Андрій Скульський
ВЂршЂ
з трагодіи «Христос пасхон» Григоріа Богослова
Першій в святый Великій Пяток при положен[н]ю
плащеницЂ до гробу.
Другіє — на пресвЂтлый день воскресеніа Господа
нашего Ісуса Христа
Герб презацный Іо Мирона Брънавского,
ПресвЂтлого господаря молдавского
Що за знаки и през що на собЂ их ту маєт,
Не без того, же кождый добре о них знаєт?
На котрій ся кождый цный хоти позирати
И герб тот знацный оу себЂ ушановати.
Смерть, котруй ся збавитель наш рачил отдати
И для нас, вЂрных, дати ся укрижовати,
Учтивостю ся нашею вЂрных находит
И по жалю муки Христовы радость родит.
Крест честный гербом ся всЂх вЂрных найдуєт,
Котрій прикрый єсть дьаблум и их збыт турбуєт,
На котром Христос кровь свою рачил пролляти
И презень непріятелеви нас отняти.
Тот же, котрій ся найвышшим гербом найдуєт
И христіанство наше ним ся тітулуєт
О кресте честный, дай же нам дочекати
Христа распятаго з гробу оглядати.
Христолюбивому и благовЂрному господару ясне вєлможному господину Іо Мирон Могилє Брънавскому, воєводє земль Молдавскых, пану своєму милостивому, при унижоных службах типокграф многолЂтствія вЂншуєт.
От многих слышачи о преважности вашоє господарскоє велможности ку хвалЂ Божой, так фунъдованьєм церквей и монастырей святых, як теж и по многих мЂсцах, о гойном ялмужны роздаваню и розсыланю, великую в том єи вельможность христолюбивую імя рек, Домну, матку свою, споспЂшницу маючи, яко некгды равноапостольный цар Константін Єлену, с котрими и ваше господарскоє христолюбіє, ликостояніє по щасливом и многолЂтном ту панованю, в небесных ликостояніях да сподобится. О котром хентливом подаваню и фундованю мЂсц святых, и способеню в том, як руцЂ з рукою, христолюбивои Домны матки, з вашею господарскою вельможностю, в устах людзких всюды ся носит и славит, а особливе в презацном мЂсте кролевства полского Лвове, як палцем, всЂм показуєт, пречестного храма Успеніа Божіа Матере, церкве прекраснои и велце удатнои ктиторство велможности вашеи господарскои, котрая церков всему снать мЂсту и махинам внем пьекным и значным оздобою єсть.
Прето ж теды, яко до так зацне вельможного пана и найпреднЂйшого помЂненои церкве ктитора найзначнЂйшого, взял-єм предся за реч выборне слушную з залеценьєм типокграфіи при той помененой церкви святой до вельможности вашоє господарскоє удатися, а хоца ж и напрудце, леч же не так з голыми руками ремесла моєго друкарского, анЂ без якого ж колвек овоцу и знаку тои то типокграфіи, иле при церкви ктиторства велможности вашоє господарскоє с подлою персоною своєю пред велможною и высоце поважною особою вашеи господарскои милости смЂти указатися, але якій ж колвек квЂточок овоцу єи оздобне оказалого и вдячне вонного ускубши, яко ктиторови найпреднЂйшему и так высоце зацному и поважному, снать не самоє тылко помЂненноє церкве ктиторства вельможности вашеи, але и типокграфіи, котрая при той же церкви єсть, на пожиток всеи церкве, яко ктиторови, ово книжечку тую, рифмами вдячными в упоминку, з кгрунту помЂненои церкве, з уклоном найнижшим, приношу.
Здалося албовЂм мЂлкому баченню моєму персонЂ найподлЂйшой, иле в тыє пречестныє дны, ту теж пресвЂтлыє и превесолыє овде, взглядом в великій пяток погребу найповажнЂйшого пана збавителя нашего Ісуса Христа, овде зась, взглядом пресвЂтлого тридневного воскресенія Христова, яко свЂтно триумъфовного дня и яко з отриманя звитязства Христова над непріятелем душ потЂхи нам радостнои. Котріє то рифмы не з мого мЂлкого довтЂпу, але с писма святого, а меновЂте с трагодіи «Хрістос пасхон» Григоріа Богослова суть взяты и под именем велможности вашоє господарскоє, яко ктитора предреченнои церкви, Богу ку чти и хвалЂ, пасце, за нас офЂрованой, Христа пана збавителя нашего, овде муку єго святую виносячи, овде зась с пресвЂтлого воскресеніа триумфуючи, на свЂт сут выданы. Котрую книжечку, яко снопок першій жнива, на котроє ся заносит, и, яко квЂток овоцу, с котрим предреченная типокграфіа церкви показатися маєт, вельможности вашеи, яко ктиторови своєму, приносит.
