Попередня       Головна       Наступна





ХОЖДЕНИЕ БОГОРОДИЦЫ ПО МУКАМЪ


ХотЂ святая богородица помолитися къ господу богу нашему на горЂ Елионстей: во имя отца и сына и святаго духа, да снидетъ архангелъ Михаилъ, да повЂсть о муцЂ небеснЂй и о земнЂй. Слово возвЂщавши, сниде архангелъ Михаилъ и 400 ангелъ съ нимъ: 100 отъ востока, 100 отъ запада, 100 отъ полудни, 100 отъ полунощь, и цЂлова благодатную Михаилъ со ангелы и рече: «радуйся, отче исполнение; радуйся, сыновне пребывание; радуйся, святаго духа похвало; радуйся Христови... и утвержение; радуйся, Давидово проречение; радуйся, святое поклонение; радуйся, пророчьска проповЂдания; радуйся, превышняя всЂхъ у престола божия».

Рече же благодатная ко архангелу Михаилу: «радуйся ты, архистратиже, первый воинъ, невидимаго отца служителю и свЂтильниче; радуйся, Михаиле, первый воинъства, святаго духа повелЂние; радуйся архистратиже, шестокрылству похвала; радуйся, Михаиле архистратиже, мучителемъ попрание, а престолу владыкы достоино стоиши; радуйся, Михаиле, просвЂщения никакого же угасая; радуйся, архистратиже, первыи воине, хотя вострубити и убудити отъ вЂка умершая; радуйся, Михаиле, первыи всЂмъ небеснымъ силамъ, первыи же и до престола божия вся ангели прославльшаго».

Богородица, хотящи, дабы видЂла, како ся душа мучать, и рече Михаилу архистратигу: «ИсповЂмся, исповЂждь ми, яже суть на земли всяческая». И рече к ней Михаилъ: «Яко же... речеши, благодатная, азъ всяческая тебЂ исповЂмъ». И рече къ нему святая богородица: «Колко есть мукъ, идЂже мучится родъ христьянскии?» И рече къ ней архистратигъ: «Неизрекомыи суть мукы». Рече же къ нему благодатная; «ИсповЂжь ми на небеси и на земли».

Тогда повелЂ архистратигъ явитися ангеломъ отъ полудне, и отверзеся адъ, и видЂ во адЂ мучащаяся, и бяше ту множество мужъ и женъ, и вопль много бяше. И воспроси благодатная архистратига: «Кто си суть?» И рече архистратигъ: «Сии суть, иже не вЂроваша во отца и сына и святаго духа, но забыша бога и вЂроваша юже ны бЂ тварь богъ на работу сотворилъ, того они все боги прозваша: солнце и мЂсяць, землю и воду, и звЂри и гади, то святЂи человЂкы, камени туустроя, Трояна, Хърса, Велеса, Перуна, но быша обратиша бЂсомъ злымъ и вЂроваша, и доселЂ мракомъ злымъ содержими суть, того ради здЂ тако мучатся...».

И видЂ на друзЂмъ мЂстЂ тму велику, и рече святая богородица: «Что сии есть тма сии, и кто суть пребывающи въ ней?» И рече архистратигъ: «Многи душа пребываютъ въ мЂстЂ семъ». И рече святая богородица: «Да отымется тма сии, да быхъ видЂла и ту муку». И отвЂщаша ангели, стрегущии муку: «пореченно есть, да не видять свЂта, дондеже явится сынъ твои благыи, паче 7 солнцъ свЂтлийши», — и прискорбна бысть святая богородица, и ко ангеломъ возведе очи свои, и возрЂвъ на невидимыи престолъ отца своего, и рече: «Во имя отца и сына и святаго духа, да отимется тма сии, и да быхъ видЂла сию муку». И отъятся тма си и 7 небесъ явися, и ту пребываше множство народу, мужъ и женъ, вопль многии бысть и гласъ велик... исхожаше. И видЂвши я пресвятая богородица, и рече къ нимъ, плачющися со слезами: «Что сотворили есте, бЂдницы окаянии, недостойнии, како вы сЂмо приидосте?» И не бысть гласа отъ нихъ, ни отвЂта, и рекоша ангели стрегуще: «Почто не глаголите?» Рекоша мучащиися: «О благодатная, отъ вЂка нЂсмь свЂта видЂли, да не можемъ зрЂти горЂ». И возрЂвши на ня святая богородица, и восплакася велми, и видЂвши ю мучащиися, и рекоша къ ней: «Како ны еси присЂтила, святая богородица, но сынъ твой благодатныи на землю приходитъ, и не воспроси насъ, то ни Авраамъ прадЂдъ, ни МоисЂи пророкъ, ни Иоаннъ креститель, то ни апостолъ Павелъ, возлюбленникъ божии, но ты, пресвятая богородице, заступнице, — ты еси роду христьянскому стЂна, ты молишь бога, како еси насъ присЂтила бЂдныхъ?» Тогда рече святая богородица ко архистратигу Михаилу: «Что есть согрЂшение техъ?» И рече Михаилъ: «Сии суть, иже не вЂроваша во отца и сына и святаго духа, то ни въ тя, святая богородица, не хотяща проповЂдати имени твоего, якоже родися отъ тебе нашъ Исус Христос, плоть приимъ, освяти землю крещениемъ, — да того дЂля въ томъ мЂстЂ мучатся». И паки прослезися святая богородица и рече къ нимъ: «Почто ся соблазнисте, не вЂсте ли вы, якожъ мое имя чте все создание?»

