Попередня     Головна     Наступна




ІЗ ЛЕГЕНД «ПАТЕРИКА, АБО ОТЕЧНИКА ПЕЧЕРСЬКОГО» 1661 РОКУ


ЖИТІЄ АНТОНІЯ ПЕЧЕРСЬКОГО
ІЗ «ПОХВАЛИ АНТОНІЮ ПЕЧЕРСЬКОМУ»
ЖИТІЕ ПРЕПОДОБНАГО ОТЦА НАШЕГО СТЕФАНА, ИГУМЕНА БЫВШАГО ПЕЧЕРСКАГО ПО ПРЕПОДОБНОМ ФЕОДОСІЙ
ЖИТІЕ ПРЕПОДОБНАГО ОТЦА НАШЕГО НІКОНА, ИГУМЕНА ПЕЧЕРСКАГО
ЖИТІЕ ПРЕПОДОБНАГО ОТЦА НАШЕГО НЕСТОРА, ЛЂТОПИСЦА РОССІЙСКАГО
ЖИТІЕ ПРЕПОДОБНАГО ОТЦА НАШЕГО СІМОНА, ЕПИСКОПА ВЛАДЫМЕРСКАГО И СУЖДАЛЬСКАГО





Див. також:
Патерик Києво-Печерський за другою Касіянівською редакцією 1462 року.
Ірина Жиленко. До історії використання топоніму "Русь", "Рóссія" в українській історіографії до XVIII ст.
Ірина Жиленко. Переклади двох фрагментів з «Paterykon abo zywoty ss. Oycow pieczarskich. — K., 1635».








ЖИТІЄ АНТОНІЯ ПЕЧЕРСЬКОГО


Фрагмент


Благословен бог, вся премудростію сътворивый, иже всЂм человЂком хощет спастися и в разум истинный прійти, яко не остави до конца россійскія нашея земли, ниже попусти помрачитися ей тмою невЂдЂнія, да не видит спасенныя стезЂ, но якоже из начала міра, егда вся земля тмою верху бездны сущею покровенна бЂ, тогда носящуся духу святому над водами свЂт земли новозданной первЂе сътвори, помалЂ же и солнцу воссіяти над нею повелЂ, егоже положи в область дни и в просвЂщеніе луны и звЂзд, обладающих в нощи; сице и егда прійде кончина лЂтом, земля же наша россійская тмою близ ада сущею, невидЂніем, глаголю, спасенія, помраченна бЂ, тогда носящуся духу томужде над крещеніем преданным нам от благовЂрнаго в князех Владымира свЂтом вЂры первЂе нас просвЂти. ПомалЂ же и солнца мысленнаго, свЂтящаго добрыми дЂлы, не возбрани [бог], да воссіяет нам в область дни спасенія и в просвЂщеніе луны и звЂзд мысленных, обладающих помощію в нощи нераденія нашего о спасеній, но избра на се преподобнаго и богоноснаго отца нашего Антонія, иже воскорЂ по крещеніи россов, аки вторый Моисей по прошествіи ізраиля чрез море, взыйде, повинуяся званію божію, на гору святую, на Сінайскую, от огня ярости божія дымящуюся, но Афонскую, благодатію богородицы сіяющую, идеже пріят благодатный закон, устроеніем ангельским преданный святому иноческому чину.

Отсюдуже егда в Россію прійде, богом послан сый, да ту закон его съвершенно устроенный предаст, показася всяко подражатель быти ізраилского законодавца. Ибо якоже той, c законом к ізраилю пришед, солнечныя на себЂ показа луча и того ради возложи на лице своє покров, сице и сей преподобный, россійскій наш законодавец, поистиннЂ просвЂтися добрыми дЂлы, яко свЂтозарное солнце, якоже и нарицает его церков, тЂмже и вселися ту в пещеру, аки такожде возлагая на лице свое покров. Обаче якоже облак, покрывающ солнечное лице, не может утаити его луч, да не творит дне, сице ниже пещера утаи принесеннаго преподобным отцем нашим Антоніем закона, о нем же той, аки о лучЂ своей, c пророком к господу глагола:

— СвЂтилник ногама моима закон твой, и свЂт стезям моим 1.

ПросвЂти бо, яко солнце, преподобный сей законодавец россійскую нашу землю законом иноческим совершенным, сіяющим добрыми дЂлы в пещерЂ, аки свЂтом, и в тмЂ свЂтящим, и сътвори ей благопріятный спасенія день, в нем же благообразно начаша ходити россійстіи сынове, пріемлющіи благочинный иноческій образ, апостолски вопіюще:

— Се нынЂ время благопріятно, се нынЂ день спасенія!

K сим же, якоже весь круг земный, покрывающ тожде солнечное лице, не может возбранити ему просвЂщати обладающих в нощи естественных свЂтил луны и звЂзд, сице и пещерною землею покровен сый преподобный отец наш Антоній, аки мысленное солнце, невозбранно просвЂти в Россіи мысленная свЂтила, обладающая нощію, в нощи нераденія нашего о спасеній. От них же сіяющій найпаче преподобный Феодосій Печерскій нарицается от церкви звЂздою росскою, не просто, по сицевою, яже вождь прочіим звЂздам является, сі есть Луною. (Якоже и вся, она первЂйшія седмь свЂтила небесныя о себЂ движимая, яже глаголются планеты, от них же не токмо Луна есть, но и Солнце, нарицаются от учителей седмь звЂздами, держимыми в десници господней.) Обаче прочіи безчисленныи печерскіи святыи, иже в законЂ, принесеннЂм от преподобнаго Антонія, послЂдоваша строенію преподобнаго Феодосія богоугоднЂ, просіяша свойственнЂ, яко звЂзды непрелестныя, на твердЂ небесной умноженныя. И того ради неложно небеси подобною святая чудотворная лавра Печерская показася.








ІЗ «ПОХВАЛИ АНТОНІЮ ПЕЧЕРСЬКОМУ»


ПовЂствуют исторіи, яко в едном кораблЂ бяху убрусы, имущія на себЂ различная подобія и браней изображенія. Пришед же тамо нЂкій афіней и смотряше прилЂжно на изображенную брань, бывшую нЂкогда лакедемонам 1 c афіней 2. И се обращся узре лакедемона на горницЂ ходяща, ему же перстом показа ону брань и глагола:

— Виждь, — рече, — како сильни суть афіней! Лакедемон же въкратцЂ отвЂща:

— Сильни суть, но на убрусЂ.