Рач же вельможность ваша господарская, хутю сердечною и оком ласкавым паньским тот убогій и малозначный с типокграфіи, при церкви зацного ктиторства вельможности вашеи упоминок и квЂток заквитнулои типокграфіи славного ктиторства велможности вашеи от мене, служебника своєго, вдячне приняти, не взглядом так малого упоминку подлои працЂ моєи, але на урожоную людзкость, и анЂмуш панскій респектуючи болш охотною услугою моєю, велможность ваша, снать погоржати не будеш рачил, але овшем, вдячне принявши, яко пан рачити росказати слузЂ своєму, в операх значных писма святого церквам Божіим, собЂ и на несмертелную памятку свою, в типокграфіи предреченнои церкве и на превелможноє имя своє господаръскоє, яко ктитору, в посполитый всему православію пожиток през розмноженьє книг служити, в котрых на початку книгах имя ваше панскоє господаръскоє, по церквах Божих и в домах христіанъских абы ся находило и на несмертельную памятку Іо Брънавъского, воєводы молдавского, высоце зацноє и поважноє имя абы не сходило до котрои услуги в выдаваню таковых книг хентного мя завше велможность ваша господаръская, яко поволного и найнижъшого слугу своєго, знати рачит. При котром до послуги велможности вашой себе офЂрованю, радости воскресенія Христова вЂншую.
Вашой господарской велможности нанижшій слуга
Андрей Скульскій.
Трагодіа «Христос пасхон», в Пяток Великій, по
вложеню плащеницЂ в гроб
Акт тот презацный, «Хрістос пасхон» названый,
В церкви нам, вЂрным, з уживаня поданый.
Повинность наша, абы го отправити
И в жалю потЂхи себе набавити.
Як бовЂм не жаль нас великій обходит,
Кды ся пан, збавитель наш, в гробЂ находит.
Бы злочинца, добродЂй укрижованый
И от безбожых жидов заморъдованый.
Котрый небо и землю въ горсти маєт,
Тот ся за нас в гробЂ малом погрЂбаєт.
Чого ся и моцарства аггел лякают,
И херувими с страху твари скривают,
З боязню, на гроб ся тот позираючи
И спра†ся туй панскуй здумЂваючи.
Поготове и нам годится бояти
И при так зацном актЂ с страхом стояти.
И мы теды ту, с хутю в церкви ся скупивъши
И гроб тот с хоры аггелов окруживши,
Повинности своюй досыть учинЂмо
А през тот час хентне вытрвати хотЂмо.
Димигоріа трену утерпЂня муки Христовы
Обач небо, що ся стало, и злякнися,
И с страху, с свЂтлы своими все затмися.
И ты, ввесь кругу земный, стань ся бояти
И в моци ти з кгрунту не сміти стояти.
Горы нех држат, и скалы ся розпадают,
И пред трясеньєм, гробы ся отвирают.
И тЂла их, з гробов, преч нехай повстанут
И пред царем небесным хором свым станут.
Спул и валы морскіє нех ся лякают
И з брегов своих широко выливают.
И все створеньє страхом нех будет знято
И на див окрутне великій завзято,
Же пан, котрій все створеньє в горсти маєт,
И животом, и смертю дужо владаєт,
И тот, неогорненый, дал ся поймати
И, бы злочиньца, назад руки звязати.
О, як-єсь, небо, и ты, солнце, стерпЂло
И до перунова ся луку не мЂло
Звысока на таких зухвалцов змЂряти
И стрЂлами просто в сердца их трафляти?
И ты, о земле, як-єсь могла зносити
И так безбожным на собЂ допустити,
Преч, аж до отхланЂ, ся не роступивши,
И так, всЂх ораз, собою не закривши?
И валы морскіє, як ся не скупили,
И так их порвавши, спул не затопили?
О створеньє, певне бы-сь им не стерпЂло,
Снадне бы-сь в тоє потрафити умЂло
Вшеляко ся за творцем своим земстити
И богобуйцам задосыть учинити,
Кгды бы не збытняя доброть закрочила
И справедливой земстЂ не допустила
Пана, котрій то оным всЂм перебачил
И до отца за них молити ся рачил,
Абы ся ото над ними не земстити
И за невЂдомость то им положити,
Що им у отца своєго пан был справил
И долгого покою оных набавил,
Поки аж ся бунтовници з свЂта звели
А доброхотне згубу на ся привели,
Же цесар рымскій мусЂл их навЂдити
И вколо мЂста войском ся положити.
О чом ту історіи не вспоминаю,
Кгды ж з жалю буль срокгій в сердцу моєм маю,
Же свого доброго не хотЂли знати,
Але преч от себе єго отпыхати,
ДобродЂя злочинцем называючи
И фалшЂ на него, ах мнЂ, сшиваючи,
Все смЂльцове на сторону отложивши
И на то ся праве дужо усадивши
Же пана, котрого ся моцарства боят,
Херувімы с серафімы с страхом стоят,
Творца своєго дивне ся лякаючи
И твари свои пред ним закриваючи,
Гимны свои, з боязню пану спЂвают
И трисъакгіон с страхом всЂ выкрикают.
И такого монарху пред себе ставят,
И Кайфаш з Аннашем до него реч правят,
Щобы зач был, смЂле ся пана пытают
И поличок му, ах мнЂ ах, вытинают.
О земле, якож-єсь их не загорнула
И знагла ораз живо всЂх не полкнула?
Що ж теды за скарги на пана вносили
И на горло пред судом дужо просили,
На збавителя фалш срокгій сшиваючи
И потвар тую на него вкладаючи,
Яко бы цесарови не голдовати,
АнЂ панству рымскому даній давати,
А до того, же церков мЂл зепсовати,
А за три дни знову єи збудовати.