То рекше святая богородица, и паки тма нападе на нихъ. Рече къ ней архистратигъ: «Куды хощешь, благодатная, да изидемъ на полудне, или на полунощь?» И рече благодатная: «Изыдемъ на полудни». Тогда обратишася херувимы и серафимы и 400 ангелъ, изведоша богородицу на полудьнь, идЂжь рЂка огненая жжаше, и ту бяше множство мужъ и женъ, бяху погружении ту, овии до пояса, овии до пазуху, овии до шия, а друзии до верха.

И видЂвше святая богородица, возопи гласомъ великимъ, и воспроси архистратига: «Которыи суть си, иже до пояса во огни погружении?» И рече къ ней архистратигъ: «Се суть, иже отецъ и матерей своихъ клятву прияша, да за то здЂ мучатся, яко прокляти суть». И паки рече богородица: «Иже суть подъ пазусЂ въ огни, котории суть?» И рече къ ней архистратигъ: «Сия суть присныя куми были, карящеся, а другия блудъ творяху, да за то ти здЂ мучатся». И рече пресвятая богородица: «А иже суть до шия во пламени огню, котории суть?» И рече къ ней архангелъ: «Сии суть, иже мяса ядшая человЂча, да за то ти здЂ мучатся тако». Рече святая богородица: «А сии до верха суть ввержении во пламени огню, которыи суть сии?» И рече архистратигь: «Си суть, госпоже, иже крестъ честныи держаще, кленутся лжами, — таковыми силы честнаго креста, его же ангели зряще трепещутъ и со страхомъ поклоняются ему, — того жъ человЂцы держаще, кленутся имъ, не вЂдуще, какова мука ожидаетъ ихъ: того ради тако мучатся».

И увидЂ святая богородица мужа висяща за нози, и червии ядяху его, и воспроси ангела: «Кто сей есть? что ли грЂхъ сотворилъ есть?» И рече къ ней архистратигъ: «Сии есть, иже приклады имаше на злато свое и на сребро, да за то на вЂки мучится».

И видЂ жену, висящу за зубъ, и различныя змия исхожаху изо устъ ея и ядяху ея. И видЂвши пресвятая, и воспроси ангела: «Что есть жена сии, что ли грЂхъ ея?» И отвЂща архистратигъ и рече: «Та есть, госпоже, еже хожаше по ближная своя и по сусЂдомъ, послушающи, что глаголютъ, и слагающи словеса неприязнена, сважающии на сварЂ, да того ради сице мучится». И рече святая богородица: «Добро было человЂку тому, да ся бы не ражалъ». И рече къ ней Михаилъ: «И еще, святая богородица, нЂсть видЂла великихъ мукъ». И рече святая ко архистратигу: «Изыдемъ да походимъ, да видимъ вся муки». И рече Михаилъ: «Куды хощеши, благодатная?» И рече святая: «На полунощь». И обратишася херувими и серафими и 400 ангелъ, изведоша благодатную на полунощъ, и бысть облакъ огненъ распростертъ, посреди его одрове, яко пламеныи огнь, и на нихъ лежаше множство мужъ и женъ.

