Попередня     Головна     Наступна           Опис та фрагменти віршів: В. П. Колосова. Віршовий полемічний комплекс...






ВІРШОВИЙ ПОЛЕМІЧНИЙ КОМПЛЕКС 80 — 90-х РОКІВ XVI ст.


Скарга нищих до бога
Із Києво-Михайлівського збірника
Із Загоровського збірника




СКАРГА НИЩИХ ДО БОГА


/Арк. 225./

Събраніє нищих въпієт къ тебЂ,

владико господи, прійми въ слух собЂ.

БЂдныѝ нужници, але рабы твоѝ,

иже провожають въ скоръби лЂта своѝ.

От тебе, боже наш, одержати милость

и на нечестивых мЂти справедливость,

Иже твоѝх людей, яко хлЂб, сънЂдають

и святый твой престол, боже, ображають.

О веліа невдячность людей непобожных,

иж неблагодарни дарованій божіх.

Безсловесними ѝх писмо называєт,

грубых и лЂнивых ослы называєт.

Лихоимцев грабитель вълчей натуры,

указуючихся въ [о]вечей покори.

Хитрых и лукавых значно выражаєт,

змиѝного роду пророк называєт.

И псу єст подобный невстыдливый кождый,

за прибыток милый прибываєт завжды.

З непобожных зьíсков пáнъства набывати,

и праци убогих смЂле выдирати.

A нЂкоторыє вЂрою торгують,

и єретичество в полечность пріймують.

Сынове темности, Христу апостаты, /Арк. 225зв./

от духа святого въвЂки прокляты.

Их же гóлос божій, як трóсти, попалить,

и гóрдыѝ мьíсли на землю разврати́ть.

Абы ѝх съвЂты збьíтися не мЂли,

и вЂтром, як порох, скоро розлетЂли.

На ѝх бо въпієт спасителев голос,

иже єсть наполнéн страшных єго чýдес.

Коли от уст єго нарóды научáл,

и непокорывых исти́но обличал.

Падьíй на камени сем, рече, съкрушится,

я́ростію гнЂва вЂчного сътрется.

Там же ся розби́ють гóрдыє народы,

иже з антихристом приходять до згóды.

Научил нас господь таких вълков знати,

именем таким их достóѝть назывáти.

Котóрыє тылом а не дверми входять,

и з собою народ до пéкла заводять.

Для того ж падаю́ть от Христова свЂта,

и посрамляются на вЂчніѝ лЂта.

Якоже сатанà, за óного гордость,

изверъжен от небес и утрáтил честность.

Иж, бывши у бога зарóвно з другими,

аньгелскіми /Арк. 226./ полки и святыми чи́нми,

Иже безсмéрътныѝ живýть въ святыны,

и божієй слýжать святой благостыни.

A ньíнЂ вже прия́ль тытул помазáнъный,

Сатанаил и́мя и враг осуждéный.

На вЂчную гáньбу от святоѝ службы,

до тéмного áда от праведных дружбы.

Был бо аггел свЂта, нынЂ уже тéмность,

богови огидный и святым всЂм мерзость.

Єму суть подóбни церковныѝ врази,

и єго вЂръныи́ и миліѝ друзи,

Иж востóка свЂтлость нынЂ оставляють

и до тьмы запада во прéлесть отбЂгають,

От истынъны до лжЂ, от вЂры въ єресь.

от доброчéстія въ грЂшную прелесть.

Въдими бывають плóтьскими съвЂты,

и попрáли своѝ ко богу обЂты,

Которых ко нему сами учинили

и своѝми усты себе осудили.

K богáтому пáпЂ отбЂгли на пашу,

абы на пЂнези изменяли душу.

Где ѝм все по воли будет поблажати

измышленый /Арк. 226зв./ Христос убийца не мати,

Иж всю вселéнъную злóстями осквернил

и духовный розум на плóтный изменил.

Дух же святый истинéн, сългати не може,

и прегоръдым людєм гордость не поможе.

Аще бо хто верже камень на высоту,

мняще небесную збивáти красоту

Всемиръного солнца ясного свЂтила,

на самого єго падет тая сила,

И на свою главу въ[с]пріймет болЂзни,

да к тому не дерзнет творити соблазны.

И сіи ж Христовы церкви не побЂдять,

але сами себе въвЂки безчестя́ть.

И срамоту пріймуть от оного славы,

и суд єго грозный съкрушить им глáвы.

НаверънЂтеся, бЂгуны, ко церкви востóчной,

прійдЂте к мáтери святой непорочной,

Не шукáйте Христа на западЂ в Ри́мЂ,

явил бо ся нам господь во Иєрусали́мЂ.

Уже бо не прійде з земного верътепа,

але от божія небесного свЂта.

Попуєт бо папа не на небесЂ, /Арк. 227./ в Ри́мЂ.

и погребаєтся во земли и ямЂ.

Не якъ бог владЂєт, человЂк бо тлЂнъный,

слава и вЂк єго въскорЂ отмЂнъный.

Але царь небéсный седить на столици,

и пред ним трепещут аггел святіѝ лици.

И все создáніє тому ся кланяєт,

от него бо живóт и духа мєваєт.

И самый Пéтръ в Ри́мЂ аще бы днесь устáл,

благочéстія въже тáмо бы не застáл,

Єго намЂстници им бы погордЂли,

иже, яко цареве, по нем збогатЂли.

Мусял бы ѝх знову нищеты учи́ти,

але по исти́нънЂ не мог бы смири́ти.

Прáведно ж бы пáпам Петра наследи́ти,

прійдет бо съ Христом оных обличи́ти.

Мы же съхранЂмо Христовы науки,

и святому Петру будем ученики.

ВЂсть бо добродЂтель слова украшáти,

и господь умЂєт якъ своих любити.