И з мЂстца на мЂстце пана отводили,
О мордырцов, як хотЂли, так чинили,
И в плащ го посмЂвиска убираючи,
И третиною по голо†взбираючи.
Там же и в корону с терня убирали,
И на пренайчистшую твар му плювали,
Спул, як пред кролем, пред ним уклякаючи
И в смЂх кролем го юдским называючи.
По том, кгды юж ся праве науругали,
И посмЂвиску с пана досыт там дали,
Теды роты жолнЂрства зась ся скупивши
И гурмом вкруг збавителя оступивши,
Аж до Голгофы го с крестом провадили
И там болшую еще тлущу звабили,
Где до креста тЂло святоє прибивши
И там уруганю дость учинивши,
Отцом и жолчу го, ах мнЂ, напавали,
И, же не злЂз с креста, збыть ся уругали,
Ркомо на смЂх кролем го называючи,
Алеть и правду под тым признаваючи.
На конец и бок святый влочню пробили
И так справу тую, нецноты, скончили,
Пречистую матку-панну засмутивши,
И материнским ю жалем обложивши,
Преч ся всЂ мордырцове поросходили,
Ркомо теж то, на триумфЂ яком были.
О небо, як-єсь з высокости стерпЂло
И до земсты ся над такими не мЂло?
И ты, о земле, як-єсь не огорнула
И розстемпне таких в себе не полкнула?
Але о, прійдет ти пан повторе, прійдет,
И з брменьєм трубы страшнои з неба зыйдет,
И тогды страшным судом таких судити
И окрутными муками им платити.
Котрыє муки таковых ожидают,
И діаблы з отхланій на них выглядают.
А ты, о пренайчистшая дЂво-мати:
Не хоти ж так срокгим жалем ся зривати
По наймилшом сыну, котрій ся ти ставит,
И, з мертвых вставши, радости тя набавит.
Лямент матки Збавителевы над Сыном єи
Ту зо мною, маткою, у гробу трвайте
И в трену смутном лзы гойне выливайте,
Сына моєго в гробЂ том жегнаючи
И з жалю слова тыи простираючи.
Пошол-єсь, о сыну, мене зоставивши,
И смутную матку, жалю набавивши,
Кгды-м ся мордырцов окрутных не бояла
И з умилованным учнєм спул стояла
Под крестом, на котором-єсь там был прибитый,
Замордован, ах мнЂ, и на смерть забитый,
Тогды ми єднак, утЂха в сердцу трвала,
Кгды-м ся єще на живого позирала.
А нынЂ и тоє свЂтло з очій зышло
И аж до отхланій пекла темных зашло.
О солнце, юж ся ми болш не улыскуєш,
АнЂ ся свЂтло в очах моих найдуєш!
Рачил-єсь до адовых кгмахов съступити
И там в темности собою розсвЂтити.
С чим хочеш позвЂрховне ся затаити
И през то непріятеля в горсти мЂти.
На карк му, о сыну, дужо наступаєш
И горкостю ся єму в горлЂ ставаєш.
На падол-єсь подземный, о сыну, пошол
И през брамы пекла до отхлани-сь вошол,
Хотячи там всЂх собою освЂтити
И Адама, всЂх отца, освободити,
Котрого зезволил-єсь взяти особу,
Абы през тоє зась му дати оздобу,
Котрои ся сам през грЂх в раи позбавил
А ошпеценя самохотне набавил.
Ах, мнЂ, упадок продка и вспоминати
И до жалю жалю собЂ придавати!
До сына мого знову ся обертаю
И в трену том слова мои простираю.
Сступил-єсь преч до пекла темного мроку,
Где там нЂкгды не бывала свЂтлость в оку.
Зезволил-єсь на тЂлЂ смерти пожити,
Абы през то звитязтва свого зажити
Над непріятелем, котрій нас позбавил
И вмЂсто живота смерти всЂх набавил.
Алеть кгдыж-єм ся я в жалю том зостала,
Ах мнЂ, матце, смутку ся дочекала!
А все то доброть отцевская справуєт,
Котрій ся гойным в милосердю найдуєт.
О тяжкій жалю, котрій мя внутр турбуєт,
Же тя, о сыну мой, гроб тот подыймуєт,
На жадном мЂсцу нЂкгды незмЂщенного,
И жадным створеньєм неогорненного.
Мудрый-сь ты мудрый, и так мудре-сь смерть поднял,
Як бы-сь през ню с тиранства смерти всЂх отнял.
Котрыє тылко в тебе вЂрити будут,
Певне, ся тым пред смертю вЂчною збудут,
Котрою то Адам мусЂл умирати,
А по нем всЂ до пекла ся доставати.
Смерть єго на собЂ мудре-сь тЂлом поднял,
Абы-сь през ню, вЂрных своих смерти отнял.
Хоть же сь и в гробЂ рачил ся положити,
Але на то, рачил-єсь то учинити,
Абы-сь през встаньє з гробу тоє всЂм справил,
Радости вЂрных своих гойне набавил,
Абы смерть, котрая з вЂку пановала,
ТобЂ, владару смерти, не подолала,
Котруй то, як юж и єст, прикростю станеш,
А вЂрным своим на радость з гробу встанеш.