И видЂвши святая, и воздохнувъ, и рече ко архистратигу: «Кто си суть, что суть согрЂшили?» И рече архистратигъ: «Сии суть, госпоже, иже во святую недЂлю на заутреню не воставають, но лЂнящеся лежатъ, яко мертви, да за то тЂ мучатся». И рече святая богородица: «Да аще кто не можетъ стати, да что сотворили?» И рече Михаилъ: «Послушаи, святая, аще кому загорится храмина на четверо, и обыдеть и огнь и згоритъ не мога востати, таковъ не имать грЂха».

И видЂ на друзЂмъ мЂстЂ столы огнены и на нихъ множство народу мужъ и женъ, згараху на нихъ, и воспроси архистратига святая... «иже поповъ не чтуть, то ни встають имъ и егда приходять оть церкви божии, да того ради мучатся».

И увидЂ святая богородица древо желЂзно, имЂюще отрасли и витвии желЂзныи, и вершие вЂтвия того имЂяше уды желЂзныя, и бяше множство висящии, мужъ и женъ, за языки. И видЂвши святая, прослезися и воспроси Михаила: «Кто си суть, что ли согрЂшении ихъ?» И рече архистратигъ: «И се суть клеветницы и свадницы, иже разлучиша брата отъ брата и мужъ отъ женъ своихъ». И рече Михаилъ: «Послушаи, пресвятая, да ти азъ скажу и о сихъ: аще кто хотяше креститися и покаятися грЂховъ своихъ, то ти разглаголаху и не поучаху спасению, да того ради тако мучатся на вЂкъ».

И видЂ святая на друзЂмъ мЂстЂ висяща мужа за четверо, за вся края ноготь его, исхожаше кровь велми зЂло, и языкъ его вязашеся отъ пламени огненаго, не можаше воздохнути, ни рещи: «Господи, помилуй мя». И видЂвши его пресвятая богородица, и рече: «Господи, помилуй», 3-ю и сотвори молитву. И приде къ ней ангелъ, иже обладаше муками, отрЂшити языкъ мужеви тому. И воспроси святая: «Кто се есть бЂдныи человЂкъ, приемля сию муку?» И рече ангелъ: «Се есть икономъ и церкви служитель, и не творя воля божия, но да продаяше сосуды, имЂние церковное, и глаголаша: иже церкви работаеть, то отъ церкви пиатеться, и того ради мучится здЂ». И рече святая: «Якоже есть сотворилъ, тако приемлетъ». И паки ему ангелъ связа языкъ.

И рече архистратигъ: «Поди, госпоже, да ти покажу, гдЂ мучать ерЂи», и видЂ попы висяща отъ краи ногти, исхождаше огнь отъ тЂмяни ихъ и опаляше я. И видЂвши пресвятая, и рече: «Кто си суть, что ли согрЂшеньи ихъ?» И рече Михаилъ: «Си суть литоргии служители и предстоящи престолу божию и достоинии ся творящи, да егда проскомисаху просвиру, и не храняху, и роняху крупицы на землю, яко звЂзды божия: тогда страшный престолъ колебашеся, и подножие божие трепеташе, да того ради тако мучатся».

И видЂ святая мужа, змии крылатъ имЂющь 3 главы, едина же бЂ глава ко очима мужа, а 2-я ко устомъ его. И рече архистратигъ: «Се есть бЂдныи человЂкъ, яко не можетъ отдохнути отъ змию сего». И рече архистратигъ: «Се есть, госпоже, и святыя книги прочиташе и евангелия, а самъ не послушаше; люди учаше, а самъ не творяше воля божия, блудомъ и всЂмъ безакониемъ».

И рече архистратигъ силы господня: «Поди, пресвятая, да ти покажу, гдЂ ся мучитъ чинъ ангельски и апостольски». И увидЂ святая, гдЂ лежаху на пламени огненемъ и ядяше ихъ червь не усыпая. И рече святая: «Кто си суть?» И отвЂща Михаилъ: «Сии суть, иже образъ ангельски носять и апостольски, на земли величающися, патриархи и епископи, славнии имены, и словяху: благословити отцы святии, но на небеси не звашеся святии, не сотвориша бо, яко бо ангельски и апостольски образъ носиша, да того ради тако мучатся».

И видЂ пресвятая жены висяща за вся ногти и пламени исхожаше изо устъ ихъ и опаляше вся, и змия исхожаше изъ пламени того и прилЂпяху къ нимъ, и вопияху, глаголаше: «Помилуйте насъ, яко мы едины мучимся паче всЂхъ мукъ». И рече святая, прослезившися: «Что есть согрЂшении тЂхъ?» И рече архистратигь: «То суть попадьи, иже поповъ своихъ не почтоша, и по смерти ихъ идоша за мужъ, да того ради мучатся».