О ОТСТУПНЫХ ПАСТЫРОХ ОТ СВЯТОИ ВЂ́РИ И ЦЕРКВИ ВЪСТЪЧНОИ


Горе оным, иже церков изражають

и за имЂния вЂру продавають,

Як жиды ІюдЂ цЂнý составляють,

Оставляють востóк и /Арк. 227зв./ бЂгуть на зáпад

и мнóгим[и] въжáми поспЂшьными въ ад.

Мимо прáва святыѝ лю́дьских наследують

и слова божего ни мáло пріємлють,

славы бо и чести на земли шукають,

До всякоѝ єреси ради ся лЂпити,

а хотять святую вЂру розврати́ти.

Суди ж им, господи, от мыслей отпáсти

и ніже избави такó и прелести.

Вы ж, правослáвныѝ, господа любите,

матъку духовную честію почтите,

Востóчной церкви уставы хранЂте

и за отстýпными пáстырмы не йдЂте.

Бог славы своєѝ не даєт никому

и кажет служи́ти нам самóму єму.

И вы от Сиóна Рьíма не шукáйте,

от непобожноѝ єдности бЂгайте.

Як свЂт бо тéмности не поработáєт,

но всегда собою тéмность отс[л]оняєт,

Так святая вЂра свЂтла єсть и прóста,

без змазы єресей, як девица чи́ста.

От самого Христа до нас возсия́ла

и от апостолов людей освЂтила,

Всю бо вселéнъную они нау/Арк. 228./чили

и за неѝ крóви своѝ пролиáли,

И на всЂ языки дали єпи́скопы,

их же обирáли, як чéстныѝ снопы.

Але во остáтний вЂк гордыѝ римля́не

почитáють своє, як божеє, здáньє.

МЂстца апостолов мнять ся съдержати,

а их обычаєв не любять ховáти,

И все проти́вноє дЂлають Христови,

и не послЂдують святому Петрóви,

И божую слáву мирскою прикрили,

и духовный розум плóтьским помрачили.

ЗапрЂмо ж ся таких апостолов нóвых,

да не отлучáть нас от любвей Христовых.

Святыѝ папЂжи первыѝ блаженъны,

иж муки за Христа были сподоблени.

И тыѝ истинъно Христови служи́ли,

и для християнов души положили.

Яких тепер церков римская не маєт,

из жидами єдность и любóв пріймаєт,

Христови и церкви зЂло єсть проти́вна

и до востóчной матки непокорна.

Але вы, вЂ́рніѝ, мачуху минайте,

святую отчи́зну душам заховáйте,

И не послЂдýйте горъдому народу,

держите со Христом /Арк. 228зв./ пресвятую згóду.

Не подобаєт нам слабовЂръным бьíти,

да не заведуть нас от вЂри блуди́ти.

Хто правослáвной вЂры отступáєт,

такій съ свєтими жребіà нЂ маєт,

Убог такій и нагій, и душа єго мерътва,

и сам єсть гнюсная грєхóвная жертва.

ВЂра бо єсть дар божій и людей спасаєт,

але єресь злая души погубляєт.

ВЂра праведников на судЂ прославить

и пред лицем божим з святыми постáвить.

ВЂра хрестияном приятель зычливый,

и настáвник грЂшным и путь добротли́вый.

ВЂра до царéства божего приведéт,

а єресь в пагýбу вЂчную приведет.

ВЂра и от смерти мнóгих избавляєт,

и божиим рабом в бЂдáх помагаєт,

ВЂра живет з богом, и в ней въсЂ во бозЂ,

и вЂръніѝ души ставаются блази,

ВЂра боголюбцем все твори́ти може,

сила бо божія таковым поможе.

ТЂсною стезéю до Христа приходять, /Арк. 229./

але ширóкою в пáгубу отходять.

Не хотЂмо ж Христа знóву роспинáти,

ани крешченія паки обновляти,

Не слýхайте лживых учителей нóвых,

иже отлучають от бесЂд Христовых.

Зáпадная мати не нас породила,

але прегордыѝ дЂти ісплоди́ла.

Блудная бо церковь нЂсть Христова дЂва,

держащія кýбок господнєго гнЂва.

Скверьная ск[в]ернити людей навыкаєт

и от спасенія хи́тро отдЂляєт.

Превеліа бЂда Риму работáти

и нóвого Христа собЂ измышъляти.

Премнóгая ж цнота Сиóну служи́ти

и святого духа устáвы хрáнити.

Як чистоє злáто, господныѝ слова,

силнЂйшая огня от уст єго мóва.

Із Єрусалима вЂрным даровáно

и всю вселéнъную богови призвáно.

Въсточная церков — правдивая мати,

въвесь свЂт породила духом благодати,

И чи́стою дЂвою Христу обручéна,

тЂлом и кровію єго освещéна,

Иже прегордому папЂ не голдýєт

и Христу-цареви вЂру заховуєт.

Златоструйны[й] поток, /Арк. 229зв./ любимици, пійте,

отческую ж вЂру хранити умЂйте,

Як святыѝ книги нам оповєдáють

и вся́кую єресь явно обличають.

Памятайте ж пилно о небесном ХрыстЂ,

который за люди умирал на крестЂ,

И на высóкую оного покору,

иже розсказýєт аньгелському збору,

Яко за нáши грєхи безчестіє приял

и нас от упадку милостію поднял.

Не мнимайте ж пáпу Петрову особу,

ани чудЂтеся на єго оздобу,

Иже єсть змышлéный на Христов апостол,

и тыранією держать єго престол.

Наука и живóт нЂсть єму духовный,

яко же блажéнъный апостол верховный.

Познайте розумно пáстыри и волки

и не лучитеся в невЂрныя полки.

Не хочет бог єдности не по єго воли,

и зá то караєт, абы єго знали,

Потóпом и огнем людей непокорных,

тЂлу и грєхови и мирови вгодных.