В повиновацтво тЂло з боством злучивши
И превазЂ своєй досыть учинивъши
Княжати темности на карк наступуєш
И вЂрных своих з горсти му одыймуєш.
О царю, царю, бозства не отступивъши
И, мертвый тЂлом, в гробЂ ся положивши,
Бог, под плащем тЂла, до пекла съступуєш
И княжати темности, моц одьшмуєш,
Ворота брам пекельных ораз скрушивши
И на моц Велзевулову наступивши.
Добре ть добре, же-сь тую землю зоставил
И през то прибытков вЂчных нас набавил,
На котрую-сь был от отца з неба зышол
И в дом невдячных ізраильчиков пришол,
Згинулых овец хотячи позыскати
И им у себе, як пастыр мЂсце дати.
А тоє не просто-сь схотЂл учинити,
Але впрод бозство с чловеченством злучити,
И през невымовноє-сь презреньє справил:
Же-сь всЂх збавеня непонятне набавил.
Як бовЂм отец без сказы завше родит
И в тобЂ ся предвЂчне завше находит.
И я, о сыну, чисто-м тя породила
И кресу панянства нич не уступила.
Котрый-сь чловеченство з духа рачил взяти
А на особу бозства з мене приняти.
Под котрою особою много-сь справил
И дивных добродЂйств невдячных набавил.
Але ть хвалы тобЂ не хотЂли дати,
АнЂ тя збавителем своим признати,
И розмайте нецноты удавали,
А по том ся и забити постарали,
ДобродЂя, о котром не час правити,
Яких-єсь добродЂйств рачил набавити,
До невдячных, в дом их, з неба завитавши
И оплавитую ласку указавъши.
Котрой ласце, кгды ж ся невдячными стали
И, бы злочинцу, добродЂя поймали,
Слушне теды, вырок маєт их поткати
И злоє злым ся им, от тебе отдати,
Же, як буря, Тітус, цесар рымскій прійдет,
Ієрусалим вколо з войском обыйдет,
Зевшонд аръматою моцне обляжет
И кожному против него сердце звяжет,
Же не тылко не змогут ся боронити,
Але и сами ся будут полонити,
ВмЂстЂ єдин другого забиваючи
И кровь свою штыхами проливаючи.
ЗвЂр теж срокгій знагла будет находити
И в самых шкоду скрутную чинити.
Слушне, абы мЂсто на собЂ дознало
Срокгости, якои нЂкгды не слыхало,
Же и матки, з оренжем ся приготуют
И дЂток своих наймилшых замордуют,
На кухню, ах мнЂ, собЂ их готуючи
И на болесный покарм приправуючи.
Ах нестуте ж, нестуте, нащо то прійдут
И нащо слова сына моєго выйдут?!
Ах мнЂ, широце о том и вспоминати
И до жалю жалю собЂ придавати.
Досыть мя росстаньє ся з сыном фрасуєт
А праве з кгрунту сердце во мнЂ турбуєт.
Прето ж, далшіє речи и помияю
И для широкости их, не вспоминаю,
О зрадци-учню нич не вспоминаючи,
Овшем того бридкого преч мияючи.
Котрій по шнурЂ преч до пекла ся спустил
И княжа темности мЂсца му допустил,
З ним там в отхланєх, завше пребывати
И на декрет страшный спул очекивати.
ДЂточки при персєх того превышали
И «осанна» криком хвалу му давали.
О чом минувши, до гробу ся вертаю
И жалосныи лзы мои выливаю.
О в яком же ся, ах мнЂ, смутку найдую
И як ся материнским болем турбую,
Як матка, жалем барзо будучи знята
И на лямент срокгій по сыну завзята!
Як бовЂм матка, маток всЂх перехожу,
Так и над всЂ матки, в болю ся нахожу,
По сыну, якого не было слыхати,
Жебы ся кгды, без отца, мЂл показати,
Як теж и матце, жебы в цале зостала,
И, над звычай, панною ся показала.
Леч же в надЂи моєй неуставаю,
Же сына моєго з мертвых оглядаю,
Але нЂжли мя тот смуток преч отидет
А потЂха змертвыхвстаня ко мнЂ прійдет.
Чиню ть, о Іосифе, подякованьє,
Учню таємный, за твоє в том стараньє,
Же-сь смЂл, цный мужу, до Пілата вступити
И о учителево тЂло просити.
И ты, з учнев котрій-сь опекуном зостал
И тітулу теоліокгом быти достал,
Учителя своєго не отступуючи
И под крестом ся зо мною найдуючи,
Поки аж сын мой рачил духа отдати
А мене, цный, в опеку тобЂ подати.
Спул от гробу также абы-сь не отступал
И оком твоим чулым ту не засыпал.
Трвай же ту, о умилованый учню, трвай
И на воскресеніє спул очекивай,
Поки аж учитель твой знову к нам прійдет
И голос сына радостный, нас обыйдет.
Іоанн Теолог
Я по учители будучи жалосный
И буль в сердцу своєм маючи незносный,
Хочу ту при тобЂ, смутной матце, трвати,
И дотонд ми от тебе не отступати,
Поки аж тяжкій тот смуток преч отидет
И радость воскресенія до нас прійдет.