Мало же ли, братіє, имать мір украшающих домы своя различными подобіи и знаки прадЂдов, дЂдов и родителей своих? И, възирающе на них, сицевыми словесы похваляют.я:

— Свят бЂ человЂк той! Но отвЂщает им нЂкто:

— Свят, но на иконЂ.

СірЂч в словесах, а не в самой вещи, якоже и афінейская крЂпость и мужество, на убрусЂ изображенная.

Взыйдем убо и мы к преподобному отцу нашему Антонію Печерскому и пріймем в ум богоугодноє его житіє, воспоминающе, како брася c міром, тЂлом и діаволом. C міром — чрез отверженіе, c тЂлом — чрез умерщвленіе, c діаволом же — чрез пощеніе и молитвы. И узрЂвше над тЂми одолЂніе eгo, исповЂмы, яко крЂпок и силен не на иконЂ, но самою вещію.

Но о преподобне отче Антоніе! Что тя к сицевым привлече подвигам?

— Слава вЂчная Христос: «Да богови жив буду, Христови съраспяхся» 3, — глаголет c божественным апостолом.

ПовЂствуется в исторіях о КирЂ, царЂ перском, яко сицевым ухищреніем граждан своих к подвигом ратным поощряше. ПовелЂ тЂм ити в лЂс и тамо c многим трудом сЂщи дрова, в утрЂе же всЂх доволнЂ (якоже лЂпо еть царем) почте учрежденіем. Таже, собрав всЂх, въпрашаше я, кій день мнится им быти лучшій — вчерашній ли, или нынЂшній, и коего бы восхотЂли. ОвЂщаша вси, глаголюще:

— НынЂшняго, аки радости и наслажденія дне, понеже вчерашній труда и озлобленія бЂ. Кир же:

— Аще таковаго дне в вЂки хощете имЂти, подобает вам въмалЂ потрудитися и братися c враги, им же одолЂвше, в богатст†их и наслажденіи почіете.

Мудро въистину Кирово изобрЂтеніе се и в лЂпоту к воспріятію радости и наслажденія труд, понеже и сам Христос, хотя нас на небеси учредити c собою и от обилія дому своего упоити, не ино изобрЂтеніе, токмо труд нам предлагает, глаголя:

— Куплю дЂйте, дондеже прійду!







ЖИТІЕ ПРЕПОДОБНАГО ОТЦА НАШЕГО СТЕФАНА, ИГУМЕНА БЫВШАГО ПЕЧЕРСКАГО ПО ПРЕПОДОБНОМ ФЕОДОСІИ


«ТерпЂніе стяжавый, всякія добродЂтели касается, радуется в скорбех, в бЂдах благоискусен, в напасти веселится» — богодухновенный Ефрем Сирин 1 рече.

Тако обрЂтеся сей преподобный отец наш Стефан, иже от братіи своея пострадав, аще и по скорбЂ, но бог его зЂло возвесели. Воспоминаше бо преподобный слово пророка и царя Давида, глаголя:

— По множеству болЂзней моих в сердци моем утЂшенія твоя возвеселиша душу мою 2.

Сего ради вся скорбная, аки от бога посылаемая, со радостію пріимаше.

ДобрЂ извыче всякоя добродЂтели искус. От дЂтства бо своего под рукою достохвальнаго в игуменЂх преподобнаго отца нашего Феодосія Печерскаго возрасте и ero присный ученик бысть, — наслаждаяся всегда и питаяся богодухновенных словес от медоточивых того уст, аки младенец от сосца, ему же и аки отцу чад всяцЂм подобіем добродЂтели соединися.

И сего ради любовію вперися в сердца всЂм братіям, от них же первЂе избран бысть доместик или строитель церковнаго устава. И тогда учащу самому игумену преподобному Феодосію братію в церкви духовными словесы, достойнЂ и сей тЂх же учаше.

По том же, егда преподобный Феодосій конец житію сему временному имяше пріяти, моляху ero вси единогласно, глаголюще:

— Стефан достоин есть по тебЂ игуменство пріяти, Стефан да будет нам игумен.

Преподобний же Феодосій преклонися к моленію братіи и, призвав любимаго си ученика, блаженнаго Стефана, вручи ему пред всЂми ограду, полну богодухновенных словесных овец, и церков, на основаній сущу чудеснЂм, моляше, да совершит. Таже, много поучив его хранити монастырскій устав, братію от чиста сердца любити, неусыпно имЂти око сердечное к богу, страннолюбія не забывати, и тако преставися к вЂчным обителем, обЂщаяся единаче и в обители своей Печерской, врученной блаженному сему Стефану, помощію всегда быти.

Преставльшу же ся преподобному Феодосію, блаженный Стефан игуменство святыя чудотворныя лавры Печерскія пріим, подвизашеся зЂло, прилежа зданію святыя богомзнаменанныя церкви, юже преподобный Феодосій начат здати, якоже и всему строенію монастырскому. И благодатно божіею, молитвами же преподобных отец наших Антонія и Феодосія в мало лЂт и церков соверши, и монастыр нов согради, и ту от ветхаго монастыра братію пресади. В ветсЂм же монастыри мало их остави, имже обычай бЂ усыпающую братію погрЂбати тамо. Се же устави преподобный отец наш Стефан, да в монастырЂ его всегда божественная литургія совершается за умершую братію и блаженных ктиторов. Бог же вся на потребу его неоскудно подаваше, и тако умножашеся мЂсто то благодатіею божіею.

Ненавидяй же добра враг, иже присно борется c рабы божій ми, завидЂ блаженному толикаго попеченія его обители святой и, злими своими козньми сопротив въстав, таково смятеніе в нЂкіих от братіи сотвори, яко не токмо от игуменства того низложиша, егоже прежде сами единогласнЂ избраша, но и от монастыра неповиннЂ отлучиша.

Сія бо вся доблественнЂ незлобія сын преподобный Стефан о братіи своея претерпЂ и любовію никакоже удаляшеся от тЂх, от них же плотію удален бысть. Но богу прилЂжно моляшеся о них, подражая о сем тезоименітаго своего первомученика Стефана и глаголя:

— Господи, не постави им грЂха сего!