Велик єсть бог, судія грозный всему свЂту,

пред которым стáнуть папы того вЂку,

Котóрыє смЂють Христова декрета

велце зневажати /Арк. 230./ для марного злата,

Ламлючи канóны и вызнáньє вЂры,

и влáсти шукáють, яже вышей мЂры,

Жидовскій опрЂснок честію почтили,

а тáйную вечеру господню змЂни́ли.

Яко мертвого трýпа, оплáтъка глытають,

а Христа живого в хлЂбЂ отмЂтають.

Посполи́тый народ без крови Христовы

сакраменътуючи, утЂшáють слóвы

И дЂти малыѝ з ними отлучають,

о горе, о горе, и сами згивають.

Там правди́вый агнець c костéла изгнано,

абы жидовскую пасху празновано.

И крещéнія их без ми́ра справýють,

не як апостоли сіє отправують.

Ани погружéній в костéлЂ не мають,

и новокресченъных блáтом помазýють.

Погружéньми трєма тройцу вызнаваєм

и смерти Христови тáйну извещаєм.

Ибо вода сія тЂло омываєт

и святоє миро члóнки освещаєт.

Слýхи, очи й чело, персы, рýци й нозЂ,

яже просвЂтленѝ бывають о бозЂ.

И дар невиди́мо духовный пріємлем,

от бога и отца сыновство возємлем.

Где /Арк. 230зв./ святыѝ моли́твы бывають читáны

и бЂсове тогда бЂгýть изгони́ми.

От святых апостолов так нам єст подáно,

и от святых отцев канóны стверъжено.

Нынє вже рімляне писмо преслушали,

и набоженства их нóво позмышля́ли.

Вже бо жидовствýють з своѝми органы,

любо плясáньци в бога поругáны.

Господь не требýєт пищáлей и шýма,

иже тщеслáвніѝ въпіють без ума.

О мирская бýто, богу досажаєш

и умилéніє з людей выганя́єш.

Гудýть бо трубами, яко смóки рыкáють,

где божіѝ анъгели приступу не мають.

Лучше ж иты в дом плáча, а не в дом веселя,

идЂже хули́мо господнєє имя.

И Христос-избавитель плакати нам каже,

из слезáми вЂръный бога найти може.

Не труба и арфа небо отворяєт,

але милостьíня бога умоляєт.

Гласы ж безчислéныѝ въздух наполняють,

и потом, яко дым, поставы нЂ мають.

Але святых моли́твы пред бога исходять /Арк. 231./

и милость божію мирови приводять.

Не єсть то честь богу, єже грЂх творити,

ниже нечистими жертвами вгоди́ти.

Святый бо дух мешъкáнья в грЂшников не маєт,

и безакóныков господь погубляєт.

Не тáмо дом божій, где злóстєм госпóда,

и не любить Христос, где мерзости згода.

Где крест єго чéстный на нóзЂ вкладáють,

таковьíѝ собЂ мучéнія чають.

Так и римскій папа Христý досажаєт,

на своих обувах крест выображаєт.

Блудницам же мерзость разреши творити,

и во римстей зéмлЂ пóсты разорити.

Доколи ж, о папо, высишся на Христа,

будет бо от него на грЂшники помста.

Достоить ти святый крест чéстно почитáти,

пред которым бЂсы видять трепетати.

Нам бо вЂнець и печáть, вЂръным хрестіаном,

а на падéніє невЂръным поганом.

От святых апостол так заповедáно,

и тобЂ заклято и не благословено.

Ни один святитель нигде на вселенъной

не съгласуєтся твоєй /Арк. 231зв./ власти темной.

И кръста на нóзЂ своѝ не вклáдають,

єго же в почести анъгели мЂвáють.

БезотвЂтен бýдеш пред царем роспя́тым

и от святых єго стáнеш ся проклятым.

Дал тобЂ бог нози по земли ходити,

а ты узакони́лєсь людєм целовати.

О гордая горъдыни, кичишъся до неба,

але во глубинý снійдеши до ада.

Надменіє твоє, як водная пЂна,

але твоя крЂпость, яко паýчина.

Явно всему свЂту, иж ся обожаєш,

ижесь перъсть и пепел, сего призирáєш.

Не буди ж нам сіє мáтку оставля́ти,

въстóчную церков, и богом кламáти.

Слыши́те, слыши́те, всЂ вЂрных народы,

яко из папЂжóм шукáєте згоды,

Котóрый вам кáжет себе обожáти

и тлЂнъныѝ нóзи своѝ лобызати.

Святый наш владыка иным нози умывал,

апостолом своѝм, и так их научáл.

Читай теж о ПетрЂ, єст ли пáпЂ отець,

который /Арк. 232./ не набыл многоцЂнъных столиць,

Але терпéніє в нищетЂ проходил

и от греха людей мнóгих освободил,

На діавола брани мнóгіѝ постáвил

и крóвію єго господа прослáвил,

Не въбивáти, но умрЂти за люде возлюби́л

и своєго Христа вседýшъно улюбил.

Живот апостолскій лéгкій и высóкый,

и над земных царей пред богом великій,

И римскіѝ папы тым ся тъщеславують,

але духовъноє житіє минáють,

В мнóгих багатствах и тєлєсных слáстєх,

во слави и чести и по своих страстєх.

Вы же всЂ знаєте, иже пьíшніѝ гниють

и святого духа в собЂ не имЂють.

В покоръных пастырєх Христос пробываєт,

але горъделивых далéче минаєт.

Где ж нынЂ папЂжи за вЂру вмирають,

але за их єресь многих убивають,

СнЂдающе, яко лвы, отческіѝ прáва,

абы ся слáвили всего свЂта глава.

Христос — глава церкви, а блудници — папа,

и своих заводить в пекелный врата.

Христос — глава вЂръным, /Арк.232зв./ а єресєм — пáпа,

иж съ ними пойдет в прострáныѝ врата,

ЧеловЂкоугодным усЂм єст наставъник,

а в лицемиріѝ богови проти́вник.