Тылько ты, панно, не рач ся фрасовати
И материнским ся жалем урывати.
Син албовЂм твуй всЂм нам з мертвых ся ставит
И радости с тобою всЂх нас набавит.
На котрую радость буду ту чекати
И тя, о матко-панно, не отступати.
Іосиф
О найслодъшій Ісусе, всЂх збавителю
И през найдрожшую кровь откупителю,
ВсЂх, тых, котрыє в тобЂ надЂю мают
И жадному вонтпеню не подпадают,
ВЂрячи, же-сь ты єст Бог з Бога правдивый
И з матки-панны чловек невонтпливый.
Смерть твоя ачъколвек живот нам справила,
Вшак же и жалю нас смутных набавила,
Же-сь мы ся юж, ах нестуте ж, пожегнали
И з учителем ся смутныє ростали.
О царю, царю, як бы иам ту стогнати
И жалобные лзы нинЂ выливати!
О Боже, Боже, як бы-м тя мЂл назвати
И надгробную ти пЂсньку заспЂвати!
Лежиш бовЂм, замордован и забитый
И в гробЂ новом в простирадлЂ завитый.
О голово пана, терньєм збоденая,
О твари бозская, крвю вся сплыненая!
О плечій, у столпа так сурове збитых,
О рук и ног, ах, мнЂ, до креста прибитых!
О боку збавенный, влочнею пропхненый
И разне так за збавеньє всЂх скрвавленый!
О всего тЂла святого так збитого
И, бы злочинцу, до креста прибитого,
О котроє-м смЂл до Пілата вступити
И Понтійчика Игемона просити,
В тыє слова з жалем до него мовячи
И о збавенноє ти тЂло просячи:
«Дай ми, о Пілате, преслЂдованого
И от безбожных так замордованого,
Дай ми, котрого нЂч а нЂч не змЂщаєт,
Все, бовЂм, створеньє в горсти своєй маєт».
А нинЂ пан покоры рачил зажити
И в гробЂ новом дати ся положити.
Чого ся и аггелов чины лякают
И «Трисакгіон» тылко с страхом спЂвают.
А нинЂ гроб мой тот небом ся найдуєт,
Кгды ж тя неогорненого подыймуєт.
Выношу утерпЂньє твоє, выношу,
И жаль срокгій в сердцу моєм отношу,
По учителю ми ся, ах мнЂ, зоставъши
И такового ся жалю дочекавши.
Жегнаю ж тя юж, о найслодшій, жегнаю
И надгробные лзы мои выливаю!
Не дай же нам в смутку том по тобЂ трвати
И недолго лзами ся нам обливати.
Никодим
О найслодшій мой Ісусе, учителю,
ВсЂх вЂруючих в тя, пане збавителю!
И я, Никодим, котрій ночу-м приходил
И на розъмо†с тобою ся находил,
Учень ачъколвек для жидов потаємный,
Леч же до тебе, учителю, приємный,
И я з жалю сердцем ся ввесь урываю
И спул з Іосифом в гробЂ тя том жегнаю,
Спул оба в тяжком жалю ся находячи
И с страхом около гробу уходячи.
Кгды ж невидоме аггели ся зебрали
И херувими полки своими стали,
С серафіми страшными ся скупивши
И гроб святый зевшунд чинно обступивши.
И маєстатове вколо гробу стоят,
И шестокрылніи, в порядъку ся боят.
И инших всЂх таксіархов страх здыймуєт,
Же цар моцарств и живот, смерть подыймуєт.
О чом широкой мовы занехавъши
И трену тылько з жалем себе отдавши,
З Ариматфеєм лзы мои выливаю
И погреб твой, Ісусе, оплакиваю,
ОлЂйки коштовныє в руках маючи
И ту на простирадло выливаючи
Алоє спул и змирну ти офЂрую
И в жалю ся тяжком по тобЂ найдую.
Дай же нам з Ариматфеєм дочекати,
З гробу єго живо тя оглядати.
Симон Киринейчик
И я, котрого мя, идучи, спотъкали
И тяжар збавенный нести ми задали,
Симону, Киринейчиком названому,
На тую послугу снать от Бога данному,
Под котрым крестом вдячным єх ся найдовал
И аж до Голгофы под ним єх працовал.
Котрій тяжар легкій видЂл ми ся быти
И снадне под ним здало ми ся ходити.
Котрого то през крест и на смерть сказали
И межи збуйцами повЂсити дали.
И я теды погреб твой оплакиваю,
И в гробЂ том, о Ісусе мой, жегнаю,
В котром єсь нинЂ рачил ся положити
И през хоренкгев креста моци зажити
Над непріателем, котрый нас позбавил
И мЂсто живота смерти всЂх набавил.
Под котрою хоругвою кгды зась прійдеш
И з небес всЂх судити на землю зыйдеш,
Кгды труба страшная всюды брмЂти будет
И жаден ся пред судом твоим не збудет.
Кгды и аггельскіє хоры будут дръжати
И всЂ з вЂку святыє збыть ся бояти,
Тогды и мене рач, пане, домЂстити,
Под хоругвою ся креста находити
И голос он вдячный абы мя доходил
И з выбранными жебы-м ся теж находил.