И видЂ другия жены во огни лежаша и различныя змия ядяху ихъ, и рече святая: «Что согрЂшение ихъ?» И отвЂща Михаилъ: «То суть монастыря черницы, яже тЂлеса своя продаша на блудъ, да того ради здЂ мучатся».

И рече архистратигъ: «Поди, пресвятая, и покажу ти, гдЂ ся мучитъ множство грЂшникъ». И видЂ святая рЂку огненую, и видЂние рЂки тоя яко кровь текущи, и пояда всю землю, и посредЂ волны тоя множство грЂшникъ. И видЂвши богородица прослезися и рече: «Что есть согрЂшение ихъ?» Рече архистратигъ: «То суть блудницы и любодЂицы, татие, иже послушають отаи, что суть ближнии глаголють, свадницы и клеветницы, иже чужие нивы ужинаху, или урояху, иже брени си остани дожидають, иже ядять труды чюжы, и малжены разлучаютъ, пьяницы, немилостиви князи, епископи и патриарси, и цари, иже не сотвориша воля божия, сребролюбци, иже лихву емлють, беззаконницы». Слышавше то, пречистая богородица прослезися и рече: «О лютЂ грЂшникомъ!» и рече ко архистратигу: «Тяжко согрЂшающимъ, да бы ся не ражали».

И рече къ ней Михаилъ: «Почто ся плачеши, святая? НЂси ли видЂла великъ мукъ!». И рече пресвятая: «Поведи мя, да вижю вся мукы». И рече къ ней Михаилъ: «Куды хощеши, благодатная, да изыдемь на востокъ или на западъ, или в раи, на десно или на лЂво, идЂже суть великия муки?» И рече пресвятая: «Изыдемъ на лЂвую страну». Слово рЂкше пресвятЂй, и обратишася херувими и серафими и 400 ангелъ, изведоша пресвятую отъ востокъ на лЂвую страну, и близъ тоя рЂки бяше тма мрачна: ту лежаше множство мужъ и женъ, и клоктаху яко въ котлЂ и яко морския волны, и ображаются надъ грЂшники, да егда волны возхождаху, и погружаху грЂшники 1000 локоти, не можаху рещи: «Праведный судья, помилуи ны». Ядяше же червии неусыпаяи, и скрежетъ зубомъ. И видЂвше пресвятую ангели стрегуще, и возопиша вси едины усты, глаголюще: «Святъ, святъ, святъ еси, боже святый, и ты, богородице, благословимъ тя и . сына божия, родившагося отъ тебе, яко бо отъ вЂка не видЂхомъ свЂта, и днесь видимъ свЂтъ тебе ради, богородице». И паки возопиша вси единЂмъ гласомъ, глаголюще: «Радуйся, благодатная богородице; радуйся, просвЂщение свЂта вЂчнаго; радуйся, святыи архистратиже Михаиле, моляся владыцЂ за весь миръ, мы убо видимъ грЂшныя мучащияся, и зЂло скорбимъ».

ВидЂвши богородица ангелы скорбныи и уныли грЂшникъ ради, и возплакася пресвятая, и возопиша вси единымъ гласомъ, глаголюще: «ДобрЂ есте пришли во тму сию, да ны видить како ны есть мука; помолись, пресвятая, со архистратигом». И слыша плачъ и гласъ грЂшныхъ, воздвигоша плачъ свои, вопиюще и глаголюще: «Господи, помилуй ны», да яко опростиша молитву, уставися буря рЂчная и волны огненыя, и явишася грЂшницы, яко зерна горюшична. И видЂвши святая, прослезися и рече: «Что есть рЂка си и волны ея?» И рече къ ней архистратигъ: «Сии рЂка вся смолена, а волны ея вся огнены, а иже ся мучатъ, то суть жидове, иже мучиша господа нашего Исуса Христа, сына божия, и вси языцы, иже крестишася во имя отца и сына и святаго духа, иже крестьяне суще, ти вЂруютъ въ дЂмоны и отвергошася бога и святаго крещения, и еже блудъ створиша по святомъ крещении, и съ кумы... своими и съ матерьми своими и со щерьми своими, и отравницы, иже ядями уморяютъ человЂки, и оружьемъ убиваютъ человЂки, и давятъ дЂти своя, и того ради мучатся противу дЂломъ своимъ». И рече святая: «По дЂломъ ихъ буди тако». И паки наиде на ня бурна рЂка и огнена волны, и тма покры я. И рече Михаилъ к богородицы: «Аще ся кто затворитъ во тмЂ сей, нЂсть памяти о немъ отъ бога». И рече пресвятая: «О лютЂ грЂшникомъ, яко неусыпаемыи есть пламы огня сего!»