Не єст всЂм удобно єго наслЂдити,

понеже не могуть там обогатЂти.

Але нищим усЂм Христос єст учи́тель

и любящим єго прáвдивый спаситель.

Таковых пастырей и вы наслЂдуйте,

и себе в чистотЂ богу приготýйте.

О прегордый пáпо, отки́нь твоѝ блуды,

иже посрамляєш всего мира студы.

Где ж ти Пéтръ повелЂл пóсты разоря́ти,

иже достоить их чéстно заховáти,

Почто ж и от блудниць дани избирáєш

і оным блудити я́вно позволяєш?

Для чого ж празнуєш свята из жидами —

христоубийцами, божими врагами?

Клятьва апостолов тебе искарáєт

и святый их канóн тебе обличáєт.

Євангéлия чому не читаєш,

до вызнáня вЂры єресь прелагаєш?

Святого бо духа отець посылáєт,

который на сынЂ преопочиваєт.

Научил нас Христос тако вЂровáти | Євангеліє Іоанна. VII, 48,52.

и благовЂрно тройцу почитáти,

Але не знáємо, /Арк.233./ хто тебе научил,

абы и от сына дух святый походил.

До третєго неба не былесь въсхищен,

ани з апóсътолов того не научен,

Котóрым сын божий духа обитовал,

котóрому прійти от отца именовал.

Отець сына родил и духа изліал

и въсему ми́рови познáти даровал,

Во єдином божест†трóйцу вызнавáти,

и цáресътво и власть єди́ну познавáти.

Якій євáньгели́ст так тебе наýчил,

дабы и от сына дух святый походил?

О мудрости земная, божей покорися!

и ты, чéстный отче, єреси заприся,

Два почáтки духови святому не учи

и євангелієм сам себе обличи,

Кривóѝ науки престáни учити

и святого Петра люби наслЂди́ти.

Хочеш отмЂня́ти божіє безумне,

но твоя срамота тебе не омине.

Богом ся на земли смЂєш удавáти,

котóрый по смéрьти будеш истлевáти.

Ключару до аду, Петрá не потваря́й,

и собЂ до Христа врата не затворяй.

Не єсть болший слуга над своєго пана,

ани власть божія тобЂ єст подана,

Попýєш ли в Ри́мЂ, не слýжи сатанЂ,

поповати тобЂ достóѝть смирéнънЂ,

Не меч и копіє Пéтръ ти зоставуєт,

ани мужебойство чинити повчаєт,

Але Христов /Арк.233зв./ яремь кажет ти носи́ти,

а ты поучаєш брáтовьбийствовáти.

Якъ можеш учити людéй свято жити,

єстли ты пред богом не хоч ся смири́ти?

Збирáючи скаръбы, учиши нищетьí,

а не приємлеши Христовы простоты.

Росказуєш себе на главах носити,

будуть ся о тебЂ бЂсове хвали́ти,

З ни́ми бо згодли́ве поваги вживáєш

и смути́ти церков óным помагáєш.

Не долго ти тая лови́тва послýжить,

ани Петръ-апостол тобЂ не поблажить,

Коли на суд божій испустить тя земля,

искараєт господь безаконъных племя.

Святыѝ нам книги того не сказали,

иж бысмо пáпежа головóю звáли,

Иже свою єресь хи́тро покрываєт

и святого Петра дармо потваря́єт,

Не євангелиє заховуєт цЂло,

але розсЂкаєт церковноє тЂло.

Мають бо и гробы златыѝ оздобу,

але внутри полни чловечого смраду.

Таким себе любить пáпа оказáти,

абы єго внутръ не могли познáти.

Але вы, братіє, Христа величайте,

и всею душею того почитáйте,

Котóрый и душу и тЂло даровал,

и царство єго вЂрным обитовал. /Арк.234./

Никто же не блуди от святого пýти,

одесную Христа возможе стáти.

Путем бо христовым отцеве ходили

и нам стезю благу ити сътворили.

НалЂво и дéсно да не возвратимся,

и Христу, господу, вЂрне прилýчимся.

Чужая то слáва и бога минаєт,

западная церков, иже отступаєт

СвЂтлости божей и єго дороги,

котóрый погýбить вЂчно своя враги.

Але вы приязни в бога набывáйте

и з єретикáми згоды не мЂвáйте.

ВсЂ бо престýпници своѝ стезЂ мають,

а пýти Христова въвЂки не знають.

Яко же бо дима, нынешный вЂк любять,

и тЂло и душу для марности губять,

МамонЂ, яко богу, вЂрно работають,

въ златЂ и сребри всю надежу мають.

Поколя во плоти живете во мири,

утвердЂте себе въ Христовой вЂри

Старци и юнóши, вЂрный народи,

будите вовЂки въ Христовой згодЂ,

Познавайте ясно прелюбом царя

и будете потом, як я́сная заря.

Нехáй же вас хитро мир сей не полонить,

ани прéлесть до грєха не зъводить,

Иже утЂкаєт, яко звЂрь из горы, /Арк.234зв./

и яко вода быстро минáєт воскори

И скáлы и пЂски мыючи з высóка,

так грЂшного слáва погибнет до вЂка.

Мира сего слáва сладка єст и люба,

але, як морьская, утЂкáєт, вода.

Котóрыи сію нынЂ приобрЂли

и вЂчноѝ жизни для неѝ презрéли.

Подсмеянъна бо єст и Христа далéче,

и дýши грЂшников въ мýки привлече.

Зачем дочáсную мáръности вовЂки

пáгубу приємлють злыѝ человЂки?

Съхрани вас, боже, храните ж ся й сáми,

всЂ бо єсте богом во вЂру призвани.

Слава бо и злáто, яко тЂнь, мимо ходить

и любящих сию в пáгубу приводить.

Малую то цЂну души учинили

и за нéбо землю собЂ измЂнили.