Маріа Магдалена
Кгды ся на тя, Магдалена, позираю,
Учителю мой, з жалю ся урываю.
На образ, тылко фарбами выраженый
И в гробЂ том на памятку положеный,
З жалю ся тяжъкого, ах мнЂ, урываю
И щобы-м с собою чинила, не знаю.
Не вЂдаю, як бы-м мЂла нарЂкати
И лзы мои ах мнЂ, буйне выливати,
Же-м ся с паном и учителем ростала
И такого-м ся ту смутку дочекала.
А иж мя тоє нещастьє поткало,
Чого ся нЂкгды пред там не сподЂвало.
Теды не дам тЂлу моєму вытхненья,
АнЂ ногам и бы знак отпочненья,
Але о пану, буду ся всЂх пытати
И учителя мого всюди шукати,
НЂчого ся не перестерЂгаючи:
АнЂ теж ся кого в том обавяючи.
Петром не буду, жебы-м ся так бояла
И до учителя ся не признавала,
Бы и менщизна, не буду ся лякати,
А не тылко през невЂсту отступати.
Нєх ми хто-колвек задаст, же-м єст Христова,
Признатися до того єст-єм готова.
Не дам ногам моим намнЂй спочивати,
Всюды буду пана моєго шукати.
Бы теж и якій пострах, нєх нападаєт,
Теды смЂлости моєй не подолаєт.
Лик мироносиць
И мы хор мирофор, будемо ту трвати,
И от гробу святого не отступати,
ОлЂйки коштовныє в руках маючи,
НамнЂй ся нЂкого не обавяючи.
Иле нас єсть Маріи, кождаа ся ставит
И зо всего сердца щире о том правит,
Гробу учителева не отступати
И при найчистшой матце-панне ту трвати,
Поки аж з мертвых встаня дочекаємо
И аггела свЂтлого оглядаємо.
От зебраня всЂх
О Ісусе-пане, нас всЂх збавителю
И през найдрожшую кровь откупителю!
Жалосные лзы нашЂ выливаємо
И в том тя гробЂ всЂ жегнаємо,
Пред плащеницею ти припадаючи
И ран святых усты ся дотыкаючи.
Цалуємо голову увельбеную,
Терновою короною скрвавеную.
Цалуємо руки к кресту прибитыє.
И на непріателя душ добытыє.
Кланяємся ногам, котрыє ходили
И землю доптаньєм своим посвятили,
Покуй и доброє нам оповЂдуючи
И ку небу стежку вЂрным торуючи.
Цалуємо бок, скрозь влочнею пробитый
И през д†жродла збавеня нам набытый.
И пред всЂм тЂлом ти святым припадаємо
И гроб честный руками обыймаємо.
В перси ся бъючи недолго в смутку трвати
И з жалю ся вЂрным твоим не урывати.
ВЂсть през аггела рыхло нехай нам прійдет
И радость воскресеніа нас обыйдет.
О дай же нам, Христе, рыхло дочекати
И «Христос воскрес» ту у гробу спЂвати.
ВЂршЂ на пресвЂтлый день Воскресеніа Христова
Пролог
Радость над радости, котрая нас обходит:
И в сердцах вЂрных нинЂ обфите ся родит.
Привела нас, абыс мы єи вам додали
И ту з рифмами ся нашими показали.
Котрыє то през оголошеньє вносимо
И о пилноє их выслуханьє просимо.
Христос же, котрый нинЂ рачил з мертвых встати
И радость в сердца всЂх нас обфите дати,
Тот въпосродку нас нехай нинЂ завитаєт
И вам ту, цным слухачум, посилком бываєт.
До конца ритмом тым слухи свои надати
И през оголошеньє з нами хентне трвати.
Первыи
НынЂ юж збавеньє, всему свЂту ся стало,
Гды ж ся звитяжцу смерти з мертвых оглядало,
Христа, котрый през крест свой з неволЂ нас збавил,
А през найдрожшую кровь, волности набавил.
Христос з мертвых встал. В сЂ ж з ним нинЂ повставайте
И на радощах воскресеніа спЂвайте
«Христос з гробу», як звитяжци ж ся поклонЂте
И з звязков грЂховных всЂ ся освободЂте.
Христос, плЂн с пекла на небо запроважаєт.
Нех же кождый вЂрный з ним ку горЂ ся маєт,
Падол тот земный пусткою зоставуючи,
А к небу, як до отчизны, ся готуючи,
Где радость, якои анЂ око видало,
АнЂ навет коли-колвек ухо слыхало,
Якую то Бог своим рачил зготовати
И през наймилшого сына на ню взывати.
НинЂ Велзевул-княжа, ввесь смутком єст знятый,
Кгды му през крест праве в бров стал Ісус распятый.
Брамы пекелныє преч ся отвирают,
Дьаблы теж всЂ с трвоги по кутЂх утЂкают.
Адам зветшалый преч юж отложен бываєт,
А новый досконалым ся в собЂ ставаєт.
НинЂ аггелове на хоры ся збирают
И як венц в нароженю, так и ту спЂвают
«Хвала на высокостях Богу», кгды ж ся стало,
Же ся непріателя през крест поконало,
И юж хоругов звитязства єст поднесена,
А потенжность тиранна душ преч юж знесена.