Влачаше бо ся святый любовію преподобнаго Феодосія, аки желЂзо каменем магнитом.

Егда же увЂдаша такову скорбь преподобнаго Стефана мнози от боляр и вельмож, сынове того суще духовній, врученныи ему преподобным Феодосіем, сожалища си зЂло, яко тако отец их духовный пострада, и, милостію подвигшеся, от имЂній своих довольно еже на потребу подаваху ему.

И в то время преподобный Стефан, воспоминая преславная она чудеса, имже самовидец бысть — како майстери из Константинаграда к преподобным отцем нашим Антонію и Феодосію Печерским прійдоша, принесше икону пресвятыя богородици и видЂніе царицы, еже в ВлахернЂ повЂдаша, — богу, ему поспЂшествующу, молитвами преподобных отец Антонія и Феодосія состави себЂ монастыр недалече Печерского, на КловЂ, и церков в нем каменну сооружи в имя пресвятыя богородицы, в память положенія честныя ризы ея, по образу, сущаго в КонстантинЂградЂ, еже въ ВлахернЂ, и по вся лЂта праздник творяше святитель мЂсяца іюля в вторый день. Тамо же и братію многу собрав, живяше богоугоднЂ. Устав же церковный и чин весь строенія монастырскаго, якоже от преподобнаго Феодосія в монастыри Печерском пріят, тако и в своем хранити повелЂ. И многа на пользу правовЂрным исправленія показав, идяше от силы в силу, яко и в далечайших странах добродЂтельнаго ради житія славиму ему быти и знаему многим.

И сего ради, егда преставися епископ славнаго града Володимера, его же сам великій он самодержец Владимир в имя свое созда, тогда сей преподобный избран бысть на архіерейскій престол града того и хиронисан преосвященным митрополитом кіевским Іоанном. И добрЂ носяше богом врученная себЂ овца, образ бывая стаду словом, житіем, любовію, духом, вЂрою, чистотою.

Егда же благоволеніем божіим и совЂтом блаженнаго Іоанна, игумена Печерскаго, и вся братіи, имяху пренесены быти честныя мощи преподобнаго отца нашего Феодосія от пещеры в богом зданную церков, в то время досточудный сей епископ Стефан, пришед от Володимира, обрЂтеся на Кло†в своем монастыри. И видЂ в нощи чрез поле зару велику, сіяющу над пещерою. МнЂв же, яко преносят честныя мощи преподобнаго Феодосія, вЂдый о намереніи том, возскорЂ зЂло, яко преносят без него, и абіе всЂде на конь и скоро гна к пещерЂ, поим со собою Климента, егоже бЂ поставил игуменом в себЂ мЂсто на КловЂ. Грядый же, видЂ издалече явльшуюся ону над пещерою зару, но егда приближися, узрЂ тамо свЂща многи, пришед же к пещерЂ, ничтоже от сих видЂ. И разумЂ, яко поистиннЂ сподобися видЂти свЂт божественныя славы от честных преподобнаго Феодосія мощей: уже бо бЂша прокопали над честными того мощами и изнесоша их к дверем пещеры.

В другій же день по видЂніи сем c прочіими епископы послужи пренесенію честных мощей отца и учителя своего преподобнаго Феодосія и блаженный Стефан.

Таже, отшед во свояси, на престол паки Володимерскій, многія добродЂтели на успЂх словесному си стаду сотвори, ихже ради достоин обрЂтеся неувядаемаго славы вЂнца, егоже от начала лЂт своих именем своим знаменова, дЂлы же взыска. И тако по лЂтах многих на пріятіе вЂнца того къ Христу, пастырей начальнику, отиде в лЂто от созданія міра 6602, от рождества же Христова 1094, мЂсяца апріллія 27 дня.

Молитвами же преподобнаго сего вЂнценосца Стефана и нас, Христе-боже, сподоби вЂнца славы, в славу тебЂ самому c безначальним ти отцем и єдиносущным духом, нынЂ и присно и въ вЂки вЂком.

Аминь.









ЖИТІЕ ПРЕПОДОБНАГО ОТЦА НАШЕГО НІКОНА, ИГУМЕНА ПЕЧЕРСКАГО


Егда благоволи господь насажденную в Россіи вЂтв житія иноческаго многоплодну сотворити, приведе к насадителю искусну и трудолюбиву, копающу землю, сего добраго содЂльника прежде иных, глаголю же к святому первоначальнику Антонію, в пещерЂ подвизатися наченшу, преподобнаго Нікона, иже добрЂ проходя иноческих добродЂтелей степени, тако подражаше въ всем наставника и учителя своего, яко достоин обрЂтеся поставлен быти от него вождь, вводящій прочіих дЂлателей въ виноград мысленный постническаго подвизанія.

Елико бо их прихождаше, равноангельному тЂх житію хотяще быти сообразны, сам преподобный Антоній поучаше их в добродЂтелех, преподобному же Нікону повелЂваше пострызати, ієрею тому сущу и черноризцу искусну. И бЂ видати тогда Моисея и Аарона в мысленном виноградЂ, творящем плоды покаянія, достойны пренесенія от Египта міра сего на обЂтованную ону небесную землю. Ибо преподобный Антоній от святыя Афонскія горы, аки от Сінайскія Моисей, закон принесе, преподобный же Нікон дЂйствоваше от него, аки Аарон, саном священства почтен сый. ДЂйствоваше же c великим благопокореніем, пріемля од дЂла своего не точію радостная, но терпя и скорбная мужественнЂ, о всем благодаря бога.

Великія сподобися радости духовныя, егда пострыже преподобнаго отца нашего Феодосія, иже воскорЂ, показася великій наставник иноческаго житія в Россіи. Возрадовася духом и тогда, егда пострыже великороднаго болярина, блаженнаго Варлаама, такожде и съдержащаго вся у князя, любимаго тому зЂло блаженнаго Ефрема-евнуха. Но за сим претерпЂ купно и скорб немалу.

Ибо, увЂдав князь Ізяслав пострыженіе тЂх, разгнЂвася зЂло на преподобных и повелЂ абіе единаго от них, дерзнувшаго пострыщи, привести пред себе.

Слуги же, скоро шедше, блаженнаго Нікона приведоша пред него.