Отстýпници вЂры, от Христа бЂгýны,

абы уносили до церкви новины,

СмЂючи и Христа тым же потварáти,

абы своих страстей волю исполняти.

Из грехами хотять от пéкла спастися,

ты же, боголюбче, от них отвратися.

Душе, душе злая, єреси отмЂтай

и на погибели своѝ спомятай,

Повержи прочіє служити /Арк.235./ сатанЂ,

будеши терпЂти в мучимой глубинЂ.

И злáто и пáпа там тебе забуде,

и горе и плачи c тобою пребуде.

Не торгуй душею, второє не купиш,

о пáстыру лъживый, к тому да не блудиш,

Пристояло тобЂ нищету терпЂти,

а не багатства у пáпы шукáти.

Господь наш спасѝтель нищету претерпЂл

и во страданіи увесь мир освятил.

Хто ж тя так научил нового закона,

иже кромЂ бога вынашол сатана?

Мудрость плóтеская Христа преслушаєт

и духа святого в себе не вмещаєт.

Которая церкви смущáніє творить

и врáта до Христа грЂшником затворить.

Але Христос убогой церкви помагáєт

и во гонéніих сію утвержáєт,

Иже поймана єст, яко Іосиф во оковы,

и поношéнія поносить Христовы.

Врази крéста Христова єя утискають,

але теръпéніє не преодолЂвають.

И так бога славить, иж в немóщи силна,

и межи турьками господеви вЂрна.

И ты, рускый роде, тепер утверъжайся,

межи єресами во вЂри мужайся.

Воля єст господня нам ныне терпЂти, /Арк.235зв./

а миролюбником врéмя богатЂти.

Научив нас Христос мир сей не любити,

и єго и вЂру над душу любити,

На гоненія бо и апостолы послáв,

на бЂды и скоръби ити им завещав,

И безоружніѝ на брани послáни,

абы были языци спасéни.

И не филосóфи, але рыболóвъци,

невЂжЂ прóстыѝ и некрасомóвъци.

Видите ли Петра, сЂти бо оставил

и як вселéнъную богови уловил.

Ввесь лик апостолов ярем Христов несли

и нас, яко дары, господу принесли,

Не шкатýлы златом собЂ наполняли,

а нас ко спасенію от мýки призвали,

Без повáги ходили пЂшими ногáми,

их же постáвил бог на земли князями,

И благочéстіє всюду насадили,

и тернієм грєхи силно погубили,

То им был прибыток — за Христа умрЂти

и брáтолюбієм єму угодити.

Вся им вселенъная скáрбы отвори́ла,

але их нищета богу приближила.

Чéстный отче пáпо, як же Христа чаєш

и святого Петра як там привитаєш,

Кгды /Арк.236./ будет судити тобЂ и другим

и дасть [ся] заплата и грЂшным и благым?

Блажени же нищіѝ, иже Христа ради,

але богатыѝ найдутся во адЂ,

Нищета Петрова богатых посрамѝть,

котóрыи єго слухати не хотя́ть.

Где ж покора, где любов, где тая наука,

иже нам зостáла от святого лика?

Иже господь други єму именовал,

на котóрых духа от отца изліал?

О римская церкви, чому погибаєш

и святоє писмо смЂле отмЂтáєш?

Можем вас плáкати, милыѝ римляне,

твердосердечніѝ жидохристіáне.

Чого Христос не любить, а вам тоє любо,

але смирéніє божіє не любо.

Плачутся святыѝ на ваше безстудство,

иж упадаєте въ вЂчноє прокля́тство.

Помрачився ваш ум людей слáволю́бных,

приносите з западу устав душегубных,

Але покажите, о римскиѝ дЂти,

где вам позволяно заповЂдь презрЂти.

НЂсте бо вы бози, но тлЂнъныѝ люде,

и на судЂ божом кождый от вас буде.

Шумите словесы, бога обидяще

и євангеліа єго не храняще,

Але влáсти /Арк.236зв./ ваши спаситель погýбить,

иже безаконъным помъстити приходить,

Роскáжет и пáпЂ нагóму предстати

и поважность тую от него отняти.

Мýсите забыти пáпу Христом звати,

который вас учить бога ображати.

Але дрéво от плод[а] бываєт познано

и благочестіє дЂлами явлено.

Блаженный убо Петръ служный уряд принял,

яко ученик, смирéніє хранил,

Царества у РимЂ не помыслив мЂти,

але всякую скорб за Христа теръпЂти,

И пáпам не казал мучителми быти,

ани правослáвных на єресь нýдити.

Але таковыѝ суть намЂстники злыѝ,

в котóрых мешъкають духи нечи́стыѝ,

Которыє кресты и мечи приємлють

и похитително влáсти въспріємлють.

Убогій Петръ и нищій о ХрістЂ памятал

и волю плóтьскую от себе отмЂтал.

Живот єго кождый познáти хотЂте

и єго стезя́ми по бозЂ ходите.

Была єго слава — окóвы й темница,

не папЂ творная гордая столи́ца.

Апостол бо Христов /Арк.237./ истéнъный служитель

и всяких сокровищ конечъне имЂтель,

Ризы бо худыи́ тЂло одЂяли

и обуви ногам єго послужили,

Постеля же — земля, а не одры чудны,

не от плачу нищих, иже богу студны,

Грєхов теж никому за злато не простил

и некáющимся мýки провозвестил,

Головою себе не помыслих звати,

ани господней чести похищáти,

Але крестная смеръть — то єго похвала,

и такая по нем столица зостáла.

Убогіѝ рубы и нагоє тЂло,

иже нужнЂйшои смеръти вокусило.

Началства ж горъдого пáпам возбраня́єт

и єго листами крЂпци завещаєт.

Началником вЂры звáтися не хотЂл

и всю свою волю Христу поработил,

Иже всему миру себе укрыжовал,

и за Христа рад[о] кров свою изліал.