З аггелы ж и мы на радощах выкрикаймо
И веселыми голосы з ними спЂваймо,
ВсЂ краины свЂта вкруг оголошаючи
И в тыє слова з ними разне спЂваючи
«Пасха панская Пасха», — и зась реку знову:
«Пасха», — на честь Тройци, здобячи свою мову.
Тоє свято над всЂ иншіє нашЂ свята,
Кгды ж земля долняа, з горним небом єст знята.
И так з мертвых встаньє всЂ свята переходит,
Иле солнце, над всЂ звЂзды выш ся находит
Тыле всЂ свята, собою превышаючи,
Иле собою, ведне их закрываючи.
СвЂтно ся през свЂтла ноч тую обходило,
Кгды ж ся през свЂчЂ всюды свЂтло находило.
Так по церквах в зебраню, як теж и зъособна,
Ноч тая през свЂтло пьєкне была оздобна.
И котрым ся свЂтлом ноч тую обходило,
СвЂтло бозства Христова през ся нам значило.
Котроє зорЂ с себе мЂло подавати,
И в очах вЂрных всюды ся улысковати.
А свЂтлозорнои ночи ся ознаймило,
Кгды ж в ней солнце справедливости взыйти мЂло,
А в день юж самого-сьмы свЂтла дочекали,
Кгды-сьмы истоту свЂтла, Христа, оглядали,
От котрого вшелякоє свЂтло походит,
И з него ся и аггелскоє свЂтло родит.
А тои ночи свЂтло радость нам значило,
Котроє нас зе днем з гробу всЂх освЂтило.
Котрым то обфите будучи освЂчени
И в воскресеніи гойне розвеселени,
На справедливости ся солнце посмотривши
И променми єго вкруг огорнены бывши,
В невымовной радости ся нинЂ найдуймо
И з моцарствы рицерств небесных триумфуймо.
Кгды ж ся ту цар небесный рачил показати
И непріателеви досыть пляцу дати.
Тому ж можному монарсЂ честь-хвалу даймо
И на радощах з аггелы єму спЂваймо.
Не ведлуг власности, як бы ся то годило,
Жебы ся пристойне творца своєго учтило,
Гды ж анЂ аггелы, могут того състигати,
Пристойную творцу своєму хвалу дати,
Котрыє ся на хвалу бозства позирают
И первшим стонд свЂтлом освЂчени бывают.
Але иле з нас уломности может стати,
Тыле хотЂмо пану честь и хвалу дати,
«Пасха а пасха» ту ж а ту ж всЂ спЂваючи
И з звитяжства ту вспанЂле выкрикаючи.
Христос през смерт свою смерть рачил поконати
И котрыє в гробЂх, живот им даровати.
На радощах же тых живота тріумфуймо
И в невымовном веселю всЂ ся найдуймо.
Иншіи
В свЂжом жалю отмЂны ся юж дочекало,
Кгды ся ту збавителя з гробу оглядало.
Іоанн-єваггелиста, учень коханый,
От Христа за опекуна матце приданый,
Матки учителевы не отступаючи,
През ввесь жаль єи статечне прі ней трваючи.
ПотЂхи юж єст нинЂ, з нею домЂщенный
И радости з воскресеніа наполненный.
Втож и Никодим, учень Христов потаємный,
До учителя своєго баръзо приємный,
Котрый на послугу тую, себе даровав,
Абы ту пречистоє тЂло был поховав,
Спул з Іосифом около того ходячи,
Мыслю побожности с собою ся водячи,
З вонностями, тЂло пречистоє повили
И в простирадлЂ до гробу го положили,
Лзами ся горкими гойне обливаючи
И з жалю тяжкого сердцем урываючи
По учители, котрого миле набыли,
А потом с тяжким го жалем з очій збыли.
НинЂ тот их жаль в потЂху ся им обернул,
Кгды ся учитель их з мертвых живо им вернул.
О щасливых рук их, котрыє погрЂбали,
Кгды ж з гробу того потЂхи ся дочекали.
Щасливый и гроб, скарб такій в собЂ маючи,
И жрудло живота, с себе выливаючи.
Не меншій и тот, щасливости собЂ додал,
Котрый рамена свои под крест честный поддал —
Симон Киринейчик, котрый то с села ишол
И с тяжаром креста аж до Голгофы пришол.
И мироносицЂ щасливыми зостали,
Котрыє у гробу през всю ноч стояли.
НапервЂй дал ся им пан з гробу видати
И з радостю воскресеніа их поткати.
А з их всЂх Магдалена єст найщаслившая,
До учителя своєго найгорливъшая.
Не дала бовЂм очом своим засыпати,
АнЂ ногам бынамнЂй отпочивати,
Але лзами ся горкими вся объливала
И през всю ноч учителя всюды шукала,
Поки аж як, щасливая, до того пришла,
Же го в особЂ огородника знашла,
Котрый не казал близко себе приступати,
АнЂ жебы тЂла ся єго дотыкати.
Щасливыє ж и мы того ся дочекавши
И през вЂру спул з ними Христа оглядавши.
Спул теды с тыми и на радощах бываймо,
И з мнозствы свЂтных аггел гимны выдаваймо,
«Христос воскрес» збытне весело спЂваючи
И незмЂрнои радости заживаючи,
Даючи хвалу, котрый з мертвых рачил встати
И себе з гробу вЂрным дати одлядати.