Князь же, съ гнЂвом возрЂв на святаго, глагола ему:

— Ты ли еси пострыгл болярина и євнуха без повеленія моего?

Преподобний же Нікон мужественнЂ отвЂща:

— Благодатію божіею аз пострыгох их, по повеленію небеснаго царя Іисус Христа, призвавшаго их на таковый подвиг.

Князь же разъярися паче и рече:

— То или увЂщай их в дом свой пойти, или на заточеніе послю тя и сущих c тобою и пещеру вашу раскопати повелю.

Блаженный же Нікон отвЂща:

— Все, владыко, якоже есть угодно пред очима твоима, тако сотвори, мнЂ же нЂсть лЂпо отвратити воинов от небеснаго царя.

Сим бывшим, Антонїй святый и иже съ ним изышли бЂша из пещеры, хотяще ити в ину область, князю еще гнЂвающуся и укаряющу блаженнаго Нікона.

И се един от отрок, вшед, повЂдаше то княгини слышащей. Она же воспоминаше князю гнЂв божій, иже бысть в отчествіи єя, въ земли Лядской, изгнанным бывшим черноризцам от отца ея Болеслава Храбраго за пострыженіе преподобнаго Моисея Угрина, и глаголаше ему:

— Послушай мене, господи, и не гнЂвайся, ибо такожде въ странЂ нашей отгнани бЂша таковыи черноризцы и много зла сотворися за них. Но блюди, господи, да не тако и в области твоей будет.

То же слышав, князь убояся гнЂва божія и отпусти блаженнаго Нікона, повелЂв ему в пещеру ити. По отшедших же от пещеры посла съ мольбою, да возвратятся воспят, иже едва по трех днех умолени бывше, возвратишася в пещеру свою.

По толицей убо напасти живяше преподобний отец наш Нікон в пещерЂ жестоко и многи побЂды на злыя духи показа молитвою и постом, единоправнЂ съ преподобными отцы Антоніем и Феодосіем, яко быти им трем тройческим свЂтилом, сіяющим в том темнЂм мЂстЂ и тьму бЂсовскую разгонящим.

Таже множащимся братіям в пещерЂ восхотЂ блаженный Нікон отити на уединеніе и сам о себЂ безмолствовати. ТЂм же по совЂту преподобнаго Антонія, совЂщався c другим черноризцем, иже бысть болгарин от Святыя Горы, зъ монастыра святаго Мины, отиде съ ним, и пришедше над море, ту разлучистася.

Болгарин убо, идый къ Константинуграду, обрЂте остров среди моря и вселися в нем. Поживе же тамо лЂта многа, терпя зиму и глад, и тако съ миром успе, идЂже и до нынЂ нарицается остров Болгаров.

Великій же сей Нікон отиде в остров Тмутороканьскій, и, обрЂт мЂсто чисто близ града, вселися ту, безмолствуя и служа богу нелЂностнЂ, труды къ трудом прилагая и народы удивляя странным своим житіем, яко сла†eгo обтещи всюду. И прихождаху къ нему граждане и иніи мнози и дивляхуся. Бяху бо еще не утверждены въ вЂрЂ, о мнишеском же житій ниже слышаху. Обаче богом наставляеми, хотяще наслЂдовати иноческое благонравіе, моляху преподобнаго Нікона, да пострыгает их. Он же поучаше их и пострызаше, и церков тамо Пресвятыя Богородицы съоружи. И тако благодатію божіею, молитвами же преподобнаго Нікона возрасте мЂсто то, и бысть монастыр славен, все подобіе имый Печерскаго монастыра.

Умершу же Ростиславу Владимеричу, князю острова того, умолен бысть преподобный. отец наш Нікон от людей страны тоя пойти къ Святославу Ярославичу, князю чернЂговскому, и молити его, да пустит им сына своего ГлЂба на престол тмутороканскій. И яко дойде града ЧернЂгова и врученное себЂ дЂло добрЂ и благополучнЂ соверши, обратися къ граду Кіеву и прійде въ монастыр Печерскій къ блаженному игумену Феодосію. И яко видЂста себе, падше оба вкупЂ поклонистася до землЂ, таже вставше объястася и на мнозЂ плакаста, яко много время не видЂста себе. По сем же моляше преподобный Феодосій, да не разлучится блаженный Нікон от него, дондеже еста оба въ плоти. Сей же обЂщася ему, глаголя, яко:

— Точію дошед, монастыр свой управлю, и абіе, богу извольшу, возвращуся воспят.

Якоже и сотвори. Дошед бо острова Тмутороканьска съ князем ГлЂбом Святославичем и оному сЂдшу на престолЂ, управи, якоже обЂщася, монастыр свой, и возвратися воспят. Таже пришед в монастыр Печерскій, всего себе предаде преподобному Феодосію и c всякою радостію покаряшеся ему.

Преподобный же Феодосій зЂло любяше его и яко отца себЂ имЂяше. ТЂм же и егда камо сам преподобный Феодосій отхождаше, то блаженному Нікому поручаше братію, еже поучати их и соблюдати, яко старЂйшу тому сущу от всЂх. Паки, якоже сам преподобный Феодосій поучаше братію духовными словесы, такожде повелЂваше и блаженному Нікону, почитающу книги, поученіе братіи творити. Многажды же блаженному Нікону, сошивающу и строящу книги (бЂ бо искусен въ художест†том), сам преподобный Феодосій, воскрай его сЂдя, вервіе дЂлаше на потребу таковому дЂлу. Сицево бЂ в них смиреніе и любы междусобна.

По сем видЂв блаженный сей безмолвник смятеніе, сущеє в князех россійских, изгнанну бывшу Ізяславу от Кіева и сЂджу ту брату его Святославу, стужи си, не могій терпЂти молвы, да не умное свое храненіе погубит, и вожделЂ паки отити во прежде реченный остров. Преподобный же Феодосій много моляше его, якоже и прежде, не разлучитися има, дондеже еста во плоти, но блаженний Нікон, испросив прощенія, глаголя не полезну быти молву паче всЂх уму его, уединенію навыкшу, отиде съ двЂма черноризцема, и поживе тамо нЂколико лЂт в обычном своем подвизаніи.