Добрый раб и вЂръный теченіє скóнъчив,

душу же богови в руци поручив.

ТеплЂйший во вЂри правый исповЂдник,

камень вЂры й святый миру проповЂдник.

Рим єго кров прияв, завЂсив на древЂ,

а Христос отворил к собЂ єму двери. /Арк.237зв./

О чистьцу не писав и словы не учив,

и многіѝ чуда богови прилучив,

Не важив ся кламства на свЂт удавáти

и в чистець по смéръти души посылáти,

О божом царест†и мýках поведал

и покаяніє преже смеръти подал,

ВсЂм быти готовым пред Христа приказал, | II Петр., гл. 3.

огнем поновлéніє всей твары написав.

Иже в день судный будет очищати,

и явно и стрáшно свЂт будет палати.

Иже потоп огнéный то ся называєт, | Сол. 2, 1 з. 274

им же, яко злато, бог мир очищáєт

Во огни пламенни, — святый Пáвев мовить, —

всесилный царь небес на землю приходить.

Але то[го] чистьцу, яко Рим повєдаєт,

святый Петръ и Павель не проповедáєт,

Але запрещають вЂрным исгрЂши́ти,

a грешъным покуту на земли чинити, | 179 з.

Ознаймили всЂм от мертвых востати

и души c тЂлом заплату пріймати.

A нынЂ пáпежи лЂта продавають

и до чистьцу души грЂшных отсылають.

Хто им болшей злата за тоє даруєт, /Арк.238./

такій подáнья от оных пріймуєт,

Иж єму всЂ злóсти зараз разрешають,

а на колко сот лЂт в чистєць посылають.

О горе, о горе души оцищаємой,

и таким прелестям мы вЂры не даймо.

Караєт бог грЂшных дочáстно и вЂчно,

а такіѝ кламства дяволу прили́чно.

О великій Риме, так прелести родиш

и всякіѝ злóсти вже ты переходиш.

Абы антихриста мЂв собЂ любовна,

котóрого воля богови противна,

Готовишся єго, як Христа, пріяти

и послушáніє оному отдати,

Сына погибели, церковного врага,

которого злыѝ мЂтимуть за бога,

А духом уст Христовых будет убиєнный

и зо всЂми єго в мýку воверженый.

О, великій Риме, чом от бога блýдиш

и нечистотáми всего мира гýбиш?

ВсЂ бо отщепéнъства в тобЂ гнЂздо мають,

и всякиѝ блýды тебе не минáють,

Плоти угодници твой єпископы,

а церкви Христовой злыѝ апостáты,

Иж толко пЂняжный закон заховáли,

а людей купами /Арк.238зв./ до пéкла погнáли,

Без покаянія святости повчають

и отпýсты своѝ за злото меня́ють

І блýды и въбыйства людєм разрешили,

которыѝ бы им сребро приноси́ли,

Забыли карáня стрáшьливоє помсты

всесилного бога за óных лакомствы.

Але познай, кождый богу вЂрный рабе,

иж пресътуплéніє от запада иде,

І зрады, и хвáльши, и хитріѝ влáсти,

розширя́ючися зъ адовы пропасти.

Аще мы умолчим, каменіє возопієт,

и блажáщих злобу гнЂв божій побієт.

І явъно и тáйно церкви ворогáми,

абы нареклися земними панами.

ВмЂсто власяни́ци царскіѝ поръфиры,

одЂяніє их, яже вышей мЂры,

Многими дворя́ны домы их съдержать,

и брани и бьíтвы съ царями творя́ть.

Жабоястный народ влоскіи́ пастыри

на Христа и Петра влагають потвары.

Але Христос Петра жабами не коръмил,

ани устен єго гадом не сквернил.

Токмо виденіє на приклад показал,

абы и погáнов до вЂры пріймовал.

Ани Предтеча /Арк.239./ саранчЂ не вживал,

але зеліàми и медом ся питал.

Тáкъ и всЂ святыѝ скверъным ся брыдили,

и чистими себе покармы питали.

Не красили себе, якъ блудныѝ жены,

и для того были Христу прилучéни.

НынЂ ж баграница — то папына слава,

понеже и сам єсть блудничая глава.

Єго же мнозіѝ людіє наслЂдують,

котóрыѝ вЂръно Христу не пріàють.

Назывáючися имя хрестиàны,

дЂла же их творять яко же поганы.

Але, Христе-царю, сам ты нас съхранѝ,

и нас от прелести такоѝ измЂни.

Каѝн из Авелем д†церкви значили,

иже от Áдама сыны ся родили.

Котóріє богу офЂры принесли,

и моли́твы своѝ ко нему вознесли.

Але Каѝн, грЂх ради, богу не въгодил

и лукавым сердцем к нему приходил,

Авель же пред богом простоту указав,

и бог єго дары на офЂри приняв.

А коли молитвы Авель богу отдав,

Каѝн єго зараз убити помышляв,

И по малом часЂ оного умертвил,

але и бог єго праведно показнил

и мерзкую жертву оного омразил.

И єго моли́твы вьíшный не возлюбив,

иже по зависти /Арк.239зв./ Авеля погубив

І братоубийство на земли сотворив,

и кров праведную, яко вóду пролив.

І ни́нЂ таковы Каѝновы вънýки,

выникáючіѝ въ [о]стáтніѝ вЂки,

Íже снопы злóбы на жéрътву влагáють,

и души праведных хитро погубляють.

Слáвицею людскою себе заслонили,

а и́мя Христово собЂ прилучили.

Але далéко суть от святого пýти,

и в безакóный навыкнули пребьíти.

Свою честь и слáву на земли кореня́ть,

а божей слáвы люби́ти не хотя́ть.

Нарекли на земли слáвно их имена,

а память им смерти не въспомянена.

І грáды и села тисящми събрали,

a Христовы слуги смЂле ся назвáли.

Хотячи и болшей землю посЂдати,

и во дни и в нощи мамону собрáти.