И рече къ ней архистратигъ: «Поди, пресвятая, да ти покажу озеро огнено, да видиши, гдЂ мучатся родъ христьянскии». И видЂ, и услыша плачъ и вопль отъ нихъ, а онЂхъ не бЂ видЂти, и рече: «Котории си суть, что ли согрЂшение ихъ есть?»

И рече къ ней Михаилъ: «Сии суть, иже крестишася и крестъ словомъ нарицаху, а дияволя дЂла творяще: и погубиша время покаянию, и того ради мучатся тако здЂ».

И рече просвятая ко архистратигу: «При единои молит†молютися, да вниду и азъ, да ся мучу со крестьяны, и понеже нарекошася чада сына моего». И рече архистратигь: «Почиваи въ раи». И рече пресвятая: «Молю ти ся, и подвигни воинства 7-ми небесъ и вся воинства ангели, да ся помолимъ за грЂшники, не бы ли насъ услышалъ господь богъ и помиловалъ ихъ».

«Живъ господь богъ, имя его велико, 7-жды на день и 7 на нощь, егда хвалу приносимъ владыцЂ и за грЂшники, госпоже, господеви поклоняемся, да ни худЂ насъ послушаетъ владыко». И рече пресвятая богородица: «Молим ти ся, повели ангельскому воинству, и вознесете мя на высоту небесную и поставите мя предъ невидимымъ отцемъ».

И повелЂ архистратигъ, и предсташа херувими и серафими, и вознесоша благодатную на высоту небесную, и поставиша ю предъ невидимымъ отцемъ у престола, и воздЂ руцЂ свои ко благодатному сыну своему, и рече: «Помилуи, владыко, грЂшныя, яко видЂхъ я, и не могу терпЂти, да ся мучю и азъ со крестьяны». И прииде гласъ къ ней, глаголя: «Како хощу тыя помиловати? А вижу гвоздия во дланехъ сыну моему, да не имамъ я како тЂ помиловати». И рече: «Владыко, не молюся за невЂрныя жиды, но за крестьяны молю твое милосердие». И прииде гласъ, глаголя: «Азъ вижу, яко братия моея не помиловаша, да нЂсть ми како тЂхъ помиловати». И рече паки пресвятая: «Помилуй, владыко, грЂшныя; помилуй, господи, тварь руку своею, яко по всей земли твое имя нарицаютъ и въ мукахъ и на всякомъ мЂстЂ, и по всеи земли глаголюще: пресвятая госпожа богородице, помогаи намъ, и егда ражается человЂкъ, и глаголетъ: «Святая богородице, помози ми». Тогда рече къ ней господь: «Послушай, пресвятая богородице, владычице, — нЂсть того человЂка, иже не молить имени твоего; азъ же не оставляю тЂхъ то ни на небеси, ни на земли».

И рече пресвятая богородица: «ГдЂ есть МоисЂи пророкъ, гдЂ ли суть вси пророцы, и вы, отци, иже грЂха не сотвористе николиже; гдЂ ли Павелъ возлюбленикъ божий; гдЂ есть недЂля, похвала христьянская; гдЂ ли есть сила честнаго креста, иже Адама и Евгу отъ клятвы избави?» Тогда Михаилъ архистратигъ и вси ангели рекоша: «Помилуй, владыко, грЂшныя». Тогда МоисЂи возопи, глаголя: «Помилуй, владыко, яко азъ законъ твой дахъ имъ». Тогда Иоаннъ возопи, глаголя: «Помилуй, владыко, азъ Евангелие твое проповЂдахъ имъ». Тогда Павелъ возопи, глаголя: «Помилуй, господи владыко, яко азъ епистолья твоя принесохъ церквамъ». И рече господь бог: «Послушайте вси вы: аще по Евангелию моему или по закону моему, и аще есть по евангельскому проповЂданию, еже проповЂдаше Иоаннъ, епистольямъ, яже принесъ Павелъ, то тако судъ приимутъ, — имЂеши чсо ради рещи ангели, толико «Помилуй господи — праведны еси». И рече пресвятая богородица: «Помилуй, владыко, грЂшныя, яко ти Евангелие прияша и законъ твой сохраниша». Тогда рече къ ней господь: «Послушай, пресвятая, аще кто тЂхъ сотвори зло, но не каются ни отъ работы, да добрЂ глаголеши, яко закону твоему поучишася, и паки сотвориша злое, егда не отдаша злаго, азъ что да реку, яко есть речено, подасть тЂмъ противу злобЂ ихъ». Тогда вси святии, слышавше владыку глаголюще, не смЂша что отвЂщати.