По преставленіи же преподобнаго Феодосія и сожалив си, яко не обрЂте въ плоти любимаго си друга, изволи прочее время жизни своея до смерти в монастырЂ его препроводити. И часто къ гробу его приходя, радостотворныя слезы испущаше, ово болЂзнуя о разлученіи любимаго си брата, ово благодарствуя богу, яко таков свЂтильник равноангельным житіем въ Россіи просія, на него же он рукама своима образ святый ангельскій иноческій возложи.

Таже по блаженнЂм игуменЂ СтефанЂ, видяще братія ceгo преподобнаго старЂйша быти от всЂх, яко и преподобный Феодосій, от его руку пострыженіе пріят, изволеніем божіим по совЂту всЂх, игуменом его себЂ избраша, яко единонравна бывша преподобным отцем Антонію и Феодосію, их же обою образ в сем едином зряще, любезнЂ покаряхуся ему и въ всем яко отца и наставника послушаху того. Многажды же окушашеся враг, добра ненавистник, такожде и сему преподобному спону сотворити, якоже и блаженному игумену Стефану в попеченій о душах богом врученнаго стада, хотя сіе возмутити нелюбовію на него, обаче ничтоже успЂв, посрамлен отбЂже. Не одолЂ тьма его свЂту дЂл добрых блаженнаго.

Сице же сей блаженный игумен богу угоди, образ чудных добродЂтелей стаду своєму сый, яко въ время тщанія его чудотворнЂ украсися образами святая богом созданная Печерская церкви. Ибо къ моленію сего блаженнаго строителя земному приложишася друзи его преподобній отци Антоній и Феодосій молитвами своими небесными и прислаша къ нему иконописцев изъ Константинаграда, имже и злато вънаим даша. Блаженный убо сей игумен показа тЂм иконописцем образ любимых си другов преподобных отец Антонія и Феодосія, прежде десяти лЂт преставльшихся; иконописцы же абіе познаша, яко тыи воистинну явльшася наяста их и посласта къ нему. Къ сим же исповЂдаху и ина дивная чудеса: како хотящим возвратитися явися им церков святая Печерская и икона пресвятая богородици, от нея же прещеніе слышаху, да не возвратятся, како же и вниз рЂки лодію гребуще, преплыша нуждею горЂ противу воды.

Съ толиким чудотвореніем пришедшіи иконописцы при тщаніи сего блаженнаго игумена устремишася тогда на дЂло украшенія святыя церкви, не оскудЂвающим паки чудесам. Ибо сама икона пресвятыя богородицы въ олтари мусіею изобразися и паче солнца просія, и голуб и з уст ея излетЂ, якоже пишется пространнЂе въ сказаній о церкви Печерской. Сія же вся быша молитвами преподобных отец Антонія и Феодосія небесными, блаженнаго же игумена Нікона еще тогда земными.

Таже, егда и сам приснопамятный игумен преподобный отец наш Нікон различными образы равноангельнаго своего житія всю святую обитель Печерскую добрЂ уже украси, по трудЂх долговременных почи о господЂ в лЂто от созданія міра 6596, от рождества же Христова 1088 при великом князЂ кіевском ВсеволодЂ ЯрославичЂ 1. И тако тЂлом положен въ той же обители своей святой Печерской, въ пещерЂ, идЂже чудотворным мощей своих нетлЂніем блаженство свое свЂдительствует, имже и по смерти обитель свою святую чудотворнЂ украшает. Духом же преселися к обителем небесным, на зрЂніе божіе пречудное, не къ тому в образЂх, но лицем къ лицу, се же c единонравными своими други, преподобними отцы Антоніем и Феодосіем, идЂже аки тріе свЂтилници предстоят престолу трисіятельнаго божества, просвЂщаеми славою вЂчною, и о нас, чадех своих, аки отцы, молятся, да сподобимся наслЂдници быти благодати их и славы, благопріятны суще господеви, емуже слава, честь и поклоненіе, нынЂ и присно и въ вЂки вЂком.

Аминь.










ЖИТІЕ ПРЕПОДОБНАГО ОТЦА НАШЕГО НЕСТОРА 1, ЛЂТОПИСЦА РÓССІЙСКАГО


Всяка вещ, аще писаніем утвержденна не будет, в забытіе и невЂденіе прійдет. Яко же и о самом началЂ и первом строєній міра, и о самом родоначальницЂ нашем АдамЂ, аще не бы Мойсей, богом научен, в книгах своих оставил нам, все бы то долгота времени покрыла, аки тьма, и в невЂденіе привела. Но бог, память творяй чудес своих, въ кое хощет время, списателей подает, яко да тЂми начертанная послЂдствующіи роди, прочетше, пользоватися возмогут.

СообразнЂ тому и въ послЂдняя сія лЂта яви господь въ Россійской нашей земли, въ Печерском святом монастырЂ, приснопамятнаго списателя, преподобнаго отца нашего Нестора, иже просвЂти наша очеса, в пользу нас и благодареніе богу приводя, егда написа нам о началЂ и первом строєній россійскаго нашего міра, не токмо внешняго, но найпаче внутрняго и духовнаго. Глаголю же о основаній и исправленіи житія въ Россіи иноческаго чиннаго, насажденнаго, аки въ раи, въ Печерском святом монастырЂ, и о духовном родоначальницЂ нашем, уже непрельщенном, о преподобном Антоній и прочіих послЂдствующих тому и порожденных духом от него печерских святых, от них же и сам достохвальный сей списатель бысть, иже святолЂпная тЂх житія не токмо тростію на хартій, но и равноподвижными дЂлы на непорочной души своей написа. ТЂм же и въ книги живота вЂчнаго самаго сь вписа, яко слышати ему: «Радуйтеся, яко имена ваша написана суть на небеси.!» 2

Сей бо блаженный отец наш Нестор, безмолствующу преподобному Антонію в пещерЂ, блаженному же Феодосію строящу монастыр, прійде къ ним, желая святаго ангельскаго иноческаго образа, имый точію седмьнадесять лЂт от рожденія своего. И тогда же, у инок сый, навыче всякія иноческія добродЂтели: чистоты тЂлесныя и душевныя, вольныя нищеты, смиренія глубока, послушанія непрекословна, пощенія крЂпка, моленія непрестанна, бдЂнія неусыпна и прочіих равноангельных трудов, им же всяко подражатель бяше житію самых первоначальников святых печерских Антонія и Феодосія. И от тоя святыя двоица пріймаше въ благоцвЂтущей юности своей всяку заповЂдь любезнЂ, аки отроча от сосец млеко и аки елень жаждущій воду от двох источников, текущих посредЂ гор в пещерах.