Але бог єсть святый и злыми ся брыдить,

иже своѝ враги вовЂки погубить.

Любить з нас чистую пріáти офЂру,

и кáжет чистую заховáти вЂру.

Без єреси й грєха богу ся явЂмо,

и послущанієм оного почтЂмо. /Арк.240./

Якъ й Авель, теръпЂмо от убійца брата,

и будет моли́тва пред вышним пріàта.

Нехай же дружáтся c Каѝном ри́мляне,

и положить их бог в такоє ж карáньє.

Нехàй же ѝх стрáхи нас не отлучають

от любъве Христови, аще и въбивають.

Даров их и лестей собЂ не приймЂмо,

и божей слáвы тлЂнъным не дадЂмо.

Слышите, слышите, всЂ кýпно нарóды,

и со єрети́ки не мєвайте згоды.

Не в полатах златых господа шукáйте,

але єго скоро з нéба ожидайте.

Лож бо чловєчаá з богом не царствýєт,

и лесть непрáведных скóро погибáєт.

Хто милуєт Христа, на прелесть не ходи,

и во теръпéніѝ óному угоди.

Остáтніѝ вЂки, але ты спасайся

и до папежскоѝ кýпы не злýчайся.

І стрáхом и дáтком уловлéн не бýди

и доброть Христову во серци соблюди.

ВЂси, яко тебе за кров свою купил,

абысь к проти́въному єго не отступил.

ЦЂну себе дал господь, себе ж єму продай,

и душу и тЂло єго ради отдай.

Поминáй, поминáй малость своєго гроба,

В нем же истаєвáєт земнаà оздóба.

Фарбовáных словес не прійми въ слýхи,

дабы твоѝ врази не мЂли утЂхи.

Мира сего му/Арк.240зв./дрость богу не пріятна,

иже неистинъна, льсти́ва и преврáтна.

Съхраним простотý, чиста бо и блага,

и да возможемо бьíти близу бога.

Господь свою мудрость з высоты дарýєт,

паче же праведным в сéрдца изливаєт,

Íже богослóвне жи́тіє приходять

и по воли богу мысли своѝ водять.

Чловєчаá ж мýдрость божієй проти́вна,

тєлесна, бЂсовска и велеречивна.

Святый єѝ Павел глýпъством назывáєт,

иж неприязнь богу от неѝ бывáєт.

Котóрою турци и жидове мають,

але не духовне сіѝ пребивáють.

Так и латинници вас нынЂ силяють,

от мýдрости божей усЂх отбавляють.

Чому ж черпаєте з горкого студенца,

иже вас погýбять даже и до конца.

О милыѝ дрýзи, всЂ вы хрестіане,

уважáйте пилно ваше ошукáньє,

Святои науки себе научи́те

и по собЂ чáдом сію подадЂте.

Вже нам лати́нъници глýпъство причитають,

а сáми все злоє в людєх умножають,

Ібо учи́лища єресь розсевають

и, яко же ядом, души забивають.

Що єсть богу немило, и вы понехáйте,

и святыѝ книги своѝ почитайте, /Арк.241./

В них наука и мýдрость и любов и цнóта,

в них побожность и разум, пречестнЂйшій злáта.

А пріазнь вам лати́на такую давáєт

и благовЂріє на вас издираєт.

Так и погáнове хрестіан гонили

и мýдрости божєй себе не смири́ли.

Марънотрáвность лЂтам молодым бываєт,

хто у лати́нъников наýк уживаєт.

Мало там о ХристЂ наýки слышáти,

мало о спасенъном пýти навыкнỳти.

Пяны бо суть мýдростю свЂтскоѝ науки

неапостолскіѝ сіѝ ученики.

Можете познати, як вас погуби́ли,

і єще бы рáди й на душах убили.

Володьíмер Великій вас у вЂру крестил

и от идолскоѝ тéмьносьти осветил.

А то бог даровал з ми́лосьти благоѝ,

абы вас прилучив до воли своєѝ.

Чому ж єсьте марне вЂру отсьтупи́ли

и єрети́цкіѝ науки злюбили?

Чому церков божію ни́щую твóрите,

чому о збавлéнью своєм не рáдите?

Отци вáши вЂру святую люби́ли

и святыѝ церкви чéстно украсили.

Отци ваши пóсты святыѝ хранили

и братолюбіє и милость ширили.

Отци ваши /Арк.241зв./ дЂла добрыѝ твори́ли

и церкви божей усердно прияли.

Отци ваши в єресь не приступовали

и в благочестіє души их спасáли,

Святых патриархов, яко отцев, чътили

и благословéнъства от них пріймовáли.

Отци ваши наук святых ся учи́ли,

а от поги́белных себе отлучили.

А чому ж вы и́мы єсте погордЂли

и на зловЂріє себе измЂнили?

Єстьли погýбите души для мамоны,

вже вам не помóгуть римъскіѝ закóны.

И Христос не схоче о вас уже знáти,

єстли умьíслите єго отступáти.

Нехай вЂрять, як рачать, папЂжніѝ дЂти,

але вы в такіѝ не впадáйте сЂти.

Не бойтеся, малáя господняà чрéдо,

упасет вы Христос цЂло, своє стáдо.

Раз єсте крещени, любиміѝ дрýзи,

мужáйтеся нынЂ о преблагом бозЂ.

От вътóрого креста, єреси, бЂжЂте

и от прелестников себе стережЂте.

Добрую мáєте вЂру и науку,

и помощ божую, всесилную руку.

Маємо погóду богу угóдити

и цареви царєм любЂмо служѝти.

Хто вас отлучаєт от Христа и прáвды,

того не пріймуйте лукáвоѝ рады.

Єстьли бы і аньгел не так проповєдáл,

якую нам Христос з апостолы подал, /Арк.242./

Святоє нас писмо учить не пріймáти

и кламли́вым ýстам вЂры не давáти.

