ему: «человЂк сьде не приходилъ въ плъти сы ни прЂже тебе ни по тебЂ имать прити». Агапии же съказа ему вься елико съказа ему господь.
И како изведенъ бысть изъ манастыря, и како орьлъ казаше ему путь стЂньмь, и како прЂведенъ бысть море, и како явися ему господь 12 те апостолома въ сла†велицЂ. «Отнюду бо посъла мя сЂмо, рекъ: «Иди путьмь симь и обрящеши стЂны высокы и глядаи стьжицЂ мали по неи шьдъ обрящеши окъньце мало въ стЂнЂ. И тълъкнувъ възовеши, и изидеть къ тобЂ человЂкъ старъ, иже въведеть тя тамо и съкажеть ти вься». Рече же старыи человЂк: «Буди воля господня» и имъ за руку Агапия проведе и стЂны. И егда въниде Агапии вънутрь узьрЂ свЂтъ седмерицею свЂтлЂи сего свЂта, очи же его не можаста зьрЂти на свЂтъ. И паде ниць на земли. Поимъ же мя человЂкъ старый приведе къ хрЂсту, его же бяше высота до небесе и бльщаше ся паче солнця. И поклониста ся прЂдъ крьстомъ и сътвориста молитву. И тако начать Агапии тьрьпЂти свЂт. И поимъ приведе и иде же стояше одръ ему и трьпеза украшена отъ камения драгааго. И лежаше хлЂбъ на неи бЂлЂи снЂга, видЂхъ бо у одра кладязь бЂлЂи млЂка и слажьи меду. Виногради же стояху различьно имуще грьздовие: ово багъряно, ово чьрьвлено, ово бЂло, и овоща имуща различьны, и цвЂтьци и житие его же не видЂ никъто же. И рече Агапии старому человЂку: «Господи, съкажи ми, чьто се, еже вижю?» И рече ему: «О брате мои Агапие, по чьто глаголеши ми господи, ельма же жидове не нарекоша бога нашего богомъ, нъ рекоша льстьць есть и злодЂи. И имъше убиша и распяша и на крьстЂ, али ты мнЂ глаголеши господи а хотящу умрЂти и съ пьрьстию съмЂсити ся, нъ обаче съкажю ти да ся не блазниши, азъ есмь Илия ТезвитЂнин, его же възнесоша колесниця огньны и кони огньни, и господь благослови мя подъ небесьмь. И съниде и посади мя сьде, и сьде живу до вътораго пришьствия господня. Си же вься яже видиши душЂ суть человечьскыя, тобЂ явилыся грьздовиемь, поне бо живь человЂкъ не можеть видЂти душь человечьскъ. Сь же кладязь порода ся наричеть и исходить въ дрЂва раиская, сь же свЂтъ ангельскъ есть и правьдьныихъ душь. Сь же одръ и трьпеза творение руку господню. ХлЂбъ же сь небесьныи есть и правьдьныихъ душь, источьникъ же сь ангели пиють и правьдьнии человЂци. ВидЂхъ же и ина брашьна ихъ же сласти нЂсть удобь съказати, нЂсть бо имъ притъча на семь свЂтЂ. Их же бо сласти и вонЂ человечьска уста не могуть исповЂдати. Простая же ядь яко и млЂко и медъ». И възьмъ дасть ми отъ источника въкусити. И просвьтЂ ми ся умъ и поимъ мя приведе къ трьпезЂ. И видЂхъ хлЂбъ цЂлъ и яко не уломлено отъ него ничьто же. Илия же съказа ми вся ихъ же не удобь съказати никому же и приведе мя пакы къ хрЂсту и сътвори молитву съ мною. И изведе мя изъ окъньця и яко поклонихо†и целоваховЂ.