Являет бо в писаній своем, яко велію любов къ тЂм преподобным основателем имЂяше, не словом и языком, но дЂлом и истинною, и яко зЂло прославляше бога в телеси своем и в души своей, видя свЂтящеяся добрая дЂла тЂх двох веліих свЂтил россійскаго небеси.

По честной же пред господем смерти преподобных отец тЂх сей блаженный отец наш Нестор не токмо дЂлы мірскими мірови умре, еже и прежде въ искусЂ сый сотвори, но уже и мірским образом. И пріят святый ангельскій иноческій образ от преподобнаго Стефана, игумена печерскаго. По том же и на діаконскій степень от тогожде возведен.

И тогда сугубый зря на себЂ агнельскій сан, иноческій же и діаконскій, день отъ дне добродЂтели усугубляша, умерщвляя вся страсти плотскія и творя всяку истинну, яко да будет никакоже плотен, но всяко духовен и истинный раб и поклонник божій, свЂдый добрЂ, еже сам господь рече, яко дух єсть бог и иже кланяются ему, духом и истинною достоит кланятися. Обаче духа непріязненна въ нем же истинны нЂсть, не покланяющагося господеви, како побЂждаше, являет въ писаній своем извЂстно, яко найпаче смиреніем неизреченным. Всюду бо смиряяся нарицает себе недостойна, груба, невЂжду и наполнена множеством грЂхов.

Егда же богом движимій братія совЂт сотвориша ископати честныя мощи преподобнаго Феодосія и пренести их от пещерывъ святую богом созданную Печерскую церков, тогда на се послушаніе первЂйшій бысть блаженный сей Нестор. И съ великою вЂрою и моленіем въ дЂлЂ копанія об нош. потруждся, многоцЂнный сей бисер Печерскому святому монастыру, честныя, глаголю, мощи преподобнаго Феодосія ископа и пред пещеру изнесе, веліим же тогда бывшим чудесем самовидец бысть, якоже сам исповЂда.

Поживе же лЂта довольна, труждаяся въ дЂлах лЂтописанія и лЂта вЂчная поминая. И тако добрЂ угоди творцу лЂтом, къ нему же по лЂтех временных довольных преставися на вЂчность. И положен есть въ пещерЂ, идЂже и до нынЂ честное ero тЂло въ чудотворном нетлЂніи почивает, свЂдительствующи, яко преподобный сей списатель житій святых и лЂт нетлЂнное себЂ жилище на небеси написа и благословен есть нетлЂнным вЂнцем лЂта благости божія, лЂта господня пріятна.

Молитвами же преподобнаго сего списателя буди и нам вписанным быти в книги живота агнца божія, его же лЂта не оскудЂют. Ему же съ богом отцем и животворящим духом подобает от нас всякая слава, честь и поклоненіе, нынЂ и присно и въ вЂки вЂком.

Аминь.







ЖИТІЕ ПРЕПОДОБНАГО ОТЦА НАШЕГО СІМОНА 1, ЕПИСКОПА ВЛАДЫМЕРСКАГО И СУЖДАЛЬСКАГО


Еже Іисус Сирахов о СімонЂ оніи [словеса] написа, рек: «Сімом сын оній ієрей великій, иже в животЂ своем сострои дом и въ дни своя утверди церков», и паки: «Яко звЂзда утренняя посредЂ облак, аки луна полна въ дни своя и яко солнце сіяя на церков вышняго», такожде нам о тезоименитом тому преподобном отцЂ нашем СімонЂ, епископЂ владымерском и суждальском, свЂдители и списатели житій святых печерских втором по НесторЂ блаженном, написати должно есть. ПоистиннЂ бо добрЂ сострои дом божій и утверди церков Христову житіем своим святым и ученіем о житіях святых, аки един от тЂх добрых пастырей, их же обЂща господь Іереміем пророком, глаголя: «Дам вам пастырей по сердцу моєму, и упасут вас разумом и ученіем» 2. И поистиннЂ вся подобія и имЂнованія Сімона онаго, сыаа Оніи 3, добраго пастыра законнаго, и сему нашему преподобному Сімонови, пастыреви владьщерскому и суждальскому, свойственна суть.

Сей бо блаженный Сімон видЂ, яко пріят святый иноческій образ в манастыри святом Печерском, небеси подобном, украшенном святыми отци, аки мысленными звЂздами, луною и солнцем. И тогда почиташе прилЂжно житія прежде бывших и богу угодивших печерских святых, умноженных, аки звЂзд, тЂм же и сам тЂх же добродЂтели тщашеся всяко исполнити. Воспоминаше любезнЂ дЂйства перваго строителя, преподобнаго Феодосія, аки луны, умножившія таковыя звЂзды, тЂм же и сам подражаше правом его. Помышляше усерднЂ подвиги святаго первоначальника Антонія, аки свЂтозарнаго солнца, просвЂтившаго всЂх свЂтом добрых своих дЂл, тЂм же и на того равноангельное теченіе устремляшеся сам. От преподобных, умноженных, аки звЂзд, служащих лунЂ и солнцу, навыче послушанія смиренна. От блаженнаго Феодосія, аки от луны, свЂтящія съ звЂздами, свЂтящія же паче всЂх звЂзд, пріобрЂте подвизаніе в соборЂ велико, паче братій всЂх. От Антонія святого, аки от солнца, текущаго на единЂ без инЂх свЂтил, наслЂди равноангельное угоЖденіе господеви в безмолвіи наединЂ. И тако, аки истинное зерцало, изображая на себЂ представленныя себЂ тыя добродЂтельныя свЂтила, звЂзды, луну и солнце, и сам такожде показа на себЂ звЂздечный, лунный и солнечный свЂт. ТЂм же, аки он древній Сімон, ієрей великій, и сей бысть я†и, аки звЂзда утренняя, и, аки луна полна, и, аки солнце, сіяя на церков вышняго. И достойнЂ работаше в монастырЂ святом Печерском, небеси подобном, восходящей, аки звЂздЂ утренней, доброй, аки лунЂ, избранной, аки солнцу, пресвятой богородици, подражая и той самой елико мощно въ послушаніи смиренном, въ усердном моленій соборном и въ безмолвіи на богомышленіе уединенном.