Мнóзи бо лъжехристы маются явити

и на прéлесть многих будут изводити.

Лукавыи ж до злых приставáти будуть,

благочестивыи ж прогоними будуть,

але блаженыѝ во вЂри пребудуть.

Лéстници бо на дЂло от врáга послáніѝ,

иже в нечéстіє дáвно осужденъни.

И вас нынЂ господь хощет досведчáти,

и вы к нéму должни любов показáти.

Являють бо вЂру воѝны в день брáни

и зá то от царя бывають вЂньчáни.

Будте ж мужествéнъни, иноци й мЂря́не,

Христос вам на пóмощь невидимо стáне.

НинЂ вам подвизи от вЂры предлежать,

и нехай вас силы божіѝ укрепять.

Істéнъныѝ дЂти святым отцем будте

и, якоже они, бога ся убойте.

Мáєт земля вáши и святыѝ тЂла

во слáвном КієвЂ, где нам дáна вЂра.

Вже от шести сот лЂт в печерах нетлєнъни,

святыѝ постници по смеръти явлéни.

Преподóбный Анътоній, иноком начáльник,

общого житія по бозЂ настáвник.

Блаженъный Феодосій, ангелскій сожитель,

братіѝ игумен и Христу ревнитель.

И тых молитъвами вы /Арк.242зв./ [ны]нЂ живете,

им же послєдуйте, и так ся спасете.

Пречестно бо они Христу угодили.

иже з любóвію за нас ся трудили.

Побáчте очима, хто тому не вЂрить,

и самыми дЂлы нехáй ся увЂрить.

Тыѝ не римскому костéлови служи́ли,

але патриархов святых наследи́ли.

И то вам, о руси, печать хрестіанства,

принесéнный овоц в начáлЂ з погáнъства,

як честный дар богу, блаженый рáби,

от вашеѝ персти въ небесном стáдЂ.

Шестьсот лЂт минаєт, а их чуда слáвны

и до судного дьня будуть свЂту явны.

Подземніѝ мученики гóры постигáли,

постом и прáцами тЂла избужали.

Преже смéръти тЂла земли предавали,

кожи их до кóстей в жівых присыхали,

Пот чола своєго на жрьтву отдали

и слéзами лице своє омывали,

Чудами своѝми прославили бога,

отож и вам по них святаà дорога

Єсть уготованъна, и по ней шествýйте

и во святой вЂри отéческой стойте.

Не ослабевáйте ж стрáшъками гнильíми

а ни зводЂтеся науками зльíми,

Вспоминáйте оный лик от руских рожáєв,

котóрыѝ были святых обычаєв.

Господь их зостáвил на вашу /Арк.243./ науку,

иж бысте желали честному их лику.

И вЂру правую и дЂла благиѝ,

принесЂте богу дары дорогиѝ.

А хто ж вас оскорбить, кгды бог утЂшаєт

и святыми усты радость обЂщаєт?

Не ужасáйтеся в послЂднéє время,

одно облегчайте грЂховноє бремя,

От любве божеѝ да вас не отлучать,

аще и рáнами и огня́ми мучать.

Ревноть апостолскую в серцах роспалЂте

и вЂрность къ богу щире покажЂте.

Вам то честь и слава за вЂру вмирати

и за то будете c Христом царствовати.













Продовження комплексу:
Із Києво-Михайлівського збірника
Із Загоровського збірника

Див.: В. П. Колосова. Віршовий полемічний комплекс 80 — 90-х років XVI ст.








ПРИМІТКИ



ВІРШОВИЙ ПОЛЕМІЧНИЙ КОМПЛЕКС 80 — 90-х РОКІВ XVI СТ.



Скарга нищих до бога

Рукописний віршовий твір 80-х — початку 90-х років XVI ст. Міститься у конволюті, що зберігається у ЦНБ АН УРСР у фонді П. М. Попова, на арк. 225 — 246 (докладніше див. у статті «Віршовий полемічний комплекс 80 — 90-х років XVI ст.», с. 25 — 56 цього видання).

На полях рукопису вказано джерела:

Євангеліє Іоанна, VII, 48, 52 — Євангеліє від Іоанна, зачало VII стихи 48 — 52.

II. Петр, гл. 3. — Друге соборне послання апостола Петра, глава 3.

Сол. 2, I, з. 274 — Друге послання апостола Павла до солунян, глава I, зачало 274.

179 з. — Послання апостола Павла до корінфян, зачало 179.

Публікується вперше за рукописом.
















Див. також:

Опис та фрагменти віршів: В. П. Колосова. Віршовий полемічний комплекс 80 — 90-х років XVI ст.


ВІРШОВИЙ ПОЛЕМІЧНИЙ КОМПЛЕКС 80 — 90-Х РОКІВ XVI СТ. Українська література XIV-XVI ст.

Із Києво-Михайлівського збірника. Українська література XIV-XVI ст.

Із Загоровського збірника. Українська література XIV-XVI ст.


Вірші із Києво-Михайлівського рукописного збірника 80 — 90-х років XVI століття. Переклав В. Шевчук

Полемічні вірші із Загоровського збірника 80-90-х рр. XVI ст. Переклав В. Шевчук












Попередня     Головна     Наступна


Вибрана сторінка

Арістотель:   Призначення держави в людському житті постає в досягненні (за допомогою законів) доброчесного життя, умови й забезпечення людського щастя. Останнє ж можливе лише в умовах громади. Адже тільки в суспільстві люди можуть формуватися, виховуватися як моральні істоти. Арістотель визначає людину як суспільну істоту, яка наділена розумом. Проте необхідне виховання людини можливе лише в справедливій державі, де наявність добрих законів та їх дотримування удосконалюють людину й сприяють розвитку в ній шляхетних задатків.   ( Арістотель )



Якщо помітили помилку набору на цiй сторiнцi, видiлiть мишкою ціле слово та натисніть Ctrl+Enter.