И рече ми Илия: «Миръ ти буде, Агапие, иди въ пути господня и господь богъ съ тобою». Азъ же поклонивъ ся поидохъ по пути, иже ми показа Илия. И тако шьдъ многы дни доидохъ моря и поглядахъ по морю, и видЂхъ корабль идущь къ себЂ и 12 мужа въ немь. И егда приближиша ся къ мнЂ глаголахъ имъ: «ДобрЂ ходите и добръ вы буди путь». ОтвЂщаша и рекоша: «Послушаи тебе богъ твои добрыи старьче». Агапие же рече къ нимъ: «ВъзьмЂте мя съ собою въ корабль и иду съ вами въ градъ въ нь же хощете ити». Они же глаголаша къ нему: «Мы се третиее лЂто заблудихомы въ мори и не вЂмы камо ити. Братия же наша измьроша отъ глада и зимы и отъ бурЂ морьскыя. Мы же доселЂ живи есмъ, яко ни хлЂба ни воды многы дни не насытихомъ ся, и нЂ днесь нЂ ночьсь умремъ. И аще тя приимемъ и ты съ нами умреши и болии намъ грЂхъ приложиши». Агапии же рече къ нимъ: «ВъзьмЂте мя съ собою; господь богъ печеть ся животъмь нашимь». И глаголаша ему корабльници: «Въниди рабе божии къ намъ, аще имаши брашьно съ собою, да понЂ ты спасенъ будеши». Агапий же въниде къ нимъ и видЂв я яко зЂло немощьни суть и милосьрьдовавъ о нихъ сътвори молитву. И посадивъ я въ корабли възя укрухъ иже ему дасть Илия въ раи, и прЂломи и на четыри части, и хвалу въздавъ, въдасть и 12 те мужема. И Ђша и насытиша ся и четвьртую часть юже остави цЂла бысть пакы, яко и не уломлено отъ нея ничьто же. ВидЂвъше же корабльници славу божию, възъпиша къ Агапию глаголюще: «Рабе божии, помилуй ны, не ходи отъ насъ, да о укрусЂ семь плаваемъ глубины морьскыя». Агапий же рече: «Буди воля господня». И рече корабльникомъ: «Поставите вЂтрила». Они же поставиша. Приде же вЂтръ волею божиею и принесе я единомь часЂ въ градъ свои, отъ него же плаваша укияна не вЂдяще камо ити. И егда присташа у града, изидоша гражане противу имъ, въпиюще: «ИзидЂте яко и братия наша придоша, ихъ же се тртиее лЂто гласа не слышахомъ», и шьдъше цЂловаша я. Глаголаху же къ нимъ корабльници: «И еще бысте гласа нашего не слышали, аще не бы богъ посълалъ раба своего къ намъ, его же ради принесени быхомъ въ градъ». Гражане же прославиша бога, и изиде жена изъ града въ сквьрьньнахъ ризахъ простовласа. Пришьдъши поклони ся прЂдъ Агапиемь, плачющи ся и глаголющи: «Рабе божии Агапие, помилуй мя». Агапий же глаголаше: «Чьто деши къ мънЂ?» Жена же въпияше прЂдъ въсЂмь народъмь: «Поиди, рабе божии, яко сынъ мои се пятыи на десяте дьнь мьрътвъ лежить. Господь бо не да ми его погрети глаголя: «Пожиди 3 дьни донъдеже придеть корабль и 12 те мужа въ немь, и калугеръ съ ними имя ему Агапии, того поимъши веди, да въскрЂсить сына твоего». Агапии же помяну, еже рече ему Исусъ. И въставъ иде въ слЂдъ жены водимъ ею, и 12 корабльника, и вьси гражане. Агапии же въниде въ хлЂвину, иде же лежааше сынъ ея на одрЂ и сътворивъ молитву, и възя укрухъ, иже ему дасть Илия, и положи на лици его. И сЂде отрочищи на одрЂ. И имъ и за руку въдасть матери. Мати же его прослави бога, и вьси гражане глаголаху къ Агапию: «Рабе божии, не ходи отъ насъ, и яко мы обычаи имамъ, да иже умреть, погрЂбаемъ. А ты имаши обычаи, да иже умьреть, пакы оживишии». И не дадяху ему изити изъ града. И корабльници не рачаху остати его, глаголюще: «Идемъ и мы съ тобою, любо по суху, любо по водЂ, ямо же хощеши ити». ПрЂбы же ту семь дьнии. Въ едину же нощь приде ангелъ господень къ нему и изведе и изъ града и рече ему: «Иди подълъгъ моря, и донъдеже обрящеши мЂсто уготованое тебЂ, иде же бо сЂдъ, напишеши, яже ти съказа господь видЂния и яже походи мЂста господня». И то рекъ ангелъ господень, отиде отъ него. Агапий же иде подълъгъ моря многы дьни и обрЂте стЂны высокы, и видЂ двьрьця въ стЂнахъ. И вълЂзе въ ня по степеньмъ. И видЂ хлЂвину устроену и одръ въ неи, и постеля на одрЂ. И вълЂзъ въ хлЂвину сътвори молитву и сЂдъ написа чьтение се. И егда съконьча, волею божиею привьрьженъ бысть вЂтръмь къ нему корабль. И излЂзъ Агапий въдасть корабльникомъ чьтение се глаголя: «Несъше въдадите патриарху в ИерусалимЂ, да е въдасть въ вься церкви, да е чьтуть». Блаженыи же Агапий прЂбысть въ хлЂвиници тои 40 лЂтъ и съконча животъ свои о укрусЂ иже ему дасть Илия. И прЂдасть духъ свои славя прЂсвятую троицю, отця и сына и святаго духа ныня и присно и въ вЂкы вЂкомъ. Аминь.
За вид.: Апокрифы. Сказание отца нашего Агапия / Памятники литературы Древней Руси. XII век. — М., 1980. — С.154-165.
Підготовка тексту М.В.Рождєственської.
Текст подається за списком Успенського збірника в кн.: «Успенский сборник XII-XIII вв.», под ред. С.И.Коткова. М., 1971, с.466-473.