Егда же просія свЂтом дЂл своих добрых всюду и въ далечЂйшія страны, обрЂтеся тогда на имущая архіерейска вЂнца церков престольная єпархій владьмерскія и суждальскія. Церкви же краситися достоит вЂнцем звЂздечным, якоже Іоанн святый в «Откровеніи» написа 4. Не бЂ на том престолЂ пастыра, аки пресвЂтлаго солнца и аки совершенныя луны, аки не мощи тогда той церкви похвалитися псаломски: «Престол его, яко солнце, предо мною и, яко луна совершенна» 5. В то убо время изволеніем пастырей начальника Іисуса, вручившаго иногда паству овец своих любящему его Сімону Петрови 6, сей блаженный Сімон, возлюбивый пречистую его богоматер, вознесен бысть на престол пастырскій богохранимому граду Владимеру и Суждалю.

И украсися я†вЂнец тамо сущія церкви свЂтом звЂздечным, престол же ея просвЂтися, яко солнце и яко луна совершенна, егда на высоком том степени много паче свЂтлЂе сей добрый пастыр просія добрыми дЂлы и, аки звЂзда утреняя, и, аки луна полна, и, аки солнце. Просія же, ученіем просвЂщая, любовію согрЂвая, благодатію же, от бога умоленною, живот дая. Помышляше той, яко звЂзда утреняя концем єсть нощи, началом же дне, тЂм же, изображая ту, храняша овца своя всяко от дЂл темных, помраченных грЂхом, и наставляше на дЂла свЂтла, благодатію просвЂщенна. Разсмотряше такожде, яко солнце и луна д†суть неусыпная небесная очеса, тЂм же содержа престол, свЂтящ, аки солнце и аки луну совершенну, и на самом себЂ изъявляя та неусыпная небесная очеса, съ всякою бодростію стадо свое пасяше. И тако съ всяким прилежаніем и опаством подвизашеся о богом врученнЂй себЂ паствЂ, и въ званій своем благоискусен обрЂташеся.

Обаче и трудов своих иноческих никакоже оставляше, всегда воспоминая и в умЂ содержа преподобных отец печерских труды и подвиги, душею же радуяся, яко сподобися там образ святый ангельскій воспріяти и сожитель их быти. ТЂм же и в помощ себЂ молитв их призываше и предстательством тЂх, благодатію же божіею добрЂ престол свой строяше.

Яко исполнитися на нем и прочіим подобіям и имЂнованіям Сімона, ієрея великаго, угодившаго богу в Ветхом ЗавЂтЂ. Пишет бо раз†преждереченных именованій о своем СімонЂ Сірах, яко бЂ еще той, аки дуга небесная, аки цвЂт шипок, аки крин, аки стебло ліваново, аки огнь и ліван в кадильници, аки сосуд злат, аки маслина и аки кипарис. Но вся добродЂтели пастырскія, сими таинственными образы проявленныя, и сей наш добрый пастыр Сімон святый исполни. Печаше бо ся о храненіи во людех своих мира, образованнаго небесною дугою. Учаше дЂлом терпенія, аки цвЂт шипок, растущ втерніи, возжращая в мысленном вертоградЂ паствы своея; наставляше твореніем и ученіем на непорочную чистоту, аки крін бЂл насаждая; исправляше в подражаніе всЂм к богу молитву, аки стебло ліваново или кадильно умножая; благодаряще бога в скорбех, и къ томужде своих си поучаше, аки ліван в огни оборяющ предоставляя; предлагаше сосуд злат любве и премудрости духовныя; вкореняше маслину милосердія ко ближним, такожде и кипарис превысок помышленія выну о бозЂ.

И понеже тыя вся добродЂтели в Печерском святом монастырЂ на скрижалех сердца своего написа и навыче от житій преподобных отец, велію ревность имЂ и прочіим правовЂрным на пользу житія святых отец тЂх писаніем преподати. Найпаче же аще бы что ненаписано было или съ книгами въ небытіе пришло нестроенія ради и браній, случающихся тогда в Россіи многажды. ТЂм же и съ великим тщаніем испытоваше, аще кто самовидец был или слышатель извЂстен коему печерскому чудеси, и сія вся, аки пчела премудрая, въедино събираше. И тако паки (возвращающеся на преждереченная, возглаголем) просвЂти нас свЂтом солнечным, лунным и звЂздечным. Ибо написа нам чудеса преподобнаго Антонія, аки свЂтозарнаго солнца, и чудотворное окованіе раки преподобнаго Феодосія, аки луны полныя, къ сим же сказаніе о святой небеси подобной церкви Печерской, ея же поистиннЂ престол, яко солнце и яко луна совершенна... Та же многа житія святых черноризцев печерских древнЂйших, свЂтящихся, аки звЂзд, блаженному Поликарпу къ написанію извЂсти... ПослЂди же сам прочіих преподобных звЂздоносныя добродЂтели и чудеса съ богодухновенным наказаніем къ томужде Поликарпу написа.

ИзвЂстно же есть от писанія его, яко презЂльную любов и вЂру имЂ къ пресвятЂй богородици и къ преподобным отцем

Антонію и Феодосію Печерским, яко мнЂтися ему неразлучнЂ въ пещерЂ жити: тЂлом бо точію в єпархій живяше, душею же й умом всегда съ преподобными обиташе. И поистиннЂ, яко же Сімон Петр, паче всЂх ревнЂйшій любитель бысть самаго господа, сице и сей, тезоименитый тому пастыр святый, къ пречистЂй богородицЂ и обители ея Печерской паче всЂх ревнЂйшій любитель показася.

И бЂ видЂти во дни ero знаменіе веліе на небеси печерском, яко имЂ жена, невЂста неневЂстная, пресвятая богородица, под ногама своима не точію свЂт лунный, но и звЂздечный, и солнечный. Ибо сей добрый пастыр, свЂтяся добрыми дЂлы, яко же рЂхом, и, аки звЂзда, и, аки солнце, не точію, аки луна, таковое смиреніе являше, яко писати ему в посланій своем, єпископу сущу: «Аще бы ми, — рече, — мощно смЂтъем помятену быти в Печерском святом монастырЂ и попираему ногама», — яко же посланіеего пространнЂе свЂдительствует.