И видЂвше пресвятая, яко вси не успЂша ничто же и господь святыхъ не послуша, но удаляетъ милость свою отъ грЂшникъ, и рече пресвятая: «ГдЂ есть архистратигъ Гаврилъ, иже возвЂсти мнЂ, — радуися, якоже преже всЂхъ вЂкъ внемляше отца, — и нынЂ на грЂшники не призираеть; гдЂ есть велики, иже градъ носить на версЂ своемъ и на единой земли, за неприязнена дЂла человЂческая искаляна бысть земля, — и посла господь богъ сына своегр и утверди плодъ земьныи; гдЂ суть служители престолу, гдЂ есть Иоаннъ Богословець? почто не явистеся съ нами на мольбу владыцЂ за крестьяныя грЂшники? Не видите ли мене плачющуся за грЂшныя? ПриидЂте вси ангели и сущии на небесЂхъ; приидЂте вси праведнии, яже господь оправди, и вамо дано есть молитися за грЂшныя. Прииди ты, Михаиле, — ты еси первый безплотнымъ и до престола божия, — повели и всЂмъ, да припадемъ предъ невидимымъ отцемъ, и не подвижемъ себе, дондеже послушаетъ насъ богъ и помилуетъ грЂшныя». Тогда падеся Михаилъ ницъ лицемъ своимъ предъ престоломъ, и вся лики небесныя, и вси чини безплотныхъ. И видЂ владыко молбу святыхъ, умилосердися сына ради своего единороднаго, и рече: «Сниди, сынъ мой возлюбленный, виждь молбу святыхъ, и яви лице свое на грЂшники».

И сшедъ господь отъ невидимаго престола, и увидЂша и во тмЂ сущии, и возопиша вси единымъ гласомъ, глаголюще: «Помилуй ны, сыне божий; помилуй ны, цьсарю всЂхъ вЂкъ». И рече владыка: «Слышите вси, рай насадихъ и человЂка создахъ по образу своему и поставихъ и господина раеви, и животъ вЂчный дахъ имъ, они же ослуху створиша и въ своемъ хотЂнии согрЂшиша, и предашась смерти; азъ же не быхъ хотЂлъ обозрити дЂла руку своею мучима отъ диявола, снидохъ на землю и воплотихся во дЂвицу, и вознесохся на крестъ, да свобожу ся отъ работы и отъ первыя клятвы; воды испросихъ, и даша ми желчи со оцетомъ смЂшено; руцЂ мои создаста человЂка, и во гробъ вложиша мя; да и во адъ снидохъ и врага своего попрахъ, избраны своя воскресихъ, Иорданъ благословихъ, да вы прощу отъ первыя клятвы, — и вы не брегосте покаятися грЂховъ своихъ, но крестьяне ся творяще словомъ точию, а заповЂдей моихъ не соблюдосте; да того ради обрЂтостеся во огни негасимомъ, да не имамъ васъ помиловати. НынЂ же за милосердие отца моего, яко посла мя къ вамъ, и за молитвы матери моея, яко плакася много за васъ, и за Михаила архистратига завЂту и за множство мученикъ моихъ, яко многа трудишася за васъ, и се даю вамъ мучащимся день и нощь отъ Великаго четверга до святыя пянтикостия, имЂте вы покои и прославите отца и сына и святаго духа». И отвЂщаша вси: «слава милосердию твоему».

Слава отцу и сыну и святому духу, и нынЂ и присно и во вЂки вЂкомъ. Аминь.








За вид.: Апокрифы. Хождение Богородицы по мукам / Памятники литературы Древней Руси. XII век. — М., 1980. — С.166-184.

Підготовка тексту М.В.Рождєственської.

Подається за текстом одного з пізних списків за виданням А.Н.Пипіна в «Памятниках старинной русской литературы», вип. 3. СПб., 1862, с.118-124. Текст звірено з найдавнішим списком Ходіння XII ст. з зібрання ГПБ, ф. 304, Троїце-Серг. №12.








Попередня       Головна       Наступна



Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.