Иншіи
По жалю радость, котрая нас всЂх обходить
И з воскресеніа Христова в нас ся родить.
По муце, котрую-сьмы ту оплакивали
И у гробу збавенного смутно стояли,
На тЂло ся збавителя позираючи
И раны найдрожшіє оплакиваючи,
Котрыє за всЂх збавеньє рачил подняти,
Абы нас с тиранства смерти вЂчнои отняти,
С княжатем темности на гарцу ся поткавши
И кгротом креста през сердце разне му давши.
Того теды звитязства триумф обходЂмо,
И при радости ся гойной всЂ находЂмо,
Же-сь мы звитяжцу смерти з гробу оглядали
И през то в смутку радости ся дочекали.
Котрои, о пасхо, абы-смы дочекали
И тебе в немеркаючом дни заживали.
Иншіи
День той, котрого пан рачил постановити,
Абы нас, вЂрных в нем, гойне розвеселити.
Будмо ж теды нинЂ в пану розвеселены
И в невымовной радости неполнены,
Кгды ж Христос собою рачил смерть поконати
И, як звитяжца єи, свЂтно з мертвых встати.
Юж княжа чартовскій преч єст с трону знесеный
И кгротом креста острым навылот пропхненый.
Полки дьаблув моцю креста суть роспрошены
И, як дым по повЂтрю, преч порозношены.
НинЂ брамы пекелныи на дол упали
И моцарства шатанскіє тыл подали,
Кгды лысканьє бозства страшноє их обняло,
Теды ляканьє ся окрутноє их зняло.
НинЂ Велзевул ланцухами єст скрепован
И на декрет суду страшного наготован
Огня геєнского, котрый го ожидаєт
И спул з ангелы єго на него чекаєт.
А мы, вЂрніи, радости сут домЂщени,
Кгды ж з неволЂ пекла вЂчне освобожени.
Котрый огнь незгашоный нинЂ згасаєт,
И робацтво незаснулоє юж здыхаєт.
НинЂ дьаблы, з моцю своєю, преч упали,
И ушикованыє полки тыл подали,
Ад темный и сумный, в трвозЂ ся ввесь найдуєт
И з отхланю и дьаблы обою турбуєт,
Не могучи ся и бынамнЂй поправити
И монарсЂ небесному в чоло ставити,
Кгды ж му праве в чоло стал на крестЂ роспятый,
И плЂн з вЂку померлых єст му отнятый,
До раю на роскош свЂтно запроважон,
А непріатель душ, вЂчне єсть поражон.
СпЂваймо ж з звитязства нинЂ гимны, спЂваймо,
И «Христос воскрес» всЂ весело выкрыкаймо!
Епілог
За вдячность, котрую-сте церкви показали,
И промовум нашим хентне слухи надали,
Людзкости вашой чинимо подякованьє:
За так миле охотноє нас выслуханьє.
Христос-пан, котрый нинЂ з мертвых рачил встати
И гойною радостю нас обдаровати,
Нех же то вам, о цныє слухаче, даруєт
И сердца вашЂ напрезърок зась приготуєт
Ушы свои на оголошеньє надати
И намъ, як и тераз, тую ж хуть указати,
Особливе руки ку небу подъносячи
И спул всЂ Бога о тоє пилно просячи,
Абы и ктитора церкве тои заховал,
И в помысльных потЂхах быти му даровал,
Воєводє Іо МИРОНЕ Брънавскому,
Великому господареви молдавскому.
Котрому и «Полла та ети» заспЂваймо,
И с панованя єго Богу хвалу даймо.
Андрій Скульський
Андрій Скульський — львівський міщанин, друкар. Рік народження не відомий. З власною друкарнею мандрував по Молдавії. Близько 1628 р. повернувся до Львова. В 1638 р. об’єднався з друкарем Михайлом Сльозкою. В 1641 — 1643 рр. був управителем і складачем друкарні Львівського братства. З 1643 р. працював у друкарні львівського православного єпископа Арсенія Желиборського, з 1646 р. в друкарні, яка діяла в Уневі. В 1651 р. був звинувачений у зв’язках з козаками Б. Хмельницького, заарештований і закатований. Автор віршованого діалогу «Вірші з трагодії «Хрістос пасхон» Григоріа Богослова». Йому ж, мабуть, належить кілька геральдичних епіграм.
ВЂршЂ з трагодіи «Христос пасхон» Григоріа
Богослова. Першіи в святый Великій Пяток при положен[н]ю плащеницЂ до гробу.
Другіє — на пресвЂтлый день воскресеніа Господа нашего Ісуса Христа. — Въ ЛьвовЂ: Въ типокграфіи брацкой при церкви Успеніа пресвятыя
богородица року от рождества господа нашего Ісуса Христа 1630, мЂсяца марта,
23. — 36 с. (Запаско, Ісаєвич. — № 206.)
Публікація: Щурат В. Хрістос пасхон: Львівські віршовані діалоги з 1630 р. // ЗНТШ. — 1913. — Т. 117 — 118. — С. 139, 140, 156 — 178.
Подається за публікацією В. Щурата. Першодрук втрачено.