Потрудися убо сей добрый пастыр много, пасый овца своя не смертныи коим брашном, но животным, ибо предложеніем житій святых печерских и въ своем животЂ, и въ книгах своих. И пребыв дванадесят лЂт на пастырском престолЂ, отиде къ пастырем, на дванадесяти престолех сЂдящим, и къ самому пастырей начальнику Іисусу на пріятіе неувядаемаго вЂнца славы достойныя и, аки звЂздЂ, и, аки лунЂ, и, аки солнцу. ТЂло же его честное, по желанію, извЂщенном в посланій къ блаженному Поликарпу и по вЂрЂ его и люб†къ преподобным, положенно єсть въ пещерЂ, идЂже и до нынЂ въ неувядаемом нетлЂніи пребывает въ честь, славу и хвалу богу, въ тройци единому, отцу и сыну и святому духу, нынЂ и присно и въ вЂки вЂком.

Аминь.












ІЗ ЛЕГЕНД «ПАТЕРИКА, АБО ОТЕЧНИКА ПЕЧЕРСЬКОГО» 1661 р.


Патерик, або Отечник Печерський, виданий у Києві 1661 р., є переробкою Києво-Печерського патерика — пам'ятки літератури Київської Русі, збірки легенд про Києво-Печерський монастир.

Збірка сформувалася у XIII ст. на основі листування печерських ченців Симона і Полікарпа, в якому використані усні перекази, монастирські записи XI ст. та літописні розповіді. Найдавніші рукописи патерика датуються XV ст. Твір відзначається жвавістю і колоритністю викладу, близькістю до народної творчості, яскраво змальовує побут і звичаї монастирської братії і давніх киян. Він високо цінувався впродовж віків. О. С. Пушкін, наприклад, відзначав «чарівність простоти і вимислу» його оповідань.

«Патерик...» 1661 р. — перше друковане видання Києво-Печерського патерика церковнослов'янською мовою. Він зазнає істотної трансформації в дусі барокко. Змінюється його композиція, з'являються вступ, посвята, гравюри — ілюстрації з віршовими підписами; додаються нові житія, укладені на основі патерикових новел. Особливо відчутно змінюються оповідання про перших мешканців монастиря — Антонія, Варлаама, Никона, Стефана та ін. До книги включено «Похвалу Антонієві Печерському», розповіді про авторів окремих частин твору — Нестора, Симона, Полікарпа. «Патерик Печерський» — один із найвидатніших здобутків української бароккової агіографії.



Житів Антонія Печерського. Фрагмент. — Подається за виданням: Патерик, або Отечник Печерський. К., 1661, арк. 2 — 3 зв.

 1 «СвЂтилник ногама моима закон твой и свЂт стезям моим». — Пор.: «Слово твоє — світильник нозі моїй і світ стежці моїй» (Псалтир, пс. 118, ст. 105).




Із «Похвали Антонію Печерському». — Подається за виданням: Патерик, або Отечник Печерський, арк. 25 — 26.

 1 Лакедемон — мешканець міста Лакедемона (Спарти).

 2 Афіней — мешканець Афін.

 3 «Да богови жив буду, Христови съраспяхся». — Цитата з Послання апостола Павла до галатів, гл. 2, ст. 19.



Житіє преподобного отца нашего Cтефана, игумена бывшаго печерскаго по преподобном Феодосіи. — Подається за виданням: Патерик, або Отечник Печерський, арк. 123 — 125 зв.

 1 Єфрем Сірин (бл. 306 — 373) — ранньохристиянський богослов і письменник.

 2 «По множеству болЂзней моих в сердци моем утЂшенія твоя возвеселиша душу мою». — Псалтир, пс. 93, ст. 19.



Житіє преподобного отца нашего Нікона, игумена печерскаго. — Подається за виданням: Патерик, або Отечник Печерський, арк. 126 зв. — 131.

 1 Всеволод Ярославич (1030 — 1093) — син Ярослава Мудрого, великий князь київський у 1076 — 1077 і 1078 — 1093 рр., батько Володимира Мономаха.



Житіє npеподобнаго отца нашего Нестора, лЂтописца россійскаго. — Подається за виданням: Патерик, або Отечник Печерський, ар». 274 — 276.

 1 Нестор — за традицією, автор першої (1113) редакції «Повісті минулих літ», розповіді якої використано в Києво-Печерському патерику. Йому приписується також авторство «Чтенія о житіи и о погубленіи блаженную страстотерьпицу Бориса і ГлЂба» та «Житія Феодосія Печерського».

 2 «Радуйтеся, яко имена ваша написана суть на небеси!» — Цитата з Євангелія від Луки, гл. 10, ст. 20.




Житіє npеподобнаго отца нашего Сімона, епископа владымерскаго и суждальскаго. — Подається за виданням: Патерик, або Отечник Печерський, арк. 277 — 280 зв.

 1 Симон (? — 1226) — спершу чернець Києво-Печерського монастиря, потім ігумен Рождественсько-Богородичного монастиря у Владимирі Заліському, в 1214 — 1226 рр. єпископ владимирський і суздальський, автор «Слова про побудову церкви Печерської» та послань до Полікарпа, що лягли в основу Києво-Печерського патерика.

 2 «Дам вам пастырей по сердцу моєму, и упасут вас разумом и ученіем». — Цитата із біблійної старозавітної книги пророка Єремії, гл. 3, ст. 15.

Симон, син Онії — біблійний старозавітний персонаж, священик Єрусалимського храму, про якого розповідається в біблійній книзі Ісуса, сина Сірахового, гл. 50, ст. 1 — 17.

 4 ...якоже Іоанн святый в «Откровеніи» напиcа. — Йдеться про біблійну новозавітну книгу «Одкровення Іоанна Богослова», або «Апокаліпсис», в якій обігруються образи зірок, золотого вінця, вінця життя.

 5 «Престол его, яко солнце, предо мною и, яко луна совершенна». — Пор.: Псалтир, пс. 88, ст. 37 — 38.

 6 Симон-Петро — біблійний новозавітний персонаж, один із учнів Ісуса Христа (апостолів), провідник перших християнських громад.





Попередня     Головна     Наступна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.